១១. ឯកាទសមោ បរិច្ឆេទោ

វិបស្សនាវិភាគោ

១៥០៦. ទ្វិធា សមុដ្ឋានធុរា, តិវិធា ភូមិយោ មតា;

តិវិធាភិនិវេសា ច, សរីរំ តុ ចតុព្ពិធំ.

១៥០៧. តិវិធា ភាវនា តត្ថ, សង្ខារេសុ យថារហំ;

ទុវិធាការមារព្ភ, និជ្ឈាយតិ តិលក្ខណំ.

១៥០៨. អដ្ឋារសាការភិន្នា, ទសាវត្ថា វិភាវិតា;

តិធា វិភាគា សាធេតិ, វិមោក្ខត្តយមុត្តមំ.

១៥០៩. ចតុសច្ចបដិវេធា, សត្តដ្ឋារិយបុគ្គលា;

ក្លេសហានី យថាយោគំ, ចតស្សោ បដិសម្ភិទា.

១៥១០. តិវិធា ច សមាបត្តិ, និរោធា ច តថាបរា;

និស្សន្ទផលមិច្ចាហុ, តស្សា សាសនកោវិទា.

១៥១១. វិបស្សនាភាវនាយ-មិតិ ភាសន្តិ បណ្ឌិតា;

តមិទានិ បវក្ខាមិ, យថានុក្កមតោ កថំ.

១៥១២. ភូមិធម្មេ បរិគ្គយ្ហ, វិចិនន្តស្ស យោគិនោ;

សតិយា សមថា វាថ, សមុដ្ឋាតិ វិបស្សនា.

១៥១៣. សភាវបដិវេធេ ច, សទ្ធម្មបដិបត្តិយំ;

បញ្ញាសទ្ធាទ្វយំ តស្សា, ធុរមាហុ ធុរន្ធរា.

១៥១៤. តេភូមកសភាវានំ, សប្បច្ចយបរិគ្គហោ;

ញាតបរិញ្ញា នាមាយំ, ភូមីតិ បឋមា មតា.

១៥១៥. កលាបតោ សម្មសនំ, ឧទយព្ពយទស្សនំ;

បរិញ្ញាតីរណា នាម, ទុតិយា ភូមិ ភាសិតា.

១៥១៦. បហានបរិញ្ញា ភូមិ, តតិយាហុ តតោបរំ;

ភង្គាទិញាណមិច្ចេវំ, តិវិធា ភូមិយោ មតា.

១៥១៧. ខណសន្តតិអទ្ធាន-វសេនេត្ថ សមីរិតា;

អនិច្ចា ទុក្ខានត្តាតិ, តិវិធាភិនិវេសនា.

១៥១៨. ទិដ្ឋិកង្ខាវិតរណា, មគ្គាមគ្គបដិប្បទា;

វិសុទ្ធិយោ ចតស្សោបិ, សរីរន្តិ និទស្សិតា.

១៥១៩. សលក្ខណវវត្ថានំ, បច្ចយាការនិច្ឆយោ;

កុម្មគ្គបរិហារោ ច, តិលក្ខណវិបស្សនា.

១៥២០. ឥតិ លក្ខណភិន្នត្តា, លព្ភន្តេកក្ខណេបិ ច;

ទេសិតា ហេតុភូតេន, កមេនេវំ វិសុទ្ធិយោ.

១៥២១. សីលព្ពិសុទ្ធិអាទីនំ, តថា សាវ បរម្បរា;

ចិត្តព្ពិសុទ្ធិអាទីនមត្ថាយាតិ បកាសិតា.

១៥២២. ទិស្សមានសភាវានំ, បស្សន្តោ បច្ចយដ្ឋិតិ;

បរិបន្ថវិមុត្តោ ហិ, បដិបាទេតិ ភាវនំ.

១៥២៣. តថាបិ ច វិសេសេន, បដិបន្នស្ស យោគិនោ;

តត្ថ តត្ថ វិភូតត្តា, ឋានតោ ភេទិតា កថំ.

១៥២៤. រូបបុព្ពង្គមំ វាថ, នាមបុព្ពង្គមំ តថា;

អជ្ឈត្តំ វា ពហិទ្ធា វា, យថាបាកដធម្មតោ.

