១. សរូបសង្គហកថា

២. ចិត្តំ ចេតសិកំ រូបំ, និព្ពានន្តិ និរុត្តរោ;

ចតុធា ទេសយី ធម្មេ, ចតុសច្ចប្បកាសនោ.

៣. ចិត្តមេកូននវុតិវិធំ តត្ថ វិភាវយេ;

ឯកនវុតិវិធំ វា, ឯកវីសសតម្បិ វា.

៤. ទ្វេបញ្ញាស សរូបេន, ធម្មា ចេតសិកា មតា;

ចិត្តុប្បាទវសា ភិន្នា, សម្បយោគានុសារតោ.

៥. អដ្ឋវីសវិធំ រូបំ, ភូតោបាទាយភេទតោ;

ទុវិធំ រូបរូបំ តុ, អដ្ឋារសវិធំ ភវេ.

៦. និព្ពានំ បន ទីបេន្តិ, អសង្ខតមនុត្តរំ;

អត្ថនាមវសា ទ្វេធា, បញ្ញត្តីតិ បវុច្ចតិ.

៧. តេសំ ទានិ បវក្ខាមិ, វិភាគំ តុ យថាក្កមំ;

ចតុធា បរមត្ថានំ, ទ្វិធា បញ្ញត្តិយា កថំ.

៨. កុសលាទិវិភាគេន, តត្ថ ចិត្តំ ចតុព្ពិធំ;

តថា ភូមិវិភាគេន, កាមភូមាទិតោ កថំ.

៩. សោមនស្សសហគតំ, ឧបេក្ខាសហិតំ តថា;

ញាណេន សម្បយុត្តញ្ច, វិប្បយុត្តន្តិ ភេទិតំ.

១០. អសង្ខារំ សសង្ខារមិតិ ភិន្នំ បុនដ្ឋធា;

កាមាវចរកុសលំ, កាមេ សុគតិសាធកំ.

១១. តក្កចារបីតិសុខ-ចិត្តស្សេកគ្គតាយុតំ;

បឋមជ្ឈានកុសលំ, បញ្ចង្គិកមុទាហដំ.

១២. វិតក្កហីនំ ទុតិយំ, ឈានំ តុ ចតុរង្គិកំ;

វិចារហីនំ តតិយំ, ឈានំ បន តិវង្គិកំ.

១៣. បីតិហីនំ ចតុត្ថញ្ច, ឧបេក្ខេកគ្គតាយុតំ;

បញ្ចមញ្ច បកាសេន្តិ, ឧភយម្បិ ទុវង្គិកំ.

១៤. ឯវំ ឈានង្គភេទេន, ចិត្តំ បញ្ចវិធំ ភវេ;

រូបាវចរកុសលំ, រូបភូមិបវត្តកំ.

១៥. អាកាសានញ្ចាយតនំ, កុសលំ បឋមំ ភវេ;

វិញ្ញាណញ្ចាយតនន្តិ, ទុតិយំ តតិយំ តថា.

១៦. អាកិញ្ចញ្ញាយតនំ តុ, ចតុត្ថំ បន មានសំ;

នេវសញ្ញានាសញ្ញាយ-តនញ្ចេតិ ចតុព្ពិធំ.

១៧. អារុប្បកុសលំ នាម, ឧបេក្ខេកគ្គតាយុតំ;

ទុវង្គិកមិទំ សព្ពំ, អារុប្បភវសាធកំ.

១៨. សោតាបត្តិមគ្គចិត្តំ, បឋមានុត្តរំ តថា;

សកទាគាមិ អនាគាមិ, អរហត្តន្តិ សព្ពថា.

១៩. ចតុធា មគ្គភេទេន, ឈានភេទេន បញ្ចធា;

វីសតាបរិយាបន្នកុសលំ ទ្វយមិស្សិតំ.

២០. ឥត្ថំ ភូមិវិភាគេន, កុសលំ តុ ចតុព្ពិធំ;

ឯកវីសាបិ ពាវីសំ, សត្តតិំសវិធម្បិ វា.

២១. សោមនស្សសហគតំ, ឧបេក្ខាសហិតំ តថា;

ទិដ្ឋិគតសម្បយុត្តំ, វិប្បយុត្តន្តិ ភេទិតំ.

២២. អសង្ខារំ សសង្ខារមិតិ ភិន្នំ បុនដ្ឋធា;

លោភមូលំ បកាសេន្តិ, លោភមោហទ្វិហេតុកំ.

២៣. ទោមនស្សសហគតំ, បដិឃេន សមាយុតំ;

អសង្ខារំ សសង្ខារមិតិ ភិន្នំ ទ្វិធា បន.

