៤. ចតុត្ថោ បរិច្ឆេទោ

ឯកវិធាទិនិទ្ទេសោ

១២៧. ឥតោ បរំ បវក្ខាមិ, នយមេកវិធាទិកំ;

អាភិធម្មិកភិក្ខូនំ, ពុទ្ធិយា បន វុទ្ធិយា.

១២៨. សព្ពមេកវិធំ ចិត្តំ, វិជាននសភាវតោ;

ទុវិធញ្ច ភវេ ចិត្តំ, អហេតុកសហេតុតោ.

១២៩. បុញ្ញាបុញ្ញវិបាកា ហិ, កាមេ ទស ច បញ្ច ច;

ក្រិយា តិស្សោតិ សព្ពេបិ, អដ្ឋារស អហេតុកា.

១៣០. ឯកសត្តតិ សេសានិ, ចិត្តុប្បាទា មហេសិនា;

សហេតុកាតិ និទ្ទិដ្ឋា, តាទិនា ហេតុវាទិនា.

១៣១. សវត្ថុកាវត្ថុកតោ, តថោភយវសេន ច;

សព្ពំ វុត្តបការំ តុ, តិវិធំ ហោតិ មានសំ.

១៣២. សព្ពោ កាមវិបាកោ ច, រូបេ បញ្ចទសាបិ ច;

អាទិមគ្គោ សិតុប្បាទោ, មនោធាតុ ក្រិយាបិ ច.

១៣៣. ទោមនស្សទ្វយញ្ចាបិ, តេចត្តាលីស មានសា;

នុប្បជ្ជន្តិ វិនា វត្ថុំ, ឯកន្តេន សវត្ថុកា.

១៣៤. អរូបាវចរបាកា ច, ឯកន្តេន អវត្ថុកា;

ទ្វាចត្តាលីស សេសានិ, ចិត្តានុភយថា សិយុំ.

១៣៥. ឯកេការម្មណំ ចិត្តំ, បញ្ចារម្មណមេវ ច;

ឆឡារម្មណកញ្ចេតិ, ឯវម្បិ តិវិធំ សិយា.

១៣៦. វិញ្ញាណានិ ច ទ្វេបញ្ច, អដ្ឋ លោកុត្តរានិ ច;

សព្ពំ មហគ្គតញ្ចេវ, ឋបេត្វាភិញ្ញមានសំ.

១៣៧. តេចត្តាលីស វិញ្ញេយ្យា, ឯកេការម្មណា បន;

មនោធាតុត្តយំ តត្ថ, បញ្ចារម្មណមីរិតំ.

១៣៨. តេចត្តាលីស សេសានិ, ឆឡារម្មណិកា មតា;

តថា ច តិវិធំ ចិត្តំ, កុសលាកុសលាទិតោ.

១៣៩. អហេតុំ ឯកហេតុញ្ច, ទ្វិហេតុញ្ច តិហេតុកំ;

ឯវំ ចតុព្ពិធំ ចិត្តំ, វិញ្ញាតព្ពំ វិភាវិនា.

១៤០. ហេដ្ឋា មយាបិ និទ្ទិដ្ឋា, អដ្ឋារស អហេតុកា;

វិចិកិច្ឆុទ្ធច្ចសំយុត្តំ, ឯកហេតុមុទីរិតំ.

១៤១. កាមេ ទ្វាទសធា បុញ្ញ-វិបាកក្រិយតោ បន;

ទសធាកុសលា ចាតិ, ពាវីសតិ ទុហេតុកា.

១៤២. កាមេ ទ្វាទសធា បុញ្ញ-វិបាកក្រិយតោ បន;

សព្ពំ មហគ្គតញ្ចេវ, អប្បមាណំ តិហេតុកំ.

១៤៣. រូបីរិយាបថវិញ្ញត្តិ-ជនកាជនកាទិតោ;

ឯវញ្ចាបិ ហិ តំ ចិត្តំ, ហោតិ សព្ពំ ចតុព្ពិធំ.

១៤៤. ទ្វាទសាកុសលា តត្ថ, កុសលា កាមធាតុយា;

តថា ទស ក្រិយា កាមេ, អភិញ្ញាមានសំ ទ្វយំ.

១៤៥. សមុដ្ឋាបេន្តិ រូបានិ, កប្បេន្តិ ឥរិយាបថំ;

ជនយន្តិ ច វិញ្ញត្តិំ, ឥមេ ទ្វត្តិំស មានសា.

