២. ទុតិយោ បរិច្ឆេទោ

លក្ខណរសុបដ្ឋានវិភាគោ

៦៧. សភាវោ លក្ខណំ នាម, កិច្ចសម្បជ្ជនា រសោ;

គយ្ហាការោ ឧបដ្ឋានំ, បទដ្ឋានំ តុ បច្ចយោ.

៦៨. អត្តុបលទ្ធិសង្ខាតា, សម្បត្តា ច បនត្ថតោ;

លក្ខណរសុបដ្ឋានា, វោហារាភោគភេទិតា.

៦៩. តេបញ្ញាសសភាវេសុ, តស្មា ភេទំ យថារហំ;

លក្ខណាទិប្បការេហិ, បវក្ខាមិ ឥតោ បរំ.

៧០. ចិន្តេតីតិ ភវេ ចិត្តំ, ចិន្តនមត្តមេវ វា;

សម្បយុត្តាថ វា តេន, ចិន្តេន្តីតិ ច គោចរំ.

៧១. ផុសតីតិ ភវេ ផស្សោ, ផុសនំ វាថ កេវលំ;

សម្បយុត្តាថ វា តេន, ផុសន្តីតិ ច គោចរំ.

៧២. ឯវំ កត្តរិ ភាវេ ច, ករណេ ច យថារហំ;

តេបញ្ញាសសភាវេសុ, សទ្ទនិព្ពចនំ នយេ.

៧៣. អាលម្ពណមនំ ចិត្តំ, តំវិជាននលក្ខណំ;

សហជាធិដ្ឋានរសំ, ចិន្តាកប្បោតិ គយ្ហតិ.

៧៤. អាលម្ពណសមោធានោ,

ផស្សោ ផុសនលក្ខណោ;

សង្ឃដ្ដនរសោ តត្ថ,

សន្និបាតោតិ គយ្ហតិ.

៧៥. វេទនាលម្ពណរសា, សា វេទយិតលក្ខណា;

គោចរានុភវរសា, អនុភុត្តីតិ គយ្ហតិ.

៧៦. អាការគហណំ សញ្ញា, សា សញ្ជាននលក្ខណា;

និមិត្តុប្បាទនរសា, ឧបលក្ខាតិ គយ្ហតិ.

៧៧. ចេតនា ចិត្តវិប្ផារា, សាយំ ព្យាបារលក្ខណា;

កម្មន្តាយូហនរសា, សំវិធានន្តិ គយ្ហតិ.

៧៨. ឯកគ្គតា អវិក្ខេបោ, សាវិសាហារលក្ខណា;

សម្បិណ្ឌនរសា ចិត្តំ, សមោធានន្តិ គយ្ហតិ.

៧៩. យាបនំ សហជាតាន-មនុបាលនលក្ខណំ;

ជីវិតំ ជីវនរសំ, អាយុពន្ធោតិ គយ្ហតិ.

៨០. សារណា មនសីការោ, សមន្នាហារលក្ខណោ;

សំយោជនរសោ ចិត្ត-បដិបត្តីតិ គយ្ហតិ.

៨១. សង្កប្បនលក្ខណោ តក្កោ, សហជាភិនិរោបនោ;

អាលម្ពាហននរសោ, សន្និរុជ្ឈោតិ គយ្ហតិ.

៨២. វិចារោ អនុសន្ធានោ, អនុមជ្ជនលក្ខណោ;

ចិត្តានុយោជនរសោ, អនុបេក្ខាតិ គយ្ហតិ.

៨៣. អធិមោក្ខោ អសំសប្បោ, សុសន្និដ្ឋានលក្ខណោ;

និច្ចលាបាទនរសោ, ទឡ្ហវុត្តីតិ គយ្ហតិ.

៨៤. វីរិយំ បន វាយាមោ, មហុស្សាហនលក្ខណោ;

កិច្ចាសំសីទនរសោ, ឧបត្ថម្ភោតិ គយ្ហតិ.

៨៥. អាលម្ពត្ថិកតា ឆន្ទោ, កត្តុកាមតលក្ខណោ;

អាលម្ពណេសនរសោ, ហត្ថាទានន្តិ គយ្ហតិ.

