៤. អានេញ្ជសុត្តវណ្ណនា

១១៧. ចតុត្ថេ សហ ព្យយតិ គច្ឆតីតិ សហព្យោ, សហបវត្តនកោ. តស្ស ភាវោ សហព្យតា, សហបវត្តីតិ អាហ ‘‘សហភាវំ ឧបបជ្ជតី’’តិ. ‘‘យាវតកំ តេសំ ទេវានំ អាយុប្បមាណំ, តំ សព្ពំ ខេបេត្វា និរយម្បិ គច្ឆតី’’តិអាទិវចនតោ អរូបភវតោ ចុតស្ស អបាយូបបត្តិ វុត្តា វិយ ទិស្សតីតិ តន្និវត្តនត្ថំ ភគវតោ អធិប្បាយំ វិវរន្តោ ‘‘សន្ធាយភាសិតមិទំ វចន’’ន្តិ ទីបេតិ ‘‘និរយាទីហិ អវិប្បមុត្តត្តា’’តិអាទិនា. ន ហិ តស្ស ឧបចារជ្ឈានតោ ពលវតរំ អកុសលំ អត្ថីតិ. ឥមិនា តតោ ចវន្តានំ ឧបចារជ្ឈានមេវ បដិសន្ធិជនកំ កម្មន្តិ ទីបេតិ. អធិកំ បយសតិ បយុជ្ជតិ ឯតេនាតិ អធិប្បយាសោ, សវិសេសំ ឥតិកត្តព្ពកិរិយា. តេនាហ ‘‘អធិកប្បយោគោ’’តិ. សេសមេត្ថ ឧត្តានមេវ.

អានេញ្ជសុត្តវណ្ណនា និដ្ឋិតា.