១. បឋមោ បរិច្ឆេទោ

នាមត្តយវិភាគោ

៣. តត្ថ ចិត្តំ ចេតសិកំ, និព្ពានន្តិ មតំ តិធា;

នាមំ រូបំ តុ ទុវិធំ, ភូតោបាទាយភេទតោ.

៤. កាមភូមាទិភេទេន, តត្ថ ចិត្តំ ចតុព្ពិធំ;

ចេតោយុត្តា ទ្វិបញ្ញាស, ធម្មា ចេតសិកា មតា.

៥. ចក្ខុសោតឃានជិវ្ហា-កាយវិញ្ញាណធាតុយោ;

សម្បដិច្ឆនចិត្តញ្ច, តថា សន្តីរណទ្វយំ.

៦. សោមនស្សសហគតំ, ឧបេក្ខាសហិតន្តិ ច;

ឥច្ចាហេតុកចិត្តានិ, បុញ្ញបាកានិ អដ្ឋធា.

៧. សោមនស្សយុតំ តត្ថ, ហិត្វា សន្តីរណំ តថា;

សត្តាកុសលបាកានិ, តានេវាតិ វិនិទ្ទិសេ.

៨. បញ្ចទ្វារមនោទ្វារាវជ្ជនំ ហសនន្តិ ច;

ក្រិយចិត្តមុទីរិតំ, តិវិធម្បិ អហេតុកំ.

៩. ឯវំ អដ្ឋារសវិធំ, មានសំ ហោតិហេតុកំ;

មូលភេទេនាកុសលំ, ចិត្តំ តុ តិវិធំ មតំ.

១០. សោមនស្សសហគតំ, ឧបេក្ខាសហិតំ តថា;

ទិដ្ឋិគតសម្បយុត្តំ, វិប្បយុត្តន្តិ ភេទិតំ.

១១. អសង្ខារំ សសង្ខារមិតិ ភិន្នំ បនដ្ឋធា;

លោភមូលំ បកាសេន្តិ, តត្ថាកុសលមានសំ.

១២. ទោមនស្សសហគតំ, បដិឃេន សមាយុតំ;

ទោសមូលមសង្ខារំ, សសង្ខារន្តិបិ ទ្វិធា.

១៣. វិចិកិច្ឆាសហគតំ, ឧទ្ធច្ចសហិតន្តិ ច;

មោហមូលញ្ច ទុវិធំ, ឧបេក្ខាយ សមាយុតំ.

១៤. ទ្វាទសាកុសលានេវំ, ចិត្តានីតិ វិភាវយេ;

ហិត្វាហេតុកបាបានិ, សោភនានិ តតោ បរំ.

១៥. សោមនស្សសហគតំ, ឧបេក្ខាសហិតំ តថា;

ទ្វិធា ញាណេន សំយុត្តំ, វិប្បយុត្តន្តិ ភេទិតំ.

១៦. អសង្ខារំ សសង្ខារមិតិ ភិន្នំ បនដ្ឋធា;

សហេតុកាមាវចរ-បុញ្ញបាកក្រិយា ភវេ.

១៧. កាមេ តេវីស បាកានិ, បុញ្ញាបុញ្ញានិ វីសតិ;

ឯកាទស ក្រិយា ចេតិ, ចតុបញ្ញាស សព្ពថា.

១៨. តក្កចារបីតិសុខេកគ្គតាសហិតំ បន;

បឋមជ្ឈានកុសលំ, វិបាកញ្ច ក្រិយា តថា.

១៩. ទុតិយំ តក្កតោ ហីនំ, តតិយំ តុ វិចារតោ;

ចតុត្ថំ បីតិតោ ហីនំ, ឧបេក្ខេកគ្គតាយុតំ.

២០. បញ្ចមំ បញ្ចទសធា, រូបាវចរមីរិតំ;

បញ្ចមជ្ឈានមេវេកមរូបាវចរំ បន.

២១. អាកាសានញ្ចាយតនំ, បុញ្ញបាកក្រិយា តថា;

វិញ្ញាណញ្ចាយតនញ្ច, អាកិញ្ចញ្ញាយតនកំ;

នេវសញ្ញានាសញ្ញាយតនំ ទ្វាទសធា ភវេ.

២២. សោតាបត្តិមគ្គចិត្តំ, ផលចិត្តំ តថាបរំ;

សកទាគាមានាគាមិ, អរហត្តន្តិ អដ្ឋធា.

២៣. ឈានង្គយោគភេទេន, កត្វេកេកំ តុ បញ្ចធា;

វិត្ថារានុត្តរំ ចិត្តំ, ចត្តាលីសវិធំ ភវេ.

២៤. រូបាវចរចិត្តានិ, គយ្ហន្តានុត្តរានិ ច;

បឋមាទិជ្ឈានភេទេ, អារុប្បញ្ចាបិ បញ្ចមេ.

