១០. ទសមោ បរិច្ឆេទោ

សេសកម្មដ្ឋានវិភាគោ

១២៩៨. ព្យាបាទាទីនវំ ទិស្វា, ខេមភាវញ្ច ខន្តិយំ;

អប្បមញ្ញា តុ ភាវេន្តោ, វិនេយ្យ បដិឃំ កថំ.

១២៩៩. ចេតោសន្តាបនោ កោធោ,

សម្បសាទវិកោបនោ;

វិរូបពីភច្ឆករោ,

មុខវណ្ណប្បធំសនោ.

១៣០០. សីលកាលុស្សិយុប្បាទោ, ចិត្តវិក្ខេបសម្ភវោ;

បញ្ញាបជ្ជោតវិទ្ធំសី, បដិបត្តិវិពន្ធកោ.

១៣០១. អបាយេកាយនោ មគ្គោ, បាបកណ្ដកពន្ធកោ;

ធម្មមគ្គសមុច្ឆេទី, មគ្គទ្វារបិធានកោ.

១៣០២. យសោវណ្ណវិសង្ខារោ, គុណមូលប្បភញ្ជកោ;

ទុក្ខធម្មសមោធានោ, ព្យសនោបទ្ទវាករោ.

១៣០៣. ទុន្និមិត្តមិទំ ជាតំ, សព្ពសម្បត្តិធំសនំ;

ធូមកេតុសមុប្បាទោ, សព្ពលោកវិនាសកោ.

១៣០៤. សព្ពកល្យាណធម្មានំ, អវមង្គលមុដ្ឋិតំ;

ហិតារម្ភសមុគ្ឃាតី, អន្តរាយសមាគមោ.

១៣០៥. សព្ពាការបដិក្កូលំ, សព្ពវិទ្ទេសការណំ;

វិបត្តិមុខមុប្បន្នំ, អមិត្តជនបត្ថិតំ.

១៣០៦. សបត្តករណំ ឃោរំ, សព្ពានត្ថវិធាយកំ;

ភយមន្តរតោ ជាតំ, តំ ជនោ នាវពុជ្ឈតិ.

១៣០៧. ខុរធារំ លិហន្តាវ, គិលន្តាវ ហុតាសនំ;

តិត្តលាពុំវ ខាទន្តា, គណ្ហន្តាទិត្តមាយុធំ.

១៣០៨. ព្យាបាទមត្តសម្ភវ-មត្តឃញ្ញាយ កេវលំ;

ឧបលាឡេន្តិ ទុម្មេធា, ឃោរមាសីវិសំ យថា.

១៣០៩. ទោសតេជេន រុក្ខោវ, សុសិរារុឡ្ហបាវកោ;

អន្តោនុទយ្ហមានាបិ, វិប្ផន្ទន្តិ វិឃាតិនោ.

១៣១០. នាវពុជ្ឈន្តិ ទុម្មេធា, ចេតោសង្កប្បវាយុនា;

ឧក្កាមុខាមិវាទិត្ត-មុជ្ជលន្តា បុនប្បុនំ.

១៣១១. ភយមគ្គសមារុឡ្ហា, ខេមមគ្គវិរោធិនោ;

ព្យាបន្នា កិព្ពិសាកិណ្ណា, អត្ថទ្វយវិរោធិនោ.

១៣១២. អនាថា សល្លកាវិទ្ធា, វិសដ្ដា អនុសោចិនោ;

អន្ធា វិយ មិគារញ្ញេ, ភមន្តិ ហតចក្ខុកា.

១៣១៣. អសំវិហិតកម្មន្តា, ពាលា កោធវសានុគា;

ខិប្បំ លក្ខិំ បរិច្ចត្តា, យសោភោគេហិ ធំសរេ.

១៣១៤. ទុប្បដិប្បាទិតារម្ភា, កោធសង្ខោភមោហិតា;

ធម្មាមតរសស្សាទំ, ន វិន្ទន្តិ អវិទ្ទសុ.

