៩. នវមោ បរិច្ឆេទោ

បុញ្ញវិបាកបច្ចយនិទ្ទេសោ

៥៦០. ពាត្តិំស បាកចិត្តានិ, លោកិកានេវ យានិ ហិ;

ឯតេសំ បាកចិត្តានំ, បដិសន្ធិបវត្តិសុ.

៥៦១. បុញ្ញាបុញ្ញាទិសង្ខារា, យថា យេសញ្ច បច្ចយា;

ភវាទីសុ តថា តេបិ, វិញ្ញាតព្ពា វិភាវិនា.

៥៦២. តយោ ភវា ចតស្សោ ច, យោនិយោ គតិបញ្ចកំ;

វិញ្ញាណដ្ឋិតិយោ សត្ត, សត្តាវាសា នវេរិតា.

៥៦៣. កាមេ បុញ្ញាភិសង្ខារ-សញ្ញិតា អដ្ឋ ចេតនា;

នវន្នំ បាកចិត្តានំ, កាមេ សុគតិយំ បន.

៥៦៤. នានាក្ខណិកកម្មូប-និស្សយបច្ចយេហិ ច;

ទ្វេធា ហិ បច្ចយា តេសំ, ភវន្តិ បដិសន្ធិយំ.

៥៦៥. ឧបេក្ខាសហិតាហេតុ-មនោវិញ្ញាណធាតុយា;

វិនា បរិត្តបាកានំ, ហោន្តិ ទ្វេធា បវត្តិយំ.

៥៦៦. តាយេវ ចេតនា រូប-ភវេ ទ្វេធាវ បច្ចយា;

បញ្ចន្នំ បាកចិត្តានំ, ភវន្តិ ហិ បវត្តិយំ.

៥៦៧. អដ្ឋន្នំ តុ បរិត្តានំ, កាមេ ទុគ្គតិយំ តថា;

បវត្តេ បច្ចយា ហោន្តិ, ន ហោន្តិ បដិសន្ធិយំ.

៥៦៨. ហោន្តិ វុត្តប្បការាវ, កាមេ សុគតិយំ តថា;

សោឡសន្នំ វិបាកានំ, បវត្តេ បដិសន្ធិយំ.

៥៦៩. រូបេ បុញ្ញាភិសង្ខារា, រូបាវចរភូមិយំ;

បញ្ចន្នំ បាកចិត្តានំ, បច្ចយា បដិសន្ធិយំ.

៥៧០. ហោន្តិមាបុញ្ញសង្ខារា, កាមេ ទុគ្គតិយំ ទ្វិធា;

វិញ្ញាណស្ស បនេកស្ស, បច្ចយា បដិសន្ធិយំ.

៥៧១. ឆន្នំ បន បវត្តេវ, ហោន្តិ នោ បដិសន្ធិយំ;

សត្តន្នម្បិ ភវន្តេវ, បវត្តេ បដិសន្ធិយំ.

៥៧២. កាមេ សុគតិយំ តេសំ, សត្តន្នម្បិ តថេវ ច;

បវត្តេ បច្ចយា ហោន្តិ, ន ហោន្តិ បដិសន្ធិយំ.

៥៧៣. វិញ្ញាណានំ ចតុន្នម្បិ, តេសំ រូបភវេ តថា;

បវត្តេ បច្ចយា ហោន្តិ, ន ហោន្តិ បដិសន្ធិយំ.

៥៧៤. សោ ច កាមភវេនិដ្ឋ-រូបាទិឧបលទ្ធិយំ;

អនិដ្ឋរូបាទយោ បន, ព្រហ្មលោកេ ន វិជ្ជរេ.

៥៧៥. តថេវានេញ្ជសង្ខារោ, អរូបាវចរភូមិយំ;

ចតុន្នំ បាកចិត្តានំ, បវត្តេ បដិសន្ធិយំ.

៥៧៦. ឯវំ តាវ ភវេស្វេតេ, បដិសន្ធិបវត្តិសុ;

យថា ច បច្ចយា ហោន្តិ, តថា ញេយ្យា វិភាវិនា.

៥៧៧. ឯសេវ ច នយោ ញេយ្យោ, យោនិអាទីសុ តត្រិទំ;

អាទិតោ បន បដ្ឋាយ, មុខមត្តនិទស្សនំ.

៥៧៨. អវិសេសេន បុញ្ញាភិ-សង្ខារោ ទ្វិភវេសុបិ;

ទត្វាន បដិសន្ធិំ តុ, សព្ពបាកំ ជនេតិ សោ.

៥៧៩. តថា ចតូសុ វិញ្ញេយ្យោ, អណ្ឌជាទីសុ យោនិសុ;

ពហុទេវមនុស្សានំ, គតីសុ ទ្វីសុ ឯវ ច.

