៧. សត្តមោ បរិច្ឆេទោ

សព្ពសង្គហវិភាគោ

៦១៧. ចតុបញ្ញាស ធម្មា ហិ, នាមនាមេន ភាសិតា;

អដ្ឋារសវិធា វុត្តា, រូបធម្មាតិ សព្ពថា.

៦១៨. អភិញ្ញេយ្យា សភាវេន, ទ្វាសត្តតិ សមីរិតា;

សច្ចិកដ្ឋបរមត្ថា, វត្ថុធម្មា សលក្ខណា.

៦១៩. តេសំ ទានិ បវក្ខាមិ, សព្ពសង្គាហិកំ នយំ;

អាភិធម្មិកភិក្ខូនំ, ហត្ថសារមនុត្តរំ.

៦២០. ទុកា តិកា ច ខន្ធាយតនតោ ធាតុសច្ចតោ;

បដិច្ចសមុប្បាទា ច, បច្ចយា ច សមញ្ញតោ.

៦២១. បច្ចយោ ឯវ និព្ពានមបច្ចយមសង្ខតំ;

អសង្ខារមនុប្បាទំ, សស្សតំ និច្ចលក្ខណំ.

៦២២. បច្ចយា ចេវ សង្ខារា, សង្ខតា ច តតោបរេ;

ឧប្បាទវយធម្មា ច, បច្ចយដ្ឋិតិកា តថា.

៦២៣. និព្ពានំ រូបធម្មា ច, វិប្បយុត្តាវ កេវលំ;

អារម្មណា ឯវ នាម, នាលម្ពន្តិ ហិ កិញ្ចិបិ.

៦២៤. ឯកុប្បាទនិរោធា ច, ឯកាលម្ពណវត្ថុកា;

សំសដ្ឋា សម្បយុត្តា ច, សហជាតា យថារហំ.

៦២៥. អញ្ញមញ្ញេនុបត្ថទ្ធា, សព្ពត្ថ សហវុត្តិនោ;

សារម្មណារម្មណា ច, ចិត្តចេតសិកា មតា.

៦២៦. វិបស្សនាយ ភូមីតិ, តត្ថ តេភូមកា មតា;

លោកិយា បរិយាបន្នា, វដ្ដធម្មា សឧត្តរា.

៦២៧. សក្កាយធម្មា សភយា, តីរមោរិមនាមកំ;

សំយោជនិយា សមលា, តថា នីវរណីយកា.

៦២៨. សំក្លេសិកា បរាមដ្ឋា, ឧបាទានីយសាសវា;

ឱឃនីយា យោគនីយា, គន្ថនីយាតិ ភាសិតា.

៦២៩. អញ្ញេ អបរិយាបន្នា, វិវដ្ដា ចាវិបស្សិយា;

លោកុត្តរានុត្តរា ច, នោសំយោជនិយាទយោ.

៦៣០. កម្មជាតា ឧបាទិន្នា, នាម វុច្ចន្តិ សាសវា;

អនុបាទិន្នកា នាម, តតោ សេសា បវុច្ចរេ.

៦៣១. ធម្មា សប្បដិភាគាតិ, កុសលាកុសលា មតា;

អប្បដិភាគធម្មាតិ, តទញ្ញេ បរិទីបយេ.

៦៣២. សរណា ច បហាតព្ពា, ទ្វាទសាកុសលា បន;

តទញ្ញេ អរណា នាម, បហាតព្ពា ន កេហិចិ.

៦៣៣. រូបិនោ រូបធម្មា ច, នាមធម្មា អរូបិនោ;

ឯវមាទិប្បភេទេន, ទ្វិធា ភេទំ វិភាវយេ.

៦៣៤. ពាលា ធម្មា តបនីយា, កណ្ហា ច កដុកប្ផលា;

អសេវិតព្ពា សាវជ្ជា, ទ្វាទសាកុសលា មតា.

៦៣៥. បណ្ឌិតា ចាតបនីយា, សុក្កា ច សុខទាយកា;

សេវិតព្ពានវជ្ជា ច, កុសលា ឯកវីសតិ.