១៣១៥. ពហ្វាទីនវមិច្ចេវ-មន្តោ ព្យាធិមិវុដ្ឋិតំ;

ជាតានលមិវុច្ឆង្គេ, អជ្ឈុបេក្ខន្តិ ទុជ្ជនា.

១៣១៦. ចោទយមានា ទុក្ខេហិ, ក្លេសាចិណ្ណមលីមហា;

បាបកម្មេហិ បូរេន្តា, សេន្តិ មច្ចុបថេ ចិរំ.

១៣១៧. តមេវំ បដិសង្ខាយ, បដិឃំ បន យោនិសោ;

វាឡមិគំវ ធាវន្តំ, អាវិសន្តំវ រក្ខសំ.

១៣១៨. បាវកំវ បរិព្យុឡ្ហំ, ភាយមានស្ស យោគិនោ;

សោត្ថិភាវាយ ខេមន្ត-មុបញ្ញត្តំ មហេសិនា.

១៣១៩. មាតា កល្យាណធម្មានំ, ខមា នាម មហិទ្ធិកា;

សមប្បវត្តិ សត្តេសុ, សព្ពសម្បត្តិសាធិកា.

១៣២០. កោធានលជលាសេកោ,

សោកោបាយាសនាសនំ;

អាឃាតសល្លនិទ្ធារី,

ឧបនាហវិមោចនំ.

១៣២១. វណ្ណកិត្តិសមុដ្ឋានំ, គុណមូលាភិសេវនំ;

អបារុតមុខំវេត-មត្ថទ្វយសមិទ្ធិយា.

១៣២២. វិឃាតបរិយាទាន-មាសវានមសេសតោ;

បដិបស្សម្ភនំ ចេតោ-បីតិករណចន្ទនំ.

១៣២៣. សព្ពទុក្ខសមុគ្ឃាតិ, សុខុបដ្ឋានមុត្តមំ;

ព្យសនោទយវិច្ឆេទោ, ភយភេរវនិគ្គមោ.

១៣២៤. ចេតោបសាទសន្ធានោ, បាសាទិកផលាវហោ;

បវរោ ពោធិសម្ភារោ, នរានរនិសេវិតោ.

១៣២៥. បាបកន្តារនិត្ថារោ, ចតុរាបាយរោធកោ;

ទ្វារាវាបុរណញ្ចេតំ, ទេវលោកូបបត្តិយា.

១៣២៦. បញ្ញាសីលសមាធានំ, បដិបត្តិវិសោធនោ;

បិយង្ករោ សោម្មភាវោ, ទុល្លភោ ពហុបត្ថិតោ.

១៣២៧. ក្លេសសង្ខោភវិក្ខេប-វិប្ផន្ទបដិពន្ធនំ;

តិតិក្ខាគុណមក្ខាត-មារក្ខវិធិមត្តនោ.

១៣២៨. វិហិំសារតិសារម្ភ-បដិរោធវិមោចនំ;

វេរិកិព្ពិសវិទ្ធំសី, លោកានុគ្គហការណំ.

១៣២៩. ធម្មបជ្ជោតករណំ, សំយោគមលសោធនំ;

សម្មោហតិមិរុទ្ធារិ, សម្បត្តិបដិបាទនំ.

១៣៣០. ឥច្ចត្តត្ថំ បរត្ថញ្ច, សម្បាទេត្វា ខមាបរោ;

សាធេតិ សព្ពសម្បត្តិ-មិធ ចេវ បរត្ថ ច.

១៣៣១. តិតិក្ខាគុណសម្បន្នោ, បាណភូតានុកម្បកោ;

អនាកុលិតកម្មន្តោ, សោរតោ សខិលោ សុចិ.

១៣៣២. និវាតោ សមិតាចារោ, សុភគោ បិយទស្សនោ;

បដិសង្ខាពលប្បត្តោ, ធិតិមា មតិបាដវោ.

