៩. នវមោ បរិច្ឆេទោ

ទសានុស្សតិវិភាគោ

១១០០. សទ្ធាបព្ពជិតោ យោគី, ភាវេន្តោនុស្សតិំ បន;

ទសានុស្សតិភេទេសុ, ភាវេយ្យញ្ញតរំ កថំ.

១១០១. អរហំ សុគតោ លោកេ, ភគវា លោកបារគូ;

វិជ្ជាចរណសម្បន្នោ, វិមុត្តិបរិនាយកោ.

១១០២. ជេដ្ឋោ សម្មាភិសម្ពុទ្ធោ, សេដ្ឋោ បុរិសសារថី;

សត្ថា ទេវមនុស្សានំ, ពុទ្ធោ អប្បដិបុគ្គលោ.

១១០៣. សព្ពលោកហិតោ ពន្ធុ, សមត្តរតនាលយោ;

សត្តានមនុកម្បាយ, ជាតោ នាថោ សិវំករោ.

១១០៤. ចក្ខុមា តិត្ថកុសលោ, ធម្មស្សាមី តថាគតោ;

មច្ចុធេយ្យវិមោក្ខាយ, បដិបាទយិ បាណិនោ.

១១០៥. សត្ថវាហោ មហាយោគ្គោ, មគ្គាមគ្គយុធន្ធរោ;

សិរិសត្ថមធិគ្គយ្ហ, វិចរិត្ថ មហាបថំ,

១១០៦. អនោមោ អសមោ ធីរោ,

លោកហីតបរក្កមោ;

សព្ពាការវរោបេតោ,

អច្ឆេរព្ភុតបុគ្គលោ.

១១០៧. អត្ថភូតោ ធម្មភូតោ,

ព្រហ្មភូតោ មហាយសោ;

ញាណាលោកបរិច្ឆិន្ន-

ញេយ្យាសេសបរិគ្គហោ.

១១០៨. អានុភាវវសិប្បត្តោ, អាសភណ្ឌាននិច្ចលោ;

មហន្តមរិយាទោយមនន្តគតិគោចរោ.

១១០៩. សព្ពា ភិញ្ញាពលប្បត្តោ, វេសារជ្ជវិសារទោ;

សព្ពសម្បត្តិនិដ្ឋានោ, គុណបារមិបូរកោ.

១១១០. អប្បមេយ្យោ មហានាគោ, មហាវីរោ មហាមុនិ;

មហេសី មហិតាចារោ, មហាមហោ មហិទ្ធិកោ.

១១១១. សព្ពត្ថសិទ្ធិសញ្ចារោ, មហេសីគណបូជិតោ;

រាជាធិរាជមហិតោ, ទេវព្រហ្មាភិវន្ទិតោ.

១១១២. អភិភូយ តយោ លោកេ, អាទិច្ចោវ នភន្តរេ;

វិរោចតិ មហាតេជោ, អន្ធការេ បភង្ករោ.

១១១៣. ព្យាមប្បភាបរិក្ខិត្តោ, កេតុមាលាហលង្កតោ;

ទ្វត្តិំសលក្ខណាសីតិអនុព្យញ្ជនសោភិតោ.

១១១៤. ឆព្ពណ្ណរំសិលលិតោ, រតនគ្ឃិយសន្និភោ;

សមិទ្ធិរូបសោភគ្គោ, ទស្សនេយ្យំវ បិណ្ឌិតំ.

១១១៥. ផុល្លំ បទុមសណ្ឌំវ, កប្បរុក្ខោវលង្កតោ;

នភំវ តារកាកិណ្ណំ, ឧត្តមោ បដិទិស្សតិ.

១១១៦. សត្ថុកប្បមហាវីរបុត្តេហិ បរិវារិតោ;

សព្ពលោកមហិទ្ធាយ, ធម្មរាជា សយំវសី.

