៤. វីថិបរិកម្មកថា

១២៦. បឋមាវជ្ជនំ បញ្ច-ទសន្នំ បរតោ ភវេ;

ទុតិយាវជ្ជនំ ហោតិ, ឯកវីសតិតោ បរំ.

១២៧. ឯកម្ហា បញ្ចវិញ្ញាណំ, បញ្ចម្ហា សម្បដិច្ឆនំ;

សុខសន្តីរណំ ហោតិ, បញ្ចវីសតិតោ បរំ.

១២៨. សត្តតិំសតិតោ ហោតិ, ឧបេក្ខាតីរណទ្វយំ;

វោដ្ឋព្ពនសរូបានំ, ទ្វិន្នំ កាមជវា បរំ.

១២៩. មគ្គាភិញ្ញា បរំ ទ្វិន្នំ, តិណ្ណន្នំ លោកិយប្បនា;

ផលា ចតុន្នំ បញ្ចន្នំ, ឧបរិដ្ឋផលទ្វយំ.

១៣០. ភវន្តិ ចត្តាលីសម្ហា, សុខបាកា ទ្វិហេតុកា;

តថេកចត្តាលីសម្ហា, ឧបេក្ខាយ សមាយុតា.

១៣១. ហោន្តិ សត្តតិតោ កាមេ, សុខបាកា តិហេតុកា;

ទ្វាសត្តតិម្ហា ជាយន្តិ, ឧបេក្ខាសហិតា បន.

១៣២. ឯកូនសដ្ឋិតោ រូប-បាកា បាកា អរូបិនោ;

កមាដ្ឋចត្តាលីសម្ហា, តថេកទ្វិតិហីនតោ.

១៣៣. បុព្ពសង្គហមិច្ចេវំ, វិគណេត្វា វិចក្ខណោ;

បរសង្គហសង្ខ្យាទិំ, វិភាវេយ្យ វិសារទោ.

១៣៤. បញ្ចទ្វារាវជ្ជនតោ, ទស ចិត្តានិ ទីបយេ;

សេសាវជ្ជនតោ បញ្ចចត្តាលីសន្តិ ភាសិតំ.

១៣៥. បញ្ចវិញ្ញាណតោ បាបវិបាកា សម្បដិច្ឆនា;

បរមេកំ ទ្វយំ បុញ្ញវិបាកា សម្បដិច្ឆនា.

១៣៦. សន្តីរណា ទ្វិហេតុម្ហា, បាកា ទ្វាទស ជាយរេ;

តិហេតុកាមបាកម្ហា, ឯកវីសតិ លព្ភរេ.

១៣៧. រូបាវចរបាកម្ហា, បរមេកូនវីសតិ;

នវដ្ឋារូបបាកម្ហា, សត្ត ឆាបិ យថាក្កមំ.

១៣៨. បដិឃម្ហា តុ សត្តេវ, សិតម្ហា តេរសេរិតា;

បាបបុញ្ញទ្វិហេតុម្ហា, ឯកវីសតិ ភាវយេ.

១៣៩. ទ្វិហេតុកាមក្រិយតោ, អដ្ឋារស ឧបេក្ខកា;

សត្តរស សុខោបេតា, វិភាវេយ្យ វិចក្ខណោ.

១៤០. កាមបុញ្ញតិហេតុម្ហា, តេត្តិំសេវ ឧបេក្ខកា;

តេបញ្ញាស សុខោបេតា, ភវន្តីតិ បកាសិតំ.

១៤១. តិហេតុកាមក្រិយតោ, ចតុវីសតិបេក្ខកា;

សុខិតម្ហា តុ ទីបេយ្យ, បញ្ចវីសតិ បណ្ឌិតោ.

១៤២. ទសរូបជវម្ហេកា-ទសទ្វាទស តេរស;

យថាក្កមំ បញ្ចទស, អារុប្បា បរិទីបយេ.

១៤៣. ផលម្ហា ចុទ្ទសេវាហុ, មគ្គម្ហា តុ សកំ ផលំ;

បរំ សង្គហមិច្ចេវំ, វិគណេយ្យ វិសារទោ.