១៣៣៣. អក្ខោភោ អធិវាសេន្តោ,

សព្ពានត្ថេ បរិស្សយេ;

ភីមសង្គាមាវចរោ,

ហត្ថិនាគោវ សោភតិ.

១៣៣៤. ឥត្ថំ សមន្តតោ ភទ្ទំ, តិតិក្ខំ បច្ចវេក្ខតោ;

បស្សម្ភេតិ សមុដ្ឋាយ, ខមា ព្យាបាទសម្ភមំ.

១៣៣៥. ទិព្ពោសធមិវាតង្កំ, មេឃជ្ជវំ ហុតាសនំ;

ខិប្បមន្តរធាបេតិ, តិតិក្ខា កោធមត្តនោ.

១៣៣៦. តតោនេកគុណោបេតំ, នេកទោសប្បភញ្ជនំ;

ខន្តិធម្មមធិដ្ឋាយ, បសន្នធីរមានសោ.

១៣៣៧. ភាវេយ្យ បឋមំ តាវ, មេត្តាភាវនមុត្តមំ;

អត្តានមុបមំ កត្វា, សត្តេសុ ហិតវុឌ្ឍិយា.

១៣៣៨. សព្ពេ សត្តា ច បាណា ច, ភូតា ជីវា ច បុគ្គលា;

អព្យាបជ្ជា តថាវេរា, អនីឃា ច សុខេធិនោ.

១៣៣៩. វិជ្ជាសម្បត្តិភោគេហិ, បវឌ្ឍន្តុ យសស្សិនោ;

បរិវារពលប្បត្តា, ភយោបទ្ទវវជ្ជិតា.

១៣៤០. សខិលា សុខសម្ភាសា, អញ្ញមញ្ញាវិរោធិនោ;

មោទន្តុ សុហិតា សព្ពេ, មា កិញ្ចិ បាបមាគមា.

១៣៤១. សទ្ធាបាមោជ្ជពហុលា, ទានសីលមហុស្សវា;

គុណភូសិតសន្តានា, អាយុំ បាលេន្តនាមយំ.

១៣៤២. សម្មាទិដ្ឋិំ បុរោធាយ, សទ្ធម្មបដិបត្តិយា;

អារាធេន្តុ ហិតោបាយ-មច្ចន្តំ សុខសាធនំ.

១៣៤៣. ឥតិ នានប្បការេន, សត្តេសុ ហិតមានសំ;

មាតាវ បិយបុត្តម្ហិ, បវត្តេយ្យ និរន្តរំ.

១៣៤៤. សិនេហំ បរិវជ្ជេន្តោ, ព្យាបាទញ្ច វិនាសយំ;

បរិសុទ្ធេន ចិត្តេន, ហិតកាមោវ កេវលំ.

១៣៤៥. មេត្តាយ មិត្តេ មជ្ឈត្តេ, វេរិកេ ច យថាក្កមំ;

ករោន្តោ សីមសម្ភេទំ, អត្តនិ ច សមំ ផរេ.

១៣៤៦. អាសេវន្តស្ស តស្សេវំ, ហិតាភោគសមាហិតំ;

សត្តបញ្ញត្តិមារព្ភ, សមាធិយតិ មានសំ.

១៣៤៧. តតោ អនីឃោ ឯកគ្គោ, ឧបសន្តមនោរថោ;

ឈានត្តិកំ ចតុក្កំ វា, មេត្តាចេតោវិមុត្តិយា.

១៣៤៨. ភូមិទេសទិសាសត្ត-ភេទភិន្នេសុ ឱធិសោ;

យថាសម្ភវមប្បេតិ, សព្ពសត្តេស្វនោធិសោ.

១៣៤៩. តទេវមេកសត្តម្ហិ, បរិច្ឆេទនិយាមតោ;

ពហុកេសុ ច សត្តេសុ, សព្ពេសុ ច បវត្តតិ.

១៣៥០. តថាសេវិតសន្តានោ,

មេត្តាចេតោវិមុត្តិយា;

ករុណាភាវនាយោគ-

មារភេយ្យ តតោ បរំ.

