៩. ចេតសិកសង្គហកថា

៣១៥. សត្ត សាធារណា ចេវ, ឆ ធម្មា ច បកិណ្ណកា;

សទ្ធាទិ បញ្ចវីសេតិ, អដ្ឋតិំស សមិស្សិតា.

៣១៦. កាមាវចរបុញ្ញេសុ, លព្ភន្តិ បឋមទ្វយេ;

សត្តតិំសេវ ទុតិយេ, បញ្ញាមត្តវិវជ្ជិតា.

៣១៧. តតិយេ ច យថាវុត្តា, បីតិមត្តវិវជ្ជិតា;

ឆត្តិំសេវ ចតុត្ថម្ហិ, បញ្ញាបីតិទ្វយំ វិនា.

៣១៨. មហាក្រិយាសុ យុជ្ជន្តិ, ហិត្វា វិរតិយោ តថា;

បញ្ចតិំស ចតុត្តិំសទ្វយំ តេត្តិំសកំ កមា.

៣១៩. ឋបេត្វា អប្បមញ្ញា ច, មហាបាកេសុ យោជិតា;

តេត្តិំសា ចេវ ទ្វត្តិំសទ្វយេកត្តិំសកំ កមា.

៣២០. អប្បមញ្ញា គហេត្វាន, ហិត្វា វិរតិយោ តថា;

បញ្ចតិំសេវ បឋមេ, រូបាវចរមានសេ.

៣២១. វិតក្កំ ទុតិយេ ហិត្វា, វិចារញ្ច តតោ បរំ;

ចតុត្ថេ បន បីតិញ្ច, អប្បមញ្ញញ្ច បញ្ចមេ.

៣២២. យថាវុត្តបការាវ, ចតុត្តិំស យថាក្កមំ;

តេត្តិំស ចេវ ទ្វត្តិំស, សមតិំសញ្ច លព្ភរេ.

៣២៣. បញ្ចមេន សមានា ច, ឋបេត្វារុប្បមានសា;

ភូមារម្មណភេទញ្ច, អង្គានញ្ច បណីតតំ.

៣២៤. អប្បមញ្ញា ឋបេត្វាន, គហេត្វា វិរតិត្តយំ;

ឆត្តិំសានុត្តរេ ហោន្តិ, បឋមជ្ឈានមានសេ.

៣២៥. វិតក្កំ ទុតិយេ ហិត្វា, វិចារញ្ច តតោ បរំ;

បីតិំ ហិត្វា ចតុត្ថេ ច, បញ្ចមេបិ ច សព្ពថា.

៣២៦. យថាវុត្តប្បការាវ, បញ្ចតិំស យថាក្កមំ;

ចតុត្តិំសញ្ច តេត្តិំស, តថា តេត្តិំស ចាបរេ.

៣២៧. ឯវំ ពាវីសធា ភេទោ, អនវជ្ជេសុ សង្គហោ;

ឯកូនសដ្ឋិចិត្តេសុ, អដ្ឋតិំសានមីរិតោ.

៣២៨. វិរតី អប្បមញ្ញា ច, គហេត្វា បន សព្ពសោ;

ឯកមេកំ គហេត្វា ច, បច្ចក្ខាយ ច សព្ពថា.

៣២៩. កាមេសុ សត្តធា បុញ្ញេ, ចតុធា ច ក្រិយេ តថា;

រូបជ្ឈានចតុក្កេ ច, កត្តព្ពោយម្បិ សង្គហោ.

៣៣០. ឥមិនា បនុបាយេន, សមសត្តតិ ភេទតោ;

អនវជ្ជេសុ វិញ្ញេយ្យោ, ចិត្តុប្បាទេសុ សង្គហោ.

៣៣១. ឥតិ សព្ពប្បការេន, អនវជ្ជវិនិច្ឆយំ;

ញត្វា យោជេយ្យ មេធាវី, សាវជ្ជេសុ ច សង្គហំ.

៣៣២. សត្ត សាធារណា ចេវ, ឆ ធម្មា ច បកិណ្ណកា;

ចត្តារោ បាបសាមញ្ញា, ធម្មា សត្តរសេវិមេ.

៣៣៣. ឯកូនវីសាសង្ខារេ, បឋមេ លោភទិដ្ឋិយា;

ទុតិយេ លោភមានេន, យថាវុត្តា ច តត្តកា.

