១៧. ទិដ្ឋិសង្គហកថា

៥៩៣. យេវាបនកនាមេន, ធម្មា ឆន្ទាទយោ តថា;

ខន្ធាទយោ ច កោដ្ឋាសា, ឧទ្ទិដ្ឋា ហិ យថារហំ.

៥៩៤. តត្ថ ឆន្ទាទយោ ធម្មា, វិភត្តាវ យថារហំ;

ខន្ធាទិរាសយោ វាបិ, វិញ្ញេយ្យា ទានិ សម្ភវា.

៥៩៥. វេទនា វេទនាក្ខន្ធោ, ចក្ខុសម្ផស្សជាទិកា;

សញ្ញា ច សញ្ញាក្ខន្ធោតិ, ឆព្ពិធាបិ បកាសិតា.

៥៩៦. សង្ខារក្ខន្ធនាមេន, សេសា ចេតសិកា មតា;

វុត្តា វិញ្ញាណកាយា ឆ, វិញ្ញាណក្ខន្ធនាមតោ.

៥៩៧. រូបក្ខន្ធោ បុនេកោវ, សម្បយុត្តាវិយោគិនោ;

អរូបិនោ ច ចត្តារោ, បញ្ចក្ខន្ធា បវុច្ចរេ.

៥៩៨. មនាយតននាមំ តុ, ចិត្តមេវ តថាបរា;

ចក្ខុវិញ្ញាណធាតាទិសត្តវិញ្ញាណធាតុយោ.

៥៩៩. សព្ពេ ចេតសិកា ធម្មា, ធម្មាយតនសង្គហា;

ធម្មធាតូតិ ច វុត្តា, ទ្វិបញ្ញាសាបិ សព្ពថា.

៦០០. សុខុមានិ ច រូបានិ, និព្ពានញ្ចេត្ថ គយ្ហរេ;

ឱឡារិកានិ រូបានិ, ទសាយតនធាតុយោ.

៦០១. ចក្ខុសោតឃានជិវ្ហា-កាយាយតននាមកា;

រូបសទ្ទគន្ធរស-ផោដ្ឋព្ពាយតនានិ ច.

៦០២. ទ្វាទសាយតនា សព្ពេ, ហោន្តដ្ឋារសធាតុយោ;

ខន្ធា ឋបេត្វា និព្ពានំ, នត្ថិ បណ្ណត្តិ តីសុបិ.

៦០៣. អាហារាទិ ច កោដ្ឋាសា, បុព្ពេ វុត្តនយាវ តេ;

ឥតិ មិស្សកសង្ខេបោ, វិញ្ញាតព្ពោ វិភាវិនា.

៦០៤. ទ្វាទសាកុសលេស្វេវ, ចុទ្ទសាបិ វវត្ថិតា;

យេ សាវជ្ជាវ តេសម្បិ, សង្គហោ ទានិ និយ្យតេ.

៦០៥. កាមាសវោ ភវាសវោ, ទិដ្ឋាវិជ្ជាសវាតិ ច;

ចត្តារោ អាសវា វុត្តា, តយោ ធម្មា សរូបតោ.

៦០៦. អាសវា អាសវដ្ឋេន,

ឱឃា វុយ្ហនតោ តថា;

យោជេន្តីតិ ច យោគាតិ,

តេ ចត្តារោ ច ទេសិតា.

៦០៧. កាមព្ភវោ ច បដិឃោ, មានោ ទិដ្ឋិ ច សំសយោ;

សីលព្ពតបរាមាសោ, ភវរាគោ តថាបរោ.

៦០៨. ឥស្សា មច្ឆរិយាវិជ្ជា, ឥតិ សំយោជនា ទស;

អដ្ឋ ធម្មា សរូបេន, អភិធម្មេ បកាសិតា.

៦០៩. ឥស្សាមច្ឆរិយំ ហិត្វា, កត្វា មានុទ្ធវំ តហិំ;

ភិន្ទិត្វា ភវរាគញ្ច, រូបារូបវសា ទ្វិធា.

៦១០. បញ្ចោរម្ភាគិយា ចេវ, បញ្ចុទ្ធម្ភាគិយាតិ ច;

ទស សំយោជនា វុត្តា, សុត្តេ សត្ត សរូបតោ.

៦១១. គន្ថា ធម្មា ច ចត្តារោ, តយោ ធម្មា សរូបតោ;

អភិជ្ឈាកាយគន្ថោ ច, ព្យាបាទោ ច បវុច្ចតិ.

៦១២. សីលព្ពតបរាមាសោ, កាយគន្ថោ តថាបរោ;

ឥទំសច្ចាភិនិវេសោ, ឥតិ ទិដ្ឋិ វិភេទិតោ.

