៥. បញ្ញត្តិវិភាគោ

១០៦២. ចិត្តំ ចេតសិកំ រូបំ, និព្ពានម្បិ ច ភាជិតំ;

តស្មា ទានិ យថាយោគំ, បញ្ញត្តិបិ បវុច្ចតិ.

១០៦៣. សា ចាយំ អត្ថបញ្ញត្តិ-នាមបញ្ញត្តិភេទតោ;

ទុវិធា ហោតិ បញ្ញត្តិ, អត្ថបញ្ញត្តិ តត្ថ ច.

១០៦៤. សត្តសម្ភារសណ្ឋាន-សង្ឃាដបរិណាមតោ;

វិកប្បុបដ្ឋានាការវោហារាភិនិវេសតោ.

១០៦៥. តថា បវត្តសង្កេតសិទ្ធា អត្ថា បកប្បិតា;

បញ្ញាបីយន្តិ នាមាតិ, បញ្ញត្តីតិ បកិត្តិតា.

១០៦៦. អត្ថា ហិ បរមត្ថត្ថា, បញ្ញត្តត្ថាតិ ច ទ្វិធា;

តត្ថ ច បរមត្ថត្ថា, សច្ចិកដ្ឋា សលក្ខណា.

១០៦៧. បញ្ញត្តត្ថា សច្ចិកដ្ឋសលក្ខណសភាវតោ;

អញ្ញថា គហិតា តំតមុបាទាយ បកប្បិតា.

១០៦៨. តស្មា ឧបាទាបញ្ញត្តិ, អត្ថបញ្ញត្តិនាមកា;

បញ្ញបេតព្ពនាមាវ, បញ្ញត្តត្ថាវ សព្ពថា.

១០៦៩. បរមត្ថា យថាវុត្តា, ចិត្តចេតសិកាទយោ;

បញ្ញត្តា ឥត្ថិបុរិសមញ្ចបីឋបដាទយោ.

១០៧០. យេន វុច្ចតិ តំ នាមំ, បញ្ញបេតីតិ វុច្ចតិ;

បញ្ញត្តីតិ ច សា នាមបញ្ញត្តីតិ តតោ មតា.

១០៧១. សង្ខា សមញ្ញា បញ្ញត្តិ, វោហារោតិ ច ភាជិតា;

ចតុធា បញ្ញបេតព្ពបញ្ញត្តីតិ ហិ វណ្ណិតា.

១០៧២. តតោ នាមំ នាមកម្មំ, នាមធេយ្យំ អថាបរំ;

និរុត្តិ ព្យញ្ជនមភិលាបោតិ បន ភាជិតា.

១០៧៣. នាមបញ្ញត្តិ នាមាតិ, បញ្ញត្តិ ទុវិធា កតា;

សព្ពេវ ធម្មា បញ្ញត្តិបថាតិ បន ភាជិតា.

១០៧៤. បរមត្ថបញ្ញត្តត្ថា, ទុវិធា ហោន្តិ តត្ថ ច;

បញ្ញត្តិបថាវ ហោន្តិ, បរមត្ថា សលក្ខណា.

១០៧៥. បញ្ញត្តត្ថា បញ្ញត្តិ ច, បញ្ញបេតព្ពមត្តតោ;

បញ្ញត្តិបថា ច នាមបញ្ញត្តិបថភាវតោ.

១០៧៦. នាមម្បិ បញ្ញាបេតព្ពមេវ កិញ្ចាបិ កេនចិ;

នាមមេវម្បេតំ តត្ថ, បញ្ញត្តិច្ចេវ វណ្ណិតំ.

១០៧៧. បញ្ញបេតព្ពធម្មា ច, តេសំ បញ្ញាបិតាបិ ច;

ឥច្ឆិតព្ពាបិ បញ្ញត្តិបថា បញ្ញត្តិនានតា.

១០៧៨. ឥតិ វុត្តានុសារេន, វុត្តំ អដ្ឋកថានយេ;

នយំ គហេត្វា ឯត្ថាបិ, បញ្ញត្តិ ទុវិធា កតា.

១០៧៩. តស្មិម្បិ បរមត្ថា ច, សច្ចិកដ្ឋសលក្ខណា;

អត្ថា បញ្ញត្តិមត្តា ច, អត្ថបញ្ញត្តិនាមកា.

១០៨០. តេសំ បញ្ញាបិកា ចេវ, នាមបញ្ញត្តិនាមិកា;

ឥច្ចេវំ វណ្ណនាមគ្គេ, ញេយ្យត្តា តិវិធា កតា.

១០៨១. បរមត្ថសច្ចំ នាម, បរមត្ថាវ តត្ថ ច;

សច្ចិកដ្ឋសភាវត្តា, អវិសំវាទកា ហិ តេ.

១០៨២. សម្មុតិសច្ចំ បញ្ញត្តិទ្វយំ វោហារវុត្តិយា;

លោកសមញ្ញាធិប្បាយាវិសំវាទកភាវតោ.

១០៨៣. ឥតិ សច្ចទ្វយម្បេតំ, អក្ខាសិ បុរិសុត្តមោ;

តេនាបិ នាមសំវិញ្ញូ, វោហរេយ្យុភយម្បិ វា.

ឥតិ បញ្ញត្តិវិភាគេ បភេទកថា និដ្ឋិតា.

សត្តវីសតិមោ បរិច្ឆេទោ.