៨. ចេតសិកសម្បយោគកថា

២៨៦. ឥតិ ចិត្តវិធិំ ញត្វា, ទ្វេបញ្ញាស វិភាវិនា;

ញេយ្យា ចេតសិ សម្ភូតា, ធម្មា ចេតសិកា កថំ.

២៨៧. ផស្សោ ច វេទនា សញ្ញា, ចេតនេកគ្គតា តថា;

ជីវិតំ មនសិការោ, សត្ត សាធារណា ឥមេ.

២៨៨. វិតក្កោ ច វិចារោ ច, បីតិ ច វីរិយំ តថា;

ឆន្ទោ ច អធិមោក្ខោ ច, ឆ បកិណ្ណកនាមកា.

២៨៩. បុញ្ញាបុញ្ញេសុ បាកេសុ, ក្រិយាសុ ច យថារហំ;

មានសេសុ បវត្តន្តិ, វិប្បកិណ្ណា បកិណ្ណកា.

២៩០. សទ្ធា សតិន្ទ្រិយញ្ចេវ, ហិរោត្តប្បពលទ្វយំ;

អលោភោ ច អទោសោ ច, បញ្ញា មជ្ឈត្តតាបិ ច.

២៩១. អដ្ឋេតេ ឧត្តមា នាម, ធម្មា ឧត្តមសាធនា;

និវជ្ជាតិ បវុច្ចន្តិ, យុគឡា ឆ តតោបរេ.

២៩២. បស្សទ្ធិ កាយចិត្តានំ, លហុតា មុទុតា តថា;

កម្មញ្ញតា ច បាគុញ្ញ-តា ច ឧជុកតាតិ ច.

២៩៣. អប្បមញ្ញាទ្វយំ នាម, ករុណាមុទិតា សិយុំ;

សម្មាវាចា ច កម្មន្តា-ជីវា ច វិរតិត្តយំ.

២៩៤. បញ្ចវីស បនិច្ចេតេ, អនវជ្ជា យថារហំ;

បាបាហេតុកមុត្តេសុ, អនវជ្ជេសុ ជាយរេ.

២៩៥. លោភោ ទោសោ ច មោហោ ច,

មានោ ទិដ្ឋិ ច សំសយោ;

ថិនមិទ្ធញ្ច ឧទ្ធច្ចំ,

កុក្កុច្ចញ្ច តថា ទស.

២៩៦. អហិរីកមនោត្តប្បំ, ឥស្សា មច្ឆរិយន្តិ ច;

ហោន្តិ ចុទ្ទស សាវជ្ជា, សាវជ្ជេស្វេវ សម្ភវា.

២៩៧. ទ្វេបញ្ញាស ចតុទ្ធេវំ, ធម្មា ចេតសិកា ឋិតា;

តេសំ ទានិ បវក្ខាមិ, សម្បយោគញ្ច សង្គហំ.

២៩៨. សត្ត សាធារណា សព្ព-ចិត្តសាធារណា តតោ;

ចិត្តេន សទ្ធិ អដ្ឋន្នំ, វិប្បយោគោ ន កត្ថចិ.

២៩៩. វិតក្កោ បញ្ចវិញ្ញាណំ, ទុតិយាទិវិវជ្ជិតេ;

វិចារោបិ ច តត្ថេវ, តតិយាទិវិវជ្ជិតេ.

៣០០. សោមនស្សយុតេ បីតិ-ចតុត្ថជ្ឈានវជ្ជិតេ;

វីរិយំ បឋមាវជ្ជ-វិបាកាហេតុវជ្ជិតេ.

៣០១. ឆន្ទោ សម្ភោតិ សព្ពត្ថ, មោមូហាហេតុវជ្ជិតេ;

អធិមោក្ខោ វិចិកិច្ឆា-បញ្ចវិញ្ញាណវជ្ជិតេ.

៣០២. ឆសដ្ឋិ បញ្ចបញ្ញាស, សត្តតិ ចេវ សោឡស;

វីសតេកាទសេវាថ, បកិណ្ណកវិវជ្ជិតា.

៣០៣. មានសា បញ្ចបញ្ញាស, សវិតក្កា ឆសដ្ឋិ ច;

សវិចារេកបញ្ញាស, សប្បីតិកមនា តថា.

៣០៤. តេសត្តតិ សវីរិយា, សឆន្ទេកូនសត្តតិ;

សាធិមោក្ខា បវុច្ចន្តិ, អដ្ឋសត្តតិ មានសា.

៣០៥. បញ្ញាប្បមញ្ញាវិរតី, ហិត្វា ឯកូនសដ្ឋិសុ;

បាបាហេតុកមុត្តេសុ, សទ្ធាទេកូនវីសតិ.

៣០៦. ទ្វិហេតុកាហេតុបាបវជ្ជិតេសុ សមាសតោ;

បញ្ញា តុ ជាយតេ សត្តចត្តាលីសេសុ សព្ពថា.

៣០៧. មហាក្រិយាកាមបុញ្ញ-រូបជ្ឈានេសុ ជាយរេ;

អប្បមញ្ញាដ្ឋវីសេសុ, ហិត្វា ឈានំ តុ បញ្ចមំ.

៣០៨. លោកុត្តរេសុ សព្ពត្ថ, សហេវ វិរតិត្តយំ;

កាមបុញ្ញេសុ សម្ភោតិ, យថាសម្ភវតោ វិសុំ.

៣០៩. វិរតីអប្បមញ្ញាសុ, បញ្ចស្វបិ យថារហំ;

កទាចិទេវ សម្ភោតិ, ឯកេកោវ ន ចេកតោ.

៣១០. អហិរីកមនោត្តប្បំ, មោហឧទ្ធច្ចមេវ ច;

បាបសាធារណា នាម, ចត្តារោ បាបសម្ភវា.

៣១១. លោភោ ច លោភមូលេសុ, ទិដ្ឋិយុត្តេសុ ទិដ្ឋិ ច;

មានោ ទិដ្ឋិវិយុត្តេសុ, ទិដ្ឋិមានា ន ចេកតោ.

៣១២. ទោសមូលេសុ ទោសោ ច, ឥស្សា មច្ឆរិយំ តថា;

កុក្កុច្ចមិតិ ចត្តារោ, វិចិកិច្ឆា តុ កង្ខិតេ.

៣១៣. សហេវ ថិនមិទ្ធំ តុ, សសង្ខារេសុ បញ្ចសុ;

ឥតិ ចុទ្ទស សាវជ្ជា, សាវជ្ជេស្វេវ និច្ឆិតា.

៣១៤. មានោ ច ថិនមិទ្ធញ្ច, សហ វាថ វិសុំ ន វា;

ឥស្សាមច្ឆេរកុក្កុច្ចា, អញ្ញមញ្ញំ វិសុំ ន វាតិ.

ឥតិ ចេតសិកវិភាគេ ចេតសិកសម្បយោគកថា និដ្ឋិតា.

អដ្ឋមោ បរិច្ឆេទោ.