៤. ចតុត្ថោ បរិច្ឆេទោ

បកិណ្ណកវិភាគោ

២១១. ឥតោ បរំ កិច្ចតោ ច, ទ្វារាលម្ពណវត្ថុតោ;

ភូមិបុគ្គលតោ ឋានា, ជនកា ច យថារហំ.

២១២. សង្គហោ ច បវត្តិ ច, បដិសន្ធិបវត្តិសុ;

ចិត្តុប្បាទវសេនេវ, សំខិបិត្វាន និយ្យតេ.

២១៣. រូបារូបមហាបាកា, មុបេក្ខាតីរណទ្វយំ;

ចុតិសន្ធិភវង្គានិ, ចិត្តានេកូនវីសតិ.

២១៤. អាវជ្ជនំ តុ យុគឡំ, ទស្សនំ សវនំ តថា;

ឃាយនំ សាយនញ្ចេវ, ផុសនំ សម្បដិច្ឆនំ.

២១៥. តីណិ តីរណចិត្តានិ, ឯកំ វោដ្ឋព្ពនំ មតំ;

បញ្ចទ្វារេ មនោទ្វារេ, តទាវជ្ជននាមកំ.

២១៦. បញ្ចបញ្ញាស ជវនកិច្ចានីតិ វិនិទ្ទិសេ;

ក្រិយា ចាវជ្ជនំ ហិត្វា, កុសលាកុសលប្ផលំ.

២១៧. តទាលម្ពណចិត្តានិ, ភវន្តេកាទសេវ ហិ;

មហាវិបាកចិត្តានិ, អដ្ឋ សន្តីរណត្តយំ.

២១៨. បញ្ចកិច្ចន្តិ ភាសន្តិ, ឧបេក្ខាតីរណទ្វយំ;

ចតុកិច្ចា មហាបាកា, តិកកិច្ចា មហគ្គតា.

២១៩. ទុកិច្ចមិតិ វោដ្ឋព្ពំ, សុខតីរណមីរិតំ;

បញ្ចវិញ្ញាណជវនមនោធាតុត្តិកំ បន.

២២០. ឯកកិច្ចាតិ ភាសន្តិ, អដ្ឋសដ្ឋិ វិភាវិនោ;

ឥច្ចេវំ កិច្ចភេទេន, ចិត្តុប្បាទា វវត្ថិតា.

២២១. ចក្ខុសោតឃានជិវ្ហា-កាយធាតុ យថាក្កមំ;

បញ្ចទ្វារា ភវង្គំ តុ, មនោទ្វារំ បវុច្ចតិ.

២២២. ឃានាទយោ តយោ រូបេ, បញ្ច ចក្ខាទយោ តថា;

អរូបេ នត្ថុភយត្ថ, តទាលម្ពណមានសំ.

២២៣. ឆ ទ្វារា វីថិចិត្តានិ, សត្ត កាមីសុ រូបិសុ;

ទ្វារត្តយំ ឆ ចិត្តានិ, មនោទ្វារមរូបិសុ.

២២៤. បដិសន្ធាទិភូតា ហិ, អវសានេ ចុតិដ្ឋិតា;

មជ្ឈេ ភវង្គំ ឆេត្វាន, បច្ចេកំ វីថិ ជាយតិ.

២២៥. រូបាទារម្មណេ ចក្ខុ-បសាទាទិម្ហិ ឃដ្ដិតេ;

អាវជ្ជនាទយោ ហោន្តិ, ភវង្គទ្វិចលា បរំ.

២២៦. បរិណាមេ ភវង្គស្ស, អាលម្ពេ គហណារហេ;

តថា វីថិ មនោទ្វារេ, យថាសម្ភវតោ ភវេ.

២២៧. អាវជ្ជា បញ្ចវិញ្ញាណំ, សម្បដិច្ឆនតីរណំ;

វោដ្ឋព្ពកាមជវនំ, តទាលម្ពណមានសំ.

២២៨. សត្តេវំ វីថិចិត្តានិ, ចិត្តុប្បាទា ចតុទ្ទស;

ចតុបញ្ញាស វិត្ថារា, បញ្ចទ្វារេ យថារហំ.

