២២. ពាវីសតិមោ បរិច្ឆេទោ

ញាណទស្សនវិសុទ្ធិនិទ្ទេសោ

១៣១៩. ឥតោ បរំ តុ ភិក្ខុស្ស, ហោតិ គោត្រភុមានសំ;

អាវជ្ជនិយឋានត្តា, មគ្គចិត្តស្ស តំ បន.

១៣២០. ន ចប្បដិបទាញាណ-ទស្សនំ វា តថេវ ច;

ញាណទស្សនសុទ្ធិំ វា, ភជតេ ន កុទាចនំ.

១៣២១. ឧភិន្នមន្តរា ឯតំ, អព្ពោហារិកមេវ តំ;

វិបស្សនាយ សោតស្មិំ, បតិតត្តា វិបស្សនា.

១៣២២. បោថុជ្ជនិកគោត្តំ វា, អភិភុយ្យ បវត្តិតោ;

គោត្តំ វុច្ចតិ និព្ពានំ, តតោ ភវតិ គោត្រភុ.

១៣២៣. ញាណំ ចតូសុ មគ្គេសុ, ញាណទស្សនសុទ្ធិកំ;

តត្ថ តំ បឋមំ មគ្គំ, សម្បាទេតុំ បនិច្ឆតា.

១៣២៤. អញ្ញំ កិញ្ចិបិ កាតព្ពំ, ភិក្ខុនា តេន នត្ថិ តំ;

យញ្ហិ តេន ច កាតព្ពំ, សិយា តំ កតមេវ តុ.

១៣២៥. អនុលោមាវសានញ្ហិ, សូរំ តិក្ខំ វិបស្សនំ;

ឧប្បាទេន្តេន តំ សព្ពំ, កតមេវ ច យោគិនា.

១៣២៦. តស្សានុលោមញាណស្ស, អន្តេ តុ អនិមិត្តកំ;

វិសង្ខារំ និរោធញ្ច, និព្ពានំ អមតំ បទំ.

១៣២៧. គោចរំ កុរុមានំ តំ, និព្ពានារម្មណេ បន;

បឋមាវជ្ជនញ្ចេវ, បឋមាភោគតាបិ ច.

១៣២៨. មគ្គស្សានន្តរាទីហិ, បច្ចយេហិ បនច្ឆហិ;

តស្ស បច្ចយភាវញ្ច, សាធយន្តំ តតោ បន.

១៣២៩. វិបស្សនាយ មុទ្ធញ្ហិ, សិខាបត្តាយ តាយ តំ;

ឧប្បជ្ជតិ អនាវត្តំ-រម្មណំ តស្ស គោត្រភុ.

១៣៣០. ឯកេនាវជ្ជនេនេវ, ឯកិស្សាយេវ វីថិយា;

នានារម្មណតា ចានុ-លោមគោត្រភុចេតសំ.

១៣៣១. ឋត្វា អាវជ្ជនដ្ឋានេ, តមនាវជ្ជនម្បិ ច;

មគ្គស្ស បន តំ សញ្ញំ, ទត្វា វិយ និរុជ្ឈតិ.

១៣៣២. មគ្គោបិ តេន តំ ទិន្នំ, អមុញ្ចិត្វាវ សញ្ហិតំ;

តំ ញាណមនុពន្ធន្តោ, ជាយតេ តទនន្តរំ.

១៣៣៣. កទាចិបិ អនិព្ពិទ្ធបុព្ពំ មគ្គោ បនេស ហិ;

លោភំ ទោសញ្ច មោហញ្ច, វិទ្ធំសន្តោវ ជាយតិ.

១៣៣៤. ន កេវលមយំ មគ្គោ, ទោសនាសនមេវ ច;

ករោតិ អថ ខោបាយទ្វារានិបិ បិធេតិ ច.

១៣៣៥. អនាមតគ្គសំសារវដ្ដទុក្ខមហោទធិំ;

អបារមតិឃោរញ្ច, សោសេតិ ច អសេសតោ.

១៣៣៦. មិច្ឆាមគ្គំ បនដ្ឋង្គំ, ជាយមានោ ច ឧជ្ឈតិ;

សព្ពវេរភយានេត្ថ, និច្ចំ វូបសមេតិ ច.

១៣៣៧. ពុទ្ធស្សោរសបុត្តត្តំ, ឧបនេតិ នយំ បន;

អានិសំសេ អនេកេបិ, បវត្តយតិ យោគិនោ.

