៤. និព្ពានវិភាគោ

២៣. មូលវិសុទ្ធិកថា

៨៩៥. ឥត្ថំ ចិត្តំ ចេតសិកំ, រូបញ្ចេវាតិ សង្ខតា;

វុត្តា អសង្ខតំ ទានិ, និព្ពានន្តិ បវុច្ចតិ.

៨៩៦. សីលវិសុទ្ធិ អាទិម្ហិ, តតោ ចិត្តវិសុទ្ធិ ច;

ទិដ្ឋិវិសុទ្ធិនាមា ច, កង្ខាវិតរណាបិ ច.

៨៩៧. តតោ បរំ មគ្គាមគ្គ-ញាណទស្សននាមិកា;

តថា បដិបទាញាណ-ទស្សនា ញាណទស្សនំ.

៨៩៨. ឥច្ចានុក្កមតោ វុត្តា, សត្ត ហោន្តិ វិសុទ្ធិយោ;

សត្តមានុត្តរា តត្ថ, បុព្ពភាគា ឆ លោកិយា.

៨៩៩. សំវរោ បាតិមោក្ខោ ច, តថេវិន្ទ្រិយសំវរោ;

អាជីវបារិសុទ្ធិ ច, សីលំ បច្ចយនិស្សិតំ.

៩០០. ឥតិ សីលវិសុទ្ធីតិ, សុទ្ធមេតំ បវុច្ចតិ;

ចតុបារិសុទ្ធិសីលំ, ធុតង្គបរិវារិតំ.

៩០១. កសិណានិ ទសាសុភា, ទសានុស្សតិយោ បន;

អប្បមញ្ញា ច សញ្ញា ច, វវត្ថារុប្បកាតិ ច.

៩០២. សមថក្កម្មដ្ឋានានិ, តាលីសដ្ឋកថានយេ;

បាឡិយំ តុ វិភត្តានិ, អដ្ឋតិំសាតិ វណ្ណិតំ.

៩០៣. បថវាបោ ច តេជោ ច,

វាយោ នីលញ្ច បីតកំ;

លោហិតោទាតមាកាសំ,

អាលោកកសិណន្តិ ច.

៩០៤. កសិណានិ ទសេតានិ, វុត្តានដ្ឋកថានយេ;

អដ្ឋេវ បាឡិយំ ហិត្វា, អន្តេ តុ កសិណទ្វយំ.

៩០៥. ឧទ្ធុមាតំ វិនីលញ្ច, វិបុព្ពកំ វិខាយិតំ;

វិច្ឆិទ្ទកញ្ច វិក្ខិត្តំ, ហតវិក្ខិត្តលោហិតំ.

៩០៦. បុឡវកំ អដ្ឋិកញ្ចេតិ, អសុភា ទស ទេសិតា;

រូបកាយវិភាគាយ, ទសកាយវិបត្តិយា.

៩០៧. ពុទ្ធេ ធម្មេ ច សង្ឃេ ច, សីលេ ចាគេ ច អត្តនា;

ទេវតោបសមាយញ្ច, សត្តានុស្សតិយោ កមា.

៩០៨. មរណស្សតិ នាមេកា, តថា កាយគតាសតិ;

អានាបានស្សតិច្ចេវំ, ទសានុស្សតិយោ មតា.

៩០៩. មេត្តា ករុណា មុទិតា, ឧបេក្ខាតិ ចតុព្ពិធា;

វុត្តា ព្រហ្មវិហារា ច, អប្បមញ្ញាតិ តាទិនា.

៩១០. ឯកាហារេ បដិក្កូល-សញ្ញា នាមេកមេវ តុ;

ចតុធាតុវវត្ថានំ, ចតុធាតុបរិគ្គហោ.

៩១១. អាកាសានញ្ចាយតនំ, វិញ្ញាណញ្ចមថាបរំ;

អាកិញ្ចញ្ញំ តថា នេវ-សញ្ញានាសញ្ញនាមកំ.

៩១២. ឥច្ចានុក្កមតោ វុត្តា, អរូបជ្ឈានិកា បន;

អរូបកម្មដ្ឋានានិ, ចត្តារោបិ បកិត្តិតា.

៩១៣. កសិណាសុភកោដ្ឋាសេ, អានាបានេ ច សព្ពថា;

ទិស្វា សុត្វា ផុសិត្វា វា, បរិកម្មំ តុ កុព្ពតោ.

៩១៤. ឧគ្គហោ នាម សម្ភោតិ, និមិត្តំ តត្ថ យុញ្ជតោ;

បដិភាគោ តមារព្ភ, តត្ថ វត្តតិ អប្បនា.

៩១៥. សាធុ សត្តា សុខី ហោន្តុ, ទុក្ខា មុច្ចន្តុ បាណិនោ;

អហោ សត្តា សុខប្បត្តា, ហោន្តុ យទិច្ឆកាតិ ច.

៩១៦. ឧទ្ទិស្ស វា អនោទិស្ស, យុញ្ជតោ សត្តគោចរេ;

អប្បមញ្ញា បនប្បេន្តិ, អនុបុព្ពេន វត្តិកា.

