២៤. បរិគ្គហវិសុទ្ធិកថា

៩៤០. សីលចិត្តវិសុទ្ធីហិ, យថាវុត្តាហិ មណ្ឌិតោ;

បយោគាសយសម្បន្នោ, និព្ពានាភិរតោ តតោ.

៩៤១. ខន្ធាយតនធាតាទិប្បភេទេហិ យថារហំ;

លក្ខណបច្ចុបដ្ឋាន-បទដ្ឋានវិភាគតោ.

៩៤២. បរិគ្គហេត្វា សង្ខារេ, នាមរូបំ យថាកថំ;

វវត្ថបេន្តោ តត្ថេវមនុបស្សតិ បញ្ញវា.

៩៤៣. នាមរូបមិទំ សុទ្ធំ, អត្តភាវោតិ វុច្ចតិ;

នត្ថេត្ថ កោចិ អត្តា វា, សត្តោ ជីវោ ច បុគ្គលោ.

៩៤៤. យថាបិ អង្គសម្ភារា, ហោតិ សទ្ទោ រថោ ឥតិ;

ឯវំ ខន្ធេសុ សន្តេសុ, ហោតិ សត្តោតិ សម្មុតិ.

៩៤៥. ខន្ធាយតនធាតូនំ, យថាយោគមនុក្កមោ;

អព្ពោច្ឆិន្នោ បវត្តន្តោ, សំសារោតិ បវុច្ចតិ.

៩៤៦. ឥតិ នានប្បការេន, តេភូមកបរិគ្គហោ;

ភូមិធម្មវវត្ថានំ, សុទ្ធសង្ខារទស្សនំ.

៩៤៧. អត្តទិដ្ឋិបហានេន, ទិដ្ឋិសំក្លេសសោធនំ;

ទិដ្ឋិវិសុទ្ធិ នាមាតិ, ញាណមេតំ បវុច្ចតិ.

៩៤៨. បរិគ្គហិតសង្ខារោ, នាមរូបមបត្ថិយា;

តតោ បរំ យថាយោគំ, បរិគ្គណ្ហតិ បច្ចយេ.

៩៤៩. ទុក្ខសមុទយោ តត្ថ, តណ្ហា សំសារនាយិកា;

សមោធានេតិ សង្ខារេ, តត្ថ តត្ថុបបត្តិយា.

៩៥០. តណ្ហាសម្ភវមេវេតំ, តស្មា ទុក្ខំ បវុច្ចតិ;

តទប្បវត្តិ និព្ពានំ, មគ្គោ តំបាបកោតិ ច.

៩៥១. ចតុសច្ចវវត្ថាន-មុខេនេវម្បិ បច្ចយេ;

បរិគ្គណ្ហន្តិ ឯកច្ចេ, សង្ខារានមថាបរេ.

៩៥២. អាលោកាកាសវាយាបបថវិញ្ចុបនិស្សយំ;

ភវង្គបរិណាមញ្ច, លភិត្វាវ យថារហំ.

៩៥៣. ឆ វត្ថូនិ ច និស្សាយ, ឆ ទ្វារារម្មណានិ ច;

បដិច្ច មនសិការំ, បវត្តន្តិ អរូបិនោ.

៩៥៤. យថាសកសមុដ្ឋានំ, វិភាគេហិ ច រូបិនោ;

បវត្តន្តិ ឯកច្ចេតិ, បរិគ្គណ្ហន្តិ បច្ចយេ.

៩៥៥. អវិជ្ជាបច្ចយា ហោន្តិ, សង្ខារា តុ តតោ តថា;

វិញ្ញាណំ នាមរូបញ្ច, សឡាយតននាមកំ.

៩៥៦. ផស្សោ ច វេទនា តណ្ហា, ឧបាទានំ ភវោ តតោ;

ជាតិ ជរា មរណញ្ច, បវត្តតិ យថារហំ.

៩៥៧. តតោ សោកោ បរិទេវោ, ទុក្ខញ្ចេវ តថាបរំ;

ទោមនស្សមុបាយាសោ, សម្ភោតិ ច យថារហំ.

៩៥៨. ឯតស្ស កេវលស្សេវំ, ទុក្ខក្ខន្ធស្ស សម្ភវោ;

បដិច្ចសមុប្បាទោវ, នត្ថញ្ញោ កោចិ ការកោ.

៩៥៩. តត្ថាវិជ្ជាទយោ ទ្វេបិ, អទ្ធាតីតោ អនាគតោ;

ជាតាទយោបរេ អដ្ឋ, បច្ចុប្បន្នោតិ វណ្ណិតោ.