១៥២៥. នាមរូបាទិភេទេន, ភូមិធម្មបរិគ្គហោ;

វុត្តា ទិដ្ឋិវិសុទ្ធីតិ, អត្តទិដ្ឋិប្បហានតោ.

១៥២៦. អាហច្ច បច្ចយុប្បន្នា, តថា តព្ភាវភាវិនោ;

បវត្តន្តីតិ សង្ខារេ, បស្សតោ បន យោនិសោ.

១៥២៧. បច្ចយគ្គាហិនី បញ្ញា, នាមរូបប្បវត្តិយា;

កង្ខា តរន្តិ តាយាតិ, កង្ខាវិតរណា មតា.

១៥២៨. អនិច្ចា ទុក្ខានត្តាតិ, បច្ចយាយត្តវុត្តិតោ;

សង្ខិបិត្វា កលាបេន, សម្មសីយន្តិ សង្ខតា.

១៥២៩. ឧប្បាទវយភាវោបិ, លក្ខណត្តយសាធកោ;

បច្ចយាការមារព្ភ, លក្ខីយតិ វិសេសតោ.

១៥៣០. តស្មា សម្មសនញាណំ, ឧទយព្ពយទស្សនំ;

កង្ខាវិតរណាយំ តុ, សង្គយ្ហតិ វិសុទ្ធិយំ.

១៥៣១. តត្ថ សំក្លេសវិក្ខេបំ, កុម្មគ្គំ បរិវជ្ជតោ;

មគ្គាមគ្គវិសុទ្ធីតិ, ញាណទស្សនមីរិតំ.

១៥៣២. តតោ កថេន្តិ អក្លិដ្ឋមុទយព្ពយទស្សនំ;

អាទិំ កត្វា បដិបទាញាណទស្សនសុទ្ធិយំ.

១៥៣៣. បច្ចយបច្ចយុប្បន្នេ, យថាវត្ថុវវត្ថិតេ;

បហាតុមីហមានានំ, និយ្យានបដិបត្តិតោ.

១៥៣៤. ឧបក្លេសវិសុទ្ធោ ហិ, បុនទេវោទយព្ពយំ;

អធិដ្ឋហិត្វា ភង្គាទិ-ញាណេហិ បដិបជ្ជតិ.

១៥៣៥. តថា ចាភិនវុប្បន្នេ, ភិជ្ជមានេ វិបស្សតោ;

សំវេគកឌ្ឍិតំ ញាណំ, ភង្គាទិមនុតិដ្ឋតិ.

១៥៣៦. តតោ បុព្ពេ បវត្តា ហិ, សំក្លេសាបាយសម្ភវា;

បដិបត្តិវិសុទ្ធីតិ, ន សង្គយ្ហតិ ភាវនា.

១៥៣៧. សម្បាទេន្តោ បនិច្ចេតា, ចតស្សោបិ វិសុទ្ធិយោ;

អនិច្ចា ទុក្ខានត្តាតិ, ភាវេយ្យ តិវិធា កថំ.

១៥៣៨. បច្ចយបច្ចយុប្បន្នា, ជាតានន្តរភេទិនោ;

អនិច្ចា ច បភង្គូ ច, បលុជ្ជន្តិ ចវន្តិ ច.

១៥៣៩. អទ្ធុវា ច អសារា ច, វិភវា ច វិនាសិនោ;

សង្ខតា វិបរិណាម-ធម្មា ឥត្តរកាលិកា.

១៥៤០. ខយធម្មា វយធម្មា, លហុកាលប្បវត្តិនោ;

តាវកាលិកធម្មា ច, បរិត្តដ្ឋិតិកា តថា.

១៥៤១. ខណត្តយបរិច្ឆិន្នា, បុព្ពាបរវិចិត្តកា;

បុរក្ខតា និរោធស្ស, សស្សតា ន កុទាចនំ.

១៥៤២. ជាយន្តិ បរិហានាយ, ន តុ ជាយន្តិ វុទ្ធិយា;

ជិយ្យមានាវ តិដ្ឋន្តិ, ជិណ្ណា ភង្គបរាយណា.

