៥. បញ្ចមោ បរិច្ឆេទោ

កម្មវិភាគោ

៣២៨. វិភាគំ បន កម្មានំ,

បវក្ខាមិ ឥតោ បរំ;

កម្មបាកក្រិយាភេទេ,

អមោហាយ សមាសតោ.

៣២៩. កម្មបច្ចយកម្មន្តិ, ចេតនាវ សមីរិតា;

តត្ថាបិ នានក្ខណិកា, បុញ្ញាបុញ្ញាវ ចេតនា.

៣៣០. ទេតិ បាកមធិដ្ឋាយ, សម្បយុត្តេ យថារហំ;

កម្មស្សាយូហនដ្ឋេន, បវត្តត្តា ហិ ចេតនា.

៣៣១. ក្លេសានុសយសន្តានេ, បាកធម្មា ហិ ជាយរេ;

បហីនានុសយានំ តុ, ក្រិយាមត្តំ បវត្តតិ.

៣៣២. មូលភាវា ច សព្ពេសំ, តថេវាវជ្ជនទ្វយំ;

ជនិតានិ ច កម្មេហិ, វិបាកានិ បវត្តរេ.

៣៣៣. ចិត្តុប្បាទវសេនេវ, កម្មំ តេត្តិំសធា ឋិតំ;

កម្មចតុក្កភេទេហិ, វិភាវេយ្យ វិចក្ខណោ.

៣៣៤. បច្ចុប្បន្នាទិកណ្ហាទិ-ជនកាទិគរាទិតោ;

ទិដ្ឋធម្មាទិកាមាទិ-ភេទា ឆធា យថាក្កមំ.

៣៣៥. យំ បាបំ សុខវោកិណ្ណំ, អកិច្ឆេន ករីយតិ;

បច្ចុប្បន្នសុខំ កម្មំ, អាយតិំ ទុក្ខបាកជំ.

៣៣៦. កិច្ឆេន ទុក្ខវោកិណ្ណំ, យទិ បាបំ ករីយតិ;

បច្ចុប្បន្នេ ច តំ ទុក្ខំ, អាយតិំ ទុក្ខបាកជំ.

៣៣៧. កិច្ឆេន ទុក្ខវោកិណ្ណំ, យទិ បុញ្ញំ ករីយតិ;

បច្ចុប្បន្នម្ហិ តំ ទុក្ខំ, អាយតិំ សុខបាកជំ.

៣៣៨. យំ បុញ្ញំ សុខវោកិណ្ណំ, អកិច្ឆេន ករីយតិ;

បច្ចុប្បន្នសុខញ្ចេវ, អាយតិំ សុខបាកជំ.

៣៣៩. វិសសំសដ្ឋមធុរំ, សវិសំ តិត្តកំ តថា;

គោមុត្តមធុភេសជ្ជ-មិច្ចោបម្មំ យថាក្កមំ.

៣៤០. សមាទានេ វិបាកេ ច, សុខទុក្ខប្បភេទិតំ;

កម្មមេវំ ចតុទ្ធាតិ, បកាសេន្តិ តថាគតា.

៣៤១. អានន្តរិយកម្មាទិ, ឯកន្តកដុកាវហំ;

កណ្ហំ កណ្ហវិបាកន្តិ, កម្មំ ទុគ្គតិគាមិកំ.

៣៤២. បឋមជ្ឈានកម្មាទិ, ឯកន្តេន សុខាវហំ;

សុក្កំ សុក្កវិបាកន្តិ, កម្មំ សគ្គូបបត្តិកំ.

៣៤៣. វោកិណ្ណកម្ម វោកិណ្ណ-សុខទុក្ខូបបត្តិកំ;

កណ្ហសុក្កំ កណ្ហសុក្ក-វិបាកន្តិ សមីរិតំ.

៣៤៤. អកណ្ហសុក្កមីរេន្តិ, អកណ្ហសុក្កបាកទំ;

កម្មំ លោកុត្តរំ លោកេ, គតិកម្មក្ខយាវហំ.