២២៩. ឧប្បាទដ្ឋិតិភង្គានំ, វសា ចិត្តក្ខណំ តយំ;

រូបានំ ឋិតិ ឯកូន-បញ្ញាសញ្ច ទុកេ ទុកំ.

២៣០. បរិត្តេតិបរិត្តេ ច, មហន្តេតិមហន្តកេ;

វោដ្ឋព្ពមោឃជវនំ, តទាលម្ពន្តិ តំ កមា.

២៣១. អាវជ្ជនញ្ច ជវនំ, មនោទ្វារេ តុ គោចរេ;

វិភូតេ តុ តទាលម្ពំ, វិត្ថារា សត្តសដ្ឋិ តេ.

២៣២. កាមេ ជវនសត្តាល-ម្ពណានំ និយមេ សតិ;

វិភូតេតិមហន្តេ ច, តទាលម្ពណមីរិតំ.

២៣៣. បញ្ចទ្វារេ មនោធាតុ, បច្ចេកម្ហិ យថាក្កមំ;

បញ្ចវិញ្ញាណយុគឡំ, បច្ចេកំ តុ បកាសិតំ.

២៣៤. មនោទ្វារេ តុ ជវនំ, មហគ្គតមនុត្តរំ;

សុខតីរណវោដ្ឋព្ពំ, បរិត្តជវនំ ឆសុ.

២៣៥. មហាវិបាកចិត្តានិ, ឧបេក្ខាតីរណទ្វយំ;

ឆសុ ទ្វារេសុ ជាយន្តិ, វីថិមុត្តានិ ចេកទា.

២៣៦. សត្តតិ វីថិចិត្តានិ, វិបាកា តុ មហគ្គតា;

នវ វីថិវិមុត្តា ច, ទុវិធាបិ ទសីរិតា.

២៣៧. ឥច្ចេវំ ទ្វារភេទេន, វិភាវេត្វា តតោ បរំ;

ញេយ្យា គោចរភេទេន, ចិត្តុប្បាទា យថារហំ.

២៣៨. រូបសទ្ទគន្ធរសផោដ្ឋព្ពា បញ្ច គោចរា;

សេសញ្ច រូបបញ្ញត្តិនាមញ្ច ធម្មគោចរំ.

២៣៩. បញ្ចទ្វារេ វត្តមានំ, បញ្ចាលម្ពំ យថាក្កមំ;

ឆាលម្ពណំ មនោទ្វារេ, អតីតានាគតម្បិ ច.

២៤០. បញ្ញត្តាតីតវត្តន្តំ, ឆទ្វារគ្គហិតំ បន;

ឆឡារម្មណសង្ខាតំ, យេភុយ្យេន ភវន្តរេ.

២៤១. និមិត្តគតិកម្មានំ, កម្មមេវាថ គោចរំ;

បដិសន្ធិភវង្គានំ, ចុតិយាវ យថារហំ.

២៤២. បញ្ចាលម្ពេ មនោធាតុ, បច្ចេកម្ហិ យថាក្កមំ;

បញ្ចវិញ្ញាណយុគឡំ, បច្ចេកំ តុ បកាសិតំ.

២៤៣. កាមបាកានិ សេសានិ, ហសនញ្ច បរិត្តកេ;

ញាណហីនានិបុញ្ញានិ, ជវនានិ អនិម្មលេ.

២៤៤. តិហេតុកាមបុញ្ញានិ, បុញ្ញាភិញ្ញា ច លោកិយា;

សព្ពាលម្ពេ បវត្តន្តិ, អគ្គមគ្គផលំ វិនា.

២៤៥. ក្រិយាភិញ្ញា ច វោដ្ឋព្ពំ, ក្រិយា កាមេ តិហេតុកា;

សព្ពាលម្ពេ បវត្តន្តិ, និព្ពានេ និម្មលា សិយុំ.

២៤៦. ទុតិយញ្ច ចតុត្ថញ្ច, អារុប្បេសុ មហគ្គតេ;

មហគ្គតញ្ញេ វោហារេ, អយមាលម្ពណេ នយោ.

២៤៧. ចក្ខុសោតឃានជិវ្ហា-កាយហទយវត្ថុនា;

កាមលោកេ ឆវត្ថូនិ, និស្សិតា សត្ត ធាតុយោ.