៥៨០. តថា នានត្តកាយាទិ-វិញ្ញាណានំ ឋិតីសុបិ;

តថា វុត្តប្បការស្មិំ, សត្តាវាសេ ចតុព្ពិធេ.

៥៨១. ឯវំ បុញ្ញាភិសង្ខារោ, ភវាទីសុ យថារហំ;

ឯកវីសតិបាកានំ, បច្ចយោ ហោតិ ច ទ្វិធា.

៥៨២. កាមេ អបុញ្ញសង្ខារោ, ភវេ ចតូសុ យោនិសុ;

តីសុ គតីសុ ឯកិស្សា, វិញ្ញាណដ្ឋិតិយាបិ ច.

៥៨៣. សត្តាវាសេ បនេកស្មិំ,

ឧហោតិ សោ បច្ចយោ ទ្វិធា;

សត្តន្នំ បាកចិត្តានំ,

បវត្តេ បដិសន្ធិយំ.

៥៨៤. តថេវានេញ្ជសង្ខារោ, ឯការូបភវេ បុន;

ឯកិស្សា យោនិយា ចេវ, ឯកិស្សា គតិយាបិ ច.

៥៨៥. តីសុ ចិត្តដ្ឋិតីស្វេវ, សត្តាវាសេ ចតុព្ពិធេ;

ចតុន្នំ បាកចិត្តានំ, ទ្វេធា សោ ហោតិ បច្ចយោ.

៥៨៦. បដិសន្ធិបវត្តីនំ, វសេនេវ ភវាទិសុ;

វិជានិតព្ពា សង្ខារា, យថា យេសញ្ច បច្ចយា.

៥៨៧. ន រូបារូបធម្មានំ, សង្កន្តិ បន វិជ្ជតិ;

សង្កន្តិភាវេ អសតិ, បដិសន្ធិ កថំ សិយា.

៥៨៨. នត្ថិ ចិត្តស្ស សង្កន្តិ, អតីតភវតោ ឥធ;

តតោ ហេតុំ វិនា តស្ស, បាតុភាវោ ន វិជ្ជតិ.

៥៨៩. សុលទ្ធបច្ចយំ រូបា-រូបមត្តំ តុ ជាយតិ;

ឧប្បជ្ជមានមេវំ តុ, លភិត្វា បច្ចយំ បន.

៥៩០. ភវន្តរមុបេតីតិ, សមញ្ញាយ បវុច្ចតិ;

ន ច សត្តោ ន ច ជីវោ, ន អត្តា វាបិ វិជ្ជតិ.

៥៩១. តយិទំ បាកដំ កត្វា, បដិសន្ធិក្កមំ បន;

ទស្សយិស្សាមហំ សាធុ, និពោធថ សុទុព្ពុធំ.

៥៩២. អតីតស្មិំ ភវេ តស្ស, អាសន្នមរណស្ស ហិ;

ហរិតំ តាលបណ្ណំវ, បក្ខិត្តំ អាតបេ បន.

៥៩៣. សុស្សមានេ សរីរស្មិំ, នដ្ឋេ ចក្ខុន្ទ្រិយាទិកេ;

ហទយវត្ថុមត្តស្មិំ, ឋិតេ កាយប្បសាទិកេ.

៥៩៤. វត្ថុសន្និស្សិតំ ចិត្តំ, ហោតិ តស្មិំ ខណេបិ ច;

បុព្ពានុសេវិតំ កម្មំ, បុញ្ញំ វាបុញ្ញមេវ វា.

៥៩៥. កម្មំ កម្មនិមិត្តំ វា, អាលម្ពិត្វា បវត្តតិ;

ឯវំ បវត្តមានំ តំ, វិញ្ញាណំ លទ្ធបច្ចយំ.

៥៩៦. អវិជ្ជាយ បដិច្ឆន្នា-ទីនវេ វិសយេ បន;

តណ្ហា នមេតិ សង្ខារា, ខិបន្តិ សហជា បន.

៥៩៧. ន មីយមានំ តណ្ហាយ, តំ សន្តតិវសា បន;

ឱរិមា បន តីរម្ហា, អាលម្ពិត្វាន រជ្ជុកំ.

៥៩៨. មាតិកាតិក្កមោវេតំ, បុរិមំ ជហតិ និស្សយំ;

អបរំ កម្មសម្ភូតំ, លម្ពិត្វា វាបិ និស្សយំ.

៥៩៩. តំ បនារម្មណាទីហិ, បច្ចយេហិ បវត្តតិ;

បុរិមំ ចវនំ ឯត្ថ, បច្ឆិមំ បដិសន្ធិ តុ.

៦០០. តទេតំ នាបិ បុរិមា, ភវតោបិ ឥធាគតំ;

កម្មាទិញ្ច វិនា ហេតុំ, បាតុភូតំ ន ចេវ តំ.

