៣. តតិយោ បរិច្ឆេទោ

ភេទសង្គហវិភាគោ

១២៣. ឯវំ ភេទសភាវេសុ, តេស្វេវ បុន សង្គហំ;

សភាវត្ថវិសេសេហិ, បវក្ខាមិ ឥតោ បរំ.

១២៤. អសាធារណញាណេហិ, សត្ថា វត្ថុវិវេចកោ;

សង្គហេត្វា សភាគេហិ, ធម្មេ ទស្សេសិ ចក្ខុមា.

១២៥. ទិដ្ឋិភិនិវេសដ្ឋេន, យថាភូតសភាវតោ;

បរមាមសតិច្ចេកា, បរាមាសោតិ ភាសិតា.

១២៦. កិលេសាសុចិភាវេន, វណស្សាវរសោ វិយ;

អាលិម្បន្តាវ សន្តានំ, សវន្តីតិ បកាសិតា.

១២៧. កាមតណ្ហា ភវតណ្ហា, ទិដ្ឋាវិជ្ជាតិ អាសវា;

ចត្តារោ អាសវដ្ឋេន, តយោ ធម្មា សភាវតោ.

១២៨. ឯតេវោ ឃាតិ វុត្តាវ, ទ្វារាលម្ពាភិវាហិនោ;

ឱត្ថរិត្វា បរាភូតេ, ហរន្តា បាណិនោ ភវេ.

១២៩. យោគាតិ ចាហុ តេ ឯវ, បាណិនោ ភវយន្តកេ;

ទ្វារាលម្ពាភិសម្ពន្ធា, យន្តពន្ធាវ យោជិតា.

១៣០. សន្តានមធិគណ្ហន្តា, មាលុវាវ មហាតរុំ;

គណ្ហន្តា ទឡ្ហមាលម្ពំ, មណ្ឌូកមិវ បន្នគោ.

១៣១. កាមតណ្ហា ច ទិដ្ឋិ ច, ឧបាទានា ចតុព្ពិធា;

ទិដ្ឋិ ទិដ្ឋិសីលព្ពត-មត្តវាទោតិ ភេទិតា.

១៣២. កាយេន កាយំ គន្ថេន្តា, ទុប្បមុញ្ចានុវេឋិនោ;

កថិតា កាយគន្ថាតិ, តណ្ហាព្យាបាទទិដ្ឋិយោ.

១៣៣. សីលព្ពតបរាមាសោ, ឥតិ ទិដ្ឋិ វិភេទិតា;

ឥទំសច្ចាភិនិវេសោ, ឥតិ ចេវំ ចតុព្ពិធា.

១៣៤. នេក្ខម្មំ បលិពោធេន្តា, ភាវនាបរិបន្ថកា;

សន្តានមណ្ឌកោសាវ, បរិយោនន្ធកាតិ ច.

១៣៥. កាមច្ឆន្ទោ ច ព្យាបាទោ, ថិនមិទ្ធញ្ច សំសយោ;

អវិជ្ជុទ្ធច្ចកុក្កុច្ចមិតិ នីវរណា មតា.

១៣៦. អាគាឡ្ហំ បរិយាទាយ, ឱគយ្ហនុប្បវត្តិនោ;

យោប្បរោគាវ សន្តាន-មនុសេន្តីតិ ភាសិតា.

១៣៧. កាមរាគោ ភវរាគោ, បដិឃោ មានទិដ្ឋិយោ;

កង្ខាវិជ្ជាតិ សត្តេវ, ឆ ធម្មានុសយា មតា.

១៣៨. ទ្វារាលម្ពណពន្ធេន, បាណីនំ ភវមណ្ឌលេ;

សំយោជនានិ វុត្តានិ, បាសពន្ធាវ បក្ខិនំ.

១៣៩. កាមរូបារូបរាគា, បដិឃោ មោហសំសយោ;

ទិដ្ឋិ សីលព្ពតំ មានោ, ឧទ្ធច្ចេន ទសា ភវេ.

