២៩. នាមបញ្ញត្តិកថា

១១១៤. នាមវោហារសង្កេតការណោបនិពន្ធនា;

យថាវុត្តត្ថសទ្ទានំ, អន្តរា ចិន្តនា គតា.

១១១៥. នាមបញ្ញត្តិ នាមាយំ, អត្ថសទ្ទវិនិស្សដា;

តំទ្វយាពទ្ធសង្កេតញេយ្យាការោបលក្ខិតា.

១១១៦. យា គយ្ហតិ នាមឃោសគោចរុប្បន្នវីថិយា;

បវត្តានន្តរុប្បន្ន-មនោទ្វារិកវីថិយា.

១១១៧. មញ្ចបីឋាទិសទ្ទំ ហិ, សោតវិញ្ញាណវីថិយា;

សុត្វា តមេវ ចិន្តេត្វា, មនោទ្វារិកវីថិយា.

១១១៨. តតោ សង្កេតនិប្ផន្នំ, នាមំ ចិន្តាយ គយ្ហតិ;

នាមបញ្ញត្តិអត្ថា តុ, តតោ គយ្ហន្តិ សម្ភវា.

១១១៩. សទ្ទនាមត្ថបញ្ញត្តិបរមត្ថវសេន ហិ;

ចតុធា តិវិធា វាថ, ចិន្តនា តត្ថ ឥច្ឆិតា.

១១២០. ឥត្ថមដ្ឋកថាមគ្គំ, វណ្ណេន្តេន ហិ ទស្សិតោ;

នយោ អាចរិយេនេតិ, វិភាគោយំ បកាសិតោ.

១១២១. នត្ថញ្ញា កាចិ វិញ្ញត្តិ, វិការសហិតោ បន;

សទ្ទោវ នាមបញ្ញត្តិ, ឥច្ចេកច្ចេហិ វណ្ណិតំ.

១១២២. តទេតំ នាមបញ្ញត្តិភាវេនេកវិធម្បិ ច;

នេរុត្តិកយាទិច្ឆកវសា នាមំ ទ្វិធា ភវេ.

១១២៣. សញ្ញាសុ ធាតុរូបានិ, បច្ចយញ្ច តតោ បរំ;

កត្វា វណ្ណាគមាទិញ្ច, សទ្ទលក្ខណសាធិតំ.

១១២៤. នេរុត្តិកមុទីរេន្តិ, នាមំ យាទិច្ឆកំ បទំ;

យទិច្ឆាយ កតមត្តំ, ព្យញ្ជនត្ថវិវជ្ជិតំ.

១១២៥. តិវិធម្បិ តទន្វត្ថកាទិមញ្ចោបចារិមំ;

និព្ពចនត្ថសាបេក្ខំ, តត្ថាន្វត្ថមុទីរិតំ.

១១២៦. យទិច្ឆាកតសង្កេតំ, កាទិមញ្ចោបចារិមំ;

អតម្ភូតស្ស តព្ភាវវោហារោតិ បវុច្ចតិ.

១១២៧. តថា សាមញ្ញនាមញ្ច, គុណនាមញ្ច កិត្តិមំ;

ឱបបាតិកមិច្ចេវំ, នាមំ ហោតិ ចតុព្ពិធំ.

១១២៨. មហាជនសម្មតញ្ច, អន្វត្ថញ្ចេវ តាទិសំ;

តីណិ នាមានិ ចន្ទាទិនាមំ តត្ថោបបាតិកំ.

១១២៩. យាទិច្ឆកមាវត្ថិកំ, នេមិត្តកមថាបរំ;

លិង្គិកំ រុឡ្ហិកញ្ចេតិ, នាមំ បញ្ចវិធំ ភវេ.

១១៣០. យាទិច្ឆកំ យថាវុឌ្ឍំ, វច្ឆទម្មាទិកំ បន;

អាវត្ថិកំ នេមិត្តកំ, សីលវាបញ្ញវាទិកំ.

