៩. បឋមបាបណិកសុត្តវណ្ណនា

១៩. នវមេ ឧគ្ឃាដេត្វាតិ អាសនទ្វារញ្ចេវ ភណ្ឌបសិព្ពកេ ច វិវរិត្វា. នាធិដ្ឋាតីតិ តំតំកយវិក្កយេ អត្តនា វោយោគំ នាបជ្ជតិ. ទិវាកាលេតិ មជ្ឈន្ហិកសមយេ. អស្សាមិកោ ហោតិ តីសុបិ កាលេសុ លទ្ធព្ពលាភស្ស អលភនតោ. អបតិវាតាពាធំ រត្តិដ្ឋានំ. ឆាយុទកសម្បន្នំ ទិវាដ្ឋានំ. វិបស្សនាបិ វដ្ដតិ វិបស្សនាកម្មិកោយេវ. តេនបិ ហិ នវធា ឥន្ទ្រិយានំ តិក្ខត្តំ អាបាទេន្តេន សមាធិនិមិត្តំ គហេតព្ពំ, វិបស្សនានិមិត្តំ សមាហិតាការសល្លក្ខណាយ.

បឋមបាបណិកសុត្តវណ្ណនា និដ្ឋិតា.