២. បកិណ្ណកកថា

៤៦. កុសលានេកវីសេវ, ទ្វាទសាកុសលានិ ច;

ឆត្តិំសតិ វិបាកានិ, ក្រិយាចិត្តានិ វីសតិ.

៤៧. កាមេសុ ចតុបញ្ញាស, រូបេសុ ទស បញ្ច ច;

ទ្វាទសារុប្បចិត្តានិ, អដ្ឋានុត្តរមានសា.

៤៨. កាមេ តេវីស បាកានិ, បុញ្ញាបុញ្ញានិ វីសតិ;

ឯកាទស ក្រិយា ចេតិ, ចតុបញ្ញាស សព្ពថា.

៤៩. បុញ្ញបាកក្រិយាភេទា, តយោ រូបេសុ បញ្ចកា;

អារុប្បេតិ ចតុក្កានិ, សត្តវីស មហគ្គតា.

៥០. ចតុមគ្គផលានំ តុ, វសេនដ្ឋបិ ឈានតោ;

ទសោភយម្បិ មិស្សេត្វា, តាលីសានុត្តរា សិយុំ.

៥១. បុញ្ញបាកក្រិយាបាបា, សន្តិ កាមេ មហគ្គតេ;

បាបំ នត្ថិ ក្រិយាបាបា, ន វិជ្ជន្តិ អនុត្តរេ.

៥២. បាបាហេតុកមុត្តានិ, អនវជ្ជានិ សព្ពថា;

ឯកូនសដ្ឋិ ចិត្តានិ, បុញ្ញបាកក្រិយាវសា.

៥៣. កម្មចិត្តានិ តេត្តិំស, បុញ្ញាបុញ្ញានិ សព្ពថា;

ឆត្តិំស តេសំ បាកានិ, ក្រិយា វីស ន ចោភយំ.

៥៤. ចក្ខុវិញ្ញាណធាតាទិ, បញ្ចវិញ្ញាណនាមកា;

បញ្ចទ្វារាវជ្ជនញ្ច, ទុវិធំ សម្បដិច្ឆនំ.

៥៥. មនោធាតុត្តយំ នាម, ឆសត្តតិ តតោ បរេ;

មនោវិញ្ញាណធាតូតិ, សត្តធា ធាតុភេទតោ.

៥៦. មនោវិញ្ញាណធាតុញ្ច, មនោធាតុត្តយំ តថា;

កត្វា មនោវិញ្ញាណន្តិ, ឆ វិញ្ញាណា បកិត្តិតា.

៥៧. អាវជ្ជនំ ទស្សនញ្ច, សវនំ ឃាយនំ តថា;

សាយនំ ផុសនញ្ចេវ, សម្បដិច្ឆនតីរណំ.

៥៨. វោដ្ឋព្ពនញ្ច ជវនំ, តទារម្មណនាមកំ;

ភវង្គំ ចុតិ សន្ធីតិ, ចិត្តំ ចុទ្ទសធា ឋិតំ.

៥៩. អាវជ្ជនាទយោ ទ្វេ ទ្វេ, យុគា សត្ត យថាក្កមំ;

តីណិ តីរណចិត្តានិ, ឯកំ វោដ្ឋព្ពនំ មតំ.

៦០. កុសលាកុសលា សព្ពេ, ផលា ចាវជ្ជនំ វិនា;

ក្រិយា ច បញ្ចបញ្ញាស, ជវនន្តិ បវុច្ចរេ.

៦១. សន្តីរណមហាបាកា, តទារម្មណនាមកា;

ឯកាទស បវត្តន្តិ, ជវនារម្មណេ យតោ.

៦២. មហគ្គតមហាបាកា, ឧបេក្ខាតីរណទ្វយំ;

ចុតិសន្ធិភវង្គានិ, ចិត្តានេកូនវីសតិ.

៦៣. ជវនាវជ្ជនាទីនិ, វោដ្ឋព្ពសុខតីរណា;

មហគ្គតមហាបាកា, ឧបេក្ខាតីរណាតិ ច.

៦៤. អដ្ឋសដ្ឋិ តថា ទ្វេ ច, នវដ្ឋ ទ្វេ យថាក្កមំ;

ឯកទ្វិតិចតុប្បញ្ចកិច្ចដ្ឋានានិ និទ្ទិសេ.

៦៥. រូបបាកា មហាបាកា, មនោធាតុ ច តីរណំ;

រូបំ ជនេន្តិ ឯកូនវីសតិ នេតរទ្វយំ.

