៣. តតិយោ បរិច្ឆេទោ

ចេតសិកវិភាគនិទ្ទេសោ

៨៩. សព្ពេ ចេតសិកា វុត្តា, ពុទ្ធេនាទិច្ចពន្ធុនា;

នាមសាមញ្ញតោយេវ, ទ្វេបញ្ញាស ភវន្តិ តេ.

សេយ្យថិទំ – ផស្សោ វេទនា សញ្ញា ចេតនា វិតក្កោ វិចារោ បីតិ ចិត្តេកគ្គតា វីរិយំ ជីវិតំ ឆន្ទោ អធិមោក្ខោ មនសិការោ តត្រមជ្ឈត្តតា សទ្ធា សតិ ហិរី ឱត្តប្បំ អលោភោ អទោសោ អមោហោ កាយប្បស្សទ្ធិអាទីនិ ឆ យុគានិ, តិស្សោ វិរតិយោ, ករុណា មុទិតា លោភោ ទោសោ មោហោ ឧទ្ធច្ចំ មានោ ទិដ្ឋិ ឥស្សា មច្ឆរិយំ កុក្កុច្ចំ ថិនំ មិទ្ធំ វិចិកិច្ឆា អហិរិកំ អនោត្តប្បញ្ចាតិ.

៩០. ចតុបញ្ញាសធា កាមេ, រូបេ បញ្ចទសេរិតា;

តេ ហោន្តិ ទ្វាទសារូបេ, ចត្តាលីសមនាសវា.

៩១. ឯកវីសសតំ សព្ពេ, ចិត្តុប្បាទា សមាសតោ;

ឯតេសុ តេសមុប្បត្តិំ, ឧទ្ធរិត្វា បនេកកំ.

៩២. ផស្សាទីនំ តុ ធម្មានំ, បវក្ខាមិ ឥតោ បរំ;

បាដវត្ថាយ ភិក្ខូនំ, ចិត្តចេតសិកេស្វហំ.

៩៣. ឯកគ្គតា មនក្ការោ, ជីវិតំ ផស្សបញ្ចកំ;

អដ្ឋេតេ អវិនិព្ភោគា, ឯកុប្បាទា សហក្ខយា.

៩៤. ផស្សោ ច វេទនា សញ្ញា, ចេតនា ជីវិតិន្ទ្រិយំ;

ឯកគ្គតា មនក្ការោ, សព្ពសាធារណា ឥមេ.

៩៥. វិតក្កោ បញ្ចបញ្ញាស-ចិត្តេសុ សមុទីរិតោ;

ចារោ ឆសដ្ឋិចិត្តេសុ, ជាយតេ នត្ថិ សំសយោ.

៩៦. ឯកបញ្ញាសចិត្តេសុ, បីតិ តេសដ្ឋិយា សុខំ;

ឧបេក្ខា បញ្ចបញ្ញាស-ចិត្តេ ទុក្ខំ តុ តីសុ ហិ.

៩៧. ហោតិ ទ្វាសដ្ឋិចិត្តេសុ, សោមនស្សិន្ទ្រិយំ បន;

ទុក្ខិន្ទ្រិយំ បនេកស្មិំ, តថេកម្ហិ សុខិន្ទ្រិយំ.

៩៨. បញ្ចុត្តរសតេ ចិត្តេ, វីរិយំ អាហ នាយកោ;

ចតុត្តរសតេ ចិត្តេ, សមាធិន្ទ្រិយមព្រវិ.

៩៩. សព្ពាហេតុកចិត្តានិ, ឋបេត្វា ចេកហេតុកេ;

ឯកុត្តរសតេ ចិត្តេ, ឆន្ទស្សុប្បត្តិមុទ្ទិសេ.

១០០. ឋបេត្វា ទស វិញ្ញាណេ, វិចិកិច្ឆាយុតម្បិ ច;

ទសុត្តរសតេ ចិត្តេ, អធិមោក្ខោ ឧទីរិតោ.

១០១. សទ្ធា សតិ ហិរោត្តប្បំ, អលោភាទោសមជ្ឈតា;

ឆឡេវ យុគឡា ចាតិ, ធម្មា ឯកូនវីសតិ.

១០២. ឯកនវុតិយា ចិត្តេ, ជាយន្តិ និយតា ឥមេ;

អហេតុកេសុ ចិត្តេសុ, អបុញ្ញេសុ ន ជាយរេ.

១០៣. ឯកូនាសីតិយា ចិត្តេ, បញ្ញា ជាយតិ សព្ពទា;

អដ្ឋវីសតិយា ចិត្តេ, ករុណាមុទិតា សិយុំ.

១០៤. កាមាវចរបុញ្ញេសុ, សព្ពលោកុត្តរេសុ ច;

ចត្តាលីសវិធេ ចិត្តេ, សាដ្ឋកេ វិរតិត្តយំ.

១០៥. សទ្ធា សតិ ហិរោត្តប្បំ, អលោភាទិត្តយម្បិ ច;

យុគឡានិ ឆ មជ្ឈត្តំ, ករុណាមុទិតាបិ ច.

១០៦. តថា វិរតិយោ តិស្សោ, សព្ពេ តេ បញ្ចវីសតិ;

កុសលាព្យាកតា ចាបិ, កុសលេន បកាសិតា.