១៣៥១. សត្តានំ ទុក្ខិតាការ-មាវជ្ជិត្វាន យោនិសោ;

‘‘អហោ ទុក្ខា វិមុច្ចន្តុ, សព្ពេ សត្តា’’តិ ចិន្តយំ.

១៣៥២. កថំ មាណវកោយញ្ច, ភយភេរវកម្បិតោ;

ព្យសនោបទ្ទវាវិទ្ធោ, វិប្ផន្ទតិ វិឃាតវា.

១៣៥៣. តថា ហេតេ វិមោសាយ, បដិបន្នា វិរោធិនោ;

សព្យាបជ្ជា វិហញ្ញន្តិ, ចេតោទុក្ខសមប្បិតា.

១៣៥៤. អថញ្ញេ បរិទេវន្តិ, វិបត្តិវិនិបាតិកា;

បធុបាយិកសង្កប្បា, សោកោបាយាសភាគិនោ.

១៣៥៥. អថាបរេ បរាភូតា, កាមក្លេសវសីកតា;

មោហន្ធការបក្ខន្តា, សត្តា គច្ឆន្តិ ទុគ្គតិំ.

១៣៥៦. តេ តត្ថ កដុកំ ឃោរមនុភោន្តា សកំ ផលំ;

ទុក្ខសូលសមាវិទ្ធា, ពាហា បគ្គយ្ហ កន្ទរេ.

១៣៥៧. ទីឃរត្តាធិមុត្តាយ, ទេវលោកសមិទ្ធិយា;

ទេវកាយា វិហាយន្តិ, អកាមា បរិវត្តិនោ.

១៣៥៨. ចិរកាលំ ជលិត្វាន, សូរិយោវ នភន្តរេ;

ព្រហ្មានោបិ បតន្តេវ, ព្រហ្មលោកាបរាយណា.

១៣៥៩. ខន្ធបញ្ចកមិច្ចេវំ, ទុក្ខាគារំ សមុព្ពហំ;

នានាគតីសុ វិក្ខិត្តំ, បាណជាតំ វិហញ្ញតិ.

១៣៦០. អនាថមនយាបន្នំ, បរិហានិភយាកុលំ;

វាតមណ្ឌលិកក្ខិត្តបក្ខីវ បរិវត្តតិ.

១៣៦១. ឥតិ ទិស្វាន សុត្វា វា, សម្ភាវេត្វាន វា បុន;

ទុក្ខាបគមមិច្ឆន្តោ, ទុក្ខាបគម បត្ថយំ.

១៣៦២. សុខិតេសុ ច មេធាវី, ទុក្ខាការមនុស្សរំ;

បវត្តេយ្យ ទយាបន្នោ, ករុណាភាវនប្បនំ.

១៣៦៣. ‘‘អហោ សត្តា វិមុច្ចន្តុ, ទុក្ខធម្មេហិ សព្ពថា;

សាធុ សមេន្តុបាយាសា, សោកា ច បរិទេវនា.

១៣៦៤. ‘‘ខីយន្តុ បាបធម្មា ច, បស្សម្ភេន្តាមយា តថា;

សំក្លេសា បលិពោធា ច, សមុច្ឆិជ្ជន្តុ បាណិនំ.

១៣៦៥. ‘‘ព្យាបាទា ច វិហាយន្តុ, វិនិវត្តន្តុបទ្ទវា;

ព្យសនានិ វិនស្សន្តុ, វិគច្ឆន្តុ វិបត្តិយោ.

១៣៦៦. ‘‘វិហេសា ច វិឃាតា ច, ខីយន្តុ ភយភេរវា;

បដិក្កមន្តុ វិស្សដ្ឋា, សោត្ថិំ បស្សន្តុ បាណិនោ’’.

១៣៦៧. ឥច្ចេវមនុកម្បន្តោ, សព្ពសត្តេបិ សព្ពថា;

សព្ពទុក្ខសមុគ្ឃាតំ, បត្ថេន្តោ ករុណាយតិ.