១៣៣៨. ទាយកេនានិសំសានំ, អនេកេសមនេន ច;

អាទិមគ្គេន សំយុត្តំ, ញាណន្តិ ញាណទស្សនំ.

បឋមមគ្គញាណំ.

១៣៣៩. តស្សេវានន្តរំ តស្ស, វិបាកា ទ្វេបិ តីណិ វា;

ផលចិត្តានិ ជាយន្តេ, ន ជាយន្តេ តតោ បរំ.

១៣៤០. កេចិ ឯកញ្ច ទ្វេ តីណិ, ចត្តារីតិ វទន្តិ តុ;

ន បនេតំ គហេតព្ពំ, អជានិត្វា វទន្តិ តេ.

១៣៤១. ឯកស្សាសេវនំ នត្ថិ, តស្មា ទ្វេ អនុលោមកា;

តេហិ អាសេវនំ លទ្ធា, តតិយំ ហោតិ គោត្រភុ.

១៣៤២. ចតុត្ថំ មគ្គចិត្តំ តុ,

តស្មា តីណិ ផលានិ ហិ;

អនុលោមា តយោ ហោន្តិ,

ចតុត្ថំ ហោតិ គោត្រភុ.

១៣៤៣. បញ្ចមំ មគ្គចិត្តញ្ច, ផលានិ ទ្វេ តតោ បន;

សត្តចិត្តបរមាវ, ឯកាវជ្ជនវីថិ ហិ.

១៣៤៤. ឯត្តាវតា បនេសោ ហិ, សោតាបន្នោតិ វុច្ចតិ;

ផលស្ស បរិយោសានេ, ភវង្គោត្តរណំ សិយា.

១៣៤៥. តតោ ភវង្គំ ឆិន្ទិត្វា, មគ្គបេក្ខនហេតុកំ;

ឧប្បជ្ជតិ មនោទ្វារេ, អាវជ្ជនមនោ បន.

១៣៤៦. តស្មិំ និរុទ្ធេ មគ្គស្ស, បច្ចវេក្ខណសញ្ញិតា;

ជវនានិ ហិ ជាយន្តេ, សត្តេវ បដិបាដិយា.

១៣៤៧. ឯសេវ ច នយោ ញេយ្យោ, ផលាទីនម្បិ បេក្ខនេ;

បច្ចវេក្ខណញាណានិ, ភវន្តេកូនវីសតិ.

១៣៤៨. មគ្គោ ផលំ បហីនា ច, កិលេសា អវសិដ្ឋកា;

និព្ពានញ្ចេតិ បញ្ចេតេ, បច្ចវេក្ខណភូមិយោ.

១៣៤៩. ឯវំ សោ បច្ចវេក្ខិត្វា, សោតាបន្នោបបត្តិយា;

យោគមារភតេ ធីរោ, ទុតិយាយ ច ភូមិយា.

១៣៥០. ខន្ធបញ្ចកសង្ខាតំ, តំ សង្ខារគតំ បុន;

អនិច្ចំ ទុក្ខមនត្តាតិ, ញាណេន បរិមជ្ជតិ.

១៣៥១. តតោ វិបស្សនាវីថិ-មោគាហតិ ច តាវទេ;

តស្សេវំ បដិបន្នស្ស, ហេដ្ឋា វុត្តនយេន តុ.

១៣៥២. តតោ សង្ខារុបេក្ខាយ, អវសានេ តថេវ ច;

ឯកាវជ្ជនវារស្មិំ, គោត្រភុស្ស អនន្តរំ.

១៣៥៣. ព្យាបាទកាមរាគានំ, តនុភាវំ តុ សាធយំ;

សកទាគាមិមគ្គោយំ, ជាយតេ ទុតិយោ បន.

ទុតិយមគ្គញាណំ.

១៣៥៤. ឥមស្សាបិ ច ញាណស្ស, ហេដ្ឋា វុត្តនយេនិធ;

ផលចិត្តានិ ញេយ្យានិ, វិញ្ញុនា ទ្វេបិ តីណិ វា.

១៣៥៥. ឯត្តាវតា បនេសោ ហិ, សកទាគាមិ នាមយំ;

សកិទេវ ឥមំ លោកំ, អាគន្ត្វាន្តករោ ភវេ.

១៣៥៦. ហេដ្ឋា វុត្តនយេនេវ, បញ្ចធា បច្ចវេក្ខណំ;

ឯវំ សោ បច្ចវេក្ខិត្វា, សកទាគាមិបត្តិយា.

