១២. ទ្វាទសមោ បរិច្ឆេទោ

ទសាវត្ថាវិភាគោ

១៦៤២. ឥច្ចដ្ឋារសធា ភិន្នា, បដិបក្ខប្បហានតោ;

លក្ខណាការភេទេន, តិវិធាបិ ច ភាវនា.

១៦៤៣. កលាបតោ សម្មសនំ, ឧទយព្ពយទស្សនំ;

ភង្គេ ញាណំ ភយេ ញាណំ, ញាណមាទីនវេបិ ច.

១៦៤៤. តថេវ និព្ពិទាញាណំ, ញាណំ មុច្ចិតុកម្យតា;

បដិសង្ខា ច សង្ខារុ-បេក្ខាញាណានុលោមកំ.

១៦៤៥. ឥច្ចាវត្ថាបភេទេន, ទសធាបិ វិភាវិតា;

សភាគត្ថវិសេសេន, តិធា សង្គហិតា បុន.

១៦៤៦. យថាភូតំ នាម ញាណត្តយំ សម្មសនាទិកំ;

ភយាទិញាណំ តិវិធំ, និព្ពិទាតិ បវុច្ចតិ.

១៦៤៧. តថា មុច្ចិតុកាមាទិ, វិរាគោវ ចតុព្ពិធំ;

លក្ខណត្តយនិជ្ឈានវសេន បុន វុដ្ឋិតា.

១៦៤៨. សុញ្ញតញ្ចានិមិត្តញ្ច, តថាប្បណិហិតន្តិ ច;

សាធេតិ មគ្គសង្ខាតំ, វិមោក្ខត្តយមុត្តមំ.

១៦៤៩. ឥតិ ភាវេតុកាមស្ស, វិភាវេតិ យថាក្កមំ;

ទសាវត្ថាវិភាគេន, សមាទាយ យថា កថំ.

១៦៥០. វិសុទ្ធោ បឋមំ តាវ, សាធុ សីលវិសុទ្ធិយា;

ឧបចារប្បនាយញ្ច, ឋត្វា ចិត្តវិសុទ្ធិយំ.

១៦៥១. សប្បច្ចយំ បរិគ្គយ្ហ, នាមរូបំ សភាវតោ;

ទិដ្ឋិកង្ខាវិតរណំ, បត្វា សុទ្ធិំ តតោ បរំ.

១៦៥២. អតីតានាគតេ ខន្ធេ, បច្ចុប្បន្នេ ច សាសវេ;

កលាបតោ សម្មសិត្វា, សម្មសេយ្យ តិលក្ខណំ.

១៦៥៣. អាទាននិក្ខេបនតោ,

វយោវុទ្ធត្ថគាមិតោ;

អាហារតោបិ ឧតុតោ,

កម្មតោ ចាបិ ចិត្តតោ.

១៦៥៤. ធម្មតារូបតោ ចាបិ, រូបសត្តកតោ នយេ;

កលាបតោ យមកតោ, ខណិកា បដិបាដិតោ.

១៦៥៥. ទិដ្ឋិមុគ្ឃាដយន្តោ ច, មានមុគ្ឃាដយំ តថា;

និកន្តិបរិយាទានោ, នាមសត្តកតោ នយេ.

១៦៥៦. និច្ចា ចេ ន និរុជ្ឈេយ្យុំ, ន ពាធេយ្យុំ សុខា យទិ;

វសេ វត្តេយ្យុមត្តា ចេ, តទភាវា ន តាទិសា.

១៦៥៧. សម្ភវន្តិ ហិ សង្ខារា, សតិ បច្ចយសម្ភវេ;

តតោ បច្ចយនិប្ផន្នា, អវស្សំ ភេទគាមិនោ.

១៦៥៨. តទនិច្ចា ខយដ្ឋេន, ទុក្ខា នាម ភយដ្ឋតោ;

អនត្តាសារកដ្ឋេន, សង្ខារាតិ វិភាវយំ.