២៤. ទោសមូលំ បកាសេន្តិ, ទោសមោហទ្វិហេតុកំ;

វិចិកិច្ឆាសហគតំ, ឧទ្ធច្ចសហិតន្តិ ច.

២៥. ឧបេក្ខាវេទនាយុត្តំ, មោមូហំ ទុវិធំ បន;

មោហមូលំ បកាសេន្តិ, មោហេនេវេកហេតុកំ.

២៦. ទ្វាទសាកុសលា នាម, ចតុរាបាយសាធកា;

ឯតេ សុគតិយញ្ចាបិ, វិបត្តិផលទាយកា.

២៧. ចក្ខុសោតឃានជិវ្ហា-កាយវិញ្ញាណនាមកា;

បញ្ចវិញ្ញាណយុគឡា, យុគឡំ សម្បដិច្ឆនំ.

២៨. សន្តីរណទ្វយញ្ចេវ, ឧបេក្ខាសហិតំ តថា;

បុញ្ញាបុញ្ញវសេនេវ, វិបាកា ទុវិធា ឋិតា.

២៩. ឧបេក្ខាសហិតា តត្ថ, មានសា ទ្វាទសេរិតា;

កាយវិញ្ញាណយុគឡំ, សុខទុក្ខយុតំ កមា.

៣០. សោមនស្សសហគតំ, យំ សន្តីរណមានសំ;

តំ បុញ្ញបាកមេវាហុ, បាបបាកំ ន វិជ្ជតិ.

៣១. បញ្ចទ្វារមនោទ្វារ-វសេន ទុវិធំ បន;

ឧបេក្ខាវេទនាយុត្តំ, ក្រិយាវជ្ជននាមកំ.

៣២. សោមនស្សសហគតំ, ហសិតុប្បាទមានសំ;

ក្រិយាជវនមិច្ចេវំ, តិវិធាហេតុកក្រិយា.

៣៣. អដ្ឋេវ បុញ្ញបាកានិ, បាបបាកានិ សត្តធា;

ក្រិយចិត្តានិ តីណីតិ, អដ្ឋារស អហេតុកា.

៣៤. សបុញ្ញេហិ សមានា ច, មហាបាកមហាក្រិយា;

មហគ្គតក្រិយា បាកា, ផលចិត្តានិ ច កមា.

៣៥. ឥត្ថមេកូននវុតិ-វិធំ ចិត្តំ ភវេ តថា;

ឯកនវុតិវិធំ វា, ឯកវីសសតម្បិ វា.

៣៦. តក្កចារបីតិសុខចិត្តស្សេកគ្គតាយុតំ;

សោតាបត្តិមគ្គចិត្តំ, បឋមជ្ឈានិកំ មតំ.

៣៧. ទុតិយំ តក្កតោ ហីនំ, តតិយំ តុ វិចារតោ;

ចតុត្ថំ បីតិតោ ហីនំ, ឧបេក្ខេកគ្គតាយុតំ.

៣៨. បញ្ចមន្តិ ច បញ្ចេតេ, បឋមានុត្តរា មតា;

ទិដ្ឋិកង្ខាសីលព្ពតបរាមាសប្បហាយិនោ.

៣៩. តថេវ សកទាគាមិមគ្គចិត្តញ្ច បញ្ចធា;

រាគទោសមោហត្តយតនុត្តករមីរិតំ.

៤០. កាមទោសសមុគ្ឃាតករំ និរវសេសតោ;

តតិយានុត្តរញ្ចាបិ, កុសលំ បញ្ចធា តថា.

៤១. រូបរាគារូបរាគមានុទ្ធច្ចាបិ ចាបរា;

អវិជ្ជា ចេតិ បញ្ចុទ្ធំភាគិយានមសេសតោ.

៤២. សំយោជនានំ សេសានំ, សមុគ្ឃាតករំ បរំ;

ចតុត្ថានុត្តរំ មគ្គចិត្តំ បញ្ចវិធន្តិ ច.

៤៣. ចត្តារិ បញ្ចកានេវ, មគ្គេសុ ច ផលេសុ ច;

សេសានិ ចេកាសីតីតិ, ឯកវីសសតំ ភវេ.

៤៤. លោកុត្តរានំ អដ្ឋន្នំ, ឥច្ចេវំ បញ្ចធា បុន;

ឈានង្គមគ្គពោជ្ឈង្គ-វិភាគាយ យថារហំ.

៤៥. បាទកជ្ឈានមាមដ្ឋឈានំ អជ្ឈាសយោ តថា;

វុដ្ឋានគាមិនី ចេវ, និយាមេតិ វិបស្សនាតិ.

ឥតិ ចិត្តវិភាគេ សរូបសង្គហកថា និដ្ឋិតា.

បឋមោ បរិច្ឆេទោ.