៩៦០. បុញ្ញាបុញ្ញានេញ្ជវសា, សង្ខារា តិវិធា តថា;

ភវេកទេសោ កម្មញ្ច, កម្មវដ្ដន្តិ វុច្ចតិ.

៩៦១. អវិជ្ជាតណ្ហុបាទានា, ក្លេសវដ្ដមថាបរេ;

វិបាកវដ្ដំ សត្តាបិ, ឧបបត្តិភវោបិ ច.

៩៦២. អវិជ្ជាសង្ខារានំ តុ, គហណេ គហិតាវ តេ;

តណ្ហុបាទានភវាតិ, អតីតេ បញ្ច ហេតវោ.

៩៦៣. តណ្ហុបាទានភវានំ, គហណេ គហិតាវ តេ;

អវិជ្ជា សង្ខារា ចេតិ, បច្ចុប្បន្នេបិ បញ្ចកេ.

៩៦៤. វិញ្ញាណាទិសរូបេន, ទស្សិតំ ផលបញ្ចកំ;

តថា តទេវ ជាតាទិ-នាមេនានាគតន្តិ ច.

៩៦៥. អតីតេ ហេតវោ បញ្ច, ឥទានិ ផលបញ្ចកំ;

ឥទានិ ហេតវោ បញ្ច, អាយតិំ ផលបញ្ចកំ.

៩៦៦. ហេតុផលំ ផលហេតុ, បុន ហេតុផលានិ ច;

តិសន្ធិ ចតុសង្ខេបំ, វីសតាការមព្រវុំ.

៩៦៧. អត្ថធម្មបដិវេធ-ទេសនានំ យថារហំ;

គម្ភីរត្តា ចតុន្នម្បិ, ចតុគម្ភីរតា មតា.

៩៦៨. ឯកត្តនានត្តនយា, អព្យាបារនយោបរោ;

តថេវំធម្មតា ចេតិ, នយា វុត្តា ចតុព្ពិធា.

៩៦៩. ជរាមរណសោកាទិ-បីឡិតានមភិណ្ហសោ;

អាសវានំ សមុប្បាទា, អវិជ្ជា ច បវត្តតិ.

៩៧០. អវិជ្ជាបច្ចយា ហោន្តិ, សង្ខារាបិ យថា បុរេ;

ពទ្ធាវិច្ឆេទមិច្ចេវំ, ភវចក្កមនាទិកំ.

៩៧១. តណ្ហាវិជ្ជានាភិកំ តំ, ជរាមរណនេមិកំ;

សេសាការាទិឃដិកំ, តិភវារថយោជិតំ.

៩៧២. តិអទ្ធញ្ច តិវដ្ដញ្ច, តិសន្ធិឃដិកំ តថា;

ចតុសង្ខេបគម្ភីរនយមណ្ឌិតទេសនំ.

៩៧៣. វីសតាការវិភាគំ, ទ្វាទសាការសង្គហំ;

ធម្មដ្ឋិតីតិ ទីបេន្តិ, ឥទប្បច្ចយតំ ពុធា.

៩៧៤. បដិច្ចសមុប្បាទោយំ, បច្ចយាការនាមតោ;

សង្ខេបតោ ច វិត្ថារា, វិវិធាការភេទតោ.

៩៧៥. ជនេតិ បច្ចយុប្បន្នេ, អវិជ្ជាទិបវត្តិយា;

អវិជ្ជាទិនិរោធេន, និរោធេតិ ច សព្ពថា.

៩៧៦. បច្ចយប្បច្ចយុប្បន្ន-វសេនេវ បវត្តតិ;

សំសារោយន្តិ ឯកច្ចេ, បរិគ្គណ្ហន្តិ បច្ចយេ.

៩៧៧. សមន្តបដ្ឋានមហាបករណវិភាគតោ;

ឯកច្ចេ បរិគ្គណ្ហន្តិ, ចតុវីសតិ បច្ចយេ.

៩៧៨. ឥតិ នានប្បការេន, បច្ចយានំ បរិគ្គហោ;

សប្បច្ចយនាមរូបំ, វវត្ថានន្តិ វេទិតំ.

៩៧៩. ឥទប្បច្ចយតាញាណំ, បច្ចយាការទស្សនំ;

ធម្មដ្ឋិតិ យថាភូតញាណទស្សននាមកំ.

៩៨០. កាលត្តយវិភាគេសុ, កង្ខាសំក្លេសសោធនំ;

កង្ខាវិតរណា នាម, វិសុទ្ធីតិ បវុច្ចតីតិ.

ឥតិ និព្ពានវិភាគេ បរិគ្គហវិសុទ្ធិកថា និដ្ឋិតា.

ចតុវីសតិមោ បរិច្ឆេទោ.