៨. អដ្ឋមោ បរិច្ឆេទោ

បកិណ្ណកនិទ្ទេសោ

៤៧៥. ឥទានិ បន សព្ពេសំ, ឯតេសំ មានសំ មយា;

បាដវត្ថាយ ភិក្ខូនំ, កថីយតិ បកិណ្ណកំ.

៤៧៦. បន្ថមក្កដកោ នាម, ទិសាសុ បន បញ្ចសុ;

តត្ថ សុត្តំ បសារេត្វា, ជាលមជ្ឈេ និបជ្ជតិ.

៤៧៧. បឋមាយ ទិសាយេត្ថ, សុត្តេ បន បសារិតេ;

បាណកេន បដង្គេន, ឃដ្ដិតេ មក្ខិកាយ វា.

៤៧៨. និបន្នដ្ឋានតោ កិញ្ចិ, ចលិត្វា ឧណ្ណនាភិ តុ;

គន្ត្វា សុត្តានុសារេន, យូសំ បិវតិ តស្ស សា.

៤៧៩. បុនាគន្ត្វាន តត្ថេវ, និបជ្ជតិ យថាសុខំ;

ឯវមេវ ករោតេវ, ទិសាសុ ទុតិយាទិសុ.

៤៨០. បសាទា បញ្ច ទដ្ឋព្ពា, សុត្តំ បញ្ចទិសាស្វិវ;

ចិត្តំ បន ច ទដ្ឋព្ពំ, មជ្ឈេ មក្កដកោ វិយ.

៤៨១. បាណកាទីហិ សុត្តស្ស, តស្ស សង្ឃដ្ដនា វិយ;

បសាទានំ តុ ទដ្ឋព្ពា, ឃដ្ដនារម្មណេន ហិ.

៤៨២. ចលនំ វិយ តំមជ្ឈេ, និបន្នាយុណ្ណនាភិយា;

បសាទឃដ្ដនំ តត្ថ, គហេត្វារម្មណំ បន.

៤៨៣. មនោធាតុក្រិយាចិត្តំ, ភវង្គាវដ្ដនំ មតំ;

តស្សា សុត្តានុសារំវ, វីថិចិត្តបវត្តនំ.

៤៨៤. សីសេ បនស្ស វិជ្ឈិត្វា, យូសបានំវ ចេតសោ;

អារម្មណេសុ ទដ្ឋព្ពំ, ជវនស្ស បវត្តនំ.

៤៨៥. បុនាគន្ត្វា យថា សុត្ត-ជាលមជ្ឈេ និបជ្ជនំ;

វត្ថុំយេវ ច និស្សាយ, ចិត្តស្ស បរិវត្តនំ.

៤៨៦. ឥទំ តុ បន ឱបម្មំ, អត្ថំ ទីបេតិ កិំ តុ ហិ;

អារម្មណេន បឋមំ, បសាទេ ឃដ្ដិតេ បន.

៤៨៧. បសាទវត្ថុតោ ចិត្តា, វត្ថុសន្និស្សិតំ មនោ;

តតោ ហិ បឋមំយេវ, ជាយតីតិ ហិ ទីបិតំ.

៤៨៨. ឯកេការម្មណំ ទ្វីសុ, ទ្វីសុ ទ្វារេសុ សព្ពសោ;

អាគច្ឆតិ តេនាបាថំ, អយមត្ថោបិ ទីបិតោ.

៤៨៩. រូបំ ចក្ខុបសាទម្ហិ, ឃដ្ដិត្វា តង្ខណេ បន;

មនោទ្វារេ តថាបាថ-មាគច្ឆតិ និសំសយោ.

៤៩០. ខគោ យថា ហិ រុក្ខគ្គេ, និលីយន្តោវ សាខិនោ;

សាខំ ឃដ្ដេតិ តស្សីធ, ឆាយា ផរតិ ភូមិយំ.

៤៩១. សាខាយ ឃដ្ដនច្ឆាយា, ផរណានិ ច សព្ពសោ;

អបុព្ពាចរិមំ ឯក-ក្ខណស្មិំយេវ ជាយរេ.