៨៦. សហជាតានុផរណា, សម្បិយាយនលក្ខណា;

សម្បីននរសា បីតិ, បាមោជ្ជមិតិ គយ្ហតិ.

៨៧. ចេតោសទ្ទហនំ សទ្ធា, ភូតោកប្បនលក្ខណា;

ហិតបក្ខន្ទនរសា, អធិមុត្តីតិ គយ្ហតិ.

៨៨. អសម្មោសា សភាវេសុ, សតិ ធារណលក្ខណា;

ធម្មាបិលាបនរសា, អប្បមាទោតិ គយ្ហតិ.

៨៩. ហិរី ជេគុច្ឆា បាបេសុ, សា ហរាយនលក្ខណា;

ហីឡសំកោចនរសា, បាបលជ្ជាតិ គយ្ហតិ.

៩០. បាបសារជ្ជមោត្តប្បំ, ឧព្ពេគុត្តាសលក្ខណំ;

ភយសង្កោចនរសំ, អវិស្សាសោតិ គយ្ហតិ.

៩១. អលោភោ អនភិសង្គោ, អបរិគ្គហលក្ខណោ;

មុត្តប្បវត្តនរសោ, អសំសគ្គោតិ គយ្ហតិ.

៩២. អទោសោ ចិត្តសាខល្យំ, អព្យាបជ្ជនលក្ខណោ;

សណ្ហប្បវត្តនរសោ, សោម្មភាវោតិ គយ្ហតិ.

៩៣. អមោហោ ខលិតាភាវោ, បដិវិជ្ឈនលក្ខណោ;

វិសយោភាសនរសោ, បដិពោធោតិ គយ្ហតិ.

៩៤. តត្រមជ្ឈត្តតោបេក្ខា, សមីករណលក្ខណា;

អបក្ខបាតនរសា, សមវាហោតិ គយ្ហតិ.

៩៥. បស្សទ្ធិ កាយចិត្តានំ, ទរថាភាវលក្ខណា;

អបរិប្ផន្ទនរសា, សីតិភាវោតិ គយ្ហតិ.

៩៦. លហុតា កាយចិត្តានំ, អទន្ធាការលក្ខណា;

អវិត្ថាររសា សល្លហុកវុត្តីតិ គយ្ហតិ.

៩៧. មុទុតា កាយចិត្តានំ, កក្ខឡាភាវលក្ខណា;

កិច្ចាវិរោធនរសា, អនុកុល្យន្តិ គយ្ហតិ.

៩៨. កម្មញ្ញតា ឧភិន្នម្បិ, អលំកិច្ចស្ស លក្ខណា;

បវត្តិសម្បត្តិរសា, យោគភាវោតិ គយ្ហតិ.

៩៩. តថា បាគុញ្ញតា ទ្វិន្នំ, វិសទាការលក្ខណា;

សុខប្បវត្តនរសា, សេរិភាវោតិ គយ្ហតិ.

១០០. ឧជុតា កាយចិត្តានំ, កុដិលាភាវលក្ខណា;

ជិម្ហនិម្មទនរសា, ឧជុវុត្តីតិ គយ្ហតិ.

១០១. សម្មាវាចា វចីសុទ្ធិ, វាចាសំយមលក្ខណា;

មិច្ឆាវាចោរមរសា, វចីវេលាតិ គយ្ហតិ.

១០២. សម្មាកម្មំ ក្រិយាសុទ្ធំ, សម្មាករណលក្ខណំ;

មិច្ឆាកម្មោរមរសំ, ក្រិយាវេលាតិ គយ្ហតិ.

១០៣. សម្មាជីវោ វិសុទ្ធេដ្ឋិ, អល្លិដ្ឋាជីវលក្ខណោ;

មិច្ឆាជីវោរមរសោ, សម្មាវុត្តីតិ គយ្ហតិ.

១០៤. ករុណា ទីនសត្តេសុ, ទុក្ខាបនយលក្ខណា;

សោត្ថិតាបត្ថនរសា, អនុកម្បាតិ គយ្ហតិ.

១០៥. សុខដ្ឋិតេសុ មុទិតា, អនុមោទនលក្ខណា;

ចេតោវិកាសនរសា, អវិរោធោតិ គយ្ហតិ.