៣៤៥. ឥតិ វដ្ដប្បវត្តម្ហិ, ក្លេសវោទានភេទិតំ;

កម្មក្ខយេន សង្គយ្ហ, ចតុធា កម្មមីរិតំ.

៣៤៦. ជនកញ្ចេវុបត្ថម្ភ-មុបបីឡោបឃាតកំ;

ចតុធា កិច្ចភេទេន, កម្មមេវំ បវុច្ចតិ.

៣៤៧. ជនេតិ ជនកំ បាកំ, តំ ឆិន្ទតុបបីឡកំ;

តំ បវត្តេតុបត្ថម្ភំ, តំ ឃាតេតោបឃាតកំ.

៣៤៨. ករោតិ អត្តនោ បាក-ស្សាវកាសន្តិ ភាសិតំ;

បាកទាយកកម្មំ តុ, យំ កិញ្ចិ ជនកំ ភវេ.

៣៤៩. ពាធមានកកម្មំ តុ, តំ បាកមុបបីឡកំ;

ឧបឃាតកមីរេន្តិ, តទុបច្ឆេទកំបរេ.

៣៥០. គរុកាសន្នមាចិណ្ណំ, កដត្តាកម្មុនា សហ;

កម្មំ ចតុព្ពិធំ បាក-បរិយាយប្បភេទតោ.

៣៥១. មហគ្គតានន្តរិយំ, គរុកម្មន្តិ វុច្ចតិ;

កតំ ចិន្តិតមាសន្ន-មាសន្នមរណេន តុ.

៣៥២. ពាហុល្លេន សមាចិណ្ណមាចិណ្ណន្តិ បវុច្ចតិ;

សេសំ បុញ្ញមបុញ្ញញ្ច, កដត្តាកម្មមីរិតំ.

៣៥៣. ទិដ្ឋធម្មេ វេទនីយមុបបជ្ជាបរេ តថា;

បរិយាយវេទនីយមិតិ ចាហោសិកម្មុនា.

៣៥៤. បាកកាលវសេនាថ, កាលាតីតវសេន ច;

ចតុធេវម្បិ អក្ខាតំ, កម្មមាទិច្ចពន្ធុនា.

៣៥៥. ទិដ្ឋធម្មេ វេទនីយំ, បឋមំ ជវនំ ភវេ;

អលទ្ធាសេវនត្តាវ, អសមត្ថំ ភវន្តរេ.

៣៥៦. វេទនីយំ តុបបជ្ជបរិយោសានមីរិតំ;

បរិនិដ្ឋិតកម្មត្តា, វិបច្ចតិ អនន្តរេ.

៣៥៧. សេសានិ វេទនីយានិ, បរិយាយាបរេ បន;

លទ្ធាសេវនតោ បាកំ, ជនេន្តិ សតិ បច្ចយេ.

៣៥៨. វុច្ចន្តាហោសិកម្មានិ, កាលាតីតានិ សព្ពថា;

ឧច្ឆិន្នតណ្ហាមូលានិ, បច្ចយាលាភតោ តថា.

៣៥៩. ចតុធា បុន កាមាទិភូមិភេទេន ភាសិតំ;

បុញ្ញាបុញ្ញវសា ទ្វេធា, កាមាវចរិកំ ភវេ.

៣៦០. អបុញ្ញំ តត្ថ សាវជ្ជ-មនិដ្ឋផលទាយកំ;

តំ កម្មផស្សទ្វារេហិ, ទុវិធំ សម្បវត្តតិ.+

៣៦១. កាយទ្វារំ វចីទ្វារំ, មនោទ្វារន្តិ តាទិនា;

កម្មទ្វារត្តយំ វុត្តំ, ផស្សទ្វារា ឆ ទីបិតា.

៣៦២. កម្មទ្វារេ មនោទ្វារេ, បញ្ចទ្វារា សមោហិតា;

ផស្សទ្វារមនោទ្វារំ, កម្មទ្វារត្តយំ កតំ.