៤៩២. ឯវមេវ ច រូបស្ស, បសាទស្ស ច ឃដ្ដនំ;

ភវង្គចលនស្សាបិ, បច្ចយត្តេន អត្ថតោ.

៤៩៣. តថេវ ច មនោទ្វារេ, អាបាថគមនម្បិ ច;

អបុព្ពាចរិមំ ឯក-ក្ខណស្មិំយេវ ហោតិតិ.

៤៩៤. តតោ ភវង្គំ ឆិន្ទិត្វា, ចក្ខុទ្វារេ យថាក្កមំ;

អាវជ្ជនេ សមុប្បន្នេ, ទស្សនេ សម្បដិច្ឆនេ.

៤៩៥. សន្តីរណេ សមុប្បន្នេ, តតោ វោដ្ឋព្ពនេបិ ច;

កុសលំ ជវនំ ចិត្តំ, តថាកុសលមេវ វា.

៤៩៦. ឯសោ ឯវ នយោ សោត-ទ្វារាទីសុបិ វិញ្ញុនា;

អវិសេសេន វិញ្ញេយ្យោ, សទ្ទាទីនំ តុ ឃដ្ដនេ.

៤៩៧. ទោវារិកោបមាទីនិ, ឯតស្សត្ថស្ស ទីបនេ;

ឧទ្ធរិត្វាន តានេត្ថ, ទស្សេតព្ពានិ វិញ្ញុនា.

៤៩៨. អសម្ភេទេន ចក្ខុស្ស, រូបាបាថគមេន ច;

អាលោកនិស្សយេនាបិ, សមនក្ការហេតុនា.

៤៩៩. បច្ចយេហិ បនេតេហិ, សមេតេហិ ចតូហិបិ;

ជាយតេ ចក្ខុវិញ្ញាណំ, សម្បយុត្តេហិ តំ សហ.

៥០០. អសម្ភេទេន សោតស្ស, សទ្ទាបាថគមេន ច;

អាកាសនិស្សយេនាបិ, សមនក្ការហេតុនា.

៥០១. បច្ចយេហិ បនេតេហិ, សមេតេហិ ចតូហិបិ;

ជាយតេ សោតវិញ្ញាណំ, សម្បយុត្តេហិ តំ សហ.

៥០២. អសម្ភេទេន ឃានស្ស, គន្ធាបាថគមេន ច;

វាយោសន្និស្សយេនាបិ, សមនក្ការហេតុនា.

៥០៣. បច្ចយេហិ បនេតេហិ, សមេតេហិ ចតូហិបិ;

ជាយតេ ឃានវិញ្ញាណំ, សម្បយុត្តេហិ តំ សហ.

៥០៤. អសម្ភេទេន ជិវ្ហាយ, រសាបាថគមេន ច;

អាបោសន្និស្សយេនាបិ, សមនក្ការហេតុនា.

៥០៥. បច្ចយេហិ បនេតេហិ, សមេតេហិ ចតូហិបិ;

ជាយតេ ជិវ្ហាវិញ្ញាណំ, សម្បយុត្តេហិ តំ សហ.

៥០៦. អសម្ភេទេន កាយស្ស, ផោដ្ឋព្ពាបាថសង្គមា;

បថវីនិស្សយេនាបិ, សមនក្ការហេតុនា.

៥០៧. បច្ចយេហិ បនេតេហិ, សមេតេហិ ចតូហិបិ;

ជាយតេ កាយវិញ្ញាណំ, សម្បយុត្តេហិ តំ សហ.

៥០៨. អសម្ភេទា មនស្សាបិ, ធម្មាបាថគមេន ច;

វត្ថុសន្និស្សយេនាបិ, សមនក្ការហេតុនា.

៥០៩. បច្ចយេហិ បនេតេហិ, សមេតេហិ ចតូហិបិ;

មនោវិញ្ញាណមេវំ តុ, សម្បយុត្តេហិ ជាយតេ.

៥១០. មនោ ភវង្គចិត្តន្តិ, វេទិតព្ពំ វិភាវិនា;

អាវជ្ជនក្រិយាចិត្តំ, សមនក្ការោតិ សញ្ញិតំ.