១៤០. រូបារូបរាគុទ្ធច្ចំ, អភិធម្មេ វិនា បុន;

ភវរាគិស្ស មច្ឆេរំ, គហេត្វា ទសធា សិយុំ.

១៤១. សំក្លេបយន្តិ សន្តានំ, ឧបឃាតេន្តិ បាណិនោ;

សហជាតេក្លេសេន្តីតិ, កិលេសាតិ បកាសិតា.

១៤២. លោភោ ទោសោ ច មោហោ ច,

ទិដ្ឋិ មានោ ច សំសយោ;

ថិនាហិរិកនោត្តប្ប-

មុទ្ធច្ចេន សិយុំ ទស.

១៤៣. នវសង្គហិតា ឯត្ថ, ទិដ្ឋិលោភា បកាសិតា;

សត្តសង្គហិតាវិជ្ជា, បដិឃោ បញ្ចសង្គហោ.

១៤៤. ចតុសង្គហិតា កង្ខា, មានុទ្ធច្ចា តិសង្គហា;

ទុកសង្គហិតំ ថីនំ, កុក្កុច្ចមេកសង្គហំ.

១៤៥. ទ្វិធាហិរិកនោត្តប្ប-មិស្សាមច្ឆរិយំ តថា;

ឥច្ចេវំ ទសធា វុត្តា, បាបកេស្វេវ សង្គហា.

១៤៦. បរាមាសាសវោឃា ច, យោគុបាទានគន្ថតោ;

នីវារណានុសយតោ, សំយោជនកិលេសតោ.

១៤៧. ចុទ្ទសេវ តុ សង្ខេបា, សត្តបញ្ញាស ភេទតោ;

យថាធម្មានុសារេន, ចិត្តុប្បាទេសុ យោជយេ.

១៤៨. តតោបរេ នោបរាមា-សាទិភេទិតសង្គហា;

ចិត្តំ ចេតសិកំ រូបំ, និព្ពានមិតិ ទីបយេ.

១៤៩. ឥច្ចាកុសលធម្មានំ, ញត្វា សង្គហមុត្តរំ;

មិស្សកា នាម វិញ្ញេយ្យា, យថាសម្ភវតោ កថំ;

១៥០. លោភោ ទោសោ ច មោហោ ច,

ឯកន្តាកុសលា តយោ;

អលោភាទោសាមោហោ ច,

កុសលាព្យាកតា តថា.

១៥១. បាទបស្សេវ មូលានិ, ថិរភាវាយ បច្ចយា;

មូលភាវេន ធម្មានំ, ហេតូ ធម្មា ឆ ទីបិតា.

១៥២. វិតក្កោ ច វិចារោ ច, បីតិ ចេកគ្គតា តថា;

សោមនស្សំ ទោមនស្សំ, ឧបេក្ខាតិ ច វេទនា.

១៥៣. អាហច្ចុបនិជ្ឈាយន្តា, និជ្ឈានដ្ឋេន បច្ចយា;

ឈានធម្មាតិ សត្ថាហ, បញ្ច វត្ថុសភាវតោ.

១៥៤. សម្មាទិដ្ឋិ ច សង្កប្បោ, វាយាមោ វិរតិត្តយំ;

សម្មាសតិ សមាធី ច, មិច្ឆាទិដ្ឋិ ច សម្ភវា.

១៥៥. សម្មាមិច្ឆា ច នីយន្តា, និយ្យានដ្ឋេន បច្ចយា;

មគ្គង្គា ទ្វាទសក្ខាតា, នវ ធម្មា សភាវតោ.

១៥៦. អត្តភាវំ បវត្តេន្តា, ឱជដ្ឋមកវេទនំ;

បដិសន្ធិនាមរូប-មាហរន្តា យថាក្កមំ.

១៥៧. កពឡីការោ អាហារោ,

ផស្សោ សញ្ចេតនា តថា;

វិញ្ញាណមិតិ ចត្តារោ,

អាហារាតិ បកាសិតា.

