៦. ឆដ្ឋោ បរិច្ឆេទោ

រូបវិភាគោ

៤៨១. ឥតិ បញ្ចបរិច្ឆេទ-បរិច្ឆិន្នត្ថសង្គហំ;

នាមធម្មមសេសេន, វិភាវេត្វា សភាវតោ.

៤៨២. សប្បភេទំ បវក្ខាមិ, រូបធម្មមិតោ បរំ;

ភូតោបាទាយភេទេន, ទុវិធម្បិ បកាសិតំ.

៤៨៣. ឧទ្ទេសលក្ខណាទីហិ, វិភាគជនកា តថា;

កលាបុប្បត្តិតោ ចាបិ, យថានុក្កមតោ កថំ?

៤៨៤. រុប្បតីតិ ភវេ រូបវិការប្បច្ចយេសតិ;

រូបរូបំ តថា រូបបរិយាបន្នតោបរំ.

៤៨៥. ភូតរូបំ តុ បថវី, អាបោ តេជោ តថាបរោ;

វាយោ ច ភវតូបាទារូបមេត្ថាតិ ភាសិតំ.

៤៨៦. ភូតរូបមុបាទាយ, បវត្តតិ ន ចញ្ញថា;

ឥច្ចុបាទាយរូបន្តិ, រូបំ សេសមុទីរិតំ.

៤៨៧. ចក្ខុ សោតញ្ច ឃានញ្ច, ជិវ្ហា កាយោតិ បញ្ចធា;

បសាទរូបមក្ខាតំ, នោបសាទំ បនេតរំ.

៤៨៨. រូបសទ្ទគន្ធរសា, ផោដ្ឋព្ពមិតិ បញ្ចធា;

រូបំ បសាទវិសយំ, បសាទោ គោចរំបរំ.

៤៨៩. ឥត្ថត្តំ បុរិសត្តញ្ច, ភាវរូបមុទីរិតំ;

ជីវិតិន្ទ្រិយរូបន្តិ, ឧបាទិន្នបវត្តិកំ.

៤៩០. វត្ថុរូបំ តុ ហទយំ, យំ ធាតុទ្វយនិស្សយំ;

កពឡីការមាហាររូបមិច្ចាហុ បណ្ឌិតា.

៤៩១. រូបធម្មសភាវត្តា, រូបន្តិ បរិទីបិតំ;

ឥច្ចេវមដ្ឋារសធា, រូបរូបមុទីរិតំ.

៤៩២. អនិប្ផន្នសភាវត្តា, រូបាការោបលក្ខិតំ;

អនិប្ផន្នំ នាម រូបំ, ទសធា បរិទីបិតំ.

៤៩៣. រូបប្បរិច្ឆេទំ រូបមិច្ចាកាសោ បកាសិតោ;

កាយព្ពចីវិញ្ញត្តិកំ, ទ្វយំ វិញ្ញត្តិរូបកំ.

៤៩៤. លហុតា មុទុតា កម្ម-ញ្ញតា វិញ្ញត្តិយា សហ;

វិការរូបមិច្ចាហុ, បញ្ចធា ច វិភាវិនោ.

៤៩៥. ឧបចយោ សន្តតិ ច, ជរតានិច្ចតាតិ ច;

ចតុធា លក្ខណរូបំ, រូបកណ្ឌេ វិភាវិតំ.

៤៩៦. ឥច្ចេវមដ្ឋវីសតិវិធានិបិ វិចក្ខណោ;

រូបានិ លក្ខណាទីហិ, វិភាវេយ្យ យថាក្កមំ.

៤៩៧. ខរតា បថវីធាតុ, សាយំ កក្ខឡលក្ខណា;

កលាបាធិដ្ឋានរសា, បដិគ្គាហោតិ គយ្ហតិ.

៤៩៨. អាពន្ធនមាបោធាតុ, សា បគ្ឃរណលក្ខណា;

កលាបាពន្ធនរសា, សង្គហត្តេន គយ្ហតិ.