៦៣៦. ក្រិយា វិបាកា រូបញ្ច, និព្ពានន្តិ ចតុព្ពិធា;

វុត្តា អព្យាកតា នាម, ធម្មា តព្ពិបរីតតោ.

៦៣៧. ហីនា ធម្មា បរិត្តា ច, កាមាវចរភូមិកា;

រូបារូបា បវុច្ចន្តិ, មជ្ឈិមា ច មហគ្គតា.

៦៣៨. អប្បមាណា បណីតា ច, ធម្មា លោកុត្តរា មតា;

សំកិលិដ្ឋសំក្លេសិកា, ទ្វាទសាកុសលា តថា.

៦៣៩. អសំកិលិដ្ឋសំក្លេសិកា, ធម្មា តេភូមកាបរេ;

អសំក្លិដ្ឋាសំក្លេសិកា, នវ លោកុត្តរា សិយុំ.

៦៤០. វិបាកា តេ បវុច្ចន្តិ, វិបាកា ចតុភូមកា;

វិបាកធម្មា នាមាតិ, កុសលាកុសលា មតា.

៦៤១. ក្រិយា រូបញ្ច និព្ពានំ, ន បាកំ ន តុ បច្ចតិ;

អាចយគាមិនោ ធម្មា, បុញ្ញាបុញ្ញាវ សាសវា.

៦៤២. វុត្តាបចយគាមិនោ, កុសលានុត្តរា បន;

ក្រិយា រូបញ្ច និព្ពានំ, បាកា ចោភយវជ្ជិតា.

៦៤៣. បឋមានុត្តរោ មគ្គោ, ទស្សនំ ភាវនាបរេ;

តទញ្ញេ ទ្វយនិម្មុត្តា, សព្ពេបិ បរមត្ថតោ.

៦៤៤. សត្ត លោកុត្តរា ហេដ្ឋា, វុត្តា សេក្ខាតិ តាទិនា;

អរហត្តផលមេវ, អសេក្ខន្តិ បកាសិតំ.

៦៤៥. លោកិយាបិ ច និព្ពានំ, ភាសិតោភយវជ្ជិតា;

ឯវមាទិប្បការេហិ, តិវិធាតិ វិភាវយេ.

៦៤៦. អតីតានាគតំ រូបំ, បច្ចុប្បន្នមថាបរំ;

អជ្ឈត្តំ វា ពហិទ្ធា វា, សុខុមោឡារិកំ តថា.

៦៤៧. ហីនំ បណីតំ យំ ទូរេ, សន្តិកេ វា តទេកតោ;

សព្ពំ រូបំ សមោធាយ, រូបក្ខន្ធោតិ វុច្ចតិ.

៦៤៨. តថេវ វេទនាក្ខន្ធោ, នាម យា កាចិ វេទនា;

សញ្ញាក្ខន្ធោតិ សញ្ញា ច, រាសិភាវេន ភាសិតា.

៦៤៩. វដ្ដធម្មេសុ អស្សាទំ, តទស្សាទោបសេវនំ;

វិនិភុជ្ជ និទស្សេតុំ, ខន្ធទ្វយមុទាហដំ.

៦៥០. វិវាទមូលសំសារ-កមហេតុនិទស្សនំ;

សន្ធាយ វេទនា សញ្ញា, កតា នានាតិ កេចន.

៦៥១. ចិត្តសំសដ្ឋធម្មានំ, ចេតនាមុខតោ បន;

សង្ខារក្ខន្ធនាមេន, ធម្មា ចេតសិកា មតា.

៦៥២. សព្ពភេទំ តថា ចិត្តំ, វិញ្ញាណក្ខន្ធ សម្មតំ;

ភេទាភាវេន និព្ពានំ, ខន្ធសង្គហនិស្សដំ.

៦៥៣. អាលម្ពនីយភាវេន, ឧបាទានោបការតោ;

បញ្ចុបាទានក្ខន្ធាតិ, លោកុត្តរវិវជ្ជិតា.

៦៥៤. យថា ថូលំ ហិតត្ថាយ, បរិគ្គាហកយោគិនំ;

ធម្មា តេភូមកា ឯក-ភូមិភាវាយ ទេសិតា.