៥១១. វត្ថុសន្និស្សយេនាតិ, នាយំ សព្ពត្ថ គច្ឆតិ;

ភវំ តុ បញ្ចវោការំ, សន្ធាយ កថិតោ បន.

៥១២. បដិសន្ធាទិចិត្តានិ, សព្ពានេកូនវីសតិ;

កាមេ ទស ច រូបេសុ, បញ្ច ចត្តារិរូបិសុ.

៥១៣. កម្មំ កម្មនិមិត្តញ្ច, តថា គតិនិមិត្តកំ;

ឥទំ ហិ តិវិធំ តេសំ, អារម្មណមុទីរិតំ.

៥១៤. កាមាវចរសន្ធីនំ, បរិត្តារម្មណំ មតំ;

បច្ចុប្បន្នមតីតំ វា, ហោតិ នត្ថិ អនាគតំ.

៥១៥. អដ្ឋេវ ច មហាបាកា, តីណិ សន្តីរណានិ ច;

ឯកាទសវិធំ ចិត្តំ, តទារម្មណសញ្ញិតំ.

៥១៦. ឯកាទសវិធេ ចិត្តេ, តទារម្មណសញ្ញិតេ;

ទស បុញ្ញវិបាកានិ, ឯកំ ហោតិ អបុញ្ញជំ.

៥១៧. មហាបាកា ន ជាយន្តេ, រូបារូបភវទ្វយេ;

កាមេ រូបេ ភវេ ចេវ, ហោតិ សន្តីរណត្តយំ.

៥១៨. តទារម្មណចិត្តានិ, យានិ វុត្តានិ សត្ថុនា;

តេសុ ចិត្តំ បនេកម្បិ, រូបារូបភវទ្វយេ.

៥១៩. ន តទារម្មណំ ហុត្វា, បវត្តតិ កទាចិបិ;

កស្មា ន ហោតិ ចេ តត្ថ, ពីជស្សាភាវតោ បន.

៥២០. បដិសន្ធិពីជំ នត្ថេត្ថ, កាមាវចរសញ្ញិតំ;

រូបាទិគោចរេ តស្ស, ភវេយ្យ ជនកំ តុ យំ.

៥២១. ចក្ខុវិញ្ញាណកាទីនំ, នត្ថិតាបជ្ជតីតិ ចេ;

និន្ទ្រិយានំ បវត្តានុ-ភាវតោ ចិត្តសម្ភវោ.

៥២២. ឯកន្តេន យថា ចេតំ, តទារម្មណមានសំ;

នប្បវត្តតិ សព្ពម្បិ, រូបារូបភវទ្វយេ.

៥២៣. អកាមាវចរធម្មេបិ, តទេតំ នានុពន្ធតិ;

កស្មា អជនកត្តា ហិ, ជនកស្សាសមានតោ.

៥២៤. ជនកំ តេន តុល្យំ វា, កាមាវចរសញ្ញិតំ;

កុសលាកុសលាទិំ តុ, ជវនំ អនុពន្ធតិ.

៥២៥. កាមាវចរធម្មាបិ, យេ មហគ្គតគោចរា;

ហុត្វា វត្តន្តិ តេ ចាបិ, ឥទំ នេវានុពន្ធតិ.

៥២៦. បរិត្តារម្មណត្តា ច, ឯកន្តេន បនស្ស ហិ;

តថាបរិចិតត្តា ច, នានុពន្ធតិ សព្ពទា.

៥២៧. កិំ តេន យុត្តិវាទេន, វុត្តំ អដ្ឋកថាសុ ហិ;

តទារម្មណចិត្តានិ, ឯកាទសបិ សព្ពសោ.

៥២៨. នាមគោត្តំ បនារព្ភ, ជវនេ ជវិតេបិ ច;

តទារម្មណំ ន គណ្ហន្តិ, រូបារូបភវេសុ វា.

៥២៩. យទា បញ្ញត្តិមារព្ភ, ជវនេ ជវិតេបិ វា;

តថា វិបស្សនាយាបិ, លក្ខណារម្មណាយ ច.