២៥. ទ្វាទសាកុសលានេវំ, កុសលានេកវីសតិ;

ឆត្តិំសេវ វិបាកានិ, ក្រិយចិត្តានិ វីសតិ.

២៦. ឯកវីសសតំ វាថ, ឯកូននវុតីវិធំ;

ចិត្តំ តំសម្បយោគេន, ភិន្នា ចេតសិកា តថា.

២៧. ផស្សោ ច វេទនា សញ្ញា, ចេតនេកគ្គតា តថា;

ជីវិតំ មនសីការោ, សព្ពសាធារណា មតា.

២៨. តក្កចារាធិមោក្ខា ច, វីរិយំ ឆន្ទបីតិយោ;

បកិណ្ណកា ឆ អក្ខាតា, តេរសញ្ញសមានតា.

២៩. បកិណ្ណកា ន វិញ្ញាណេ, វិតក្កោ ទុតិយាទិសុ;

វិចារោ តតិយាទិម្ហិ, អធិមោក្ខោ តុ កង្ខិតេ.

៣០. សន្តីរណមនោធាតុត្តិកេសុ វីរិយំ តថា;

ចតុត្ថសុខិតេ បីតិ, ឆន្ទោហេតុម្ហិ មោមុហេ.

៣១. ឆសដ្ឋិ បញ្ចបញ្ញាស, ឯកាទស ច សោឡស;

សត្តតិ វីសតិ ចេវ, តានិ ចិត្តានិ ទីបយេ.

៣២. មោហាហិរិកានោត្តប្ប-មុទ្ធច្ចំ សព្ពបាបជំ;

ឥស្សាមច្ឆេរកុក្កុច្ចទោសា តុ បដិឃេ តថា.

៣៣. លោភោ លោភេ តុ ទិដ្ឋិ ច, ទិដ្ឋិយុត្តេ វិយុត្តកេ;

មានោ ច ថិនមិទ្ធំ តុ, សសង្ខារេសុ បញ្ចសុ.

៣៤. កង្ខិតេ វិចិកិច្ឆាតិ, ចុទ្ទសាកុសលានិមេ;

ទ្វាទសាកុសលេស្វេវ, និយមេន វវត្ថិតា.

៣៥. សទ្ធា សតិ ហិរោត្តប្បំ, អលោភាទោសមជ្ឈតា;

កាយចិត្តានំ បស្សទ្ធិ, លហុតា មុទុតា តថា.

៣៦. កម្មញ្ញតា ច បាគុញ្ញឧជុតាតិ យុគា ឆ ច;

ឯកូនវីសតិ ធម្មា, អញ្ញមញ្ញាវិយោគិនោ;

ឯកូនសដ្ឋិចិត្តេសុ, សោភនេសុ បវត្តិតា.

៣៧. សម្មាវាចា ច កម្មន្តាជីវាតិ វិរតី ឥមា;

លោកុត្តរេ សទា សព្ពា, សហ កាមសុភេ វិសុំ.

៣៨. ករុណាមុទិតា នានា, រូបេ បញ្ចមវជ្ជិតេ;

កទាចិ កាមេ កុសលេ, ក្រិយចិត្តេ សហេតុកេ.

៣៩. តិហេតុកេសុ ចិត្តេសុ, បញ្ញា សព្ពត្ថ លព្ភតិ;

ឯតេ សទ្ធាទយោ ធម្មា, បញ្ចវីសតិ សោភនា.

៤០. ឥស្សាមច្ឆេរកុក្កុច្ចវិរតីករុណាទយោ;

នានា កទាចិ មានោ ច, ថិនមិទ្ធំ តថា សហ.

៤១. សត្ត សព្ពត្ថ ជាយន្តិ, ឆ តុ ធម្មា យថារហំ;

ចុទ្ទសាកុសលេស្វេវ, សោភនេស្វេវ សោភនា.

៤២. ទ្វេបញ្ញាស បនិច្ចេវំ, ធម្មេ សង្គយ្ហ មានសេ;

លព្ភមានេ វិភាវេយ្យ, បច្ចេកម្បិ វិចក្ខណោ.

៤៣. សោភនញ្ញសមានា ច, បឋមេ វិរតី វិនា;

ទុតិយាទីសុ តក្កញ្ច, វិចារំ តតិយាទិសុ.

៤៤. ចតុត្ថាទីសុ បីតិញ្ច, ករុណាទិញ្ច បញ្ចមេ;

ហិត្វា នេវ វិយោជេយ្យ, សង្ខិបិត្វាន បញ្ចធា.

៤៥. បញ្ចតិំស ចតុត្តិំស, តេត្តិំស ច យថាក្កមំ;

ទ្វត្តិំស តិំស ឯវាថ, ជាយន្តីតិ មហគ្គតេ.