១៥៨. ធម្មានំ សហជាតានំ, ឥន្ទ្រិយដ្ឋេន បច្ចយា;

អត្តានមិស្សរដ្ឋេន, អនុវត្តាបកា តថា.

១៥៩. សទ្ធា ច សតិ បញ្ញា ច, វីរិយេកគ្គតាបិ ច;

វេទនា ជីវិតំ ចិត្តំ, អដ្ឋ រូបិន្ទ្រិយានិ ច.

១៦០. កថំ ជីវិតមេកំ តុ, សុខំ ទុក្ខន្តិ វេទនា;

សោមនស្សំ ទោមនស្សំ, ឧបេក្ខាតិ ច ភេទិតា.

១៦១. បញ្ញាទិមគ្គេនញ្ញាត-ញ្ញស្សាមីតិន្ទ្រិយំ ភវេ;

មជ្ឈេ អញ្ញិន្ទ្រិយមន្តេ, អញ្ញាតាវិន្ទ្រិយំ តថា.

១៦២. សោឡសេវ សភាវេន, ឥន្ទ្រិយដ្ឋវិភាគតោ;

ឥន្ទ្រិយានីតិ វុត្តានិ, ពាវីសតិ វិភាវយេ.

១៦៣. ទឡ្ហាធិដ្ឋិតសន្តានា, វិបក្ខេហិ អកម្បិយា;

ពលវន្តសភាវេន, ពលធម្មា បកាសិតា.

១៦៤. សទ្ធា សតិ ហិរោត្តប្បំ, វីរិយេកគ្គតា តថា;

បញ្ញាហិរិកានោត្តប្ប-មិច្ចេវំ នវធា មតា.

១៦៥. ជេដ្ឋា បុព្ពង្គមដ្ឋេន, បុញ្ញាបុញ្ញបវត្តិយំ;

បច្ចយាធិប្បតេយ្យេន, សហជានំ យថារហំ.

១៦៦. ចត្តារោធិបតី វុត្តា, អាធិប្បច្ចសភាវតោ;

ឆន្ទោ ចិត្តញ្ច វីរិយំ, វីមំសាតិ ច តាទិនា.

១៦៧. បញ្ចសង្គហិតា បញ្ញា, វាយាមេកគ្គតា បន;

ចតុសង្គហិតា ចិត្តំ, សតិ ចេវ តិសង្គហា.

១៦៨. សង្កប្បោ វេទនា សទ្ធា, ទុកសង្គហិតា មតា;

ឯកេកសង្គហា សេសា, អដ្ឋវីសតិ ភាសិតា;

ឥច្ចេវំ សត្តធា ភេទោ, វុត្តោ មិស្សកសង្គហោ.

១៦៩. ហេតុឈានង្គមគ្គង្គា, អាហារិន្ទ្រិយតោ តថា;

ពលាធិប្បតិតោ ចេវ, បុញ្ញាបុញ្ញាទិមិស្សតា;

ឆត្តិំសេវ សភាវេន, ចតុសដ្ឋិ បភេទតោ.

១៧០. ឥច្ចេវំ សង្គហេត្វាន, វិភាវេយ្យ តតោ បរំ;

ចិត្តុប្បាទបភេទេសុ, យថាសម្ភវតោ កថំ.

១៧១. សិតាវជ្ជនវិញ្ញាណំ, សម្បដិច្ឆនតីរណា;

អដ្ឋារសាហេតុកាវ, មោមូហា ឯកហេតុកា.

១៧២. សេសា តុ កុសលា ញាណវិយុត្តា ច ទ្វិហេតុកា;

ចិត្តុប្បាទាបរេ សត្ត-ចត្តាលីស តិហេតុកា.

១៧៣. បញ្ចវិញ្ញាណមជ្ឈានំ, ទ្វិឈានង្គិកមីរិតំ;

ចតុត្ថបញ្ចមជ្ឈានំ, តិឈានំ តតិយំ មតា.