៥៣០. តទារម្មណា ន លព្ភន្តិ, មិច្ឆត្តនិយតេសុបិ;

ន លោកុត្តរធម្មេបិ, អារព្ភ ជវនេ គតេ.

៥៣១. តថា មហគ្គតេ ធម្មេ, អារព្ភ ជវនេ បន;

បដិសម្ភិទាញាណានិ, អារព្ភ ជវិតេបិ ច.

៥៣២. មនោទ្វារេបិ សព្ពេសំ, ជវនានមនន្តរំ;

តទារម្មណចិត្តានិ, ភវន្តិ អនុបុព្ពតោ.

៥៣៣. ន វិជ្ជតិ មនោទ្វារេ, ឃដ្ដនារម្មណស្ស ហិ;

កថំ ភវង្គតោ ហោតិ, វុដ្ឋានំ បន ចេតសោ.

៥៣៤. មនោទ្វារេបិ អាបាថ-មាគច្ឆន្តេវ គោចរា;

ឃដ្ដនាយ វិនា តស្មា, ចិត្តានំ ហោតិ សម្ភវោ.

៥៣៥. ទ្វាទសាបុញ្ញចិត្តានំ, វិបាកា សត្តសត្តតិ;

ភវន្តិ ចតុរាសីតិ, បាបបាកា បវត្តិយំ.

៥៣៦. ឯកាទសវិធានំ តុ, ហិត្វា ឧទ្ធច្ចមានសំ;

ឯកាទសវិធា ចេវ, ភវន្តិ បដិសន្ធិយោ.

៥៣៧. ក្រិយចិត្តេសុ សព្ពេសុ, ជវនំ ន ច ហោតិ យំ;

តំ វេ ករណមត្តត្តា, វាតបុប្ផសមំ មតំ.

៥៣៨. ជវនត្តំ តុ សម្បត្តំ, កិច្ចសាធនតោ បន;

ឆិន្នមូលស្ស រុក្ខស្ស, បុប្ផំវ អផលំ សិយា.

៥៣៩. បដិច្ច បន ឯតស្មា, ផលមេតីតិ បច្ចយោ;

យោ ធម្មោ យស្ស ធម្មស្ស, ឋិតិយុប្បត្តិយាបិ វា.

៥៤០. ឧបការោ ហិ សោ តស្ស, បច្ចយោតិ បវុច្ចតិ;

សម្ភវោបភវោ ហេតុ, ការណំ បច្ចយោ មតោ.

៥៤១. លោភាទិ បន យោ ធម្មោ, មូលដ្ឋេនុបការកោ;

ហេតូតិ បន សោ ធម្មោ, វិញ្ញាតព្ពោ វិភាវិនា.

៥៤២. លោភោ ទោសោ ច មោហោ ច,

តថាលោភាទយោ តយោ;

ឆឡេវ ហេតុយោ ហោន្តិ,

ជាតិតោ នវធា សិយុំ.

៥៤៣. ធម្មានំ កុសលាទីនំ, កុសលាទិត្តសាធកោ;

មូលដ្ឋោតិ វទន្តេវំ, ឯកេ អាចរិយា បន.

៥៤៤. ឯវំ សន្តេ តុ ហេតូនំ, តំសមុដ្ឋានរូបិសុ;

ហេតុបច្ចយតា នេវ, សម្បជ្ជតិ កទាចិបិ.

៥៤៥. ន ហិ តេ បន រូបានំ, សាធេន្តិ កុសលាទិកំ;

ន តេសំ បន រូបានំ, បច្ចយា ន ច ហោន្តិ តេ.

៥៤៦. តស្មា ហិ កុសលាទីនំ, កុសលាទិត្តសាធកោ;

មូលដ្ឋោតិ ន គន្តព្ពោ, វិញ្ញុនា សមយញ្ញុនា.

៥៤៧. សុប្បតិដ្ឋិតភាវស្ស, សាធនេនុបការកោ;

មូលដ្ឋោតិ ច ហេតូនំ, វិញ្ញាតព្ពោ វិភាវិនា.