១៤៦. កុសលា ច ក្រិយា ចេវ, តេ មហគ្គតមានសា;

អដ្ឋានាសវចិត្តានិ, ឆព្ពីសតិ ច មានសា.

១៤៧. សមុដ្ឋាបេន្តិ រូបានិ, កប្បេន្តិ ឥរិយាបថំ;

ចោបនំ ន ច បាបេន្តិ, ទ្វិកិច្ចា និយតា ឥមេ.

១៤៨. ឋបេត្វា ទស វិញ្ញាណេ, វិបាកា ទ្វីសុ ភូមិសុ;

ក្រិយា ចេវ មនោធាតុ, ឥមានេកូនវីសតិ.

១៤៩. សមុដ្ឋាបេន្តិ រូបានិ, ន ករោន្តិតរទ្វយំ;

បុន ទ្វេបញ្ចវិញ្ញាណា, វិបាកា ច អរូបិសុ.

១៥០. សព្ពេសំ សន្ធិចិត្តញ្ច, ចុតិចិត្តញ្ចារហតោ;

ន ករោន្តិ តិកិច្ចានិ, ឥមេ សោឡស មានសា.

១៥១. ឯកទ្វិតិចតុដ្ឋាន-បញ្ចដ្ឋានបភេទតោ;

បញ្ចធា ចិត្តមក្ខាសិ, បញ្ចនិម្មលលោចនោ.

១៥២. កុសលាកុសលា សព្ពេ, ចិត្តុប្បាទា មហាក្រិយា;

មហគ្គតា ក្រិយា ចេវ, ចត្តារោ ផលមានសា.

១៥៣. សព្ពេវ បញ្ចបញ្ញាស, និប្បបញ្ចេន សត្ថុនា;

ជវនដ្ឋានតោយេវ, ឯកដ្ឋានេ និយាមិតា.

១៥៤. បុន ទ្វេបញ្ចវិញ្ញាណា, ទស្សនេ សវនេ តថា;

ឃាយនេ សាយនេ ឋានេ, ផុសនេ បដិបាដិយា.

១៥៥. មនោធាតុត្តិកំ ឋានេ, អាវជ្ជនេ បដិច្ឆនេ;

អដ្ឋសដ្ឋិ ភវន្តេតេ, ឯកដ្ឋានិកតំ គតា.

១៥៦. បុន ទ្វិដ្ឋានិកំ នាម, ចិត្តទ្វយមុទីរិតំ;

សោមនស្សយុតំ បញ្ច-ទ្វារេ សន្តីរណំ សិយា.

១៥៧. តទារម្មណំ ឆទ្វារេ, ពលវារម្មណេ សតិ;

តថា វោដ្ឋព្ពនំ ហោតិ, បញ្ចទ្វារេសុ វោដ្ឋពោ.

១៥៨. មនោទ្វារេសុ សព្ពេសំ, ហោតិ អាវជ្ជនំ បន;

ឥទំ ទ្វិដ្ឋានិកំ នាម, ហោតិ ចិត្តទ្វយំ បន.

១៥៩. បដិសន្ធិភវង្គស្ស, ចុតិយា ឋានតោ បន;

មហគ្គតវិបាកា តេ, នវ តិដ្ឋានិកា មតា.

១៦០. អដ្ឋ កាមា មហាបាកា, បដិសន្ធិភវង្គតោ;

តទារម្មណតោ ចេវ, ចុតិដ្ឋានវសេន ច.

១៦១. ចតុដ្ឋានិកចិត្តានិ, អដ្ឋ ហោន្តីតិ និទ្ទិសេ;

កុសលាកុសលបាកំ តុ-បេក្ខាសហគតទ្វយំ.

១៦២. សន្តីរណំ ភវេ បញ្ច-ទ្វារេ ឆទ្វារិកេសុ ច;

តទារម្មណតំ យាតិ, ពលវារម្មណេ សតិ.

១៦៣. បដិសន្ធិភវង្គានំ, ចុតិដ្ឋានវសេន ច;

បញ្ចដ្ឋានិកចិត្តន្តិ, ឥទំ ទ្វយមុទីរិតំ.