១០៦. ចេតោសារជ្ជនា លោភោ, អបរិច្ចាគលក្ខណោ;

អាលម្ពគិជ្ឈនរសោ, អភិលគ្គោតិ គយ្ហតិ.

១០៧. ចេតោព្យាបជ្ជនំ ទោសោ, សម្បទុស្សនលក្ខណោ;

អាលម្ពណឃាតរសោ, ចណ្ឌិក្កមិតិ គយ្ហតិ.

១០៨. ចេតោសម្មុយ្ហនំ មោហោ,

សោ សម្មុយ្ហនលក្ខណោ;

សភាវច្ឆាទនរសោ,

អន្ធភាវោតិ គយ្ហតិ.

១០៩. បាបាជិគុច្ឆាហិរិកំ, និល្លជ្ជាការលក្ខណំ;

បាបោបលាបនរសំ, មលគ្គាហោតិ គយ្ហតិ.

១១០. អសារជ្ជនមនោត្តប្បមនុត្តាសនលក្ខណំ;

បាបបក្ខន្ទនរសំ, បាគព្ភមិតិ គយ្ហតិ.

១១១. ទិដ្ឋិ ទឡ្ហវិបល្លាសោ, សា បរាមាសលក្ខណា;

តុច្ឆាភិនិវេសនរសា, មិច្ឆាគាហោតិ គយ្ហតិ.

១១២. ‘‘អហស្មី’’តិ មញ្ញមានោ, សោ សមុន្នតិលក្ខណោ;

កេតុសម្បគ្គហរសោ, អហំការោតិ គយ្ហតិ.

១១៣. បរសម្បត្តីសុ ឥស្សា, អក្ខមាការលក្ខណា;

ចេតោវិកុចនរសា, វិមុខត្តន្តិ គយ្ហតិ.

១១៤. បរិគ្គហេសុ មច្ឆេរំ, សន្និគូហនលក្ខណំ;

សាមញ្ញាសហនរសំ, វេវិច្ឆមិតិ គយ្ហតិ.

១១៥. ចេតោបហននំ ថីនំ, តំ សំសីទនលក្ខណំ;

ឧស្សាហភញ្ជនរសំ, សំខិត្តត្តន្តិ គយ្ហតិ.

១១៦. វិឃាតោ សហជាតានំ, មិទ្ធំ មោហនលក្ខណំ;

សត្តិសំភញ្ជនរសំ, អាតុរត្តន្តិ គយ្ហតិ.

១១៧. ឧទ្ធច្ចំ ចិត្តវិក្ខេបោ, អវូបសមលក្ខណំ;

ចេតោនវដ្ឋានរសំ, ភន្តត្តមិតិ គយ្ហតិ.

១១៨. វិប្បដិសារោ កុក្កុច្ចមនុសោចនលក្ខណំ;

អត្តានុសោចនរសំ, បច្ឆាតាបោតិ គយ្ហតិ.

១១៩. កង្ខាយនា វិចិកិច្ឆា, អសន្និដ្ឋានលក្ខណា;

អនេកគាហនរសា, អប្បតិដ្ឋាតិ គយ្ហតិ.

១២០. ឥច្ចេវំ លក្ខណាទីហិ, វិភាវេយ្យ វិចក្ខណោ;

តេបញ្ញាសសភាវេសុ, សភាវាការលក្ខណំ.

១២១. លក្ខណត្ថកុសលា សលក្ខណេ,

លក្ខណត្ថបរមេបិ កេវលំ;

លក្ខណុគ្គហសុខាយ វណ្ណយុំ,

លក្ខណាទិមុខតោ សលក្ខណំ.

១២២. អត្ថំ តមេវមនុគម្ម មយេត្ថ វុត្ត-

មត្ថានមត្ថនយនត្ថមនេកធាបិ;

បត្ថេយ្យ មេត្ថ វចនត្ថនយេហិ ញាណ-

មត្ថេសុ ពុទ្ធវចនត្ថនយត្ថិកេហិ.

ឥតិ នាមរូបបរិច្ឆេទេ លក្ខណរសុបដ្ឋានវិភាគោ នាម

ទុតិយោ បរិច្ឆេទោ.