៣៦៣. តថា ហិ កាយវិញ្ញត្តិំ, ជនេត្វា ជាតចេតនា;

កាយកម្មំ វចីកម្មំ, វចីភេទបវត្តិកា.

៣៦៤. វិញ្ញត្តិទ្វយសម្បត្តា, មនោកម្មន្តិ វុច្ចតិ;

ភេទោយំ បរិយាយេន, កម្មានមិតិ ទីបិតោ.

៣៦៥. បាណឃាតាទិកំ កម្មំ, កាយេ ពាហុល្លវុត្តិតោ;

កាយកម្មំ វចីកម្មំ, មុសាវាទាទិកំ តថា.

៣៦៦. អភិជ្ឈាទិ មនោកម្មំ, តីសុ ទ្វារេសុ ជាយតិ;

ទ្វីសុ ទ្វារេសុ សេសានិ, ភេទោយំ បរមត្ថតោ.

៣៦៧. ផស្សទ្វារមនោទ្វារេ, វិញ្ញត្តិទ្វយមីរិតំ;

បញ្ចទ្វារេ ទ្វយំ នត្ថិ, អយមេត្ថ វិនិច្ឆយោ.

៣៦៨. អក្ខន្តិញាណ កោសជ្ជំ, ទុស្សិល្យំ មុដ្ឋសច្ចតា;

ឥច្ចាសំវរភេទេន, អដ្ឋទ្វារេសុ ជាយតិ.

៣៦៩. កម្មទ្វារត្តយញ្ចេវ, បញ្ចទ្វារា តថាបរេ;

អសំវរានំ បញ្ចន្នំ, អដ្ឋ ទ្វារា បកាសិតា.

៣៧០. តត្ថ កម្មបថប្បត្តំ, បដិសន្ធិផលាវហំ;

បាណឃាតាទិភេទេន, ទសធា សម្បវត្តតិ.

៣៧១. បាណាតិបាតោ ផរុសំ, ព្យាបាទោ ច តថាបរោ;

ឥច្ចេវំ តិវិធំ កម្មំ, ទោសមូលេហិ ជាយតិ.

៣៧២. មិច្ឆាចារោ អភិជ្ឈា ច, មិច្ឆាទិដ្ឋិ តថាបរា;

ឥច្ចេវំ តិវិធំ កម្មំ, លោភមូលេហិ ជាយតិ.

៣៧៣. ថេយ្យាទានំ មុសាវាទោ, បិសុណំ សម្ផលាបនំ;

កម្មំ ចតុព្ពិធម្មេតំ, ទ្វិមូលេហិ បវត្តតិ.

៣៧៤. ឆន្ទាទោសា ភយា មោហា, បាបំ កុព្ពន្តិ បាណិនោ;

តស្មា ឆន្ទាទិភេទេន, ចត្តាលីសវិធំ ភវេ.

៣៧៥. ឥច្ចាបុញ្ញំ បកាសេន្តិ, ចតុរាបាយសាធកំ;

អញ្ញត្ថាបិ បវត្តម្ហិ, វិបត្តិផលសាធនំ.

៣៧៦. តិវិធំ បន បុញ្ញំ តុ, អនវជ្ជិដ្ឋបាកទំ;

ទានំ សីលំ ភាវនា ច, តីសុ ទ្វារេសុ ជាយតិ.

៣៧៧. មហត្តគារវា ស្នេហា, ទយា សទ្ធុបការតោ;

ភោគជីវាភយធម្មំ, ទទតោ ទានមីរិតំ.

៣៧៨. បុញ្ញមាចារវារិត្ត-វត្តមារព្ភ កុព្ពតោ;

បាបា ច វិរមន្តស្ស, ហោតិ សីលមយំ តទា.

៣៧៩. ទានសីលវិនិមុត្តំ, ភាវនាតិ បវុច្ចតិ;

បុញ្ញំ ភាវេន្តិ សន្តានេ, យស្មា តេន ហិតាវហំ.

៣៨០. ជនេត្វា កាយវិញ្ញត្តិំ, យទា បុញ្ញំ ករីយតិ;

កាយកម្មំ តទា ហោតិ, ទានំ សីលញ្ច ភាវនា.