៦៦. អភិញ្ញាវជ្ជិតា សព្ពេ, អប្បនាជវនា បន;

រូបំ ជនេន្តិ ឆព្ពីស, បណាមេន្តិរិយាបថំ.

៦៧. អភិញ្ញាទ្វយវោដ្ឋព្ពបរិត្តជវនា បន;

ទ្វត្តិំស រូបវិញ្ញត្តិឥរិយាបថសាធកា.

៦៨. បញ្ចវិញ្ញាណមារុប្ប-វិបាកា សព្ពសន្ធិយោ;

ចុតិ ខីណាសវស្សេតិ, សោឡសេតេ ន កិញ្ចិបិ.

៦៩. រូបំ ជនេន្តិ ចិត្តានិ, សត្តសត្តតិ សព្ពថា;

អដ្ឋបញ្ញាស ចិត្តានិ, បណាមេន្តិរិយាបថំ.

៧០. ទ្វត្តិំស ចតុវិញ្ញត្តិំ, សមុដ្ឋាបេន្តិ មានសា;

ន ជនេន្តិ តស្សម្បេកំ, យថាវុត្តានិ សោឡស.

៧១. សោមនស្សសហគតា, បរិត្តជវនា បន;

ហសនម្បិ ជនេន្តីតិ, ចតុកិច្ចានិ តេរស.

៧២. សព្ពម្បិ បញ្ចវោការេ, កិច្ចមេតំ បកាសិតំ;

អារុប្បេ បន សព្ពម្បិ, រូបាយត្តំ ន វិជ្ជតិ.

៧៣. អសញ្ញីនំ តុ សព្ពានិ, ចិត្តានេវ ន លព្ភរេ;

រូបក្ខន្ធោវ តេសំ តុ, អត្តភាវោតិ វុច្ចតិ.

៧៤. បាណាតិបាតថេយ្យាទិវសេនោបចិតំ បន;

ឧទ្ធច្ចរហិតាបុញ្ញំ, ចតុរាបាយភូមិយំ.

៧៥. ទត្វា សន្ធិំ បវត្តេ តុ, បញ្ចវោការភូមិយំ;

ឧទ្ធច្ចសហិតញ្ចាបិ, សត្ត បាកានិ បច្ចតិ.

៧៦. ទានសីលាទិភេទេន, បវត្តំ កុសលំ បន;

កាមេ មានសមុក្កដ្ឋំ, ចតុក្កំ តុ តិហេតុកំ.

៧៧. ទត្វា តិហេតុកំ សន្ធិំ, កាមេ សុគតិយំ បន;

សោឡស បុញ្ញបាកានិ, បវត្តេ តុ វិបច្ចតិ.

៧៨. តិហេតុកោមកំ បុញ្ញំ, ឧក្កដ្ឋញ្ច ទ្វិហេតុកំ;

ទត្វា ទ្វិហេតុកំ សន្ធិំ, កាមេ សុគតិយំ តថា.

៧៩. បវត្តេ បន ញាណេន, សម្បយុត្តំ វិវជ្ជិយ;

ទ្វាទស បុញ្ញបាកានិ, វិបច្ចតិ យថារហំ.

៨០. ទ្វិហេតុកោមកំ បុញ្ញំ, បដិសន្ធិមហេតុកំ;

ទេតិ មានុសកេ ចេវ, វិនិបាតាសុរេ តថា.

៨១. អដ្ឋាហេតុកបាកានិ, បវត្តេ តុ វិបច្ចរេ;

ចត្តារិបិ ចតុក្កានិ, បញ្ចវោការភូមិយំ.

៨២. ភាវនាមយបុញ្ញំ តុ, មហគ្គតមនុត្តរំ;

យថាភូមិនិយាមេន, ទេតិ បាកំ យថាសកំ.

៨៣. កដត្តារូបបាកានិ, បញ្ចវោការភូមិយំ;

អារុប្បានុត្តរេ បាកំ, តថា រូបមសញ្ញិសុ.

៨៤. បុញ្ញាបុញ្ញានិ កម្មានិ, តេត្តិំសាបិ ច យព្ពថា;

សញ្ជនេន្តិ យថាយោគំ, បដិសន្ធិបវត្តិយំ.

ឥតិ ចិត្តវិភាគេ បកិណ្ណកកថា និដ្ឋិតា.

ទុតិយោ បរិច្ឆេទោ.