១១៣១. លិង្គិកំ ទិដ្ឋលិង្គំ តុ, ទណ្ឌីឆត្តីតិអាទិកំ;

រុឡ្ហិកំ លេសមត្តេន, រុឡ្ហំ គោមហិំសាទិកំ.

១១៣២. វិជ្ជមានាវិជ្ជមាន-បញ្ញត្តោភយមិស្សិតា;

វិភត្តា នាមបញ្ញត្តិ, ឆព្ពិធា ហោតិ តត្ថ ហិ.

១១៣៣. វិជ្ជមានបញ្ញត្តីតិ, វិជ្ជមានត្ថទីបិតា;

វុច្ចតិ ខន្ធាយតន-ធាតុបញ្ចិន្ទ្រិយាទិកា.

១១៣៤. អវិជ្ជមានបញ្ញត្តិ-នាមិកា បរមត្ថតោ;

អវិជ្ជមានមញ្ចាទិ, អត្ថបញ្ញត្តិទីបិតា.

១១៣៥. វិជ្ជមានេន អវិជ្ជ-មានបញ្ញត្តិនាមិកា;

តេវិជ្ជោ ឆឡភិញ្ញោ ច, សីលវា បញ្ញវាបិ ច.

១១៣៦. អវិជ្ជមានេន វិជ្ជ-មានបញ្ញត្តិនាមិកា;

ឥត្ថិរូបំ ឥត្ថិសទ្ទោ, ឥត្ថិចិត្តន្តិអាទិកា.

១១៣៧. វិជ្ជមានេន តុ វិជ្ជ-មានបញ្ញត្តិនាមិកា;

ចក្ខុវិញ្ញាណំ ច ចក្ខុ-សម្ផស្សោ ចេវមាទិកា.

១១៣៨. អវិជ្ជមានេនាវិជ្ជ-មានបញ្ញត្តិនាមិកា;

ខត្តិយបុត្តោ ព្រាហ្មណ-បុត្តោ ឥច្ចេវមាទិកា.

១១៣៩. ឥតិ វុត្តានុសារេន, នាមបញ្ញត្តិយា ពុធោ;

សរូបំ វិសយញ្ចេវ, វិភាគញ្ច វិភាវយេ.

១១៤០. ឥច្ចេវំ បរមត្ថា ច, យថាវុត្តា ចតុព្ពិធា;

បញ្ញត្តិ ទុវិធា ចេតិ, ញេយ្យត្ថា ឆព្ពិធា មតាតិ.

ឥតិ បញ្ញត្តិវិភាគេ នាមបញ្ញត្តិកថា និដ្ឋិតា.

ឯកូនតិំសតិមោ បរិច្ឆេទោ.

និដ្ឋិតោ ច សព្ពថាបិ បញ្ញត្តិវិភាគោ.

និគមនកថា

១១៤១. សេដ្ឋេ កញ្ចិវរេ រដ្ឋេ, កាវេរិនគរេ វរេ;

កុលេ សញ្ជាតភូតេន, ពហុស្សុតេន ញាណិនា.

១១៤២. អនុរុទ្ធេន ថេរេន, អនិរុទ្ធយសស្សិនា;

តម្ពរដ្ឋេ វសន្តេន, នគរេ តញ្ជនាមកេ.

១១៤៣. តត្ថ សង្ឃវិសិដ្ឋេន, យាចិតេន អនាកុលំ;

មហាវិហារវាសីនំ, វាចនាមគ្គនិស្សិតំ.

១១៤៤. បរមត្ថំ បកាសេន្តំ, បរមត្ថវិនិច្ឆយំ;

បករណំ កតំ តេន, បរមត្ថត្ថវេទិនាតិ.

ឥតិ អនុរុទ្ធាចរិយេន រចិតោ

បរមត្ថវិនិច្ឆយោ និដ្ឋិតោ.

នមោ តស្ស ភគវតោ អរហតោ សម្មាសម្ពុទ្ធស្ស