១៧៤. ចតុឈានំ តុ ទុតិយំ, កាមេ ច សុខវជ្ជិតា;

បញ្ចឈានំ តុ បឋមំ, កាមេ ច សុខិតា មតា.

១៧៥. បឋមានុត្តរំ ឈានំ, អដ្ឋមគ្គង្គិកំ មតំ;

សត្តមគ្គង្គិកំ នាម, សេសឈានមនុត្តរំ.

១៧៦. លោកិយំ បឋមំ ឈានំ, តថា កាមេ តិហេតុកា;

បញ្ចមគ្គង្គិកា នាម, ចិត្តុប្បាទា បកាសិតា.

១៧៧. សេសំ មហគ្គតំ ឈានំ, សម្បយុត្តា ច ទិដ្ឋិយា;

ញាណេន វិប្បយុត្តា ច, ចតុមគ្គង្គិកា មតា.

១៧៨. បដិឃុទ្ធច្ចយុត្តា ច, វិប្បយុត្តា ច ទិដ្ឋិយា;

តិមគ្គង្គំ ទុមគ្គង្គំ, កង្ខិតំ សមុទីរិតំ.

១៧៩. ន ហោន្តាហេតុកេ មគ្គា, ចិត្តដ្ឋិតិ ច កង្ខិតេ;

វិទិតា និយតតា ច, លោកិយេសុ ន ឧទ្ធដា.

១៨០. កាមេសុ កពឡីការោ, អនាហារោ អសញ្ញិនោ;

ចិត្តុប្បាទេសុ សព្ពត្ថ, អាហារត្តយមីរិតំ.

១៨១. ឥន្ទ្រិយានិ វិភាវេយ្យ, នវធានុត្តរេ ពុធោ;

អដ្ឋធា សមុទីរេយ្យ, លោកិយេសុ តិហេតុកេ.

១៨២. សត្តធា បន ញាណេន, វិប្បយុត្តេ បកាសយេ;

សិតវោដ្ឋព្ពនាបុញ្ញេ, បញ្ចធា កង្ខិតេ បន.

១៨៣. ចតុធា តិវិធា សេសេ, ចិត្តុប្បាទេ សមីរយេ;

តិហេតុកា សត្តពលា, ឆពលា តុ ទុហេតុកា.

១៨៤. ចតុពលា អកុសលា, កង្ខិតំ តិពលំ មតំ;

ទ្វិពលំ សិតវោដ្ឋព្ព-មពលំ សេសមីរិតំ.

១៨៥. ជវនេធិបតីនំ តុ, យោ កោចេកោ តិហេតុកេ;

ទ្វិហេតុកេ វា កុសលេ, វីមំសា នោបលព្ភតិ.

១៨៦. លោកិយេសុ វិបាកេសុ,

មោហមូលេ អហេតុកេ;

យថាសម្ភវវុត្តិត្តា,

នត្ថាធិបតិ កោចិបិ.

១៨៧. សម្ភោតិ កាយវិញ្ញាណេ, បុញ្ញបាកេ សុខិន្ទ្រិយំ;

ទុក្ខិន្ទ្រិយម្បិ តត្ថេវ, បាបបាកម្ហិ ភាសិតំ.

១៨៨. សន្តីរណញ្ច ហសនំ, សោមនស្សានិ សោឡស;

បឋមាទិចតុជ្ឈានំ, សោមនស្សយុតំ ភវេ.

១៨៩. ទោមនស្សយុត្តា ទ្វេវ, ចិត្តុប្បាទា បកាសិតា;

តទញ្ញេ បន សព្ពេបិ, បញ្ចបញ្ញាសុបេក្ខកា.

១៩០. វេទនាសម្បយោគញ្ច, វិនិព្ភុជ្ជេវមដ្ឋធា;

ហេតុយោគាទិភេទេហិ, ចិត្តុប្បាទា បកាសិតា.

១៩១. តំតំវិយោគភេទញ្ច, បច្ចេកមថ មិស្សិតំ;

យថាវុត្តានុសារេន, យថាសម្ភវតោ នយេ.