៥. សចេតនសុត្តវណ្ណនា

១៥. បញ្ចមេ ឥសយោ បតន្តិ សន្និបតន្តិ ឯត្ថាតិ ឥសិបតនន្តិ អាហ ‘‘ពុទ្ធបច្ចេកពុទ្ធសង្ខាតាន’’ន្តិអាទិ. សព្ពូបករណានិ សជ្ជេត្វាតិ សព្ពានិ រុក្ខស្ស ឆេទនតច្ឆនាទិសាធនានិ ឧបករណានិ រញ្ញា អាណត្តទិវសេយេវ សជ្ជេត្វា. នានា ករីយតិ ឯតេនាតិ នានាករណំ, នានាភាវោតិ អាហ ‘‘នានត្ត’’ន្តិ. នេសន្តិ សរលោបេនាយំ និទ្ទេសោតិ អាហ ‘‘ន ឯស’’ន្តិ. តថា អត្ថេសន្តិ ឯត្ថាបីតិ អាហ ‘‘អត្ថិ ឯស’’ន្តិ. បវត្តនត្ថំ អភិសង្ខរណំ អភិសង្ខារោ, តស្ស គតិ វេគសា បវត្តិ. តំ សន្ធាយាហ ‘‘បយោគស្ស គមន’’ន្តិ.

សគណ្ឌាតិ ខុទ្ទានុខុទ្ទកគណ្ឌា. តេនាហ ‘‘ឧណ្ណតោណតដ្ឋានយុត្តា’’តិ. សកសាវាតិ សកសដា. តេនាហ ‘‘បូតិសារេនា’’តិអាទិ. ឯវំ គុណបតនេន បតិតាតិ យថា តំ ចក្កំ នាភិអរនេមីនំ សទោសតាយ ន បតិដ្ឋាសិ, ឯវមេកច្ចេ បុគ្គលា កាយវង្កាទិវសេន សទោសតាយ គុណបតនេន បតិតា សកដ្ឋានេ ន តិដ្ឋន្តិ. ឯត្ថ ច ផរុសវាចាទយោបិ អបាយគមនីយា សោតាបត្តិមគ្គេនេវ បហីយន្តីតិ ទដ្ឋព្ពា.

សចេតនសុត្តវណ្ណនា និដ្ឋិតា.