២៤៨. បញ្ចវិញ្ញាណធាតូ ច, តាសំ បុព្ពាបរត្តយំ;

មនោធាតុ តតោ សេសា, មនោវិញ្ញាណធាតុ ច.

២៤៩. ចតស្សោ ធាតុយោ រូបេ, តីណិ វត្ថូនិ និស្សិតា;

អរូបេ តុ អនិស្សាយ, ធាត្វេកាវ បវត្តតិ.

២៥០. បញ្ចប្បសាទេ និស្សាយ, បច្ចេកំ តុ យថាក្កមំ;

បញ្ចវិញ្ញាណយុគឡំ, ភវតីតិ បកាសិតំ.

២៥១. កាមបាកានិ សេសានិ, មគ្គាវជ្ជនមាទិតោ;

ហសនំ បដិឃារូបា-វចរំ វត្ថុនិស្សិតំ.

២៥២. ទ្វេចត្តាលីស និស្សាយ, អនិស្សាយ ច ជាយរេ;

អនិស្សាយ វិបាកានិ, អារុប្បេតិ សមីរិតំ.

២៥៣. ឥច្ចេវំ វត្ថុភេទេន, ចិត្តុប្បាទា បកាសិតា;

តតោ បរំ វិភាវេយ្យ, ភូមិភេទេន បណ្ឌិតោ.

២៥៤. និរយេ បេតលោកេ ច, តិរច្ឆានាសុរេ តថា;

បាបកម្មោបបជ្ជន្តិ, បាបបាកាយ សន្ធិយា.

២៥៥. ភូមិស្សិតេសុ ទេវេសុ, មនុស្សេសុបិ ហីនកា;

អហេតុកាយ ជាយន្តិ, បុញ្ញបាកាយ សន្ធិយា.

២៥៦. ចាតុមហារាជិកា ច, តាវតិំសា ច យាមកា;

តុសិតា ចេវ និម្មានរតិនោ វសវត្តិនោ.

២៥៧. ឥច្ចេវំ ឆសុ ទេវេសុ, មនុស្សេសុ ច ជាយរេ;

មហាវិបាកសន្ធីហិ, កាមបុញ្ញកតា ជនា.

២៥៨. ព្រហ្មានំ បារិសជ្ជា ច, តថា ព្រហ្មបុរោហិតា;

មហាព្រហ្មា ច ជាយន្តិ, បឋមជ្ឈានសន្ធិយា.

២៥៩. បរិត្តា អប្បមាណាភា, ជាយន្តាភស្សរា តថា;

ទុតិយជ្ឈានបាកាយ, តតិយាយ ច សន្ធិយា.

២៦០. បរិត្តសុភប្បមាណសុភា ច សុភកិណ្ហកា;

ចតុត្ថាយ តុ ជាយន្តិ, តតិយជ្ឈានភូមិកា.

២៦១. វេហប្ផលា អសញ្ញី ច, សុទ្ធាវាសាតិ សត្តសុ;

បញ្ចមាយ ច ជាយន្តិ, អសញ្ញីចិត្តវជ្ជិតា.

២៦២. អវិហា ច អតប្បា ច, សុទស្សា ច សុទស្សិនោ;

អកនិដ្ឋាតិ បញ្ចេតេ, សុទ្ធាវាសា បកាសិតា.

២៦៣. អាកាសានញ្ចាយតនបាកាទីហិ យថាក្កមំ;

អាកាសានញ្ចាយតនភូមិកាទីសុ ជាយរេ.

២៦៤. ចុតិសន្ធិភវង្គានំ, វសា បាកា មហគ្គតា;

កាមេ សហេតុកា បាកា, តទាលម្ពណតោបិ ច.

២៦៥. យថាវុត្តនិយាមេន, ភូមីស្វេកាវ ជាយរេ;

ចិត្តុប្បាទេសុ សព្ពត្ថ, ន ត្វេវាសញ្ញិនោ មតា.

២៦៦. ឃានជិវ្ហាកាយធាតុ-និស្សិតំ មានសំ តថា;

បដិឃទ្វយមិច្ចេវមដ្ឋ ហោន្តេវ កាមិសុ.