១៦៤. បញ្ចកិច្ចំ ទ្វយំ ចិត្តំ, ចតុកិច្ចំ បនដ្ឋកំ;

តិកិច្ចំ នវកំ ទ្វេ តុ, ទ្វិកិច្ចា សេសមេកកំ.

១៦៥. ភវង្គាវជ្ជនញ្ចេវ, ទស្សនំ សម្បដិច្ឆនំ;

សន្តីរណំ វោដ្ឋព្ពនំ, ជវនំ ភវតិ សត្តមំ.

១៦៦. ឆព្ពិធំ ហោតិ តំ ឆន្នំ, វិញ្ញាណានំ បភេទតោ;

សត្តធា សត្តវិញ្ញាណ-ធាតូនំ តុ បភេទតោ.

១៦៧. ឯកេការម្មណំ ឆក្កំ, បញ្ចារម្មណភេទតោ;

ឆឡារម្មណតោ ចេវ, ហោតិ អដ្ឋវិធំ មនោ.

១៦៨. តត្ថ ទ្វេបញ្ចវិញ្ញាណា, ហោន្តិ ឯកេកគោចរា;

រូបារម្មណិកា ទ្វេ តុ, ទ្វេ ទ្វេ សទ្ទាទិគោចរា.

១៦៩. សព្ពំ មហគ្គតំ ចិត្តំ, បញ្ចាភិញ្ញាវិវជ្ជិតំ;

សព្ពំ លោកុត្តរញ្ចេតិ, ឯកេការម្មណំ ភវេ.

១៧០. ឯកេការម្មណំ ឆក្ក-មិទំ ញេយ្យំ វិភាវិនា;

បញ្ចារម្មណិកំ នាម, មនោធាតុត្តយំ ភវេ.

១៧១. កាមាវចរចិត្តានិ, ចត្តាលីសំ តថេកកំ;

អភិញ្ញានិ ច សព្ពានិ, ឆឡារម្មណិកានិតិ.

១៧២. ចិត្តំ នវវិធំ ហោតិ, សត្តវិញ្ញាណធាតុសុ;

បច្ឆិមញ្ច តិធា កត្វា, កុសលាកុសលាទិតោ.

១៧៣. បុញ្ញាបុញ្ញវសេនេវ, វិបាកក្រិយភេទតោ;

ឆសត្តតិវិធោ ភេទោ, មនោវិញ្ញាណធាតុយា.

១៧៤. មនោធាតុំ ទ្វិធា កត្វា, វិបាកក្រិយភេទតោ;

នវធា បុព្ពវុត្តេហិ, ទសធា ហោតិ មានសំ.

១៧៥. ធាតុទ្វយំ តិធា កត្វា, បច្ឆិមំ បុន បណ្ឌិតោ;

ឯកាទសវិធំ ចិត្តំ, ហោតីតិ បរិទីបយេ.

១៧៦. មនោវិញ្ញាណធាតុម្បិ, កុសលាកុសលាទិតោ;

ចតុធា វិភជិត្វាន, វទេ ទ្វាទសធា ឋិតំ.

១៧៧. ភវេ ចុទ្ទសធា ចិត្តំ, ចុទ្ទសដ្ឋានភេទតោ;

បដិសន្ធិភវង្គស្ស, ចុតិយាវជ្ជនស្ស ច.

១៧៨. បញ្ចន្នំ ទស្សនាទីនំ, សម្បដិច្ឆនចេតសោ;

សន្តីរណស្ស វោដ្ឋព្ព-ជវនានំ វសេន ច.

១៧៩. តទារម្មណចិត្តស្ស, តថេវ ឋានភេទតោ;

ឯវំ ចុទ្ទសធា ចិត្តំ, ហោតីតិ បរិទីបយេ.

១៨០. ភូមិបុគ្គលនានាត្ត-វសេន ច បវត្តិតោ;

ពហុធា បនិទំ ចិត្តំ, ហោតីតិ ច វិភាវយេ.

១៨១. ឯកវិធាទិនយេ បនិមស្មិំ,

យោ កុសលោ មតិមា ឥធ ភិក្ខុ;

តស្សភិធម្មគតា បន អត្ថា,

ហត្ថគតាមលកា វិយ ហោន្តិ.

ឥតិ អភិធម្មាវតារេ ឯកវិធាទិនិទ្ទេសោ នាម

ចតុត្ថោ បរិច្ឆេទោ.