១៤៤. បុព្ពាបរសមោធាន-មិតិ ញត្វា តតោ បរំ;

វត្ថុវីថិសមោធានំ, យថាសម្ភវមុទ្ទិសេ.

១៤៥. បញ្ច វត្ថូនិ និស្សាយ, កមតោ បញ្ចមានសា;

តេត្តិំស បន និស្សាយ, ហទយំ មានសា សិយុំ.

១៤៦. កាមបាកមនោធាតុ-ហសិតុប្បាទមានសា;

ទោសមូលានិ មគ្គោ ច, រូបជ្ឈានាវ សព្ពថា.

១៤៧. ទសាវសេសាបុញ្ញានិ, កាមបុញ្ញមហាក្រិយា;

វោដ្ឋព្ពារូបជវនំ, សត្ត លោកុត្តរានិ ច.

១៤៨. ទ្វេចត្តាលីស ចិត្តានិ, បញ្ចវោការភូមិយំ;

និស្សាយ ហទយំ ហោន្តិ, អរូបេ និស្សយំ វិនា.

១៤៩. អារុប្បបាកា ចត្តារោ, អនិស្សាយេតិ សព្ពថា;

វិត្ថារេនដ្ឋធា ភិន្នំ, សង្ខេបា តិវិធំ ភវេ.

១៥០. តេចត្តាលីស និស្សាយ, អនិស្សាយ ចតុព្ពិធំ;

និស្សិតានិស្សិតា សេសា, ទ្វេចត្តាលីស មានសា.

១៥១. បញ្ច ចិត្តប្បនា ហោន្តិ, កមេនេកេកវីថិយំ;

មនោធាតុត្តិកំ នាម, បញ្ចទ្វារិកមីរិតំ.

១៥២. សុខតីរណវោដ្ឋព្ព-បរិត្តជវនា បន;

ឯកតិំសាបិ ជាយន្តេ, ឆសុ វីថីសុ សម្ភវា.

១៥៣. មហាបាកា បនដ្ឋាបិ, ឧបេក្ខាតីរណទ្វយំ;

ឆសុ ទ្វារេសុ ជាយន្តិ, ទស មុត្តា ច វីថិយា.

១៥៤. ចុតិសន្ធិភវង្គានំ, វសា បាកា មហគ្គតា;

នវ វីថិវិមុត្តាតិ, ទសធា វីថិសង្គហោ.

១៥៥. ឯកទ្វារិកចិត្តានិ, បញ្ចឆទ្វារិកា តថា;

ឆទ្វារិកវិមុត្តា ច, វិមុត្តាតិ ច សព្ពថា.

១៥៦. ឆត្តិំស តយេកតិំស, ទស ចេវ នវេតិ ច;

ញត្វា វីថិសមោធានំ, គោចរញ្ច សមុទ្ទិសេ.

១៥៧. កមតោ បញ្ចវិញ្ញាណា, លោកុត្តរមហគ្គតា;

អភិញ្ញាវជ្ជិតា សព្ពា, បញ្ចតាលីស មានសា.

១៥៨. យថាសម្ភវតោ ហោន្តិ, រូបាទេកេកគោចរា;

បញ្ចគោចរមីរេន្តិ, មនោធាតុត្តិកំ បន.

១៥៩. សន្តីរណមហាបាកា, បរិត្តជវនានិ ច;

វោដ្ឋព្ពនមភិញ្ញា ច, តេចត្តាលីស សម្ភវា.

១៦០. ឆារម្មណេសុ ហោន្តីតិ, អដ្ឋធា តិវិធា បុន;

ឯការម្មណចិត្តានិ, បញ្ចឆារម្មណានិ ច.

១៦១. សង្ខេបា មានសា បញ្ច-ចត្តាលីស តយោ តថា;

តេចត្តាលីស ចេវេតិ, សត្តធាបិ សិយុំ កថំ.

១៦២. កាមបាកមនោធាតុ-ហសិតុប្បាទមានសា;

បញ្ចវីស យថាយោគំ, បរិត្តារម្មណា មតា.

