៨. អដ្ឋមោ បរិច្ឆេទោ

កសិណាសុភវិភាគោ

៨៨០. ឥតោ បរំ បវក្ខាមិ, ភាវនានយមុត្តមំ;

នាមរូបំ បរិគ្គយ្ហ, បដិបជ្ជិតុមីហតោ.

៨៨១. ភាវនា ទុវិធា តត្ថ, សមថោ ច វិបស្សនា;

សមថោ ទុវិធោ តត្ថ, បរិត្តោ ច មហគ្គតោ.

៨៨២. ឧបចារមនុប្បត្តោ, បរិត្តោតិ បវុច្ចតិ;

មហគ្គតប្បនាបត្តោ, សមថោ លោកិយោ មតោ.

៨៨៣. កសិណានិ ទសាសុភា, ទសធានុស្សតី តថា;

អប្បមញ្ញា ច សញ្ញា ច, វវត្ថារុប្បកានិ ច.

៨៨៤. កម្មដ្ឋានានិ តត្ថាហុ, ចត្តាលីស វិចក្ខណា;

យត្ថានុយោគំ កុព្ពន្តា, ភាវេន្តិ សមថទ្វយំ.

៨៨៥. តំ បយោគវិសុទ្ធេន, បត្វានោបាយសម្បទំ;

អជ្ឈាសយំ វិសោធេត្វា, ភាវេតព្ពន្តិ ភាសិតំ.

៨៨៦. កថំ ករោន្តោ ចារិត្តំ, វារិត្តញ្ច វិវជ្ជិយ;

បាតិមោក្ខំ សមាទាយ, សទ្ធាយ បរិបូរយេ.

៨៨៧. បដិសង្ខាយ សោធេត្វា, ឆទ្វារេសុ មលាសវំ;

ឆឡិន្ទ្រិយានិ មេធាវី, សតារក្ខេន គោបយេ.

៨៨៨. បាបកាជីវនិស្សង្គោ, កុហកាចារនិស្សដោ;

អាជីវំ បរិសោធេយ្យ, បហិតត្តេដ្ឋិសុទ្ធិយា.

៨៨៩. ឥទមត្ថិតមារព្ភ, បដិសង្ខាយ យោនិសោ;

បញ្ញវា សម្បជញ្ញេន, បរិភុញ្ជេយ្យ បច្ចយេ.

៨៩០. សំវរំ បាតិមោក្ខេ ច, សីលមិន្ទ្រិយសំវរំ;

អាជីវបារិសុទ្ធិញ្ច, តថា បច្ចយនិស្សិតំ.

៨៩១. សមាទាយ ចតុទ្ធេវ-មធិដ្ឋេយ្យ តតោ បរំ;

តស្សេវ បរិវារាយ, ធុតង្គានិ យថារហំ.

៨៩២. បំសុកូលិកមង្គំ តិ-ចីវរំ ចីវរាយុគំ;

បិណ្ឌបាតិកមង្គញ្ច, សបទានិកមុត្តមំ.

៨៩៣. ខលុបច្ឆាភត្តិកង្គំ, ធុតង្គំ បត្តបិណ្ឌិកំ;

ឯកាសនិកមិច្ចេវំ, បញ្ចធា ភោជនេ ឋិតំ.

៨៩៤. អារញ្ញិកំ យថាសន្ថ-

តិកង្គំ រុក្ខមូលិកំ;

អព្ភោកាសិកសោសានិ-

កង្គា នេសជ្ជិកំ តថា.

៨៩៥. ឆ សេនាសនមារព្ភ, ធុតង្គានីតិ តេរស;

កប្បិយេបិ ច លោលុប្ប-សមាចារវិមុត្តិយា.

៨៩៦. សាមីចិបដិបត្តីតិ, កត្វា សល្លេខវុត្តិយា;

បច្ចយត្តយមាហច្ច, បញ្ញត្តានិ មហេសិនា.