១១១៧. និទ្ធោតមលចន្ទោវ, នក្ខត្តបរិវារិតោ;

ខត្តសង្ឃបរិព្យុឡ្ហោ, ចក្កវត្តីវ សោភតិ.

១១១៨. ឥច្ចានន្តគុណាកិណ្ណមសេសមលនិស្សដំ;

សព្ពសម្បត្តិទាតារំ, វិបត្តិវិនិពន្ធកំ.

១១១៩. ទយាបរមហោរត្តំ, ភគវន្តមនុស្សរំ;

ភាវេតិ បញ្ញវា យោគី, ពុទ្ធានុស្សតិភាវនំ.

១១២០. ស្វាខាតោ តេន សទ្ធម្មោ, សម្ពុទ្ធេន សតីមតា;

បច្ចត្តបដិវេធេន, បស្សិតព្ពោ យថារហំ.

១១២១. តណ្ហាទលិទ្ទនាសាយ, មនោរថសមិទ្ធិយា;

កាលន្តរមនាគម្ម, បច្ចក្ខផលទាយកោ.

១១២២. ឧបនិស្សយវន្តានំ, ‘‘ឯហិ បស្សា’’តិ ទស្សិយោ;

បច្ចត្តមេវ វិញ្ញូហិ, វេទិតព្ពោ សភាវតោ.

១១២៣. សព្ពាសវសមុគ្ឃាតី, សុទ្ធោ សោវត្ថិកោ សិវោ;

បិហិតាបាយកុម្មគ្គោ, មគ្គោ និព្ពានបត្តិយា.

១១២៤. ក្លេសសំកដទុគ្គម្ហា, ទុក្ខក្ខន្ធមហព្ភយា;

ខេមន្តភូមិំ និយ្យាតិ, អច្ចន្តមនុបទ្ទវំ.

១១២៥. បុញ្ញតិត្ថមិទំ នាម, មង្គលញ្ច សិវង្ករំ;

ហិតោទយសុខាធាន-មមតាហារមុត្តមំ.

១១២៦. អវិជ្ជាបដលុទ្ធារវិជ្ជានេត្តោសធំ វរំ;

បញ្ញាធារមិទំ សត្ថំ, ក្លេសគណ្ឌប្បភេទកំ.

១១២៧. ចតុរោឃនិមុគ្គានំ, សេតុពន្ធោ សមុគ្គតោ;

ភវចារករុទ្ធានំ, មហាទ្វារោ អបារុតោ.

១១២៨. សោកោបាយាសវិទ្ធានំ, បរិទេវសមង្គិនំ;

សល្លនីហរណោបាយោ, អច្ចន្តសុខមីរិតោ.

១១២៩. ព្យសនោបទ្ទវាបេតោ, សំក្លេសមលនិស្សដោ;

ឧជុសម្មត្តនិយតោ, បដិបត្តិវិសុទ្ធិយា.

១១៣០. សុទ្ធសីលបរិក្ខារោ, សមាធិមយបញ្ជរោ;

សម្មាសង្កប្បចក្កង្គោ, សម្មាវាយាមវាហនោ.

១១៣១. សតិសារថិសំយុត្តោ, សម្មាទិដ្ឋិបុរេជវោ;

ឯស ធម្មរថោ យាតិ, យោគក្ខេមស្ស បត្តិយា.

១១៣២. វិបត្តិបដិពាហាយ, សព្ពសម្បត្តិសិទ្ធិយា;

សព្ពខន្ធវិមោក្ខាយ, ធម្មំ ទេសេសិ ចក្ខុមា.

១១៣៣. ហិតេសី សព្ពបាណីនំ, ទយាបន្នោ មហាមុនិ;

ធម្មាលោកំ បកាសេសិ, ចក្ខុមន្តានមុត្តមោ.

១១៣៤. យំ ធម្មំ សម្មទញ្ញាយ, ខេមមគ្គប្បតិដ្ឋិតា;

បាបកាបគតា ធីរា, បស្សទ្ធិទរថាសយា.