៤៩៩. តេជនត្តំ តេជោធាតុ, សាយមុណ្ហត្តលក្ខណា;

បាចនរសា មទ្ទវា-នុប្បាទនន្តិ គយ្ហតិ.

៥០០. វាយោធាតុ វាយនត្តំ, សា វិត្ថម្ភនលក្ខណា;

សមីរណរសាភិនិ-ហារភាវេន គយ្ហតិ.

៥០១. សព្ពត្ថាវិនិភុត្តាបិ, អសម្មិស្សិតលក្ខណា;

តំតំភាវសមុស្សន្នសម្ភារេសុបលក្ខិតា.

៥០២. អញ្ញមញ្ញេនុបត្ថទ្ធា, សេសរូបស្ស និស្សយា;

ចតុទ្ធេវំ កលាបេសុ, មហាភូតា បវត្តរេ.

៥០៣. ចក្ខុ សម្ភារចក្ខុម្ហិ, សត្តក្ខិបដលោចិតេ;

កណ្ហមណ្ឌលមជ្ឈម្ហិ, បសាទោតិ បវុច្ចតិ.

៥០៤. យេន ចក្ខុបសាទេន, រូបានិ អនុបស្សតិ;

បរិត្តំ សុខុមំ ចេតំ, ឩកាសិរសមូបមំ.

៥០៥. សោតំ សោតពិលស្សន្តោ,

តម្ពលោមាចិតេ តថា;

អង្គុលិវេធនាការេ,

បសាទោតិ បវុច្ចតិ.

៥០៦. អន្តោ អជបទដ្ឋានេ, ឃានំ ឃានពិលេ ឋិតំ;

ជិវ្ហា ជិវ្ហាយ មជ្ឈម្ហិ, ឧប្បលាការសន្និភេ.

៥០៧. ឥច្ចេវំ បន ចត្តារោ, តំតំទេសវវត្ថិតា;

កាយប្បសាទោ កាយម្ហិ, ឧបាទិន្នេតិ បញ្ចធា.

៥០៨. កប្បាសបដលស្នេហ-សន្និភា ភូតនិស្សិតា;

បសាទា ជីវិតារក្ខា, រូបាទិបរិវារិតា.

៥០៩. ធីតា រាជកុមារាវ, កលាបន្តរវុត្តិនោ;

ទ្វារភូតាវ បច្ចេកំ, បញ្ចវិញ្ញាណវីថិយា.

៥១០. រូបាទាភិឃាតារហភូតានំ វា យថាក្កមំ;

ទដ្ឋុកាមនិទានាទិកម្មភូតានមេវ វា.

៥១១. បសាទលក្ខណា រូបា-ទាវិញ្ជនរសា តថា;

បញ្ចវិញ្ញាណយុគឡំ, ទ្វារភាវេន គយ្ហរេ.

៥១២. រូបំ និភាសោ ភូតានំ, សទ្ទោ និគ្ឃោសនំ តថា;

គន្ធោវ គន្ធនំ តត្ថ, រសោ ច រសនីយតា.

៥១៣. ឥច្ចេវំ បន ចត្តារោ, គោចរា ភូតនិស្សិតា;

ភូតត្តយញ្ច ផោដ្ឋព្ពមាបោធាតុវិវជ្ជិតំ.

៥១៤. សទ្ទោ អនិយតោ តត្ថ, តទញ្ញោ សហវុត្តិនោ;

តំតំសភាវភេទេន, តំតំទ្វារោបលក្ខិតោ.

៥១៥. បញ្ចេវ បញ្ចវិញ្ញាណវីថិយា វិសយា មតា;

ចក្ខាទិបដិហននលក្ខណាវ យថាក្កមំ.