៦៥៥. ភាជនំ ភោជនំ តស្ស, ព្យញ្ជនំ ភោជកោ តថា;

ភុញ្ជិតា ចាតិ បញ្ចេតេ, ឧបមេន្តិ យថាក្កមំ.

៦៥៦. គិលានសាលា គេលញ្ញំ, អសប្បាយោបសេវនា;

សមុដ្ឋានំ គិលានោតិ, ឧបមេន្តិ ច បណ្ឌិតា.

៦៥៧. ចារកោ ការណំ តត្ថ, អបរាធោ ច ការកោ;

អបរាធកតោ ចោរោ, ឥតិ ចោបមិតា បុន.

៦៥៨. និច្ចាធិបីឡនដ្ឋេន, ភារាតិ បរិទីបិតា;

ក្លេសទុក្ខមុខេនេតេ, ខាទកា ច និរន្តរំ.

៦៥៩. អនត្ថាវហិតា និច្ចមុក្ខិត្តាសិកវេរិនោ;

មច្ចុមារាភិធេយ្យត្តា, វធកាតិ ច ភាសិតា.

៦៦០. វិមទ្ទាសហនំ រូបំ, ផេណបិណ្ឌំវ ទុព្ពលំ;

មុហុត្តរមណីយត្តា, វេទនា ពុព្ពុឡូបមា.

៦៦១. មរីចិកូបមា សញ្ញា, វិបល្លាសកភាវតោ;

សង្ខារាបិ ច និស្សារា, កទលិក្ខន្ធសាទិសា.

៦៦២. នានប្បការំ ចិន្តេន្តំ, នានាក្លេសវិមោហិតំ;

បលម្ភតីតិ វិញ្ញាណំ, មាយាសមមុទីរិតំ.

៦៦៣. ឥច្ចេវំ បញ្ចុបាទានក្ខន្ធា ខន្ធា ច កេវលំ;

បញ្ចក្ខន្ធាតិ នាមេន, ទេសិតាតិ វិភាវយេ.

៦៦៤. អជ្ឈត្តញ្ច ពហិទ្ធា ច, វិញ្ញាណុប្បត្តិការណំ;

ទ្វារាលម្ពណភេទេន, ទ្វេធាយតនមីរិតំ.

៦៦៥. ចក្ខាទជ្ឈត្តិកំ តត្ថ, ឆទ្វារាយតនំ ភវេ;

ពាហិរាយតនំ នាម, តថា រូបាទិគោចរំ.

៦៦៦. ឥតិ វីថិប្បវត្តានំ, ទ្វារាលម្ពណសង្គហោ;

អាគមេ អភិធម្មេ តុ, សព្ពថាបិ យថារហំ.

៦៦៧. តថាហនន្តរាតីតោ, ជាយមានស្ស បច្ឆតោ;

មនោ សព្ពោបិ សព្ពស្ស, មនស្សាយតនំ ភវេ.

៦៦៨. តថា បុព្ពង្គមដ្ឋេន, សហជានមរូបិនំ;

ទ្វារភាវេន វិញ្ញាណំ, សព្ពមាយតនំ មតំ.

៦៦៩. មនាយតនមិច្ចេវំ, បសាទាយតនំ តថា;

បញ្ចវិញ្ញាណធម្មានំ, ឥតិ ឆទ្ធា វិភាវយេ.

៦៧០. បញ្ចប្បសាទវិសយា, បញ្ចាយតនសម្មតា;

សេសំ រូបញ្ច និព្ពានំ, សព្ពេ ចេតសិកាតិ ច.

៦៧១. ឯកូនសដ្ឋិធម្មានំ, ធម្មាយតនសង្គហោ;

ឥតិ ឆទ្ធា បកាសេន្តិ, ពាហិរាយតនំ ពុធា.

៦៧២. សុញ្ញគាមោវ ទដ្ឋព្ព-មជ្ឈត្តិកមសារតោ;

គាមឃាតកចោរាវ, តំ ហនន្តំវ ពាហិរំ.