៣៨១. វចីវិញ្ញត្តិយា សទ្ធិំ, យទា បុញ្ញំ ករីយតិ;

វចីកម្មំ មនោកម្មំ, វិនា វិញ្ញត្តិយា កតំ.

៣៨២. តំតំទ្វារិកមេវាហុ, តំតំទ្វារិកបាបតោ;

វិរមន្តស្ស វិញ្ញត្តិំ, វិនា វា សហ វា បុន.

៣៨៣. ទានំ សីលំ ភាវនា ច, វេយ្យាវច្ចាបចាយនា;

បត្តានុមោទនា បត្តិ-ទានំ ធម្មស្ស ទេសនា;

សវនំ ទិដ្ឋិជុកម្ម-មិច្ចេវំ ទសធា ឋិតំ.

៣៨៤. កាមបុញ្ញំ បកាសេន្តិ, កាមេ សុគតិសាធកំ;

អញ្ញត្ថាបិ បវត្តម្ហិ, សម្បត្តិផលសាធកំ.

៣៨៥. ចិត្តុប្បាទប្បភេទេន, កម្មំ វីសតិធា ឋិតំ;

កាមាវចរមិច្ចេវំ, វិភាវេន្តិ វិភាវិនោ.

៣៨៦. រូបាវចរិកំ កម្ម-មប្បនាភាវនាមយំ;

កសិណាទិកមារព្ភ, មនោទ្វារេ បវត្តតិ.

៣៨៧. បថវាបោ ច តេជោ ច,

វាយោ នីលញ្ច បីតកំ;

លោហិតោទាតមាកាសំ,

អាលោកោតិ វិសារទា.

៣៨៨. កសិណានិ ទសីរេន្តិ, អាទិកម្មិកយោគិនោ;

ឧទ្ធុមាតំ វិនីលញ្ច, វិបុព្ពកំ វិខាទិតំ.

៣៨៩. វិច្ឆិទ្ទកញ្ច វិក្ខិត្តំ, ហតវិក្ខិត្តលោហិតំ;

បុឡវំ អដ្ឋិកញ្ចេតិ, អសុភំ ទសធា ឋិតំ.

៣៩០. ពុទ្ធេ ធម្មេ ច សង្ឃេ ច, សីលេ ចាគេ ច អត្តនោ;

ទេវតោបសមាយញ្ច, វុត្តានុស្សតិភាវនា.

៣៩១. មរណេ សតិ នាមេកា, តថា កាយគតាសតិ;

អានាបានសតិច្ចេវំ, ទសធានុស្សតីរិតា.

៣៩២. មេត្តា ករុណា មុទិតា, ឧបេក្ខា ភាវនាតិ ច;

ចតុព្រហ្មវិហារា ច, អប្បមញ្ញាតិ ភាសិតា.

៣៩៣. អាហារេ តុ បដិក្កូល-សញ្ញេកាតិ បកាសិតា;

ចតុធាតុវវត្ថានំ, ចតុធាតុបរិគ្គហោ.

៣៩៤. ចត្តារោរុប្បកា ចេតិ, ចត្តាលីស សមាសតោ;

កម្មដ្ឋានានិ វុត្តានិ, សមថេ ភាវនានយេ.

៣៩៥. អានាបានញ្ច កសិណំ, បញ្ចកជ្ឈានិកំ តហិំ;

បឋមជ្ឈានិកា វុត្តា, កោដ្ឋាសាសុភភាវនា.

៣៩៦. មេត្តាទយោ ចតុជ្ឈានា, ឧបេក្ខា បញ្ចមី មតា;

អារុប្បារុប្បកា សេសា, ឧបចារសមាធិកា.

៣៩៧. កសិណាសុភកោដ្ឋាសេ,

អានាបានេ ច ជាយតិ;

បដិភាគោ តមារព្ភ,

តត្ថ វត្តតិ អប្បនា.

៣៩៨. កម្មដ្ឋានេសុ សេសេសុ, បដិភាគោ ន វិជ្ជតិ;