១៨. អដ្ឋារសមោ បរិច្ឆេទោ

ទិដ្ឋិវិសុទ្ធិនិទ្ទេសោ

១១៧០. សមាធិំ បន សាភិញ្ញំ, ភាវេត្វា តទនន្តរំ;

ភាវេតព្ពា យតោ បញ្ញា, ភិក្ខុនា តេន ធីមតា.

១១៧១. តតោហំ ទានិ វក្ខាមិ, បញ្ញាភាវនមុត្តមំ;

សមាសេនេវ ភិក្ខូនំ, បរំ បីតិសុខាវហំ.

១១៧២. កា បញ្ញា បន កោ ចត្ថោ,

កិមស្សា លក្ខណាទិកំ;

កតិធា សា កថំ តេន,

ភាវេតព្ពាតិ វុច្ចតេ. –

១១៧៣. បញ្ញា វិបស្សនាបញ្ញា, បុញ្ញចិត្តសមាយុតា;

បជានាតីតិ បញ្ញា សា, ជាននា វា បការតោ.

១១៧៤. សញ្ញាវិញ្ញាណបញ្ញានំ, កោ វិសេសោ កិមន្តរំ;

សញ្ញាវិញ្ញាណបញ្ញានំ, ជាននត្តេ សមេបិ ច.

១១៧៥. យា សញ្ជាននមត្តំវ, សញ្ញា នីលាទិតោ បន;

លក្ខណប្បដិវេធំ តុ, កាតុំ សក្កោតិ នេវ សា.

១១៧៦. វិញ្ញាណំ បន ជានាតិ, នីលបីតាទិគោចរំ;

សក្កោតិបិ អនិច្ចាទិលក្ខណំ បដិវិជ្ឈិតុំ.

១១៧៧. ឧស្សក្កិត្វា ន សក្កោតិ, មគ្គំ បាបេតុមេវ តំ;

បញ្ញា វុត្តនយំ កាតុំ, សក្កោតិ តិវិធម្បិ តំ.

១១៧៨. ឥមេសំ បន តិណ្ណម្បិ, វិសេសោ សមុទីរិតោ;

សព្ពេសំ បន ធម្មានំ, សភាវបដិវេធនំ.

១១៧៩. លក្ខណំ បន បញ្ញាយ, លក្ខណញ្ញូហិ ទីបិតំ;

សម្មោហនន្ធការស្ស, វិទ្ធំសនរសា មតា.

១១៨០. អសម្មោហបច្ចុបដ្ឋានា, សមាធាសន្នការណា;

ឯវមេត្ថ ច វិញ្ញេយ្យា, បញ្ញាយ លក្ខណាទិកា.

កតិធាតិ ឯត្ថ –

១១៨១. លក្ខណេនេកធា វុត្តា,

លោកិកាលោកិកា ទ្វិធា;

លោកិយេនេត្ថ មគ្គេន,

យុត្តា សា លោកិកា សិយា.

១១៨២. លោកុត្តរេន មគ្គេន, យុត្តា លោកុត្តរា មតា;

តិវិធាបិ សិយា បញ្ញា, ចិន្តាសុតមយាទិតោ.

១១៨៣. តត្ថត្តនោវ ចិន្តាយ, និប្ផន្នត្តាតិ តស្ស សា;

ហោតិ ចិន្តាមយា បញ្ញា, ភូរិបញ្ញេន ទេសិតា.

១១៨៤. បរតោ បន សុត្វាន, លទ្ធា បញ្ញា អយំ ឥធ;

សុតេនេវ ច និប្ផន្នា, បញ្ញា សុតមយា មតា.

១១៨៥. យថា វាបិ តថា ចេត្ថ, ភាវនាយ វសេន តុ;

និប្ផន្នា អប្បនាបត្តា, បញ្ញា សា ភាវនាមយា.

១១៨៦. បដិសម្ភិទាចតុក្កស្ស, វសេន ចតុធា សិយា;

អត្ថធម្មនិរុត្តីសុ, ញាណំ ញាណេសុ តីសុបិ.

១១៨៧. យំ កិញ្ចិ បច្ចយុប្បន្នំ, វិបាកា ច ក្រិយា តថា;

និព្ពានំ ភាសិតត្ថោ ច, បញ្ចេតេ អត្ថសញ្ញិតា.

១១៨៨. ផលនិព្ពត្តកោ ហេតុ, អរិយមគ្គោ ច ភាសិតំ;

កុសលាកុសលញ្ចេតិ, បញ្ចេតេ ធម្មសញ្ញិតា.

១១៨៩. តស្មិំ អត្ថេ ច ធម្មេ ច, យា សភាវនិរុត្តិ តុ;

និរុត្តីតិ ច និទ្ទិដ្ឋា, និរុត្តិកុសលេន សា.

