៣. វីថិសង្គហកថា

៨៥. ចក្ខុសោតឃានជិវ្ហា-កាយាយតន បញ្ចធា;

បសាទា ហទយញ្ចេតិ, ឆ វត្ថូនិ វិនិទ្ទិសេ.

៨៦. ចក្ខុសោតឃានជិវ្ហា-កាយទ្វារា ច បញ្ចធា;

មនោទ្វារំ ភវង្គន្តិ, ឆ ទ្វារា ចិត្តវីថិយា.

៨៧. រូបសទ្ទគន្ធរស-ផោដ្ឋព្ពា បញ្ច គោចរា;

ធម្មារម្មណបញ្ញត្តិ, ឆ ទ្វារារម្មណក្កមា.

៨៨. និមិត្តគតិកម្មានិ, កម្មមេវាថ គោចរា;

បដិសន្ធិភវង្គានំ, ចុតិយា ច យថារហំ.

៨៩. មរណាសន្នសត្តស្ស, យថោបដ្ឋិតគោចរំ;

ឆទ្វារេសុ តមារព្ភ, បដិសន្ធិ ភវន្តរេ.

៩០. ឯកចិត្តក្ខណា ហោតិ, យាវជីវំ តតោ បរំ;

ភវង្គំ បរិយោសានេ, ចុតិ ចេកក្ខណា ភវេ.

៩១. ទុហេតាហេតុចុតិយា, កាមាវចរសន្ធិយោ;

តិហេតុកាមចុតិយា, សព្ពាបិ បដិសន្ធិយោ.

៩២. រូបាវចរចុតិយា, សហេតុបដិសន្ធិយោ;

អារុប្បតោបរិ កាមេ, តត្ថ វាបិ តិហេតុកា.

៩៣. បដិសន្ធិ ភវង្គញ្ច, ឯកមេវេកជាតិយំ;

ចុតិ ចារម្មណញ្ចស្ស, ឯវមេវ យថារហំ.

៩៤. រូបាទារម្មណេ ចក្ខុ-ប្បសាទាទិម្ហិ ឃដ្ដិតេ;

មជ្ឈេ ភវង្គំ ឆិន្ទិត្វា, វីថិ នាម បវត្តតិ.

៩៥. អាវជ្ជបញ្ចវិញ្ញាណសម្បដិច្ឆនតីរណា;

វោដ្ឋព្ពកាមជវនតទារម្មណនាមកា.

៩៦. សត្តេវ ឋានសង្ខេបា, បញ្ចទ្វារិកមានសា;

ចតុបញ្ញាស សព្ពេបិ, វិត្ថារេន សរូបតោ.

៩៧. អាវជ្ជសព្ពជវនតទារម្មណនាមកា;

សត្តសដ្ឋិ សរូបេន, មនោទ្វារិកមានសា.

៩៨. ឥដ្ឋេ អារម្មណេ ហោន្តិ, បុញ្ញបាកានិ សព្ពថា;

អនិដ្ឋេ បាបបាកានិ, និយមោយំ បកាសិតោ.

៩៩. តត្ថាបិ អតិឥដ្ឋម្ហិ, តទារម្មណតីរណំ;

សោមនស្សយុតំ ឥដ្ឋមជ្ឈត្តម្ហិ ឧបេក្ខិតំ.

១០០. គោចរេតិបរិត្តម្ហិ, អតិអប្បាយុកេ បន;

ភវង្គមេវ ចលតិ, មោឃវារោតិ សោ កតោ.

១០១. វោដ្ឋព្ពនំ បរិត្តម្ហិ, ទ្វត្តិក្ខត្តុំ បវត្តតិ;

តតោ ភវង្គបាតោវ, សោបិ មោឃោតិ វុច្ចតិ.

១០២. ជវនញ្ច មហន្តម្ហិ, ជវិត្វាន តតោ បរំ;

ន សម្ភោតិ តទាលម្ពំ, សោបិ មោឃោតិ វុច្ចតិ.

១០៣. គោចរេតិមហន្តម្ហិ, អតិទីឃាយុកេ បន;

សម្ភោតិ ច តទាលម្ពំ, សម្បុណ្ណោតិ បវុច្ចតិ.

១០៤. គោចរេតិមហន្តម្ហិ, តទារម្មណសម្ភវោ;

បញ្ចទ្វារេ មនោទ្វារេ, វិភូតេ បន គោចរេ.

១០៥. កាមាវចរសត្តានំ, កាមាវចរគោចរេ;

បរិត្តជវនេស្វេវ, តទារម្មណមុទ្ទិសេ.