១៣៥៧. យោគមារភតេ ធីរោ, តតិយាយ ច ភូមិយា;

ព្យាបាទកាមរាគានំ, បហានាយ ច បណ្ឌិតោ.

១៣៥៨. ខន្ធបញ្ចកសង្ខាតំ, តំ សង្ខារគតំ បន;

អនិច្ចំ ទុក្ខមនត្តាតិ, ញាណេន បរិមជ្ជតិ.

១៣៥៩. តតោ វិបស្សនាវីថិ-មោគាហតិ ច តាវទេ;

តស្សេវំ បដិបន្នស្ស, ហេដ្ឋា វុត្តនយេន តុ.

១៣៦០. តតោ សង្ខារុបេក្ខាយ, អវសានេ តថេវ ច;

ឯកាវជ្ជនវីថិម្ហិ, គោត្រភុស្ស អនន្តរំ.

១៣៦១. ព្យាបាទកាមរាគានំ, មូលឃាតំ តុ សាធយំ;

តស្សានាគាមិមគ្គោយំ, ជាយតេ តតិយោ បន.

តតិយមគ្គញាណំ.

១៣៦២. ឥមស្សាបិ ច ញាណស្ស, ហេដ្ឋា វុត្តនយេនិធ;

បវត្តិ ផលចិត្តានំ, វេទិតព្ពា វិភាវិនា.

១៣៦៣. ឯត្តាវតា បនេសោបិ, ហោតិនាគាមិ នាមយំ;

តត្ថេវ បរិនិព្ពាយី, អនាវត្តិសភាវតោ.

១៣៦៤. ហេដ្ឋា វុត្តនយេនេវ, បញ្ចធា បច្ចវេក្ខណំ;

ឯវំ សោ បច្ចវេក្ខិត្វា, អនាគាមិរិយសាវកោ.

១៣៦៥. យោគមារភតេ ធីរោ, ចតុត្ថាយ ច ភូមិយា;

បត្តិយារូបរាគាទិ-បហានាយ ច បណ្ឌិតោ.

១៣៦៦. តថេវ សង្ខារគតំ, អនិច្ចាទិវសេន សោ;

បរិវត្តតិ ញាណេន, តថេវ បរិមជ្ជតិ.

១៣៦៧. តតោ វិបស្សនាវីថិ-មោគាហតិ ច តាវទេ;

តស្សេវំ បដិបន្នស្ស, ហេដ្ឋា វុត្តនយេន តុ.

១៣៦៨. តតោ សង្ខារុបេក្ខាយ, អវសានេ តថេវ ច;

ឯកាវជ្ជនវារស្មិំ, គោត្រភុស្ស អនន្តរំ.

១៣៦៩. តស្សារហត្តមគ្គោយំ,

ជាយតេ តុ តតោ បរំ;

រូបរាគាទិទោសានំ,

វិទ្ធំសាយ ករោ បន.

ចតុត្ថមគ្គញាណំ.

១៣៧០. ឥមស្សាបិ ច ញាណស្ស, ហេដ្ឋា វុត្តនយេនិធ;

បវត្តិ ផលចិត្តានំ, វេទិតព្ពា វិភាវិនា.

១៣៧១. ឯត្តាវតា បនេសោ ហិ,

អរហា នាម អដ្ឋមោ;

អរិយោ បុគ្គលោ ហោតិ,

មហាខីណាសវោ អយំ.

១៣៧២. អនុប្បត្តសទត្ថោ ច,

ខីណសំយោជនោ មុនិ;

សទេវកស្ស លោកស្ស,

ទក្ខិណេយ្យោ អនុត្តរោ.

១៣៧៣. ឯត្តាវតា ចតស្សោបិ, ញាណទស្សនសុទ្ធិយោ;

ហិតត្ថាយ ច ភិក្ខូនំ, សង្ខេបេនេវ ទស្សិតា.

១៣៧៤. សទ្ធេន សម្មា បន ភាវនីយា,

អរិយាយ បញ្ញាយ ច ភាវនាយ;

វិសុទ្ធិកាមេន តបោធនេន,

ភវក្ខយំ បត្ថយតា ពុធេន.

ឥតិ អភិធម្មាវតារេ ញាណទស្សនវិសុទ្ធិនិទ្ទេសោ នាម

ពាវីសតិមោ បរិច្ឆេទោ.