១៥៤៣. អហុត្វាយេវុប្បជ្ជន្តិ, ន កុតោចិបិ អាគតា;

ហុត្វា អន្តរធាយន្តិ, ន តុ កត្ថចិ សញ្ចិតា.

១៥៤៤. តំ តំ បច្ចយសាមគ្គិ-មត្តលាភាយ និស្សិតា;

និរោធធម្មា ជាយន្តិ, ជាតា ព្យន្តិ ភវន្តិ តេ.

១៥៤៥. យថា នទី បព្ពតេយ្យា, យថា ទីបសិខា តថា;

សីឃសីឃំ បវត្តន្តា, ឧប្បជ្ជន្តិ វយន្តិ ច.

១៥៤៦. ជាតា ជាតា និរុជ្ឈន្តិ, អញ្ញេ អញ្ញេ តុ ជាយរេ;

អវីចិ អនុសម្ពន្ធា, ន ជានន្តិ វិសេសតោ.

១៥៤៧. ឥតិ នានប្បការេន, វិបស្សន្តោ វិចក្ខណោ;

អនិច្ចភាវនំ ធីរោ, បរិបាចេតិ សាធុកំ.

១៥៤៨. ទុក្ខា ច ទុក្ខវត្ថូ ច, អភិណ្ហបរិបីឡិតា;

រោគា គណ្ឌា ច សល្លា ច, អឃតោ ច ឧបទ្ទវា.

១៥៤៩. ភយោបសគ្គាឃមូលា,

សាសវាទីនវីតិតា;

អលេណាសរណាតាណា,

វធកា មារកាមិសា.

១៥៥០. ជាតិធម្មា ជរាព្យាធិ-

សោកោបាយាសភាគិនោ;

បរិទេវសភាវា ច,

សំក្លេសា ទុក្ខភាគិនោ.

១៥៥១. ជេគុច្ឆា បដិកូលា ច, ពីភច្ឆា ច វិរូបិនោ;

អជញ្ញា ចបលា ហីនា, ទុគ្គន្ធា ពាលសេវិតា.

១៥៥២. សោកន្តរិកតានិច្ចំ, តណ្ហាយ កឌ្ឍិតា ភុសំ;

កបណា ទុគ្គតា ទីនា, វិបន្នា ច វិឃាតិនោ.

១៥៥៣. អត្តលាភំ គវេសន្តិ, តំតំបច្ចយនិស្សិតា;

ទុក្ខាធិដ្ឋានមច្ចន្តំ, ជាតា បុន វិហញ្ញរេ.

១៥៥៤. អគ្គិកូបេ និមុគ្គាវ, ក្លេសសន្តាបភាគិនោ;

ឱវិទ្ធា វិយ សត្តីហិ, សង្ខារា និច្ចទុក្ខិតា.

១៥៥៥. ជាយមានា ច ជិយ្យន្តា, មិយ្យន្តា ច ខណេ ខណេ;

បសុកា វិយ និច្ចម្មា, ហញ្ញន្តិ សេរិកាតុរា.

១៥៥៦. តិលានិ តិលយន្តេវ, ឧច្ឆុយន្តេវ ឧច្ឆុយោ;

ឧទយព្ពយាវស្សំ តេ, បីឡយន្តិ អភិណ្ហសោ.

១៥៥៧. មនោរមនវាការា, វិបល្លាសបរិក្ខតា;

ឥរិយាបថសញ្ឆន្នា, នោបតិដ្ឋន្តិ ទុក្ខតោ.

១៥៥៨. សង្ខារេសុ បនេតេសុ, វេទនាស្សាទរោធិនោ;

សាវ សន្ទុលសម្ពទ្ធា, សម្មោហបរិវារិតា.

១៥៥៩. ‘‘អទុំ ទុក្ខមិទំ ទុក្ខ’’-មិតិ សំសារចារិនោ;

ទុក្ខហេតុមជានន្តា, សម្ភមន្តិ អវិទ្ទសុ.