១៦៥៩. កាលេន សម្មសេ រូបំ, នាមំ កាលេន សម្មសេ;

អជ្ឈត្តញ្ច ពហិទ្ធា ច, សមាសព្យាសតោ តតោ.

១៦៦០. យថោបដ្ឋិតភេទេន, សម្មសន្តោ សមូហតោ;

កលាបតោ សម្មសនមិតិ ភាវេតិ បណ្ឌិតោ.

១៦៦១. តស្សេវំ សម្មសន្តស្ស, កម្មញ្ញំ ហោតិ មានសំ;

សូបដ្ឋន្តិ ច សង្ខារា, វោទាយតិ ច ភាវនា.

១៦៦២. តតោ បរំ វិបស្សន្តោ, បរិគ្គណ្ហាតិ បណ្ឌិតោ;

បច្ចុប្បន្នសភាវានំ, ខន្ធានមុទយព្ពយំ.

១៦៦៣. តណ្ហាសម្មោហកម្មេហិ,

ខន្ធបញ្ចកសភាវោ;

រូបមាហារតោ ហោតិ,

ផស្សតោ វេទនាទយោ.

១៦៦៤. វិញ្ញាណំ នាមរូបម្ហា, សម្ភោតីតិ ច បស្សតោ;

តស្ស បច្ចយតោ ហោតិ, ខន្ធេសុទយទស្សនំ.

១៦៦៥. តណ្ហាទីនំ និរោធា ច,

និរោធោ ហោតិ បស្សតោ;

តថា វីសតិធា ហោតិ,

តត្ថេវ វយទស្សនំ.

១៦៦៦. និព្ពត្តិវិបរិណាមលក្ខណំ បន បស្សតោ;

ខណតោ ទសធា នេសមុទយព្ពយទស្សនំ.

១៦៦៧. ឥត្ថំ បញ្ញាសធា ភេទោ,

ខន្ធានមុទយព្ពយោ;

អាយតនាទិភេទោបិ,

យោជេតព្ពោ យថារហំ.

១៦៦៨. តទេវមនុបស្សន្តោ, ខន្ធាយតនធាតុយោ;

អនិច្ចា ទុក្ខានត្តាតិ, ភាវេតិ ពហុធា ពុធោ.

១៦៦៩. ភាវនាបសុតស្សេវំ, បស្សតោ ពោធិបក្ខិយា;

បាតុភូតា បវត្តន្តិ, វិសេសេន វិសារទា.

១៦៧០. សលក្ខណបរិច្ឆិន្នេ, តិលក្ខណវវត្ថិតេ;

ឆន្ទោ សាសវសង្ខារេ, សារទំ បរិយេសតិ.

១៦៧១. តត្ថ បុព្ពង្គមំ ហុត្វា, សំបក្ខន្ទតិ មានសំ;

សង្កប្បោភិនិរោបេតិ, អាហរន្តោ បុនប្បុនំ.

១៦៧២. យថាវត្ថុសភាវេន, តតោ សទ្ធាធិមុច្ចតិ;

សតិ សូបដ្ឋិតា ហោតិ, បរិគ្គយ្ហ សភាវតោ.

១៦៧៣. បញ្ញា សម្បដិវិជ្ឈន្តី, សមាហច្ច វិបស្សតិ;

បគ្គហេត្វាន វាយាមោ, បដិបាទេតិ ភាវនំ.

១៦៧៤. តតោ បីតិមនោ ហោតិ, និប្ផាទិតមនោរថោ;

បាមោជ្ជពហុលោ ហុត្វា, បស្សទ្ធទរថោ បន.

១៦៧៥. វិក្ខេបុទ្ធច្ចនិត្តិណ្ណោ, សមាធិយតិ និច្ចលោ;

ឧបេក្ខា ភាវនាវីថិំ, អធិដ្ឋាតិ តតោ បរំ.

១៦៧៦. អារុឡ្ហយោគ្គាចរិយោ, អាជានីយរថោ វិយ;

វាតាភាវេ បទីបោវ, បសន្នេកមុខដ្ឋិតា.