៣៣៤. អដ្ឋារស វិនា បីតិំ, តតិយេ លោភទិដ្ឋិយា;

ចតុត្ថេបិ វិនា បីតិំ, លោភមានេន តត្តកា.

៣៣៥. បដិឃេ ច វិនា បីតិំ, អសង្ខារេ តថេវ តេ;

លព្ភន្តិ ទោសកុក្កុច្ច-មច្ឆរិយាហិ វីសតិ.

៣៣៦. អសង្ខារេសុ វុត្តា ច, សសង្ខារេសុ បញ្ចធា;

ថិនមិទ្ធេនេកវីស, វីស ទ្វេវីសតិក្កមា.

៣៣៧. ឆន្ទំ បីតិញ្ច ឧទ្ធច្ចេ, ហិត្វា បញ្ចទសេវ តេ;

ហិត្វា វិមោក្ខំ កង្ខញ្ច, គហេត្វា កង្ខិតេ តថា.

៣៣៨. សត្តវីសតិធម្មានំ, ឥតិ ទ្វាទស សង្គហា;

ទ្វាទសាបុញ្ញចិត្តេសុ, វិញ្ញាតព្ពា វិភាវិនា.

៣៣៩. ហិត្វា ឆានិយតេ ធម្មេ, គហេត្វា ច យថារហំ;

ចតុត្តិំសាបិ វិញ្ញេយ្យា, សង្គហា តត្ថ វិញ្ញុនា.

៣៤០. ទ្វាទសាកុសលេស្វេវ, ញត្វា សង្គហមុត្តរំ;

ញេយ្យាហេតុកចិត្តេសុ, សង្គហំ កមតោ កថំ?

៣៤១. សត្ត សាធារណា ឆន្ទវជ្ជិតា ច បកិណ្ណកា;

ហសិតុប្បាទចិត្តម្ហិ, ទ្វាទសេវ បកាសិតា.

៣៤២. វោដ្ឋព្ពេ ច វិនា បីតិំ, វីរិយំ សុខតីរណេ;

ឯកាទស យថាវុត្តា, ធម្មា ទ្វីសុបិ ទេសិតា.

៣៤៣. មនោធាតុត្តិកេ ចេវ, ឧបេក្ខាតីរណទ្វយេ;

ទស ហោន្តិ យថាវុត្តា, ហិត្វា វីរិយបីតិយោ.

៣៤៤. សត្ត សាធារណា ឯវ, បញ្ចវិញ្ញាណសម្ភវា;

ឥច្ចាហេតុកចិត្តេសុ, បញ្ចធា សង្គហោ ឋិតោ.

៣៤៥. ឥតិ ចេតសិកេ ធម្មេ, ចិត្តេសុ គណិតេ បុន;

ចិត្តេន សហ សង្គយ្ហ, គណេយ្យាបិ ច បណ្ឌិតោ.

៣៤៦. អដ្ឋតិំសាតិ យេ វុត្តា, ចិត្តេន សហ តេ បុន;

ឯកូនចត្តាលីសេតិ, សព្ពត្ថេកាធិកំ នយេ.

៣៤៧. ពាវីសេវំ ទស ទ្វេ ច, បញ្ច ចេតិ យថារហំ;

សង្គហា សម្បយុត្តានំ, តាលីសេកូនកា កថា.

៣៤៨. វិតក្កោ ច វិចារោ ច, បីតិ បញ្ញា តថា បន;

អប្បមញ្ញា វិរតីតិ, នវ ធម្មា យថារហំ.

៣៤៩. គហេតព្ពាបនេតព្ពា, ភវន្តិ អនវជ្ជកេ;

បរិវត្តេតិ សព្ពត្ថ, វេទនា តុ យថារហំ.

៣៥០. ឆន្ទាធិមោក្ខវីរិយា, សទ្ធាទេកូនវីសតិ;

ផស្សាទយោ ឆឡេវាតិ, ន ចលន្តដ្ឋវីសតិ.

៣៥១. តេរសេវ តុ សាវជ្ជេ, ឆឡេវាហេតុមានសេ;

ន ចលន្តិ ទស អញ្ញេ, ចុទ្ទសា ឆ ច សម្ភវាតិ.

ឥតិ ចេតសិកវិភាគេ ចេតសិកសង្គហកថា និដ្ឋិតា.

នវមោ បរិច្ឆេទោ.