៤៦. គហេត្វា វិរតី សព្ពា, ហិត្វាន ករុណាទយោ;

បឋមេ ទុតិយាទិម្ហិ, វិតក្កាទិំ វិនា តថា.

៤៧. បញ្ចធាវ គណេយ្យេវំ, ឆត្តិំសា ច យថាក្កមំ;

បញ្ចតិំស ចតុត្តិំស, តេត្តិំសទ្វយមុត្តរេ.

៤៨. សោភនញ្ញសមានា ច, កាមេសុ កុសលេ ក្រិយេ;

ហិត្វា វិរតិយោ បាកេ, វិរតីករុណាទយោ.

៤៩. ញាណយុត្តេ សោមនស្សេ, វិយុត្តេ ញាណវជ្ជិតា;

ឧបេក្ខកេ បីតិហីនា, វិប្បយុត្តេ ទ្វយំ វិនា.

៥០. ចតុធា តិវិធេស្វេវំ, វិគណេយ្យ ទ្វយំ ទ្វយំ;

ន សន្តុបេក្ខាសហិតេ, ករុណាទីតិ កេចន.

៥១. អដ្ឋតិំស សត្តតិំសទ្វយំ ឆត្តិំសកំ សុភេ;

បញ្ចតិំស ចតុត្តិំសទ្វយំ តេត្តិំសកំ ក្រិយេ.

៥២. តេត្តិំស បាកេ ទ្វត្តិំសទ្វយេកតិំសកំ ភវេ;

សហេតុកាមាវចរបុញ្ញបាកក្រិយាមនេ.

៥៣. មោហាទយោ សមានា ច, បឋមេ លោភទិដ្ឋិយា;

តតិយេ លោភមានេន, ជាយន្តេកូនវីសតិ.

៥៤. អដ្ឋារស បីតិហីនា, បញ្ចមេ សត្តមេ តថា;

នវមេ ទោសកុក្កុច្ចមច្ឆរិស្សាហិ វីសតិ.

៥៥. បឋមាទីសុ វុត្តាវ, ទុតិយាទីសុ ជាយរេ;

ថិនមិទ្ធេនេកវីស, វីស ទ្វេវីសតិក្កមា.

៥៦. ឆន្ទបីតិំ វិនុទ្ធច្ចេ, កង្ខិតេ និច្ឆយំ វិនា;

បញ្ចទសេវ កង្ខាយ, អសុភេសុ វិភាវយេ.

៥៧. សិតេ សមានា និច្ឆន្ទា, ទ្វាទសេកាទសេវ តុ;

បីតិំ ហិត្វាន វោដ្ឋព្ពេ, វីរិយំ សុខតីរណេ.

៥៨. ទ្វយំ ហិត្វា មនោធាតុ, ឧបេក្ខាតីរណេ ទស;

សត្ត សាធារណា ឯវ, បញ្ចវិញ្ញាណសម្ភវា.

៥៩. ឥតិ ចេតសិ សម្ភូតា,

ទ្វេបញ្ញាស យថារហំ;

ញេយ្យា ចេតសិកា ធម្មា,

ចេតោភេទប្បភេទិនោ.

៦០. សុញ្ញតញ្ចានិមិត្តញ្ច, តថាបណិហិតន្តិ ច;

តិវិធាការមីរេន្តិ, និព្ពានមមតំ ពុធា.

៦១. យំ អារព្ភ បវត្តន្តំ, តត្ថានុត្តរមានសំ;

សុញ្ញតាទិវិមោក្ខោតិ, នាមមាលម្ពតោ លភេ.

៦២. សោបាទិសេសនិព្ពានធាតុ ចេវ តថាបរា;

អនុបាទិសេសា ចាតិ, ទុវិធា បរិយាយតោ.

៦៣. តទេតំ វាននិក្ខន្តមច្ចន្តំ សន្តិលក្ខណំ;

អស្សាសករណរសំ, ខេមភាវេន គយ្ហតិ.

៦៤. តំ នាមេតីតិ និព្ពានំ, នមន្តីតិ តតោបរេ;

តេបញ្ញាសាតិ នាមានិ, ចតុបញ្ញាស សព្ពថា.

៦៥. ចិត្តចេតសិកយោជនានយំ,

ចិត្តមុត្តមមិទំ បកាសិតំ;

សាធុ ចេតសិ និធាយ បណ្ឌិតា,

សាធុ សាសនធរា ភវន្តិ តេ.

៦៦. ពុទ្ធប្បវត្តមវគាហិតពោធិញាណ-

មិច្ចាភិធម្មមវគាហិតសព្ពធម្មំ;

ឱគយ្ហ នាមគតរាសិមសេសយិត្វា,

សង្គយ្ហ សព្ពមិធ យោជិតមាទរេន.

ឥតិ នាមរូបបរិច្ឆេទេ នាមត្តយវិភាគោ នាម

បឋមោ បរិច្ឆេទោ.