១៥៦០. សុខាការមបស្សន្តា, ទុក្ខភារនិបីឡិតា;

បត្ថេន្តិ ទុក្ខមេវញ្ញំ, ពាលា ព្យសនភាគិនោ.

១៥៦១. ចវន្តា ឧបបជ្ជន្តា, រុក្ខសាខំវ មក្កដោ;

ទុក្ខមេកំ វិមុច្ចន្តិ, តតោ គណ្ហន្តិ ចាបរំ.

១៥៦២. តេ ទីឃរត្តំ សោចន្តិ, តណ្ហាសល្លសមប្បិតា;

ទិដ្ឋិបាសសមុបេតា, មានត្ថម្ភានុសាយិនោ.

១៥៦៣. តមាការំ បនិច្ចេវំ, វិបស្សន្តោ វិសារទោ;

ទុក្ខានុបស្សនំ នាម, បរិបាចេតិ ភាវនំ.

១៥៦៤. ធម្មដ្ឋិតិនិយាមា ហិ, ខន្ធាយតនធាតុយោ;

អនត្តាសស្សតន្តា ច, ឦហាភោគវិវជ្ជិតា.

១៥៦៥. បយោជនមធិដ្ឋាយ, ន តុ ព្យាបារយន្តិ ច;

បច្ចយបច្ចយុប្បន្នា, ជនេតុំ វាថ ជាយិតុំ.

១៥៦៦. តថាបិ ហេតុសាមគ្គិ-សម្ភវេ សម្ភវន្តិ តេ;

តព្ភាវភាវិភាវេន, អញ្ញមញ្ញបវត្តិតា.

១៥៦៧. អជាយិតុំ ន សក្កោន្តិ, សតិ បច្ចយសម្ភវេ;

បច្ចយានមលាភេ តុ, ន ជាយន្តិ កុទាចនំ.

១៥៦៨. ន កិញ្ចេត្ថ អបេក្ខិត្វា, សមគ្គា ហោន្តិ បច្ចយា;

ន ជនេតុំ ន សក្កោន្តិ, សមគ្គា ច កុទាចនំ.

១៥៦៩. យថាបច្ចយលាភេន, បវត្តន្តិ យថា តថា;

រក្ខិតា វា វិធាតា វា, នត្ថិ អស្សាមិកា តថា.

១៥៧០. ‘‘អហំ មម’’ន្តិ គណ្ហន្តា, បរិណាមេន្តិ អញ្ញថា;

វិស្សសន្តា ហរន្តេតេ, បរាភូតា បលម្ភិនោ.

១៥៧១. រិត្តា តុច្ឆា ច សុញ្ញា ច, វិវិត្តា សារវជ្ជិតា;

សលក្ខណបរិច្ឆិន្នា, ធម្មា នត្ថេត្ថ បុគ្គលោ.

១៥៧២. ជាយមានា ច ជិយ្យន្តា, មិយ្យមានា ច សង្ខតា;

វិវសា បរិវត្តន្តិ, វសោ តេសំ ន កត្ថចិ.

១៥៧៣. ន តេសុ កស្សចិស្សេរំ, ន តេសញ្ចត្ថិ កត្ថចិ;

ន ចត្តនីតិ សង្ខារា, អាធិបច្ចវិវជ្ជិតា.

១៥៧៤. កទលីបត្តវដ្ដីវ, អញ្ញមញ្ញបតិដ្ឋិតា;

សហជាតគ្ឃនីភូតា, នោបដ្ឋន្តិ អនត្តតោ.

១៥៧៥. អរូបនិស្សិតំ រូបំ, អរូបំ រូបនិស្សិតំ;

ជច្ចន្ធបីឋសប្បីវ, អញ្ញមញ្ញវវត្ថិតំ.

១៥៧៦. យន្តសុត្តេន យន្តំវ, កាយយន្តំ បវត្តតិ;

នាមាវកឌ្ឍិតំ តត្ថ, នត្ថិ អត្តា សយំវសី.

១៥៧៧. ចេតោវិប្ផារនិប្ផន្នា, វាយោធាតុសមុដ្ឋិតា;

ឥរិយាបថវិញ្ញត្តិវិការា បាលកា មតា.