១០. បភេទកថា

៣៥២. ឯកុប្បាទា និរោធា ច, ឯកាលម្ពណវត្ថុកា;

សហគតា សហជាតា, សំសដ្ឋា សហវុត្តិនោ.

៣៥៣. តេបញ្ញាស បនិច្ចេតេ, សម្បយុត្តា យថារហំ;

ចិត្តចេតសិកា ធម្មា, អដ្ឋារសវិធាបិ ច.

៣៥៤. ឯកធា ឆព្ពិធា ចេវ, ចតុធា សត្តធា ឋិតា;

ចិត្តុប្បាទបភេទេន, ភិន្ទិតព្ពា វិភាវិនា.

៣៥៥. អដ្ឋ ធម្មាវិនិព្ភោគា, ភិន្នាសីតិ នវុត្តរា;

សត្តសតំ ទស ទ្វេ ច, សព្ពេ ហោន្តិ សមិស្សិតា.

៣៥៦. សន្តីរណមនោធាតុ, សិតវោដ្ឋព្ពនា តថា;

អបុញ្ញា កាមបុញ្ញា ច, មហាបាកា មហាក្រិយា.

៣៥៧. បឋមជ្ឈានធម្មា ច, លោកុត្តរមហគ្គតា;

បញ្ចបញ្ញាស សព្ពេបិ, វិតក្កា ហោន្តិ ភេទិតា.

៣៥៨. វិចារាបិ ច តេយេវ, ទុតិយជ្ឈាននាមកា;

ឯកាទសាបរេ ចេតិ, ឆសដ្ឋិ បរិទីបិតា.

៣៥៩. អបុញ្ញា កាមបុញ្ញា ច, មហាបាកា មហាក្រិយា;

ចតុក្កា ចេវ ចត្តារោ, សិតញ្ច សុខតីរណំ.

៣៦០. បឋមាទិតិកជ្ឈានា, លោកុត្តរមហគ្គតា;

ឥច្ចេវមេកបញ្ញាស, បីតិយោ ហោន្តិ សព្ពថា.

៣៦១. សិតវោដ្ឋព្ពនា ទ្វេ ច, សាវជ្ជា ចានវជ្ជកា;

ភិន្នមេវំ តុ វីរិយំ, តេសត្តតិវិធំ ភវេ.

៣៦២. សាវជ្ជា ចានវជ្ជា ច, មោមូហទ្វយវជ្ជិតា;

ឆន្ទា ភវន្តិ សព្ពេបិ, សដ្ឋិភេទា នវុត្តរា.

៣៦៣. សន្តីរណមនោធាតុ, សិតវោដ្ឋព្ពនា តថា;

សាវជ្ជា ចានវជ្ជា ច, វិចិកិច្ឆាវិវជ្ជិតា.

៣៦៤. អធិមោក្ខា បនិច្ចេវំ, អដ្ឋសត្តតិ ភេទិតា;

តិសតំ នវុតិ ទ្វេ ច, ភិន្នា ហោន្តិ បកិណ្ណកា.

៣៦៥. ឯកូនសដ្ឋិ វា ហោន្តិ, សទ្ធាទេកូនវីសតិ;

សហស្សញ្ច សតញ្ចេកំ, ឯកវីសញ្ច សព្ពថា.

៣៦៦. ញាណេន សម្បយុត្តា ច, កាមេ ទ្វាទសធាបរេ;

បញ្ចតិំសាតិ បញ្ញាបិ, សត្តតាលីសធា កថា.

៣៦៧. រូបជ្ឈានចតុក្កា ច, កាមបុញ្ញា មហាក្រិយា;

អដ្ឋវីសប្បមញ្ញេវំ, ឆប្បញ្ញាស ភវន្តិ ច.

៣៦៨. អនុត្តរា កាមបុញ្ញា, តិស្សោ វិរតិយោ បន;

ហោន្តិ សោឡសធា ភិន្នា, អដ្ឋតាលីស បិណ្ឌិតា.

៣៦៩. បញ្ចវីសានវជ្ជេវំ, សម្បយុត្តា ចតុព្ពិធា;

សហស្សទ្វិសតញ្ចេវ, ទ្វិ ច សត្តតិ ភេទតោ.

៣៧០. ចត្តារោ បាបសាមញ្ញា, ភិន្នា ទ្វាទសធា បន;

អដ្ឋតាលីសធា ហោន្តិ, តេ សព្ពេ បរិបិណ្ឌិតា.

៣៧១. លោភោ បនដ្ឋធា ភិន្នោ, ថិនមិទ្ធញ្ច បញ្ចធា;

ចតុធា ទិដ្ឋិមានោ ច, ចតុធា ទិដ្ឋិយោ វិសុំ.

៣៧២. ទ្វិធា ទោសាទិចត្តារោ, វិចិកិច្ឆេកធាតិ ច;

សាវជ្ជា សត្តធា វុត្តា, ភិន្នាសីតិ តិកុត្តរា.

៣៧៣. ឥច្ចដ្ឋារសធា វុត្តា, តេបញ្ញាសាបិ ភេទតោ;

ទ្វិសហស្សញ្ច តុ សតំ, ភវន្តេកូនសដ្ឋិ ច.

៣៧៤. វិតក្កវិចារបីតិសុខោបេក្ខាសុ បញ្ចសុ;

ភិន្ទិត្វា ឈានភេទេន, គហេតព្ពា អនុត្តរា.

៣៧៥. អញ្ញត្រ បន សព្ពត្ថ, នត្ថិ ភេទប្បយោជនំ;

អដ្ឋេវ កស្មា គយ្ហន្តិ, អភេទេនាតិ លក្ខយេ.

៣៧៦. បឋមាទិចតុជ្ឈានា, លោកុត្តរមហគ្គតា;

ឥច្ចេកមេកទសធា, ចតុតាលីស បិណ្ឌិតា.

៣៧៧. តេវីស បញ្ចមា ចេតិ, សត្តសដ្ឋិ សមិស្សិតា;

អប្បនា តត្ថ សព្ពាបិ, អដ្ឋបញ្ញាស ទីបិតា.

៣៧៨. បញ្ចតិំសេវ សង្ខេបា, លោកុត្តរមហគ្គតា;

អប្បនា តត្ថ សព្ពាបិ, ឆព្ពីសតិ បកាសិតា.

៣៧៩. ឥទ្ធិវិធំ ទិព្ពសោតំ, ចេតោបរិយនាមកា;

បុព្ពេនិវាសានុស្សតិ, ទិព្ពចក្ខូតិ បញ្ចធា.

៣៨០. អភិញ្ញាញាណមីរេន្តិ, រូបាវចរបញ្ចមា;

កុសលញ្ច ក្រិយា ចេតិ, ភេទិតំ ទុវិធម្បិ ច.

៣៨១. តំ ទ្វយម្បិ សម្មិស្សេត្វា, បញ្ចាភិញ្ញា ច លោកិយា;

អាសវក្ខយញាណញ្ច, ឆឡភិញ្ញា បវុច្ចរេ.

៣៨២. លោកិយា ច ទសាភិញ្ញា, ភិន្ទិត្វា កុសលក្រិយា;

សត្តសត្តតិ ឈានានិ, អដ្ឋសដ្ឋិ បនប្បនា.

៣៨៣. សត្តសត្តតិ ចិត្តានិ, ចតុបញ្ញាស សព្ពថា;

បចិតានិ ច ចិត្តានិ, ឯកតិំសសតំ សិយុន្តិ.

ឥតិ ចេតសិកវិភាគេ បភេទកថា និដ្ឋិតា.

ទសមោ បរិច្ឆេទោ.