១០៧. អហិរីកមនោត្តប្បំ, មោហោ ឧទ្ធច្ចមេវ ច;

ទ្វាទសាបុញ្ញចិត្តេសុ, និយតាយេវ ជាយរេ.

១០៨. លោភោ ទោសោ ច មោហោ ច, មានោ ទិដ្ឋិ ច សំសយោ;

មិទ្ធមុទ្ធច្ចកុក្កុច្ចំ, ថិនំ មច្ឆរិយម្បិ ច.

១០៩. អហិរីកមនោត្តប្បំ, ឥស្សា ច ទោមនស្សកំ;

ឯតេ អកុសលា វុត្តា, ឯកន្តេន មហេសិនា.

១១០. លោភោ អដ្ឋសុ និទ្ទិដ្ឋោ, វុត្តា ចតូសុ ទិដ្ឋិតុ;

មានោ ទិដ្ឋិវិយុត្តេសុ, ទោសោទ្វីស្វេវ ជាយតេ.

១១១. ឥស្សាមច្ឆេរកុក្កុច្ចា, ទ្វីសុ ជាយន្តិ នោ សហ;

វិចិកិច្ឆា បនេកស្មិំ, ថិនមិទ្ធំ តុ បញ្ចសុ.

១១២. ផស្សោ ច វេទនា សញ្ញា, ចេតនា ជីវិតំ មនោ;

វិតក្កោ ច វិចារោ ច, បីតិ វីរិយសមាធិ ច.

១១៣. ឆន្ទោ ចេវាធិមោក្ខោ ច, មនសិការោ ច ចុទ្ទស;

កុសលាកុសលា ចេវ, ហោន្តិ អព្យាកតាបិ ច.

១១៤. ឯកូនតិំសចិត្តេសុ, ឈានំ បញ្ចង្គិកំ មតំ;

ចតុឈានង្គយុត្តានិ, សត្តតិំសាតិ និទ្ទិសេ.

១១៥. ឯកាទសវិធំ ចិត្តំ, តិវង្គិកមុទីរិតំ;

ចតុតិំសវិធំ ចិត្តំ, ទុវង្គិកមុទីរិតំ.

១១៦. សភាវេនាវិតក្កេសុ, ឈានង្គានិ ន ឧទ្ធរេ;

សព្ពាហេតុកចិត្តេសុ, មគ្គង្គានិ ន ឧទ្ធរេ.

១១៧. តីណិ សោឡសចិត្តេសុ, ឥន្ទ្រិយានិ វទេ ពុធោ;

ឯកស្មិំ បន ចត្តារិ, បញ្ច តេរសសុទ្ធរេ.

១១៨. សត្ត ទ្វាទសចិត្តេសុ, ឥន្ទ្រិយានិ ជិនោព្រវិ;

ឯកេនូនេសុ អដ្ឋេវ, ចត្តាលីសមនេសុ ច.

១១៩. ចត្តាលីសាយ ចិត្តេសុ, នវកំ នាយកោព្រវិ;

ឯវំ ឥន្ទ្រិយយោគោបិ, វេទិតព្ពោ វិភាវិនា.

១២០. អមគ្គង្គានិ នាមេត្ថ, អដ្ឋារស អហេតុកា;

ឈានង្គានិ ន វិជ្ជន្តិ, វិញ្ញាណេសុ ទ្វិបញ្ចសុ.

១២១. ឯកំ ចិត្តំ ទុមគ្គង្គំ, តិមគ្គង្គានិ សត្តសុ;

ចត្តាលីសាយ ចិត្តេសុ, មគ្គោ សោ ចតុរង្គិកោ.

១២២. បញ្ចទ្ទសសុ ចិត្តេសុ, មគ្គោ បញ្ចង្គិកោ មតោ;

វុត្តោ ទ្វត្តិំសចិត្តេសុ, មគ្គោ សត្តង្គិកោបិ ច.

១២៣. មគ្គោ អដ្ឋសុ ចិត្តេសុ, មតោ អដ្ឋង្គិកោតិ ហិ;

ឯវំ តុ សព្ពចិត្តេសុ, មគ្គង្គានិ សមុទ្ធរេ.

១២៤. ពលានិ ទ្វេ ទ្វិចិត្តេសុ, ឯកស្មិំ តីណិ ទីបយេ;

ឯកាទសសុ ចត្តារិ, ឆ ទ្វាទសសុ និទ្ទិសេ.

១២៥. ឯកូនាសីតិយា សត្ត, សោឡសេវាពលានិ តុ;

ចិត្តមេវំ តុ វិញ្ញេយ្យំ, សពលំ អពលម្បិ ច.

១២៦. ឈានង្គមគ្គង្គពលិន្ទ្រិយានិ,

ចិត្តេសុ ជាយន្តិ ហិ យេសុ យានិ;

មយា សមាសេន សមុទ្ធរិត្វា,

វុត្តានិ សព្ពានិបិ តានិ តេសុ.

ឥតិ អភិធម្មាវតារេ ចេតសិកវិភាគនិទ្ទេសោ នាម

តតិយោ បរិច្ឆេទោ.