៨៩៧. ចតុបារិសុទ្ធិសីលំ, ធុតង្គបរិវារិតំ;

បូរេត្វាន វិសុទ្ធេវំ, បយោគបរិសុទ្ធិយា.

៨៩៨. តតោ បណិធិសម្បន្នោ, ភាវនាយ វិសារទោ;

ឧបាយំ បដិបាទេយ្យ, បវិវេករតោ កថំ?

៨៩៩. អាវាសោ ច កុលំ លាភោ,

គណោ កម្មញ្ច បញ្ចមំ;

អទ្ធានំ ញាតិ អាពាធោ,

គន្ថោ ឥទ្ធីតិ តេ ទស.

៩០០. ឆេត្វាន និបកោ យោគី,

បលិពោធេ យថារហំ;

និរាលយោ និរារម្ភោ,

បបញ្ចោបសមេ រតោ.

៩០១. បិយំ គរុំ ភាវនិយំ, វត្តារំ វចនក្ខមំ;

កត្តារមតិគម្ភីរកថំ ឋាននិយោជកំ.

៩០២. ពហុស្សុតំ គុណវន្ត-មាគម្មាចរិយំ ពុធោ;

ខមោ បទក្ខិណគ្គាហី, និយ្យាតត្តុជុ ភទ្រកោ.

៩០៣. អារាធេត្វាន គណ្ហេយ្យ, តំ កម្មដ្ឋានទាយកំ;

កម្មដ្ឋានំ បរិក្ខិត្វា, ចរិយារហមត្តនោ.

៩០៤. រាគោ ទោសោ ច មោហោ ច,

ចរិយា តីហិ បណ្ឌិតា;

សទ្ធាពុទ្ធិវិតក្កេហិ,

ឆព្ពិធា ច វិភាវយុំ.

៩០៥. រាគុស្សន្នស្ស សប្បាយា, កោដ្ឋាសាសុភភាវនា;

ទោសុស្សន្នស្សប្បមញ្ញា, នីលាទិ ច ចតុព្ពិធា.

៩០៦. វិតក្កំ មោហុស្សន្នានំ, អានាបានំ បកាសិតំ;

ឆ សទ្ធាចរិតស្សាហុ, ពុទ្ធានុស្សតិអាទយោ.

៩០៧. មរណោបសមាសញ្ញាវវត្ថានានិ ពុទ្ធិនោ;

សេសានិ បន សព្ពេសំ, តត្ថាបិ កសិណំ ពុធា.

៩០៨. វិតក្កបកតិកស្ស, បរិត្តំ មោហចារិនោ;

មហន្តមិតិ សប្បាយំ, គហេត្វាន តតោ បរំ.

៩០៩. មហាវាសំ នវំ ជិណ្ណំ, បន្ថសោណ្ឌិកសន្តិកំ;

បណ្ណបុប្ផផលាកិណ្ណំ, ពហុសម្មានបត្ថិតំ.

៩១០. សីមន្តទារុនគរ-ក្ខេត្តបច្ចន្តនិស្សិតំ;

វិសភាគមសប្បាយំ, បដ្ដនំ មិត្តទុល្លភំ.

៩១១. ឋានានិដ្ឋារសេតានិ, បរិវជ្ជេយ្យ បណ្ឌិតោ;

សេវេយ្យ ភាវនាយោគ្គំ, សេនាសនមតន្ទិតោ.

៩១២. នាតិទូរំ នាច្ចាសន្នំ, អប្បសទ្ទមនាកុលំ;

គមនាគមនសម្បន្នំ, អប្បឌំសានុបទ្ទវំ.

៩១៣. អកិច្ឆបច្ចយុប្បាទំ, លជ្ជីភិក្ខុគណោចិតំ;

វិវេកដ្ឋានពហុលំ, ពហុស្សុតនិសេវិតំ.

