២០. វីសតិមោ បរិច្ឆេទោ

មគ្គាមគ្គញាណទស្សនវិសុទ្ធិនិទ្ទេសោ

១២៦៣. កលាបសម្មសនេនេវ,

យោគោ ករណិយោ សិយា;

មគ្គាមគ្គេ តុ ញាណំ ត-

មធិគន្តុំ បនិច្ឆតា.

១២៦៤. បច្ចុប្បន្នស្ស ធម្មស្ស, និព្ពត្តិ ឧទយោ មតោ;

វយោ វិបរិណាមោតិ, តស្សេវ សមុទីរិតា.

១២៦៥. អនុបស្សនាបិ ញាណន្តិ, វរញាណេន ទេសិតំ;

សោ បនេវំ បជានាតិ, យោគាវចរមាណវោ.

១២៦៦. ឥមស្ស នាមរូបស្ស, បុព្ពេ ឧប្បត្តិតោ បន;

និចយោ រាសិ វា នត្ថិ, តថា ឧប្បជ្ជតោបិ ច.

១២៦៧. រាសិតោ និចយា វាបិ, នត្ថិ អាគមនន្តិ ច;

តថា និរុជ្ឈមានស្ស, ន ទិសាគមនន្តិ ច.

១២៦៨. និរុទ្ធស្សាបិ ឯកស្មិំ, ឋានេ នត្ថិ ចយោតិ ច;

ឯត្ថ វីណូបមា វុត្តា, ឯតស្សត្ថស្ស ទីបនេ.

១២៦៩. ឧទព្ពយមនក្ការមេវំ សង្ខេបតោ បន;

កត្វា តស្សេវ ញាណស្ស, វិភង្គស្ស វសេន តុ.

១២៧០. ‘‘អវិជ្ជាសមុទយា រូបសមុទយោ’’តិ ហិ អាទិនា;

នយេនេកេកខន្ធស្ស, ឧទយព្ពយទស្សនេ.

១២៧១. ទស ទសាតិ កត្វាន, វុត្តា បញ្ញាសលក្ខណា;

តេសំ បន វសេនាបិ, ធម្មេ សមនុបស្សតិ.

១២៧២. ឯវំ រូបុទយោ ហោតិ, ឯវមស្ស វយោ ឥតិ;

ឧទេតិ ឯវំ រូបម្បិ, ឯវំ រូបំ តុ វេតិ ច.

១២៧៣. ឯវំ បច្ចយតោបេត្ថ, ខណតោ ឧទយព្ពយំ;

បស្សតោ សព្ពធម្មា ច, បាកដា ហោន្តិ តស្ស តេ.

១២៧៤. ឧទកេ ទណ្ឌរាជីវ, អារគ្គេរិវ សាសបោ;

វិជ្ជុប្បាទាវ ធម្មា តេ, បរិត្តដ្ឋាយិនោ សិយុំ.

១២៧៥. កទលីសុបិនាលាតចក្កមាយុបមា ឥមេ;

អសារា បន និស្សារា, ហុត្វា ខាយន្តិ យោគិនោ.

១២៧៦. ឯវមេត្តាវតា តេន, ឧទយព្ពយទស្សនំ;

លក្ខណានិ ច បញ្ញាស, បដិវិជ្ឈ ឋិតំ បន.

១២៧៧. ញាណំ អធិគតំ ហោតិ, តរុណំ បឋមំ បន;

យស្ស ចាធិគមា យោគី, ហោតារទ្ធវិបស្សកោ.

១២៧៨. វិបស្សនាយ ហេតាយ,

ករុណាយាថ យោគិនោ;

វិបស្សកស្ស ជាយន្តេ,

ឧបក្លេសា ទសេវិមេ.

១២៧៩. ឱភាសោ បីតិ បស្សទ្ធិ, ញាណំ សទ្ធា សតី សុខំ;

ឧបេក្ខា វីរិយំ និកន្តីតិ, ឧបក្លេសា ទសេវិមេ.

១២៨០. សម្បត្តបដិវេធស្ស, សោតាបន្នាទិនោបិ ច;

តថា វិប្បដិបន្នស្ស, ឧបក្លេសា ន ជាយរេ.