៩១៧. កសិណុគ្ឃាដិមាកាសេ, បឋមារុប្បមានសេ;

តស្សេវ នត្ថិភាវេ ច, តតិយារុប្បកេតិ ច.

៩១៨. យុញ្ជន្តស្ស បនេតេសុ, គោចរេសុ ចតូសុបិ;

អប្បេន្តិ អនុបុព្ពេន, អារុប្បាបិ ចតុព្ពិធា.

៩១៩. អានាបានញ្ច កសិណំ, បញ្ចកជ្ឈានិកំ តហិំ;

បឋមជ្ឈានិកា វុត្តា, កោដ្ឋាសាសុភភាវនា.

៩២០. សុខិតជ្ឈានិកា តិស្សោ, អប្បមញ្ញា ច ហេដ្ឋិមា;

ឧបេក្ខារុប្បកា បញ្ច, ឧបេក្ខាឈានិកាតិ ច.

៩២១. ឯកា ទសេកា ទស ច, តយោ បញ្ចេតិ សព្ពថា;

បរិកម្មវសា តិំស, ឆ កោដ្ឋាសា យថាក្កមំ.

៩២២. បញ្ចកាទិសុខោបេក្ខា, ឈានភេទា ចតុព្ពិធា;

ឯកច្ចតុបញ្ចឈាន-វសេន តិវិធា សិយុំ.

៩២៣. រូបារូបវសា ទ្វេ ច, អប្បនាតោ បុនេកធា;

ឥច្ចេវមប្បនា កម្ម-ដ្ឋានភេទា សមិស្សិតា.

៩២៤. ទ្វេ ច សញ្ញាវវត្ថានា, អដ្ឋានុស្សតិយោតិ ច;

សេសា ទស បវុច្ចន្តិ, ឧបចារសមាធិកា.

៩២៥. បរិកម្មោបចារានុលោមគោត្រភុតោ បរំ;

បញ្ចមំ វា ចតុត្ថំ វា, ជវនំ ហោតិ អប្បនា.

៩២៦. អប្បនាជវនំ សព្ពំ, លោកុត្តរមហគ្គតំ;

តិហេតុកបរិត្តានិ, បុរិមានិ យថារហំ.

៩២៧. អាវជ្ជនា ច វសិតា, តំសមាបជ្ជនា តថា;

អធិដ្ឋានា ច វុដ្ឋានា, បច្ចវេក្ខណ បញ្ចមា.

៩២៨. វសិតាហិ វសីភូតា, ឥតិ កត្វាន បញ្ចហិ;

ភាវេន្តស្ស បនប្បេន្តិ, ឧបរូបរិ អប្បនា.

៩២៩. យុញ្ជន្តស្ស តុ វុដ្ឋាយ, កសិណជ្ឈានបញ្ចមា;

បញ្ចាភិញ្ញា ហិ អប្បេន្តិ, រូបសទ្ទាទិគោចរេ.

៩៣០. លោកុត្តរា បនប្បេន្តិ, សព្ពេ និព្ពានគោចរេ;

អនិច្ចទុក្ខានត្តាតិ, ភូមិធម្មេ វិបស្សតោ.

៩៣១. តត្ថ ច បាទកជ្ឈានំ, សម្មដ្ឋជ្ឈានមេវ វា;

អជ្ឈាសយោ ច វុដ្ឋាន-គាមិនី ច វិបស្សនា.

៩៣២. មគ្គានំ ឈានភេទាយ, យថាយោគំ និយាមតា;

យថាសកំ ផលានំ តុ, មគ្គា ហោន្តិ និយាមតា.

៩៣៣. មគ្គានន្តរមេវាថ, ភូមិធម្មេ វិបស្សតោ;

ផលសមាបត្តិយម្បិ, អប្បេតិ ផលមានសំ.

៩៣៤. អនុបុព្ពសមាបត្តិំ, សមាបជ្ជិស្ស វុដ្ឋិតោ;

ឈានធម្មេ វិបស្សិត្វា, តត្ថ តត្ថេវ បណ្ឌិតោ.

៩៣៥. ចតុត្ថារុប្បមប្បេត្វា, ឯកទ្វិជវនាបរំ;

និរោធំ នាម ផុសតិ, សមាបត្តិមចិត្តកំ.

៩៣៦. អរហា វា អនាគាមី, បញ្ចវោការភូមិយំ;

យថាសកំ ផលុប្បាទោ, វុដ្ឋានន្តិ តតោ មតោ.

៩៣៧. អប្បនាបរិយោសានេ, សិយា សព្ពត្ថ សម្ភវា;

ភវង្គបាតោ តំ ឆេត្វា, ជាយតេ បច្ចវេក្ខណា.

៩៣៨. ឥតិ វុត្តានុសារេន, អប្បនានយសង្គហំ;

យថាយោគំ វិភាវេយ្យ, តត្ថ តត្ថ វិចក្ខណោ.

៩៣៩. ចិត្តវិសុទ្ធិ នាមាយំ, ចិត្តសំក្លេសសោធនោ;

ឧបចារប្បនាភេទោ, សមថោ បុព្ពភាគិយោតិ.

ឥតិ និព្ពានវិភាគេ មូលវិសុទ្ធិកថា និដ្ឋិតា.

តេវីសតិមោ បរិច្ឆេទោ.