១០៦. នាតិតិក្ខេ នាតិសីឃេ, នាតិតេជុស្សទេ ជវេ;

សមមន្ទប្បវត្តម្ហិ, តទារម្មណមិច្ឆិតំ.

១០៧. សុខោបេតំ តទាលម្ពំ, ឧបេក្ខាក្រិយតោ បរំ;

ន ហោតុបេក្ខាសហិតំ, សុខិតក្រិយតោ តថា.

១០៨. ន ហោតិ ទោមនស្សម្ហា, សោមនស្សិកមានសំ;

តទារម្មណមញ្ញញ្ច, ភវង្គំ ចុតិ វា តថា.

១០៩. រជ្ជនាទិវសេនេត្ថ, ជវនាកុសលំ ភវេ;

កុសលំ បន សម្ភោតិ, សទ្ធាបញ្ញាទិសម្ភវេ.

១១០. តទេវ វីតរាគានំ, ក្រិយា នាម បវុច្ចតិ;

អវិបាកតមាបន្នំ, វដ្ដមូលបរិក្ខយា.

១១១. អប្បនាជវនំ សេសំ, មហគ្គតមនុត្តរំ;

ឆព្ពីសតិ យថាយោគំ, អប្បនាវីថិយំ ភវេ.

១១២. បរិកម្មំ ករោន្តស្ស, កសិណាទិកគោចរេ;

សុសមាហិតចិត្តស្ស, ឧបចារសមាធិនា.

១១៣. បរិកម្មោបចារានុលោមគោត្រភុតោ បរំ;

បញ្ចមំ វា ចតុត្ថំ វា, ជវនំ ហោតិ អប្បនា.

១១៤. បុថុជ្ជនាន សេក្ខានំ, កាមបុញ្ញតិហេតុតោ;

តិហេតុកាមក្រិយតោ, វីតរាគានមប្បនា.

១១៥. តត្រាបិ សុខិតជវំ, សុខិតទ្វយតោ បរំ;

ឧបេក្ខិតម្ហា សម្ភោតិ, ឧបេក្ខេកគ្គតាយុតំ.

១១៦. បញ្ច វារេ ឆ វា សត្ត, បរិត្តជវនំ ភវេ;

សកិំ ទ្វេ វា តទាលម្ពំ, សកិមាវជ្ជនាទយោ.

១១៧. អប្បនាជវនញ្ចេកំ, បឋមុប្បត្តិយំ បន;

តតោ បរំ វសីភូតំ, អហោរត្តំ បវត្តតិ.

១១៨. សកិំ ទ្វេ វា និរោធស្ស, សមាបត្តិក្ខណេ បន;

ចតុត្ថារុប្បជវនំ, តតោ ចិត្តំ និរុជ្ឈតិ.

១១៩. និរោធា វុដ្ឋហន្តស្ស, ឧបរិដ្ឋផលទ្វយំ;

បញ្ចាភិញ្ញា តថា មគ្គា, ឯកចិត្តក្ខណា មតា.

១២០. ផលមេកទ្វយំ តថា, តិស្សោ វា មគ្គវីថិយំ;

សមាបត្តិក្ខណេ តម្បិ, អហោរត្តំ បវត្តតិ.

១២១. បញ្ចទ្វារេ ន លព្ភន្តិ, លោកុត្តរមហគ្គតា;

វីថិមុត្តមនោធាតុ, បញ្ច ចិត្តានិ អន្តិមេ.

១២២. បរិត្តានេវ សព្ពានិ, បញ្ចទ្វារេសុ សម្ភវា;

មនោទ្វារម្ហិ វោដ្ឋព្ព-តទាលម្ពជវា សិយុំ.

១២៣. ឃានជិវ្ហាកាយវីថិ, តទារម្មណមេវ ច;

រូបេ នត្ថិ តថារូបេ, ចក្ខុសោតាបិ វីថិយោ.

១២៤. សព្ពាបិ វីថិយោ កាមេ,

រូបេ តិស្សោ បកាសិតា;

ឯកា វីថិ បនារូបេ,

នត្ថាសញ្ញីសុ កាចិបិ.

១២៥. សត្តាបិ វីថិចិត្តានិ, កាមេ រូបេ ឆ សម្ភវា;

អរូបេ ទ្វេ មនោទ្វារា-វជ្ជនំ ជវនន្តិ ចាតិ.

ឥតិ ចិត្តវិភាគេ វីថិសង្គហកថា និដ្ឋិតា.

តតិយោ បរិច្ឆេទោ.