២៨. អត្ថបញ្ញត្តិកថា

១០៨៤. តត្ថ ច បុព្ពាបរិយ-បវត្តក្ខន្ធសម្មតា;

វិញ្ញត្តិន្ទ្រិយវិប្ផារ-វិសេសោបនិពន្ធនា.

១០៨៥. ទេវយក្ខមនុស្សាទិ-នានាភេទា សលក្ខិកា;

សត្តបញ្ញត្តិ នាមាយំ, ស្វាយំ សត្តោតិ សម្មតោ.

១០៨៦. វដ្ដត្តយមុបាទាយ,

ខន្ធាយតនវុត្តិយា;

ការកោ វេទកោ វាយំ,

សន្ធាវតិ ភវេ ភវេ.

១០៨៧. តស្មា សំសារមាបន្នោ, សត្តោ នាម ស បុគ្គលោ;

អហមត្តាបរា ឥត្ថី, បុរិសោតិ ច កប្បិតោ.

១០៨៨. ស្វាយំ ខន្ធាទិតោ សត្តោ, អញ្ញោតិ ច ន វុច្ចតិ;

ខន្ធាទិវិនិមុត្តស្ស, សត្តស្សេវ អភាវតោ.

១០៨៩. ខន្ធា ខន្ធានមេវាយំ, សត្តោតិ ច ន វុច្ចតិ;

ខន្ធវោហារតោ តស្ស, អញ្ញវោហារសម្ភវា.

១០៩០. ឥច្ចេវំ ខន្ធនានត្តេ-កត្តមុត្តោបិ អត្ថតោ;

តព្ពិសេសាវចរិត-វោហារោ ច តុ ទិស្សតិ.

១០៩១. តេនាយំ បុគ្គលោ សត្តោ, ជាយតិជ្ជិយ្យតីតិ ច;

មីយតីតិ ច តស្សាយំ, សំសារោតិ បវុច្ចតិ.

១០៩២. មតោ ជាតោ ច ន ស្វេវ, ខន្ធភេទោបចារតោ;

នាបរោ ស្វេវ សន្តានភេទាភាវោបចារតោ.

១០៩៣. នានត្តេកត្តមិច្ចេវំ, បុគ្គលស្សោបចារតោ;

ឧច្ឆេទសស្សតត្តំ វា, តស្មា នោបេតិ បុគ្គលោ.

១០៩៤. ឥច្ចាយំ បុគ្គលោ នាម, សត្តោ សំសារការកោ;

ខន្ធាទិកមុបាទាយ, បញ្ញត្តោតិ បវុច្ចតិ.

១០៩៥. តស្មា បុគ្គលសង្ខាតា, សំសារោបនិពន្ធនា;

សត្តបញ្ញត្តិ នាមាតិ, វិញ្ញាតព្ពា វិភាវិនា.

១០៩៦. អជ្ឈត្តិកា ច កេសាទិកោដ្ឋាសា ពាហិរេសុ ច;

ភូមិបព្ពតបាសាណតិណរុក្ខលតាទិកា.

១០៩៧. ភូតសម្ភារនិព្ពត្តិវិភាគបរិកប្បិតា;

តមុបាទាយ សម្ភារបញ្ញត្តីតិ បវុច្ចតិ.

១០៩៨. ភូតសម្ភារសណ្ឋានវិភាគបរិកប្បិតា;

សណ្ឋានបញ្ញត្តិ នាម, ថម្ភកុម្ភាទិកា មតា.

១០៩៩. ភូតសម្ភារសង្ឃាតវិសេសបរិកប្បិតា;

សង្ឃាតបញ្ញត្តិ នាម, រថគេហាទិកា មតា.

១១០០. ភូតសម្ភារវិសេសបរិណាមបកប្បិតា;

បរិណាមបញ្ញត្តីតិ, ទធិភត្តាទិកា មតា.

១១០១. ឥត្ថមជ្ឈត្តពហិទ្ធា, ធម្មា សម្ភារសម្ភូតា;

សន្តានវុត្តិ សង្កេតសិទ្ធា បញ្ញត្តិ បញ្ចធា.

១១០២. តថា តថា សមុប្បន្នវិកប្បាភោគសម្មតា;

វិកប្បបញ្ញត្តិ នាម, កាលាកាសទិសាទិកា.

១១០៣. តំ តំ និមិត្តមាគម្ម, តតោបដ្ឋានកប្បិតា;

ឧបដ្ឋានបញ្ញត្តីតិ, បដិភាគាទិកា មតា.

១១០៤. វិសេសាការមត្តាបិ, អត្ថន្តរបកប្បិតា;

អាការបញ្ញត្តិ នាម, វិញ្ញត្តិលហុតាទិកា.

១១០៥. តំ តំ ការណមាគម្ម, តថា វោហារកប្បិតា;

វោហារបញ្ញត្តិ នាម, កថិនាបត្តិអាទិកា.

១១០៦. ពាលោ យោ សោ ច មេ អត្តា,

សោ ភវិស្សាមិ មំ ច តុ;

និច្ចោ ធុវោ សស្សតោតិ-

អាទិកា បន សព្ពថា.

១១០៧. តព្ពោហារនិមិត្តានំ, អភាវេបិ បវត្តិតោ;

អភិនិវេសបញ្ញត្តិ, នាម តិត្ថិយកប្បិតា.

១១០៨. ឥច្ចេវំ លោកសាសនតិត្ថាយតនកប្បិតា;

សន្តានមុត្តសង្កេតសិទ្ធា អត្ថាបិ បញ្ចធា.

១១០៩. សង្កានវុត្តិសន្តានមុត្តភេទវសា ទ្វិធា;

អត្ថបញ្ញត្តិ នាមាយំ, ទសធា បរិទីបិតា.

១១១០. ឥតិ វុត្តប្បការេសុ, បញ្ញត្តត្ថេសុ បណ្ឌិតា;

បញ្ញត្តិមត្តំ សន្ធាយ, វោហរន្តិ យថាកថំ.

១១១១. តទញ្ញេ បន ពាលា ច, តិត្ថិយាបិ អកោវិទា;

បញ្ញត្តិមតិធាវិត្វា, គណ្ហន្តិ បរមត្ថតោ.

១១១២. តេ តថា គហិតាការា, អញ្ញាណគហិតា ជនា;

មិច្ឆត្តាភិនិវិដ្ឋា ច, វឌ្ឍន្តិ ភវពន្ធនំ.

១១១៣. ទុវិធេសុបិ អត្ថេសុ, តស្មា បណ្ឌិតជាតិកោ;

បរមត្ថបញ្ញត្តីសុ, វិភាគមិតិ លក្ខយេតិ.

ឥតិ បញ្ញត្តិវិភាគេ អត្ថបញ្ញត្តិកថា និដ្ឋិតា.

អដ្ឋវីសតិមោ បរិច្ឆេទោ.