១៦៧៧. សុខុមា និបុណាការា, ខុរធារាគតា វិយ;

គណ្ហន្តី ភាវនាគព្ភំ, បវឌ្ឍតិ វិបស្សនា.

១៦៧៨. សម្បត្តបដិវេធស្ស,

តស្សេវំ តំ វិបស្សតោ;

ជាយតេកោ ឧបក្លេសោ,

ទសោបក្លេសវត្ថុកា.

១៦៧៩. ឱភាសោ បីតិ បស្សទ្ធិ, អធិមោក្ខោ ច បគ្គហោ;

សុខំ ញាណមុបដ្ឋានមុបេក្ខា ច និកន្តិ ច.

១៦៨០. ជាតេស្វេតេសុ យំ កិញ្ចិ, ឧឡារំ ជាតវិម្ហយោ;

ទិស្វា វិបស្សនាមគ្គា, វោក្កមិត្វា តតោ បរំ.

១៦៨១. តមហំការវិក្ខិត្តោ, អស្សាទេន្តោ មមាយតិ;

ហោតាធិមានិកោ វាថ, មញ្ញន្តោ តមនុត្តរំ.

១៦៨២. សិយា ចេវមុបក្លិដ្ឋា, បតិតា វាថ ភាវនា;

តត្ថេវំ បដិសង្ខាយ, បដិវិជ្ឈតិ បណ្ឌិតោ.

១៦៨៣. ន តណ្ហាទិដ្ឋិមានេហិ, បរិយោគាហហេតុតោ;

លក្ខណាលម្ពណត្តា ច, លោកិយាយំ វិបស្សនា.

១៦៨៤. ទិដ្ឋិមាននិកន្តី ច, កុម្មគ្គា បរិបន្ថកា;

មគ្គោ វិសុទ្ធិយា នាម, វិសុទ្ធា ច វិបស្សនា.

១៦៨៥. សារថីវ រថំ ភន្តមិតិ សង្ខាយ សាធុកំ;

បវិដ្ឋមគ្គំ វិក្ខិត្តំ, សម្បាទេតិ យថា បុរេ.

១៦៨៦. ឥត្ថំ មគ្គេ អមគ្គេ ច, យាថាវបដិវេធកំ;

មគ្គាមគ្គវិសុទ្ធីតិ, ញាណទស្សនមីរិតំ.

១៦៨៧. ចេតោបវត្តនាការមិតិ សល្លក្ខយំ ពុធោ;

សាធុកំ បដិវិជ្ឈន្តោ, សុខុមំ និបុណំ តតោ.

១៦៨៨. បរិបន្ថេ វិមោចេត្វា, ពោធេត្វា ពោធិបក្ខិយេ;

ភាវនំ បដិបាទេន្តោ, បុនទេវោទយព្ពយំ.

១៦៨៩. សមធិដ្ឋាយ មេធាវី, វិបស្សតិ តិលក្ខណំ;

ឧទយព្ពយញាណន្តិ, តមីរេន្តិ តតោ បរំ.

១៦៩០. សង្ខារានំ វិភូតត្តា, សាការានំ វិសេសតោ;

តិលក្ខណានំ ទិដ្ឋត្តា, សង្ខារេសុ សភាវតោ.

១៦៩១. បរិបន្ថា វិមុត្តស្ស, មគ្គាមគ្គវិសុទ្ធិយា;

យថាវីថិប្បវត្តស្ស, បដិបត្តិវិសុទ្ធិយា.

១៦៩២. ឥន្ទ្រិយានំ សុតិក្ខត្តា, បរិបក្កា វិបស្សនា;

ឧទយម្ហា វិមុច្ចិត្វា, ភង្គេ ឋាតិ យថា កថំ.

១៦៩៣. ឧប្បាទោ បច្ចយាយត្តោ, ធម្មានមិតិ និច្ឆិតេ;

និរោធានុគតា ជាតិ, សិទ្ធាវស្សំ និយាមតោ.