៦១៣. កាមច្ឆន្ទោ ច ព្យាបាទោ, ថិនមិទ្ធមថាបរំ;

តថា ឧទ្ធច្ចកុក្កុច្ចំ, កង្ខាវិជ្ជាតិ អដ្ឋិមេ.

៦១៤. ធម្មា និវរណា នាម, ឆធា ច បន ទេសិតា;

មិច្ឆាទិដ្ឋិ បនេកាវ, បរាមាសោតិ វុច្ចតិ.

៦១៥. ឧបាទានានិ ចត្តារិ, កាមុបាទាទិនាមកា;

ទិដ្ឋិសីលព្ពតំ អត្ត-វាទុបាទានមេវ ច.

៦១៦. លោភទិដ្ឋិវសា ទ្វេវ, តិវិធា ទិដ្ឋិ ទេសិតា;

ទិដ្ឋិ សីលព្ពតមត្ត-វាទោ ចេតិ មហេសិនា.

៦១៧. លោភោ ទោសោ ច មោហោ ច,

មានោ ទិដ្ឋិ ច សំសយោ;

ថិនមុទ្ធច្ចមេវាថ,

លោកនាសយុគំ តថា.

៦១៨. ឥត្ថំ កិលេសវត្ថូនិ, កិលេសាតិ បកាសិតា;

ទសេតេ តុ សមានាវ, បរតោ ច សរូបតោ.

៦១៩. កាមរាគោ ច បដិឃោ, មានោ ទិដ្ឋិ ច សំសយោ;

ភវរាគោ អវិជ្ជាតិ, ឆ សត្តានុសយា មតា.

៦២០. គាហា ច បលិពោធា ច, បបញ្ចា ចេវ មញ្ញនា.

តណ្ហា មានោ ច ទិដ្ឋិ ច, ទិដ្ឋិ តណ្ហា ច និស្សយា.

៦២១. បរាមាសេកកោ ទ្វេវ, និស្សយា មញ្ញនា តយោ;

អាសវោឃយោគគន្ថា, ឧបាទានា ច ទុព្ពិធា.

៦២២. អដ្ឋ នីវរណា វុត្តា, សត្តធានុសយា កថា;

សំយោជនា កិលេសា ច, ទសេវ បរតោ ឋិតា.

៦២៣. ឯកទ្វិតិឆសត្តដ្ឋទសកា តុ យថារហំ;

ធម្មា សរូបតោ ហោន្តិ, យថាវុត្តេសុ រាសិសុ.

៦២៤. កាមរាគភវរាគា, កាមាសវភវាសវា;

រូបរាគារូបរាគ, ឥតិ លោភោ វិភេទិតោ.

៦២៥. ឥទំសច្ចាភិនិវេសោ, ទិដ្ឋិ សីលព្ពតំ តថា;

អត្តវាទោ បរាមាសោ, ឥតិ ទិដ្ឋិ បវុច្ចតិ.

៦២៦. ទិដ្ឋិ បញ្ចទសវិធា, លោភដ្ឋារសធា តហិំ;

សេសា សបររាសីហិ, សមានា ទ្វាទសដ្ឋិតា.

៦២៧. ឯកាទសសមុដ្ឋានេ, ទិដ្ឋិលោភា វវត្ថិតា;

អវិជ្ជា សត្តសុ វុត្តា, បដិឃោ បន បញ្ចសុ.

៦២៨. មានោ ច វិចិកិច្ឆា ច, ចតុដ្ឋានេសុ ឧទ្ធដោ;

តីសុ ទ្វីសុ ច ថីនន្តិ, អដ្ឋេតេ សវិភត្តិកា.

៦២៩. ឥស្សាមច្ឆេរកុក្កុច្ចមិទ្ធលោកវិនាសកា;

ឆាវិភត្តិកធម្មាតិ, អសម្ភិន្នា ចតុទ្ទស.

៦៣០. រូបរាគារូបរាគ-កាមាសវភវាសវា;

ហោន្តិ ទិដ្ឋិវិយុត្តេសុ, បុព្ពេ វុត្តនយា បន.

៦៣១. ឥតិ សាវជ្ជសង្ខេបំ, ញត្វា បុន វិចក្ខណោ;

ពោធិបក្ខិយធម្មានំ, សង្គហម្បិ វិភាវយេ.

៦៣២. យេសុ សញ្ញាចិត្តទិដ្ឋិ-វិបល្លាសា យថាក្កមំ;

សុភំ សុខំ និច្ចមត្តា, ឥតិ ទ្វាទសធា ឋិតា.

៦៣៣. តត្ថ កាយេ វេទនាសុ, ចិត្តេ ធម្មេសុ ចក្កមា;

អសុភំ ទុក្ខមនិច្ចមនត្តាតិ ឧបដ្ឋិតា.

