៦. សាឡ្ហសុត្តវណ្ណនា

៦៧. ឆដ្ឋេ បាតោ អសិតព្ពភោជនំ បាតរាសំ, ភុត្តំ បាតរាសំ ឯតេសន្តិ ភុត្តបាតរាសា. ទាសា នាម អន្តោជាតា វា ធនក្កីតា វា ករមរានីតា វា សយំ វា ទាសព្យំ ឧបគតា. ភត្តវេតនភតា កម្មការា នាម.

និច្ឆាតោតិ ឯត្ថ ឆាតំ វុច្ចតិ តណ្ហា ជិឃច្ឆាហេតុតាយ, សា អស្ស នត្ថីតិ និច្ឆាតោ. តេនាហ ‘‘និត្តណ្ហោ’’តិ. អព្ភន្តរេ សន្តាបករានំ កិលេសានន្តិ អត្តនោ សន្តានេ ទរថបរិឡាហជននេន សន្តាបនកិលេសានំ. អន្តោតាបនកិលេសានំ អភាវា សីតោ សីតលោ ភូតោ ជាតោតិ សីតិភូតោ. តេនាហ ‘‘សីតលីភូតោ’’តិ. មគ្គផលនិព្ពានសុខានិ វា បដិសំវេទេតីតិ សុខប្បដិសំវេទី. សេសំ សុវិញ្ញេយ្យមេវ.

សាឡ្ហសុត្តវណ្ណនា និដ្ឋិតា.