១៦៣. កសិណុគ្ឃាដិមាកាសំ, បឋមារុប្បមានសំ;

តស្សេវ នត្ថិភាវំ តុ, តតិយារុប្បកំ តថា.

១៦៤. អាលម្ពិត្វា បវត្តន្តិ, អារុប្បា កមតោ តតោ;

ទុតិយញ្ច ចតុត្ថញ្ច, ឆ មហគ្គតគោចរា.

១៦៥. អប្បមាណសមញ្ញា តេ, និព្ពានេ បន គោចរេ;

អដ្ឋ លោកុត្តរា ធម្មា, និយមេន វវត្ថិតា.

១៦៦. កសិណាសុភកោដ្ឋាសេ,

អានាបានេ ច យោគិនោ;

បដិភាគនិមិត្តម្ហិ,

អប្បមញ្ញានុយុញ្ជតោ.

១៦៧. សត្តបណ្ណត្តិយញ្ចេវ, រូបជ្ឈានំ បវត្តតិ;

យថាវុត្តនិមិត្តម្ហិ, សេសមារុប្បកន្តិ ច.

១៦៨. អភិញ្ញាវជ្ជិតា ឯកវីស មហគ្គតា សព្ពា;

សព្ពេ បណ្ណត្តិសង្ខាតេ, នវត្តព្ពេ បវត្តរេ.

១៦៩. ជាយន្តាកុសលា ញាណវិប្បយុត្តជវា តថា;

អប្បមាណំ វិនា វីស, បរិត្តាទីសុ តីសុបិ.

១៧០. តិហេតុកាមបុញ្ញានិ, បុញ្ញាភិញ្ញា ច បញ្ចិមេ;

ចតូសុបិ បវត្តន្តិ, អរហត្តទ្វយំ វិនា.

១៧១. ក្រិយាភិញ្ញា ច វោដ្ឋព្ពំ, ក្រិយាកាមេ តិហេតុកា;

ឆ សព្ពត្ថាបិ ហោន្តីតិ, សត្តធា មានសា ឋិតា.

១៧២. ឯកតិច្ចតុកោដ្ឋាសគោចរា តិវិធា បន;

សមសដ្ឋិ តថា វីស, កមេនេកាទសេតិ ច.

១៧៣. បញ្ចទ្វារេសុ បញ្ចាបិ, បច្ចុប្បន្នាវ គោចរា;

តេកាលិកា នវត្តព្ពា, មនោទ្វារេ យថារហំ.

១៧៤. អជ្ឈត្តា ច ពហិទ្ធា ច, បញ្ចទ្វារេសុ គោចរា;

មនោទ្វារេ នវត្តព្ពោ, នត្ថិភាវោបិ លព្ភតិ.

១៧៥. បញ្ចទ្វារេសុ បញ្ចន្ន-មេកមេកោ ច គោចរោ;

ឆាបិ អារម្មណា ហោន្តិ, មនោទ្វារម្ហិ សព្ពថា.

១៧៦. បញ្ចទ្វារេសុ គហិតំ, តទញ្ញម្បិ ច គោចរំ;

មនោទ្វារេ វវត្ថានំ, គច្ឆតីតិ ហិ ទេសិតំ.

១៧៧. អតីតា វត្តមានា ច, សម្ភវា កាមសន្ធិយា;

ឆទ្វារគហិតា ហោន្តិ, តិវិធា តេបិ គោចរា.

១៧៨. កម្មនិមិត្តមេវេកំ, មនោទ្វារេ ឧបដ្ឋិតំ;

នវត្តព្ពមតីតញ្ច, ធម្មារម្មណសង្គហំ.

១៧៩. អាលម្ពិត្វា យថាយោគំ, បដិសន្ធិមហគ្គតា;

អន្តេ ចុតិ ភវេ មជ្ឈេ, ភវង្គម្បិ បវត្តតីតិ.

ឥតិ ចិត្តវិភាគេ វីថិបរិកម្មកថា និដ្ឋិតា.

ចតុត្ថោ បរិច្ឆេទោ.