៦៣៤. យថាវុត្តវិបល្លាសបហានាយ យថារហំ;

ភិន្នា វិសយកិច្ចានំ, វសេន បន សម្ភវា.

៦៣៥. ចត្តារោ សតិបដ្ឋានា, កាយានុបស្សនាទយោ;

ឥតិ វុត្តា បនេកាវ, សម្មាសតិ មហេសិនា.

៦៣៦. ឧប្បន្នានុប្បន្នបាបបហានានុប្បន្នាយ ច;

អនុប្បន្នុប្បន្នេហិ វា, និព្ពត្តិ អភិវុទ្ធិយា.

៦៣៧. បទហន្តស្ស វាយាមោ, កិច្ចាភោគវិភាគតោ;

សម្មប្បធានា ចត្តារោ, ឥតិ វុត្តា មហេសិនា.

៦៣៨. ឆន្ទោ ច វីរិយំ ចិត្តំ, វីមំសាតិ ច តាទិនា;

ចត្តារោ ឥទ្ធិបាទាតិ, វិភត្តា ចតុរាធិបា.

៦៣៩. សទ្ធិន្ទ្រិយញ្ច វីរិយំ, សតិ ចេវ សមាធិ ច;

បញ្ញិន្ទ្រិយញ្ច បញ្ចេវ, ពោធិបក្ខិយសង្គហេ.

៦៤០. ឥន្ទ្រិយានិន្ទ្រិយដ្ឋេន, ពលដ្ឋេន ពលានិ ច;

ឥតិ ភិន្នា វិភត្តា ច, ទុវិធាបិ មហេសិនា.

៦៤១. សតី ច ធម្មវិចយោ, តថា វីរិយបីតិយោ;

បស្សទ្ធិ ច សមាធិ ច, ឧបេក្ខាតិ ច តាទិនា.

៦៤២. ទេសិតា សត្ត ពោជ្ឈង្គា, ពុជ្ឈន្តស្ស សភាវតោ;

កាយចិត្តវសា ភិន្នំ, កត្វា បស្សទ្ធិមេកកំ.

៦៤៣. សម្មាទិដ្ឋិ ច សង្កប្បោ, វាយាមោ វិរតិត្តយំ;

សម្មាសតិ សមាធី ច, មគ្គោ អដ្ឋង្គិកោ មតោ.

៦៤៤. ឥតិ សត្តេវ សង្ខេបា, សត្តតិំស បភេទតោ;

ឯកំ កត្វាន បស្សទ្ធិំ, អសម្ភិន្នា ចតុទ្ទស.

៦៤៥. នវធា វីរិយំ វុត្តំ, ឆសុ រាសីសុ បញ្ចសុ;

អដ្ឋធា សតិ សេសា តុ, សមានបទរាសិកា.

៦៤៦. បញ្ចស្វេវ តុ បញ្ញា ច, សមាធិ ចតុរាសិកោ;

សទ្ធា ទ្វីសុ វិភត្តាតិ, បញ្ចេតេ សវិភត្តិកា.

៦៤៧. នវា វិភត្តិកា សេសា, ឆន្ទោ ចិត្តមថាបរំ;

បីតិ បស្សទ្ធិបេក្ខា ច, សង្កប្បោ វិរតិត្តយំ.

៦៤៨. ឥតិ វុត្តនយា សព្ពេ, ពោធិបក្ខិយសង្គហា;

លោកុត្តរេសុ សម្ភោន្តិ, សព្ពថាបិ យថារហំ.

៦៤៩. បុព្ពភាគេ យថាយោគំ, លោកិយេសុ ច លព្ភរេ;

និព្ពេទភាវនាកាលេ, ឆព្ពិសុទ្ធិបវត្តិយំ.

៦៥០. ឥតិ មិស្សកសាវជ្ជា, ពោធិបក្ខិយសង្គហា;

យេវាបនករាសិម្ហិ, យថាសម្ភវតោ ឋិតា.

៦៥១. កម្មបថា តុ សម្ភោន្តិ, បុញ្ញាបុញ្ញេសុ សព្ពថា;

អបថា ច សុចរិតា, តថា ទុច្ចរិតាបិ ច.

៦៥២. តត្ថ កម្មបថដ្ឋានេ, អនភិជ្ឈាទយោ បន;

ឧបចារេន វុច្ចន្តិ, វិបាកេសុ ក្រិយេសុ វាតិ.

ឥតិ ចេតសិកវិភាគេ ទិដ្ឋិសង្គហកថា និដ្ឋិតា.

សត្តរសមោ បរិច្ឆេទោ.

និដ្ឋិតោ ច សព្ពថាបិ ចេតសិកវិភាគោ.