៥១៦. បញ្ចវិញ្ញាណយុគឡាលម្ពភាវរសា តថា;

បញ្ចវិញ្ញាណយុគឡំ, គោចរត្តេន គយ្ហរេ.

៥១៧. ឥត្ថិន្ទ្រិយំ បនិត្ថត្តមិត្ថិភាវោតិ ភាសិតោ;

បុរិសត្តំ តថា ភាវោ, បុរិសិន្ទ្រិយនាមកោ.

៥១៨. តំ ទ្វយំ បនុបាទិន្នកាយេ សព្ពត្ថ លព្ភតិ;

កលាបន្តរភិន្នញ្ច, ភិន្នសន្តានវុត្តិ ច.

៥១៩. វសេ វត្តេតិ លិង្គាន-មិត្ថិបុម្ភាវលក្ខណំ;

ឥត្ថីតិ ច បុរិសោតិ, បកាសនរសំ តថា.

៥២០. ឥត្ថីនំ បុរិសានញ្ច, លិង្គស្ស ច យថាក្កមំ;

និមិត្តកុត្តាកប្បានំ, ការណត្តេន គយ្ហតិ.

៥២១. សត្តា មរន្តិ នាសេន, យស្ស បាណន្តិ វុត្តិយា;

សជីវមតកាយានំ, ភេទោ យេនោបលក្ខិតោ.

៥២២. តទេតំ កម្មជាតាន-មនុបាលនលក្ខណំ;

ជីវិតំ ជីវនរសំ, អាយុពទ្ធោតិ គយ្ហតិ.

៥២៣. មនោធាតុយា ច តថា, មនោវិញ្ញាណធាតុយា;

និស្សយលក្ខណំ វត្ថុ-រូបំ ហទយសម្មតំ.

៥២៤. សមាធានរសំ តាស-មុព្ពាហត្តេន គយ្ហតិ;

យស្មិំ កុប្បិតកាលម្ហិ, វិក្ខិត្តា ហោន្តិ បាណិនោ.

៥២៥. កាយោ យស្សានុសារេន, ចិត្តក្ខេបេន ខិជ្ជតិ;

យស្មិំ និរុទ្ធេ វិញ្ញាណ-សោតោបិ ច និរុជ្ឈតិ.

៥២៦. យំ និស្សាយ បតិដ្ឋាតិ, បដិសន្ធិ ភវន្តរេ;

តទេតំ កម្មសម្ភូតំ, បញ្ចវោការភូមិយំ.

៥២៧. មជ្ឈេ ហទយកោសម្ហិ, អឌ្ឍបសតលោហិតេ;

ភូតរូបមុបាទាយ, ចក្ខាទិ វិយ វត្តតិ.

៥២៨. កពឡីការោ អាហារោ, រូបាហរណលក្ខណោ;

កាយានុយាបនរសោ, ឧបត្ថម្ភោតិ គយ្ហតិ.

៥២៩. ឱជាយ យាយ យាបេន្តិ, អាហារស្នេហសត្តិយា;

បាណិនោ កាមលោកម្ហិ, សាយមេវំ បវុច្ចតិ.

៥៣០. អាកាសធាតុ រូបានំ, បរិយោសានលក្ខណា;

បរិច្ឆេទរសា រូបមរិយាទោតិ គយ្ហតិ.

៥៣១. សលក្ខណបរិច្ឆិន្នរូបធម្មបរិគ្គហេ;

យោគីនមុបការាយ, យំ ទេសេសិ ទយាបរោ.

៥៣២. បរិច្ឆិន្នសភាវានំ, កលាបានំ យថារហំ;

បរិយន្តានមេវេស, តទាការោ បវុច្ចតិ.

៥៣៣. គមនាទិវចីឃោសបវត្តម្ហិ យថាក្កមំ;

វាយោបថវិធាតូនំ, យោ វិការោ សមត្ថតា.

