៧. មូសិកសុត្តវណ្ណនា

១០៧. សត្តមេ អាវាដំ ខនតីតិ អត្តនោ អាសយំ ពិលកូបំ ខនតិ. ន ច តត្ថ វសតីតិ តត្ថ អវសិត្វា កិស្មិញ្ចិទេវ ឋានេ វសតិ, ឯវំ ពិឡារាទិអមិត្តវសំ គច្ឆតិ. វសិតា នោ គាធំ កត្តាតិ សយំ ន ខនតិ, បរេន កតេ ពិលេ វសតិ, ឯវំ ជីវិតំ រក្ខតិ. តតិយា ទ្វេបិ ករោន្តី ជីវិតំ រក្ខតិ. ចតុត្ថី ទ្វេបិ អករោន្តី អមិត្តវសំ គច្ឆតិ. ឥមាយ បន ឧបមាយ ឧបមិតេសុ បុគ្គលេសុ បឋមោ យថា សា មូសិកា គាធំ ខនតិ, ឯវំ នវង្គំ សត្ថុសាសនំ ឧគ្គណ្ហាតិ. យថា បន សា តត្ថ ន វសតិ, កិស្មិញ្ចិទេវ ឋានេ វសន្តី អមិត្តវសំ គច្ឆតិ, តថា អយម្បិ បរិយត្តិវសេន ញាណំ បេសេត្វា ចតុសច្ចធម្មំ ន បដិវិជ្ឈតិ, លោកាមិសដ្ឋានេសុ វិចរន្តោ មច្ចុមារកិលេសមារទេវបុត្តមារសង្ខាតានំ វសំ គច្ឆតិ. ទុតិយោ យថា មូសិកា គាធំ ន ខនតិ, ឯវំ នវង្គំ សត្ថុសាសនំ ន ឧគ្គណ្ហាតិ. យថា បន បរេន ខនិតេ ពិលេ វសន្តី ជីវិតំ រក្ខតិ, ឯវំ បរស្ស កថំ សុត្វា ចតុសច្ចធម្មំ បដិវិជ្ឈិត្វា តិណ្ណំ មារានំ វសំ អតិក្កមតិ. ឥមិនា នយេន តតិយចតុត្ថេសុបិ ឱបម្មសំសន្ទនំ វេទិតព្ពំ.

មូសិកសុត្តវណ្ណនា និដ្ឋិតា.