១១៣៥. ភវយោគា វិនិមុត្តា, បហីនភយភេរវា;

អច្ចន្តសុខមេធេន្តិ, សោត្ថិបត្តា មហេសយោ.

១១៣៦. តមេវមុត្តមំ ធម្មំ, ចិន្តេន្តោ បន បណ្ឌិតោ;

ភាវេតីតិ បកាសេន្តិ, ធម្មានុស្សតិភាវនំ.

១១៣៧. ចត្តារោ ច បដិបន្នា, ចត្តារោ ច ផលេ ឋិតា;

ឯស សង្ឃោ ឧជុភូតោ, បញ្ញាសីលសមាហិតោ.

១១៣៨. បលាបាបគតោ សុទ្ធោ, បដិបត្តិបតិដ្ឋិតោ;

បរិគ្គហិតសទ្ធម្មោ, សមិទ្ធិគុណសោភិតោ.

១១៣៩. បហីនាបាយគមនោ, បាបក្លេសវិនិស្សដោ;

បរិបន្ថសមុច្ឆេទី, ភវចារកភេទកោ.

១១៤០. ឧត្តមទមថប្បត្តោ, សុវិនីតោ មហេសិនា;

វិជ្ជាវិមុត្តិវោទាតោ, អាជានីយបថេ ឋិតោ.

១១៤១. សុគតោរសិ សម្ភូតោ, សុចិធម្មសិរិន្ធរោ;

បដិបាទិតសម្បត្តោ, ធម្មសាសនសេវិតោ.

១១៤២. ភយភេរវនិស្សង្គោ, ជិនតេជានុបាលិតោ;

មោនេយ្យបថសញ្ចារោ, សុគតោវាទភាជនោ.

១១៤៣. អប្បមាទបរិត្តាណោ, សីលាលង្ការភូសិតោ;

ចេតោសមាធិសន្នទ្ធោ, បញ្ញាយុធសមុជ្ជលោ.

១១៤៤. ឧជុមគ្គមធិដ្ឋាយ, មារកាយប្បទាលនោ;

អបរាជិតសង្គាមោ, លលិតោទាតវិក្កមោ.

១១៤៥. មច្ចុធេយ្យមតិក្កន្តោ, ពោធិធម្មប្បតិដ្ឋិតោ;

ឆឡាភិញ្ញាពលប្បត្តោ, សមារាធិតសាសនោ.

១១៤៦. អនុពោធិមនុប្បត្តោ, បភិន្នបដិសម្ភិទោ;

សាមញ្ញបារមិប្បត្តោ, តោសេតិ ជិនមានសំ.

១១៤៧. នេកាការវរូបេតោ, នានាសម្បត្តិផុល្លិតោ;

វិបត្តិបថនិត្តិណ្ណោ, អភិពុទ្ធិបរាយណោ.

១១៤៨. អាហុនេយ្យោ បាហុនេយ្យោ,

ទក្ខិណេយ្យោ សុទុល្លភោ;

សទេវកស្ស លោកស្ស,

បុញ្ញក្ខេត្តមនុត្តរំ.

១១៤៩. យត្ថ សុទ្ធិម្ហិ និទ្ទោសេ, សទ្ធាពីជំ បតិដ្ឋិតំ;

អច្ចន្តំ បរិបាចេតិ, សម្បត្តិផលមុត្តមំ.

១១៥០. យំ ផលំ បរិភុញ្ជន្តា, វិមុត្តិរសសេវនំ;

អច្ចន្តសុខិតា ធីរា, ភវន្តិ អជរាមរា.

១១៥១. តំ ផលំ បត្ថយន្តេន, សង្ឃានុស្សតិភាវនា;

ភាវេតព្ពា បនិច្ចេវមិតិ ភាសន្តិ បណ្ឌិតា.

