១. សមិទ្ធសុត្តវណ្ណនា

២១. តតិយស្ស បឋមេ រុច្ចតីតិ កាយសក្ខិអាទីសុ បុគ្គលេសុ អតិវិយ សុន្ទរតរបណីតតរភាវេន តេ ចិត្តស្ស អភិរុចិឧប្បាទកោ កតមោតិ បុច្ឆតិ. សទ្ធិន្ទ្រិយំ ធុរំ អហោសិ សទ្ធាធុរំ មគ្គវុដ្ឋានន្តិ កត្វា, សេសិន្ទ្រិយានិ បន កថន្តិ អាហ ‘‘សេសានី’’តិអាទិ. បដិវិទ្ធមគ្គោវាតិ តីហិបិ ថេរេហិ អត្តនោ អត្តនោ បដិវិទ្ធអរហត្តមគ្គោ ឯវ កថិតោ, តស្មា ន សុករំ ឯកំសេន ព្យាកាតុំ ‘‘អយំ…បេ… បណីតតរោ ចា’’តិ. ភុម្មន្តរេនេវ កថេសិ ‘‘តីសុបិ បុគ្គលេសុ អគ្គមគ្គដ្ឋោវ បណីតតរោ’’តិ.

សមិទ្ធសុត្តវណ្ណនា និដ្ឋិតា.