៥៣៤. សហជោបាទិន្នកានំ, ក្រិយាវាចាបវត្តិយា;

វិប្ផន្ទឃដ្ដនាហេតុ, ចិត្តានុបរិវត្តកោ.

៥៣៥. ស វិការវិសេសោយំ, វិញ្ញត្តីតិ បកាសិតោ;

វិញ្ញាបេតីតិ កាយេន, វាចាយ ច វិចិន្តិតំ.

៥៣៦. វាយោបថវាធិកានំ, ភូតានមិតិ កេចន;

បវុត្តា តាទិនា កាយ-បរិគ្គហសុខាយ យា.

៥៣៧. កាយោ យស្សានុភាវេន,

សហាភោគោវ ខាយតិ;

យំ និរោធា បរាភូតោ,

សេតិ និច្ចេតនោ យថា.

៥៣៨. លោកេ បបញ្ចា វត្តន្តិ, ពហុធា យាយ និម្មិតា;

កប្បេន្តិ កាយមត្តានំ, ពាលា យាយ ច វញ្ចិតា.

៥៣៩. សាយំ កាយវចីកម្ម-ទ្វារភាវេន លក្ខិតា;

ព្យាបារឃដ្ដនាហេតុ-វិការាការលក្ខណា.

៥៤០. កាយវាចាអធិប្បាយ-បកាសនរសា តថា;

កាយវិប្ផន្ទឃដ្ដន-ហេតុភាវេន គយ្ហតិ.

៥៤១. លហុតា បន រូបានំ, អទន្ធាការលក្ខណា;

អវិត្ថានរសា សល្ល-ហុកវុត្តីតិ គយ្ហតិ.

៥៤២. មុទុតាបិ ច រូបានំ, កក្ខឡាភាវលក្ខណា;

កិច្ចាវិរុជ្ឈនរសា, អនុកុល្យន្តិ គយ្ហតិ.

៥៤៣. កម្មញ្ញតា ច រូបានំ, អលំកិច្ចស្ស លក្ខណា;

បវត្តិសម្បត្តិរសា, យោគ្គភាវោតិ គយ្ហតិ.

៥៤៤. សប្បាយមុតុមាហារំ, លទ្ធា ចិត្តមនាមយំ;

លហូ មុទុ ច កម្មញ្ញំ, យទា រូបំ បវត្តតិ.

៥៤៥. តថា បវត្តរូបស្ស, បវត្តាការភេទិតំ;

លហុតាទិត្តយម្បេតំ, សហវុត្តិ តទា ភវេ.

៥៤៦. សប្បាយបដិវេធាយ, បដិបត្តុបការិកា;

សាការា រូបសម្បត្តិ, បញ្ញត្តេវំ មហេសិនា.

៥៤៧. រូបស្សោបចយោ នាម, រូបស្សាចយលក្ខណោ;

រូបុម្មុជ្ជាបនរសោ, បារិបូរីតិ គយ្ហតិ.

៥៤៨. បវត្តិលក្ខណា រូប-សន្តតីតិ បកាសិតា;

អនុប្បពន្ធនរសា, អវិច្ឆេទោតិ គយ្ហតិ.

៥៤៩. រូបមាចយរូបេន, ជាយតិច្ចុបរូបរិ;

បេក្ខតោបចាយាការា, ជាតិ គយ្ហតិ យោគិនា.

៥៥០. អនុប្បពន្ធាការេន, ជាយតីតិ សមេក្ខតោ;

តទាយំ សន្តតាការា, សមុបដ្ឋាសិ ចេតសិ.

៥៥១. ឯវមាភោគភេទេន, ជាតិរូបំ ទ្វិធា កតំ;

អត្ថូបលទ្ធិភាវេន, ជាយន្តំ វាថ កេវលំ.

៥៥២. រូបវិវិត្តមោកាសំ, បុរក្ខត្តេន ចីយតិ;

អភាវា បន ភាវាយ, បវត្តមិតិ សន្តតិ.