១១៩០. ញាណំ អារម្មណំ កត្វា, តិវិធំ បច្ចវេក្ខតោ;

តេសុ ញាណេសុ យំ ញាណំ, បដិភានន្តិ តំ មតំ.

១១៩១. បរិយត្តិបរិបុច្ឆាហិ, សវនាធិគមេហិ ច;

បុព្ពយោគេន គច្ឆន្តិ, បភេទំ បដិសម្ភិទា.

កថំ ភាវេតព្ពាតិ ឯត្ថ –

១១៩២. ខន្ធាទីសុ ហិ ធម្មេសុ, ភូមិភូតេសុ យោគិនា;

ឧគ្គហាទិវសេនេត្ថ, កត្វា បរិចយំ បន.

១១៩៣. សីលំ ចិត្តវិសុទ្ធិញ្ច, សម្បាទេត្វា តតោ បរំ;

ទិដ្ឋិសុទ្ធាទយោ បញ្ច, សម្បាទេន្តេន សុទ្ធិយា.

១១៩៤. តាយ បញ្ញាយ យុត្តេន, ភីតេន ជននាទិតោ;

ភាវេតព្ពា ភវាភាវំ, បត្ថយន្តេន ភិក្ខុនា.

១១៩៥. រូបញ្ច វេទនា សញ្ញា, សង្ខារា ចេវ សព្ពសោ;

វិញ្ញាណញ្ចេតិ បញ្ចេតេ, ខន្ធា សម្ពុទ្ធទេសិតា.

១១៩៦. តត្ថ យំ កិញ្ចិ រូបំ តំ, អតីតានាគតាទិកំ;

អជ្ឈត្តំ វា ពហិទ្ធា វា, សុខុមោឡារិកម្បិ វា.

១១៩៧. ហីនំ វាបិ បណីតំ វា, យំ ទូរេ យញ្ច សន្តិកេ;

សព្ពំ តមេកតោ កត្វា, រូបក្ខន្ធោតិ វុច្ចតិ.

១១៩៨. ឥតរេសុបិ យំ កិញ្ចិ, តំ វេទយិតលក្ខណំ;

សព្ពំ តមេកតោ កត្វា, វេទនាក្ខន្ធតា កតា.

១១៩៩. ចិត្តជំ បន យំ កិញ្ចិ, តំ សញ្ជាននលក្ខណំ;

សព្ពំ តមេកតោ កត្វា, សញ្ញាក្ខន្ធោតិ វុច្ចតិ.

១២០០. យំ កិញ្ចិ ចិត្តសម្ភូតំ, អភិសង្ខារលក្ខណំ;

សព្ពំ តមេកតោ កត្វា, សង្ខារក្ខន្ធតា កតា.

១២០១. តត្ថ ចិត្តំ តុ យំ កិញ្ចិ, តំ វិជាននលក្ខណំ;

សព្ពំ តមេកតោ កត្វា, វិញ្ញាណក្ខន្ធតា កតា.

១២០២. ចត្តារោ ច មហាភូតា, ឧបាទា ចតុវីសតិ;

អដ្ឋវីសតិធា ចេតំ, រូបំ រូបន្តិ គណ្ហតិ.

១២០៣. ឯកាសីតិយា ចិត្តេន, សំយុត្តា វេទនាទយោ;

វេទនាសញ្ញាសង្ខារ-វិញ្ញាណក្ខន្ធសញ្ញិតា.

១២០៤. ចត្តារោរូបិនោ ខន្ធេ, នាមន្តិ បរិគណ្ហតិ;

រូបក្ខន្ធោ ភវេ រូបំ, នាមក្ខន្ធា អរូបិនោ.

១២០៥. រុប្បនលក្ខណំ រូបំ, នាមំ នមនលក្ខណំ;

ឥតិ សង្ខេបតោ នាម-រូបំ សោ បរិគណ្ហតិ.

១២០៦. ផាលេន្តោ វិយ តាលស្ស, កន្ទំ តុ យមកំ ទ្វិធា;

វវត្ថបេតិ នាមញ្ច, រូបញ្ចាតិ ទ្វិធា បន.

១២០៧. នាមតោ រូបតោ អញ្ញោ,

សត្តោ វា បុគ្គលោបិ វា;

អត្តា វា កោចិ នត្ថីតិ,

និដ្ឋំ គច្ឆតិ សព្ពទា.

១២០៨. ឯវំ វវត្ថបេត្វា សោ, នាមរូបំ សភាវតោ;

សត្តសម្មោហឃាតត្ថំ, ពហុសុត្តវសេនិធ.

១២០៩. នាមរូបមត្តញ្ញេវ, នត្ថិ កោចិធ បុគ្គលោ;

ឯវមេត្ថ បណ្ឌិតោ បោសោ, វវត្ថបេតិ តំ បន.