៩១៤. អប្បភយំ និរាសង្កំ, អប្បទោសំ មហាគុណំ;

វិហារមនុសេវន្តោ, តត្ថ និស្សង្គចេតសា.

៩១៥. តតោ កេសនខច្ឆេទ-រជនាទិមសេសតោ;

ខុទ្ទកំ បលិពោធញ្ច, ឆិន្ទិត្វាន យថារហំ.

៩១៦. អាវាសំ គោចរំ ភស្សំ, បុគ្គលំ ភោជនំ តថា;

វជ្ជេន្តោតុមសប្បាយំ, ឥរិយាបថមត្តនោ.

៩១៧. សេវន្តោ សត្ត សប្បាយេ, តេ ឯវាតិ បធានវា;

ភាវនូបាយសម្បន្នោ, វូបកដ្ឋោ រហោគតោ.

៩១៨. កាមេស្វាទីនវំ ទិស្វា, នេក្ខម្មំ ទដ្ឋុ ខេមតោ;

បរិយុដ្ឋាននិព្ពិន្ទោ, សោធេយ្យជ្ឈាសយំ កថំ.

៩១៩. អប្បស្សាទា មហាទុក្ខា, កាមា ហិ កដុកប្ផលា;

ទុស្សំហារា ទុរារក្ខា, ពហ្វាទីនវសណ្ឋិតា.

៩២០. អដ្ឋិកា ខជ្ជមានាវ, វិឃាតាយ បភិជ្ជិតា;

គយ្ហន្តត្តវធាយេតេ, មំសបេសីវ បក្ខិភិ.

៩២១. បដិវាតេ តិណុក្កាវ, បរិគ្គាហកទាហិនោ;

អង្គារកាសុសង្កាសា, សព្ពង្គបរិតាសកា.

៩២២. សុបិនេ បរិភុត្តាវ, នាលំ កស្សចិ តិត្តិយា;

ន តុ កស្សចិ អច្ចន្តា, អលង្ការាវ យាចិតា.

៩២៣. ឆជ្ជន្តា ផលរុក្ខាវ, បដិបន្នបភញ្ជិនោ;

អសិសូនូបមា និច្ច-មធិកោដ្ដេន្តិ បាណិនោ.

៩២៤. សត្តិសូលូបមា ទឡ្ហំ, តណ្ហាសល្លានុវេធិនោ;

ឃោរានត្ថវិសាកិណ្ណា, កណ្ហសប្បសិរូបមា.

៩២៥. សព្ពាសវបរិក្លិដ្ឋា, សព្ពាសំក្លេសវត្ថុកា;

គម្មា ច ចបលា នីចា, បុថុជ្ជនមមាយិតា.

៩២៦. ពហុសាធារណា ចេតេ, សបត្តជនបត្ថិតា;

មហោបទ្ទវុបយដ្ឋា, ពហ្វាយាសា ភយាវហា.

៩២៧. មហារម្ភសមារទ្ធា, ខិប្បាការវិធំសិនោ;

សោកសល្លំ បវេសេន្តា, វិគច្ឆន្តិ សុវេ សុវេ.

៩២៨. នាលំ កស្សចិ តាណាយ, នាលមស្សាសនាយ ច;

អវិសាសនិយាវស្សំ, កិតវា មារកិំករា.

៩២៩. សត្តានមុបឃាតាយ, មធុរាការនិម្មិតា;

រក្ខសី វិយ សន្តាន-មាវិសន្តិ មនោហរា.

៩៣០. អាវិដ្ឋា យេហិ ទុម្មេធា, ព្យសនាហិតសម្ភវា;

វិបល្លាសបរាភូតា, ព្យាបជ្ជន្តា វិហញ្ញរេ.

៩៣១. ចេតោសង្កប្បរចិតា, នន្ទិរាគោបសេវនា;

មធុលិត្តាសិធារាវ, ព្យាបារេនោបសេវិតា.