៦៧៣. នាមប្បវត្តិមុឡ្ហានំ, តទុប្បត្តិកការណំ;

ទ្វាទសាយតនានីតិ, វុត្តមិត្ថំ មហេសិនា.

៦៧៤. សមត្តា ភាវមត្តេន, ធារេន្តីតិ សលក្ខណំ;

ទ្វារាលម្ពតទុប្បន្ន-បរិយាយេន ភេទិតា.

៦៧៥. មនាយតនមេត្ថាហ, សត្ត វិញ្ញាណធាតុយោ;

ឯកាទស យថាវុត្តា, ឥច្ចដ្ឋារស ធាតុយោ.

៦៧៦. អន្តាទិកា មនោធាតុ, មនោវិញ្ញាណធាតុយា;

បវេសាបគមេ ទ្វារ-បរិយាយេន តិដ្ឋតិ.

៦៧៧. ភេរីតលទណ្ឌឃោស-សមំ ឆក្កំ យថាក្កមំ;

កដ្ឋារណិបាវកាទិ-សមញ្ច តិវិធំ ភវេ.

៦៧៨. ទុក្ខំ សមុទយោ ចេវ, និរោធោ ច តថាបរោ;

មគ្គោ ចាតិ ចតុទ្ធាហ, សច្ចំ សច្ចបរក្កមោ.

៦៧៩. ភារោ ច ភារទានញ្ច, ភារនិក្ខេបនំ តថា;

ភារនិក្ខេបនូបាយោ, ឥច្ចោបម្មំ យថាក្កមំ.

៦៨០. រោគោ រោគនិទានញ្ច, រោគវូបសមោ តថា;

រោគភេសជ្ជមិច្ចេវ-មុបមាហិ ច ទីបិតំ.

៦៨១. វិសរុក្ខោ រុក្ខមូលំ, រុក្ខច្ឆេទោ តថាបរោ;

រុក្ខច្ឆេទកសត្ថន្តិ, ចតុធោបមិតំ តថា.

៦៨២. តីរមោរិមសង្ខាតំ, មហោឃោ បារិមំ តថា;

តទតិក្កមុបាយោតិ, ឧបមេន្តិ ច តំ ពុធា.

៦៨៣. សច្ឆិកត្វាន បច្ចក្ខ-មិច្ចោបម្មំ យថាក្កមំ;

សមាចិក្ខិ វិមោក្ខាយ, សច្ចំ តច្ឆនិយាមតោ.

៦៨៤. តថា ហិ ទុក្ខំ នាពាធំ, នាញ្ញំ ទុក្ខា ច ពាធកំ;

ពាធកត្តនិយាមេន, ទុក្ខសច្ចមិតីរិតំ.

៦៨៥. តំ វិនា នាញ្ញតោ ទុក្ខំ, ន ហោតិ ន ច តំ តតោ;

ទុក្ខហេតុនិយាមេន, សច្ចមាហ វិសត្តិកំ.

៦៨៦. នាញ្ញា និព្ពានតោ សន្តិ, ន ច សន្តំ ន តំ យតោ;

សន្តភាវនិយាមេន, និព្ពានំ សច្ចមុត្តមំ.

៦៨៧. នាញ្ញំ មគ្គាច និយ្យានំ, អនិយ្យានោ ន ចាបិ សោ;

តស្មា និយ្យានភាវេន, មគ្គោ សច្ចន្តិ សម្មតោ.

៦៨៨. ឥតិ តច្ឆាវិបល្លាស-ភូតភាវោ ចតូសុបិ;

សច្ចដ្ឋោតិ វិនិទ្ទិដ្ឋោ, ទុក្ខាទីស្វវិសេសតោ.

៦៨៩. បីឡនដ្ឋោ សង្ខតដ្ឋោ, សន្តាបដ្ឋោ ច ភាសិតោ;

វិបរីណាមដ្ឋោ ចាតិ, ទុក្ខស្សេវំ ចតុព្ពិធា.

៦៩០. អាយូហនា និទានា ច, សំយោគា បលិពោធតោ;

ទុក្ខស្សមុទយស្សាបិ, ចតុធត្ថា បកាសិតា.