វុត្តំ ហេតំ –

១២១០. ‘‘យថាបិ អង្គសម្ភារា,

ហោតិ សទ្ទោ រថោ ឥតិ;

ឯវំ ខន្ធេសុ សន្តេសុ,

ហោតិ សត្តោតិ សម្មុតី’’តិ.

១២១១. យថាបិ ទារុយន្តម្បិ, និជ្ជីវញ្ច និរីហកំ;

ទារុរជ្ជុសមាយោគេ, តំ គច្ឆតិបិ តិដ្ឋតិ.

១២១២. តថេទំ នាមរូបម្បិ, និជ្ជីវញ្ច និរីហកំ;

អញ្ញមញ្ញសមាយោគេ, តំ គច្ឆតិបិ តិដ្ឋតិ.

តេនាហុ បោរាណា –

១២១៣. ‘‘នាមញ្ច រូបញ្ច ឥធត្ថិ សច្ចតោ,

ន ហេត្ថ សត្តោ មនុជោ ច វិជ្ជតិ;

សុញ្ញំ ឥទំ យន្តមិវាភិសង្ខតំ,

ទុក្ខស្ស បុញ្ជោ តិណកដ្ឋសាទិសោ’’តិ.

១២១៤. អញ្ញមញ្ញូបនិស្សាយ, ទណ្ឌកេសុ ឋិតេសុ ហិ;

ឯកស្មិំ បតមានេ តុ, តថេវ បតតីតរោ.

តេនាហុ បោរាណា –

១២១៥. ‘‘យមកំ នាមរូបញ្ច, ឧភោ អញ្ញោញ្ញនិស្សិតា;

ឯកស្មិំ ភិជ្ជមានស្មិំ, ឧភោ ភិជ្ជន្តិ បច្ចយា’’តិ.

១២១៦. ឧតិន្នំ នាមរូបានំ, នាមំ និត្តេជមេត្ថ តំ;

សកេនេវ ហិ តេជេន, ន សក្កោតិ បវត្តិតុំ.

១២១៧. ន ព្យាហរតិ នោ សេតិ, ន តិដ្ឋតិ ន គច្ឆតិ;

ន ភេទេតិ ន ចោរេតិ, ន ភុញ្ជតិ ន ខាទតិ.

១២១៨. តថា រូបម្បិ និត្តេជំ, វិនា នាមញ្ច សព្ពថា;

សកេនេវ ហិ តេជេន, ន សក្កោតិ បវត្តិតុំ.

១២១៩. ភុញ្ជាមីតិ បិវាមីតិ, ខាទាមីតិ តថេវ ច;

រោទាមីតិ ហសាមីតិ, រូបស្សេតំ ន វិជ្ជតិ.

១២២០. នាមំ និស្សាយ រូបំ តុ, រូបំ និស្សាយ នាមកំ;

បវត្តតិ សទា សព្ពំ, បញ្ចវោការភូមិយំ.

១២២១. ឥមស្ស បន អត្ថស្ស, អាវិភាវត្ថមេវ ច;

ជច្ចន្ធបីឋសប្បីនំ, វត្តព្ពា ឧបមា ឥធ.

១២២២. យថា ហិ នាវំ និស្សាយ, មនុស្សា យន្តិ អណ្ណវេ;

ឯវំ រូបម្បិ និស្សាយ, នាមកាយោ បវត្តតិ.

១២២៣. យថា មនុស្សេ និស្សាយ, នាវា គច្ឆតិ អណ្ណវេ;

ឯវំ នាមម្បិ និស្សាយ, រូបកាយោ បវត្តតិ.

១២២៤. សត្តសញ្ញំ វិនោទេត្វា, នាមរូបស្ស សព្ពថា;

យាថាវទស្សនំ ឯតំ, ‘‘ទិដ្ឋិសុទ្ធី’’តិ វុច្ចតិ.

១២២៥. បរិមុច្ចិតុកាមោ ច, ទុក្ខតោ ជាតិអាទិតោ;

អន្តទ្វយំ វិវជ្ជេត្វា, ភាវយេ បន បណ្ឌិតោ.

១២២៦. ទិដ្ឋិវិសុទ្ធិមិមំ បរិសុទ្ធំ,

សុដ្ឋុតរំ តុ ករោតិ នរោ យោ;

ទិដ្ឋិគតានិ មលានិ អសេសំ,

នាសមុបេន្តិ ហិ តស្ស នរស្ស.

ឥតិ អភិធម្មាវតារេ ទិដ្ឋិវិសុទ្ធិនិទ្ទេសោ នាម

អដ្ឋារសមោ បរិច្ឆេទោ.