១៦៩៤. តតោទយាវ បដ្ឋាយ, អត្ថាយ សូរិយោ វិយ;

វិនាសាយ បវត្តន្តា, វយន្តេវាតិ បេក្ខតិ.

១៦៩៥. ឧទយាភោគមោហាយ, វយន្តិច្ចេវ សព្ពថា;

ភេទស្សភាវមារព្ភ, ធម្មេសុ សតិ តិដ្ឋតិ.

១៦៩៦. អតីតា ច និរុទ្ធាវ, និរុជ្ឈិស្សន្តិនាគតា;

និរុជ្ឈន្តេវ វត្តន្តា, ឥច្ចេវមនុបស្សតោ.

១៦៩៧. និជ្ឈរោវ គិរគ្គម្ហិ, វារិវោណតបោក្ខរេ;

បទីបោ វិយ ឈាយន្តោ, អារគ្គេរិវ សាសបោ.

១៦៩៨. អាតបេ វិយ ឧស្សាវោ, បរិស្សាវេ ជលំ វិយ;

មទ្ទិតំ ផេណបិណ្ឌំវ, លោណបិណ្ឌមិវោទកេ.

១៦៩៩. ឧទកេ ទណ្ឌរាជីវ, វិជ្ជុតាវ វលាហកេ;

ជលំ តត្តកបាលេវ, សលិលេ វិយ ពុព្ពុឡំ.

១៧០០. វាតព្ភាហតតូលំវ, តីរំ បត្តាវ វីចិយោ;

ផលំ ពន្ធនមុត្តំវ, តិណានីវ ហុតាវហេ.

១៧០១. ជាយន្តាបិ ច ជិយ្យន្តា, មិយ្យន្តា ច និរន្តរំ;

និរោធាយាភិធាវន្តា, ភង្គាភិមុខបាតិនោ.

១៧០២. វិគច្ឆន្តាវ ទិស្សន្តិ, ខីយន្តន្តរធាយិនោ;

វិទ្ធំសយន្តា សង្ខារា, បតន្តា ច វិនាសិនោ.

១៧០៣. ភង្គញាណំ តមក្ខាតំ, យេន ញាណេន បស្សតោ;

អនិច្ចន្តានុធាវន្តិ, តិវិធាបិ វិបស្សនា.

១៧០៤. ឧទយព្ពយភង្គេសុ, បាកដា ហិ អនិច្ចតា;

ភយាទីនវនិព្ពេទេ, ទុក្ខតានត្តតា តតោ.

១៧០៥. ឥត្ថំ ភង្គមធិដ្ឋាយ, បស្សន្តស្ស តិលក្ខណំ;

សង្ខារា សភយា ហុត្វា, សមុបដ្ឋន្តិ យោគិនោ.

១៧០៦. វាឡមិគានុពទ្ធាវ, និម្មុជ្ជន្តា វិយណ្ណវេ;

អមនុស្សគហិតាវ, បរិក្ខិត្តាវ វេរិហិ.

១៧០៧. កណ្ហសប្បសមាលីឡ្ហា, ចណ្ឌហត្ថិសមុដ្ឋិតា;

បបាតាវាដបក្ខន្តា, បតន្តាវ ហុតាវហេ.

១៧០៨. វជ្ឈប្បត្តា មហាចោរា, ឆិជ្ជន្តា វិយ សីសតោ;

សូលមារោបិយន្តាវ, បព្ពតេនោត្ថដា វិយ.

១៧០៩. ជាតិសង្កដបក្ខន្តា, ជរាព្យាធិនិបីឡិតា;

មរណាសនិសម្មទ្ទា, មហាព្យសនភាគិនោ.

១៧១០. មច្ចុនព្ភាហតា និច្ចំ, ទុក្ខភារសមោត្ថដា;

សោកោបាយាសនិស្សន្ទា, បរិទេវបរាយណា.