២១. ឯកវីសតិមោ បរិច្ឆេទោ

១២៩៨. អដ្ឋញាណវសេនេវ, សិខាបក្កា វិបស្សនា;

នវមំ បដិបទាញាណ-ទស្សនន្តិ បវុច្ចតិ.

១២៩៩. អដ្ឋ ញាណានិ នាមេត្ថ, វេទិតព្ពានិ វិញ្ញុនា;

ឧបក្លេសវិនិមុត្តំ, ញាណំ សុវិសទំ បន.

១៣០០. ឧទយព្ពយេ ច ភង្គេ ច, ភយេ អាទីនវេ តថា;

និព្ពិទាបស្សនាញាណំ, ញាណំ មុច្ចិតុកម្យតា.

១៣០១. បដិសង្ខា ច សង្ខារេ, ឧបេក្ខាញាណមដ្ឋមំ;

ឥមានិ អដ្ឋ ញាណានិ, នវមំ សច្ចានុលោមកំ.

១៣០២. សច្ចានុលោមញាណន្តិ, អនុលោមំ បវុច្ចតិ;

តំ សម្បាទេតុកាមេន, យោគាវចរភិក្ខុនា.

១៣០៣. ឧទយព្ពយញាណំ តំ, អាទិំ កត្វា បនដ្ឋសុ;

ឯតេសុ បន ញាណេសុ, យោគោ ករណិយោ បន.

១៣០៤. យថានុក្កមតោ តស្ស, តេសុ ញាណេសុ អដ្ឋសុ;

អនិច្ចាទិវសេនេវ, យោគំ កត្វា ឋិតស្ស ហិ.

១៣០៥. អនិច្ចំ ទុក្ខមនត្តាតិ, សង្ខារេ អនុបស្សតោ;

អដ្ឋន្នំ បន ញាណានំ, វសេន បន យោគិនោ.

១៣០៦. វិបស្សនា សិខាបត្តា, ហោតិ វុដ្ឋានគាមិនី;

សច្ចានុលោមញាណន្តិ, អយមេវ បវុច្ចតិ.

១៣០៧. សង្ខារុបេក្ខាញាណំ តំ, អាសេវន្តស្ស យោគិនោ;

ឥទានិ តស្ស មគ្គោ ច, សមុប្បជ្ជិស្សតីតិ ហិ.

១៣០៨. សង្ខារុបេក្ខា សង្ខារេ, អនិច្ចា ទុក្ខាតិ វា តថា;

សម្មសិត្វា ភវង្គំ តុ, បុន វោតរតេវ សា.

១៣០៩. ភវង្គានន្តរំ សង្ខារុ-បេក្ខាគតនយេន តុ;

អនិច្ចាទិវសេនេវ, សង្ខារេ បន គោចរំ.

១៣១០. កុរុមានំ មនោទ្វារេ, ជាយតាវជ្ជនំ តតោ;

ភវង្គាវដ្ដនំ កត្វា, ជាតស្សានន្តរំ បន.

១៣១១. សង្ខារេ គោចរំ កត្វា, បឋមំ ជវនមានសំ;

ឧប្បជ្ជតីតិ តំ ចិត្តំ, បរិកម្មន្តិ វុច្ចតិ.

១៣១២. តទនន្តរមេវញ្ញំ, សង្ខារារម្មណំ បុន;

ទុតិយំ ជវនំ ហោតិ, ឧបចារន្តិ តំ មតំ.

១៣១៣. តទនន្តរំ តំ ហោតិ, តថា សង្ខារគោចរំ;

តតិយំ ជវនចិត្តំ, អនុលោមន្តិ សញ្ញិតំ.

១៣១៤. បុរិមានំ បនដ្ឋន្នំ, ញាណានំ អនុលោមតោ;

ពោធិបក្ខិយធម្មានំ, ឧទ្ធញ្ច អនុលោមតោ.

១៣១៥. តេនេវ តំ ហិ សច្ចានុលោមញាណំ បវុច្ចតិ;

ឥទំ ហិ បន សច្ចានុ-លោមញាណំ មហេសិនា.

១៣១៦. ‘‘វុដ្ឋានគាមិនីយា ហិ, បរិយោសាន’’ន្តិ ភាសិតំ;

ញេយ្យំ សព្ពបការេន, បរិយោសានន្តិ គោត្រភុ.

១៣១៧. ឥតិនេកេហិ នាមេហិ, កិត្តិតាយា មហេសិនា;

វុដ្ឋានគាមិនី សន្តា, បរិសុទ្ធា វិបស្សនា.

១៣១៨. វុដ្ឋាតុកាមោ សំសារទុក្ខបង្កា មហព្ភយា;

ករេយ្យ សតតំ តត្ថ, យោគំ បណ្ឌិតជាតិកោ.

ឥតិ អភិធម្មាវតារេ បដិបទាញាណទស្សនវិសុទ្ធិនិទ្ទេសោ នាម

ឯកវីសតិមោ បរិច្ឆេទោ.