៩៣២. មនោរមសុភាការា, បិយរូបោបលម្ភិនោ;

មិត្តមុខំ សបត្តាវ, វញ្ចយន្តិ មហាជនំ.

៩៣៣. វញ្ចិតា យេហិ ទុម្មេធា, សព្ពសម្បត្តិធំសិតា;

ខេមមគ្គា បរិព្ភដ្ឋា, ធារេន្តិ វធមត្តនោ.

៩៣៤. វិរូបរូបាការេន, និម្មថេន្តា បលោភិនោ;

អភាវិតានំ ពាលានំ, មានសំ និហនន្តិមេ.

៩៣៥. យត្ថ រាគសល្លវិទ្ធា, សល្លេនេវ វនេ មិគា;

តត្ថ តត្ថានុធាវន្តា, វិប្ផន្ទន្តិ និរន្តរំ.

៩៣៦. មមំការេន វុឌ្ឍន្តា, ឃោរមាសីវិសំ យថា;

វិស្សដ្ឋា ភោគធម្មេសុ, អស្សាទេន្តិ អវិទ្ទសុ.

៩៣៧. អនយព្យសនាយេតេ, វសី កុព្ពន្តិ បាណិនោ;

វិចិត្តាការសណ្ឋានា, បិសាចនគរំ យថា.

៩៣៨. អនត្ថាវហិតា ពាលា, វាគុរំ នាវពុជ្ឈរេ;

តត្ថេវ បដិវមន្តិ, យថា ហញ្ញន្តិ មុច្ឆិតា.

៩៣៩. សីឃវាហី មហោឃោយំ, ក្លេសវដ្ដំ មហព្ភយោ;

សកណ្ដកញ្ច គហនំ, បង្កោវ ទុរតិក្កមោ.

៩៤០. ចេតោសំមោហនដ្ឋានំ, បមាទបដិសន្ធិតំ;

ឱហារិ សិថិលំ ចេតំ, ទុប្បមុញ្ចញ្ច ពន្ធនំ.

៩៤១. ជាលំវ វិត្ថតំ លោកេ,

មារបាសោ សមោឌ្ឌិតោ;

បញ្ជរំ ចារកោ ចេសោ,

សត្តានមនយាវហោ.

៩៤២. យត្ថានុរាគសម្ពទ្ធា, បលិគុណ្ឋិតសាយិនោ;

មក្កដាលេបពទ្ធាវ, និត្ថុនន្តិ វិឃាតិនោ.

៩៤៣. ពឡិសំវាមិសច្ឆន្នំ, សវិសំ វិយ ភោជនំ;

មិគលុទ្ទនិវាបោវ, វិនាសាយ សមោឌ្ឌិតា.

៩៤៤. មីនកា វង្កគិទ្ធាវ, យេ គិលិត្វា បុថុជ្ជនា;

ឃោរំ មច្ចុមុខំ បត្វា, សោចន្តាបាយភាគិនោ.

៩៤៥. បាបក្ខេត្តមិទំ ឋានំ, មិច្ឆាលោភនិសេវនំ;

ទុច្ចរីតង្កុរារោហំ, អបាយផលបូរណំ.

៩៤៦. អជ្ឈោសិតា បនេត្ថ ច, លោភមុច្ឆាវិទាហិនោ;

កោធូបនាហជលិតា, ឥស្សាមច្ឆេរធូបិតា.

៩៤៧. សារម្ភាយុធសន្នទ្ធា, វិប្ផុរន្តា មនោរថា;

អាពន្ធិច្ឆា មហាកច្ឆា, ឋន្តិ លោកវិបត្តិយា.

៩៤៨. អវជ្ជំ នត្ថិ ឯតេស-មកត្តព្ពំ ន វិជ្ជតិ;

សម្មុដ្ឋសច្ចតា តេសុ, ន បតិដ្ឋាតិ សាធុតា.