១១. រាសិសរូបកថា

៣៨៤. សព្ពំ សភាវសាមញ្ញ-វិសេសេន យថារហំ;

គតរាសិវសេនាថ, អដ្ឋារសវិធំ កថំ.

៣៨៥. ផស្សបញ្ចករាសី ច, ឈានិន្ទ្រិយមថាបរេ;

មគ្គពលហេតុកម្ម-បថលោកិយរាសយោ.

៣៨៦. និរវជ្ជា ឆ បស្សទ្ធិ-អាទិកា ច សតីមតា;

យុគនន្ធា ច សមថា, តថា យេវាបនាតិ ច.

៣៨៧. ផស្សោ ច វេទនា សញ្ញា, ចេតនា ចិត្តមេវ ច;

ផស្សបញ្ចករាសីតិ, បញ្ច ធម្មា បកាសិតា.

៣៨៨. វិតក្កោ ច វិចារោ ច, បីតិ ចេកគ្គតា តថា;

សុខំ ទុក្ខមុបេក្ខាតិ, សត្ត ឈានង្គនាមកា.

៣៨៩. សទ្ធិន្ទ្រិយញ្ច វីរិយំ, សតិ ចេវ សមាធិ ច;

បញ្ញា ចតុព្ពិធា វុត្តា, មនោ បញ្ចាបិ វេទនា.

៣៩០. ជីវិតិន្ទ្រិយមេកន្តិ, ចក្ខាទីនិ ច សត្តធា;

ពាវីសតិន្ទ្រិយា នាម, ធម្មា សោឡស ទេសិតា.

៣៩១. អាទិមគ្គេ អនញ្ញាត-ញ្ញស្សាមីតិន្ទ្រិយំ ភវេ;

មជ្ឈេ អញ្ញិន្ទ្រិយំ អន្តេ, អញ្ញាតាវិន្ទ្រិយន្តិ ច.

៣៩២. បញ្ញានុត្តរចិត្តេសុ, ហោន្តិ តីណិន្ទ្រិយានិបិ;

តិហេតុកេសុ សេសេសុ, ឯកំ បញ្ញិន្ទ្រិយំ មតំ.

៣៩៣. សុខំ ទុក្ខិន្ទ្រិយញ្ចេវ, សោមនស្សិន្ទ្រិយំ តថា;

ទោមនស្សមុបេក្ខាតិ, បញ្ចធា វេទនា កថា.

៣៩៤. រូបារូបវសា ទ្វេធា, ជីវិតិន្ទ្រិយមេកកំ;

ចក្ខុសោតឃានជិវ្ហាកាយិត្ថិបុរិសិន្ទ្រិយា.

៣៩៥. តត្ថ ជីវិតរូបញ្ច, អដ្ឋេត្ថ ន តុ គយ្ហរេ;

តស្មា នាមិន្ទ្រិយានេវ, ទសបញ្ច វិនិទ្ទិសេ.

៣៩៦. សម្មាទិដ្ឋិ ច សង្កប្បោ, វាយាមោ វិរតិត្តយំ;

សម្មាសតិ សមាធិ ច, មិច្ឆាទិដ្ឋិ ច ធម្មតោ.

៣៩៧. មគ្គង្គានិ នវេតានិ, ទ្វាទសាបិ យតោ ទ្វិធា;

សម្មាមិច្ឆាតិ សង្កប្បោ, វាយាមោ ច សមាធិ ច.

៣៩៨. លោកបាលទុកញ្ចេវ, ហិរោត្តប្បមថាបរំ;

អហិរីកមនោត្តប្បំ, ទុកំ លោកវិនាសកំ.

៣៩៩. បញ្ច សទ្ធាទយោ ចេតិ, ពលធម្មា នវេរិតា;

កណ្ហសុក្កវសេនាបិ, បដិបក្ខេ អកម្បិយា.

៤០០. ឆ ហេតូ ហេតុរាសិម្ហិ,

លោភាលោភាទិកា តិកា;

មោមូហេ កង្ខិតុទ្ធច្ចា,

តត្ថ វុត្តាតិ អដ្ឋធា.

៤០១. មិច្ឆាទិដ្ឋិ អភិជ្ឈា ច, ព្យាបាទោ វិរតិត្តយំ;

សម្មាទិដ្ឋិនភិជ្ឈា ច, អព្យាបាទោ ច ចេតនា.

៤០២. ទស កម្មបថានេត្ថ, វុត្តា វិរតិចេតនា;

លោកបាលវិនាសាតិ, វុត្តា លោកទុកា ទ្វិធា.

៤០៣. បស្សទ្ធិអាទិយុគឡា, និរវជ្ជា ឆ រាសយោ;

សតិ ច សម្បជញ្ញញ្ច, ឧបការទុកំ ភវេ.

៤០៤. យុគនន្ធទុកំ នាម, សមថោ ច វិបស្សនា;

បគ្គហោ ច អវិក្ខេបោ, សមថទ្ទុកមីរិតំ.

៤០៥. យេ សរូបេន និទ្ទិដ្ឋា, ចិត្តុប្បាទេសុ តាទិនា;

តេ ឋបេត្វាវសេសា តុ, យេវាបនកនាមកា.

៤០៦. ឆន្ទោ ច អធិមោក្ខោ ច, តត្រមជ្ឈត្តតា តថា;

ឧទ្ធច្ចំ មនសិការោ, បញ្ចាបណ្ណកនាមកា.

៤០៧. មានោ ច ថិនមិទ្ធញ្ច, ឥស្សា មច្ឆរិយំ តថា;

កុក្កុច្ចមប្បមញ្ញា ច, តិស្សោ វិរតិយោបិ ច.

៤០៨. ឯតេ អនិយតា នាម, ឯកាទស យថារហំ;

តតោ ច សេសា សព្ពេបិ, និយតាតិ បកិត្តិតា.

៤០៩. កេចិ រាសិំ ន ភជន្តិ, កេចិ ចានិយតា យតោ;

តស្មា យេវាបនាតេវ, ធម្មា សោឡស ទេសិតា.

៤១០. សត្តតិំសាវសេសា តុ, តត្ថ តត្ថ យថារហំ;

សរូបេនេវ និទ្ទិដ្ឋា, ចិត្តុប្បាទេសុ សព្ពថា.

៤១១. ទេសិតានុត្តរុទ្ធច្ចេ, នាមតោ វិរតុទ្ធវា;

តថានុត្តរចិត្តេសុ, និយតំ វិរតិត្តយំ.

៤១២. ចិត្តំ វិតក្កោ សទ្ធា ច,

ហិរោត្តប្បពលទ្វយំ;

អលោភោ ច អទោសោ ច,

លោភោ ទោសោ ច ទិដ្ឋិ ច.

៤១៣. អហិរីកមនោត្តប្បំ,

ឧទ្ធច្ចំ វិរតិត្តយំ;

សោឡសេតេ យថាយោគំ,

ទ្វីសុ ឋានេសុ ទេសិតា.

៤១៤. វេទនា តីសុ វីរិយំ, សតិ ច ចតុរាសិកា;

សមាធិ ឆសុ បញ្ញា ច, សត្តដ្ឋានេសុ ទីបិតា.

៤១៥. ឯកវីស បនិច្ចេតេ, សវិភត្តិកនាមកា;

សេសា ទ្វត្តិំសតិ ធម្មា, សព្ពេបិ អវិភត្តិកាតិ.

ឥតិ ចេតសិកវិភាគេ រាសិសរូបកថា និដ្ឋិតា.

ឯកាទសមោ បរិច្ឆេទោ.