៦០១. ឯត្ថ ចេតស្ស ចិត្តស្ស, បុរិមា ភវតោ បន;

ឥធានាគមនេតីត-ភវហេតូហិ សម្ភវេ.

៦០២. បដិឃោសទីបមុទ្ទាទី, ភវន្តេត្ថ និទស្សនា;

យថា អាគន្ត្វា អញ្ញត្រ, ហោន្តិ សទ្ទាទិហេតុកា.

៦០៣. ឯវមេវ ច វិញ្ញាណំ, វេទិតព្ពំ វិភាវិនា;

សន្តានពន្ធតោ នត្ថិ, ឯកតា វាបិ នានតា.

៦០៤. សតិ សន្តានពន្ធេ តុ, ឯកន្តេនេកតា សិយា;

ខីរតោ ទធិសម្ភូតំ, ន ភវេយ្យ កទាចិបិ.

៦០៥. អថាបិ បន ឯកន្ត-នានតា សា ភវេយ្យ ចេ;

ខីរសាមី នរោ នេវ, ទធិសាមី ភវេយ្យ សោ.

៦០៦. តស្មា ឯត្ថ បនេកន្ត-ឯកតានានតាបិ វា;

ន ចេវ ឧបគន្តព្ពា, វិញ្ញុនា សមយញ្ញុនា.

៦០៧. ននុ ឯវមសង្កន្តិ-បាតុភាវេ តស្ស សតិ;

យេ ឥមស្មិំ មនុស្សត្ត-ភាវេ ខន្ធាភិសម្ភវា.

៦០៨. តេសំ ឥធ និរុទ្ធត្តា, កម្មស្ស ផលហេតុនោ;

បរត្ថាគមតោ ចេវ, ឥធ តស្ស កតស្ស ហិ.

៦០៩. អញ្ញស្ស អញ្ញតោ ចេវ, កម្មតោ តំ ផលំ សិយា;

តស្មា ន សុន្ទរំ ឯតំ, វិធានំ សព្ពមេវ ច.

ឯត្ថាហ –

៦១០. សន្តានេ យំ ផលំ ឯតំ, នាញ្ញស្ស ន ច អញ្ញតោ;

ពីជានំ អភិសង្ខារោ, ឯតស្សត្ថស្ស សាធកោ.

៦១១. ឯកស្មិំ បន សន្តានេ, វត្តមានំ ផលំ បន;

អញ្ញស្សាតិបិ វា នេវ, អញ្ញតោ វា ន ហោតិ តំ.

៦១២. ពីជានំ អភិសង្ខារា, ឯតស្សត្ថស្ស សាធកោ;

ពីជានំ អភិសង្ខារេ, កតេ តុ មធុអាទិនា.

៦១៣. តស្ស ពីជស្ស សន្តានេ, បឋមំ លទ្ធបច្ចយោ;

មធុរោ ផលសោ តស្ស, ហោតិ កាលន្តរេ បន.

៦១៤. ន ហិ តានិ ហិ ពីជានិ, អភិសង្ខរណម្បិ វា;

បាបុណន្តិ ផលដ្ឋានំ, ឯវំ ញេយ្យមិទម្បិ ច.

៦១៥. ពាលកាលេ បយុត្តេន, វិជ្ជាសិប្បោសធាទិនា;

ទីបេតព្ពោ អយំ វុទ្ធ-កាលស្មិំ ផលទាយិនា.

៦១៦. ឯវំ សន្តេបិ តំ កម្មំ, វិជ្ជមានម្បិ វា បន;

ផលស្ស បច្ចយោ ហោតិ, អថ វាវិជ្ជមានកំ.

៦១៧. វិជ្ជមានំ សចេ ហោតិ, តប្បវត្តិក្ខណេ បន;

ភវិតព្ពំ វិបាកេន, សទ្ធិមេវ ច ហេតុនា.

៦១៨. អថ វាវិជ្ជមានំ តំ, និរុទ្ធំ បច្ចយោ ភវេ;

បវត្តិក្ខណតោ បុព្ពេ, បច្ឆា និច្ចផលំ សិយា.

វុច្ចតេ –

៦១៩. កដត្តា បច្ចយោ កម្មំ, តស្មា និច្ចផលំ ន ច;

បាដិភោគាទិកំ កម្មំ, វេទិតព្ពំ និទស្សនំ.

៦២០. កដត្តាយេវ តំ កម្មំ, ផលស្ស បន បច្ចយោ;

ន ចស្ស វិជ្ជមានត្តំ, តស្ស វាវិជ្ជមានតា.

៦២១. អភិធម្មាវតារោយំ, បរមត្ថបកាសនោ;

សោតព្ពោ បន សោតូនំ, បីតិពុទ្ធិវិវឌ្ឍនោ.

ឥតិ អភិធម្មាវតារេ បុញ្ញវិបាកបច្ចយនិទ្ទេសោ នាម

នវមោ បរិច្ឆេទោ.