៧. កណ្ហសុត្តវណ្ណនា

៧. សត្តមេ យថា ‘‘កណ្ហា គាវី’’តិអាទីសុ កាឡវណ្ណេន សមន្នាគតា ‘‘កណ្ហា’’តិ វុច្ចតិ, ន ឯវំ កាឡវណ្ណតាយ ធម្មា ‘‘កណ្ហា’’តិ វុច្ចន្តិ, អថ ខោ កណ្ហាភិជាតិនិព្ពត្តិហេតុតោ អប្បភស្សរភាវករណតោ វា ‘‘កណ្ហា’’តិ វុច្ចន្តីតិ ទស្សេន្តោ ‘‘ន កាឡវណ្ណតាយា’’តិអាទិមាហ. កណ្ហតាយាតិ កណ្ហាភិជាតិតាយ. កណ្ហាភិជាតីតិ ច អបាយា វុច្ចន្តិ មនុស្សេសុ ច ទោភគ្គិយំ. សរសេនាតិ សភាវេន. ន ហិរីយតិ ន លជ្ជតីតិ អហិរិកោ, បុគ្គលោ, ចិត្តំ, តំ សម្បយុត្តធម្មសមុទាយោ វា. តស្ស ភាវោ អហិរិក្កន្តិ វត្តព្ពេ ឯកស្ស ក-ការស្ស លោបំ កត្វា អហិរិកន្តិ វុត្តន្តិ អាហ ‘‘អហិរិកន្តិ អហិរិកភាវោ’’តិ. ន ឱត្តប្បតីតិ អនោត្តាបី, បុគ្គលោ, យថាវុត្តធម្មសមុទាយោ វា, តស្ស ភាវោ អនោត្តប្បន្តិ អាហ ‘‘អនោត្តាបិភាវោ’’តិ.

កណ្ហសុត្តវណ្ណនា និដ្ឋិតា.