១២៨១. សម្មាវ បដិបន្នស្ស, យុត្តយោគស្ស ភិក្ខុនោ;

សទា វិបស្សកស្សេវ, ឧប្បជ្ជន្តិ កិរស្សុ តេ.

១២៨២. វិបស្សនាយ ឱភាសោ, ឱភាសោតិ បវុច្ចតិ;

តស្មិំ បន សមុប្បន្នេ, យោគាវចរភិក្ខុ សោ.

១២៨៣. មគ្គប្បត្តោ ផលប្បត្តោ, អហមស្មីតិ គណ្ហតិ;

អមគ្គំយេវ មគ្គោតិ, តស្សេវំ បន គណ្ហតោ.

១២៨៤. ឯវំ វិបស្សនាវីថិ,

ឱក្កន្តា នាម ហោតិ សា;

ឱភាសមេវ សោ ភិក្ខុ,

អស្សាទេន្តោ និសីទតិ.

១២៨៥. បីតិ វិប្បស្សនាបីតិ, តស្ស តស្មិំ ខណេ បន;

តទា បញ្ចវិធា បីតិ, ជាយន្តេ ខុទ្ទិកាទិកា.

១២៨៦. វិបស្សនាយ បស្សទ្ធិ, បស្សទ្ធីតិ បវុច្ចតិ;

យោគិនោ កាយចិត្តានិ, បស្សទ្ធានេវ ហោន្តិ ហិ.

១២៨៧. លហូនិ ច មុទូនេវ, កម្មញ្ញានេវ ហោន្តិ ហិ;

បស្សទ្ធាទីហិ សោ ភិក្ខុ, អនុគ្គហិតមានសោ.

១២៨៨. អមានុសិំ រតិំ នាម,

អនុភោតិ អនុត្តរំ;

យំ សន្ធាយ ច គាថាយោ,

ភាសិតា ហិ មហេសិនា.

១២៨៩. ‘‘សុញ្ញាគារំ បវិដ្ឋស្ស, សន្តចិត្តស្ស ភិក្ខុនោ;

អមានុសី រតិ ហោតិ, សម្មា ធម្មំ វិបស្សតោ.

១២៩០. ‘‘យតោ យតោ សម្មសតិ, ខន្ធានំ ឧទយព្ពយំ;

លភតី បីតិបាមោជ្ជំ, អមតំ តំ វិជានត’’ន្តិ.

១២៩១. ញាណាទយោ ឧបក្លេសា, ញេយ្យា វុត្តនយេនិធ;

ឯតេ ទស ឧបក្លេសា, វជ្ជនីយាវ យោគិនា.

១២៩២. ឯត្ថោភាសាទយោ ធម្មា,

ឧបក្លេសស្ស វត្ថុតោ;

ឧបក្លេសាតិ និទ្ទិដ្ឋា,

ឧបក្លេសនិកន្តិ តុ.

១២៩៣. តំ តមាវជ្ជមានស្ស, ភាវនា បរិហាយតិ;

អសត្តេ សត្តសញ្ញី ច, ហោតិ អប្បស្សុតោ នរោ.

១២៩៤. សព្ពោភាសាទយោ ធម្មេ, ន មគ្គោតិ វិចារយំ;

មគ្គោ វិបស្សនាញាណំ, ឥច្ចេវំ បន បណ្ឌិតោ.

១២៩៥. វវត្ថបេតិ មគ្គញ្ច, អមគ្គញ្ចេវ ចេតសា;

តស្ស ចេវំ អយំ មគ្គោ, នាយំ មគ្គោតិ យោគិនោ.

១២៩៦. មគ្គាមគ្គញ្ច វិញ្ញាយ, ឋិតញាណមិទំ បន;

មគ្គាមគ្គេសុញាណន្តិ, ភូរិញាណេន ទេសិតំ.

១២៩៧. មគ្គាមគ្គញាណទស្សនេសុ កោវិទា,

សារាសារវេទិនោ សមាហិតាហិតា;

មគ្គាមគ្គញាណទស្សនន្តិ តំ ឥទំ,

ពុទ្ធា ពុទ្ធសាវកា វទន្តិ វាទិនោ.

ឥតិ អភិធម្មាវតារេ មគ្គាមគ្គញាណទស្សនវិសុទ្ធិនិទ្ទេសោ

នាម វីសតិមោ បរិច្ឆេទោ.