២៦៧. ចក្ខុសោតញ្ច វិញ្ញាណំ, មនោធាតុ ច តីរណំ;

កាមរូបេសុ ជាយន្តិ, យថាសម្ភវតោ ទស.

២៦៨. វោដ្ឋព្ពកាមបុញ្ញានិ, វិប្បយុត្តានិ ទិដ្ឋិយា;

ឧទ្ធច្ចសហិតញ្ចេតិ, សព្ពត្ថេតានិ ចុទ្ទស.

២៦៩. កង្ខិតំ ទិដ្ឋិយុត្តានិ, សុទ្ធាវាសវិវជ្ជិតេ;

សិតញ្ច រូបជវន-មារុប្បាបាយវជ្ជិតេ.

២៧០. កាមក្រិយា សហេតូ ច, ឧទ្ធំ លោកុត្តរត្តយំ;

ចតុត្ថារុប្បជវនំ, សព្ពត្ថាបាយវជ្ជិតេ.

២៧១. សេសមារុប្បជវនំ, ហិត្វាបាយំ យថាក្កមំ;

ឧទ្ធមារុប្បភូមិញ្ច, ជាយតីតិ វិភាវយេ.

២៧២. សោតាបត្តិផលាទីនិ, ចត្តារានុត្តរានិ តុ;

សុទ្ធាវាសមបាយញ្ច, ហិត្វា សព្ពត្ថ ជាយរេ.

២៧៣. សុទ្ធាវាសមបាយញ្ច, ហិត្វារូបញ្ច សព្ពថា;

បឋមានុត្តរោ មគ្គោ, សេសដ្ឋានេសុ ជាយតិ.

២៧៤. សត្តតិំស អបាយេសុ, កាមេសីតិ បកាសិតា;

បញ្ចបញ្ញាស សុទ្ធេសុ, រូបេស្វេកូនសត្តតិ.

២៧៥. ឆចត្តាលីស អារុប្បេ, ឧប្បជ្ជន្តិ យថារហំ;

ឥច្ចេវំ ភូមិភេទេន, ចិត្តុប្បាទា បកាសិតា.

២៧៦. តិហេតុសត្តេ សព្ពានិ, ទ្វិហេតុកាហេតុកេ បន;

បរិត្តានិ វិវជ្ជេត្វា, ញាណបាកក្រិយាជវេ.

២៧៧. បុថុជ្ជនានំ សម្ភោន្តិ, ទិដ្ឋិយុត្តញ្ច កង្ខិតំ;

សោតាបន្នាទិតិណ្ណម្បិ, ផលំ ហោតិ យថាសកំ.

២៧៨. វីតរាគស្ស ជវនំ, ក្រិយា ចន្តិមនុត្តរំ;

បុថុជ្ជនាទិតិណ្ណម្បិ, បដិឃំ សមុទីរិតំ.

២៧៩. ជវា បុថុជ្ជនាទីនំ, ចតុន្នំ សេស សាសវា;

សាសវាវជ្ជបាកានិ, បញ្ចន្នមបិ ទីបយេ.

២៨០. បុថុជ្ជនេសុ តេសដ្ឋិ, សោតាបន្នាទិកទ្វយេ;

ឯកូនសដ្ឋិ ចិត្តានិ, អនាគាមិកបុគ្គលេ.

២៨១. សត្តបញ្ញាស ជាយន្តិ, តេបញ្ញាស អនាសវេ;

មគ្គដ្ឋេសុ សកោ មគ្គោ, បុគ្គលេសុ អយំ នយោ.

២៨២. តិហេតុកាមចុតិយា, សព្ពាបិ បដិសន្ធិយោ;

ទ្វិហេតាហេតុចុតិយា, កាមាវចរសន្ធិយោ.

២៨៣. រូបាវចរចុតិយា, សហេតុបដិសន្ធិយោ;

អារុប្បារុប្បចុតិយា, ហេដ្ឋិមារុប្បវជ្ជិតា.

២៨៤. បដិសន្ធិ តថា កាមេ, តិហេតុបដិសន្ធិយោ;

ភវន្តីតិ ច មេធាវី, ចុតិសន្ធិនយំ នយេ.