១១៥២. បញ្ចសីលំ ទសសីលំ, បាតិមោក្ខមុបោសថំ;

ចាតុបារិសុទ្ធិសីលំ, ធុតង្គបរិវារិតំ.

១១៥៣. ឯវមេតេសុ យំ កិញ្ចិ, សមាទាយ រហោគតោ;

តមានិសំសំ គុណតោ, ផលតោ ច វិចិន្តយេ.

១១៥៤. អាទិ ចេតំ បតិដ្ឋា ច, មុខំ បមុខមុត្តមំ;

មូលំ កុសលធម្មានំ, បភវំ បដិបត្តិយា.

១១៥៥. សាសនោតរណទ្វារំ, តិត្ថំ សទ្ធម្មវាបិយា;

បារិសុទ្ធិបទដ្ឋានំ, មគ្គោ ខេមន្តបាបកោ.

១១៥៦. សាធុ សិក្ខាសមាទានំ, ពាហុសច្ចវិភូសនំ;

អរិយាចារចារិត្ត-មវណ្ណមលវជ្ជនំ.

១១៥៧. កុលបុត្តអលង្ការោ, បាបជល្លបវាហនំ;

អនបាយិ សុគន្ធញ្ច, មហាបុរិសសេវិតំ.

១១៥៨. បច្ឆានុតាបហរណំ, បីតិបាមោជ្ជវឌ្ឍនំ;

នេក្ខម្មភាវនោបេតំ, បព្ពជ្ជាវេសសោភនំ.

១១៥៩. សោបានំ សគ្គលោកស្ស, ទឡ្ហាបាយវិធានកំ;

អនុបទ្ទវសម្បត្តិ, សមត្ថគុណសូទនី.

១១៦០. ក្លេសបញ្ជរវិច្ឆេទិ, វិបត្តិបថវារណំ;

សោត្ថិកម្មសមុដ្ឋានំ, អសាធារណមង្គលំ.

១១៦១. ‘‘សុលទ្ធា វត មេ លទ្ធា, សទ្ធា សុគតសាសនេ;

សីលំ មេ យស្ស កល្យាណំ, បរិសុទ្ធមខណ្ឌិតំ.

១១៦២. ‘‘ទុល្លភោ វត មេ លទ្ធោ,

មហាលាភោ អនប្បកោ;

យោហមក្ខលិតាចារោ,

ឧបឃាតវិវជ្ជិតោ.

១១៦៣. ‘‘ធម្មង្កុរិតសន្តានោ, មូលជាតោស្មិ សាសនេ;

ឧជុមគ្គំ សមារុឡ្ហោ, បិហិតា សភយា ទិសា.

១១៦៤. ‘‘អវញ្ចា វត មេ ជាតិ, អារទ្ធា ខណសម្បទា;

បតិដ្ឋិតោម្ហិ សទ្ធម្មេ, សផលំ មម ជីវិតំ’’.

១១៦៥. ឥត្ថំ នានប្បការេន, ចិន្តេន្តោ គុណមត្តនោ;

សីលក្ខន្ធស្ស ភាវេតិ, សីលានុស្សតិភាវនំ.

១១៦៦. សទ្ធាយ សីលវន្តេសុ, ទត្វា ទានំ យថារហំ;

និទ្ធោតមលមច្ឆេរោ, វិវិត្តោ តមនុស្សរេ.

១១៦៧. ទានំ និធានមនុគំ, អសាធារណមុត្តមំ;

អវិនាសសុខាធានំ, អច្ចន្តំ សព្ពកាមទំ.

១១៦៨. កោបទាហោបសមនំ, មច្ឆេរមលសោធនំ;

បមាទនិទ្ទាវុដ្ឋានំ, លោភបាសវិមោចនំ.

១១៦៩. ចេតោវិការទមនំ, មិច្ឆាមគ្គនិវារណំ;

វិត្តិលាភសុខស្សាទោ, វិភវោទយមង្គលំ.