១៧. សត្តរសមោ បរិច្ឆេទោ

អភិញ្ញារម្មណនិទ្ទេសោ

១១០៤. អនាគតំសញាណញ្ច, យថាកម្មុបគម្បិ ច;

បញ្ច ឥទ្ធិវិធាទីនិ, សត្តាភិញ្ញា ឥមា បន.

១១០៥. ឯតាសំ បន សត្តន្នំ, អភិញ្ញានមិតោ បរំ;

បវក្ខាមិ សមាសេន, អារម្មណវិនិច្ឆយំ.

១១០៦. អារម្មណត្តិកា វុត្តា, យេ ចត្តារោ មហេសិនា;

សត្តន្នមេត្ថ ញាណានំ, សម្បវត្តិំ សុណាថ មេ.

១១០៧. តត្ថ ឥទ្ធិវិធញាណំ, បរិត្តាទីសុ សត្តសុ;

អារម្មណវិភាគេសុ, បវត្តតិ កថំ បន.

១១០៨. កាយេនាទិស្សមានេន, គន្តុកាមោ យទាភវេ;

ចិត្តសន្និស្សិតំ កត្វា, កាយំ ចិត្តវសេន តំ.

១១០៩. មហគ្គតេ ច ចិត្តស្មិំ, សមារោបេតិ សោ តទា;

កាយារម្មណតោ ញាណំ, បរិត្តារម្មណំ សិយា.

១១១០. ទិស្សមានេន កាយេន, គន្តុកាមោ យទា ភវេ;

កាយសន្និស្សិតំ កត្វា, ចិត្តំ កាយវសេន តំ.

១១១១. បាទកជ្ឈានចិត្តំ តំ, កាយេ រោបេតិ សោ តទា;

ឈានារម្មណតោ ញាណំ, តំ មហគ្គតគោចរំ.

១១១២. អនាគតមតីតញ្ច, ករោតិ វិសយំ យទា;

អតីតារម្មណំ ហោតិ, តទានាគតគោចរំ.

១១១៣. កាយេន ទិស្សមានេន, គមនេ បន ភិក្ខុនោ;

បច្ចុប្បន្នោ ភវេ តស្ស, គោចរោតិ វិនិទ្ទិសេ.

១១១៤. កាយំ ចិត្តវសេនាបិ, ចិត្តំ កាយវសេន វា;

បរិណាមនកាលស្មិំ, អជ្ឈត្តារម្មណំ សិយា.

១១១៥. ពហិទ្ធារម្មណំ ហោតិ, ពហិទ្ធារូបទស្សនេ;

ឯវមិទ្ធិវិធំ ញាណំ, សម្បវត្តតិ សត្តសុ.

១១១៦. បច្ចុប្បន្នេ បរិត្តេ ច, ពហិទ្ធជ្ឈត្តិកេសុបិ;

ចតូស្វេតេសុ ធម្មេសុ, ទិព្ពសោតំ បវត្តតិ.

១១១៧. បច្ចុប្បន្នោ បរិត្តោ ច, សទ្ទោ អារម្មណំ យតោ;

បរិត្តារម្មណំ បច្ចុ-ប្បន្នារម្មណតំ គតំ.

១១១៨. អត្តនោ កុច្ឆិសទ្ទស្ស, សវនេបិ បរស្ស ច;

អជ្ឈត្តារម្មណញ្ចេវ, ពហិទ្ធារម្មណម្បិ ច.

១១១៩. ចេតោបរិយញាណម្បិ, បរិត្តាទីសុ អដ្ឋសុ;

អារម្មណវិភាគេសុ, បវត្តតិ កថំ បន.

១១២០. បរិត្តារម្មណំ ហោតិ, បរិត្តានំ បជាននេ;

ជាននេ មជ្ឈិមានំ តុ, តំ មហគ្គតគោចរំ.

១១២១. ជាននេ បន មគ្គស្ស, ផលស្សាបិ បជាននេ;

តទា បនស្ស ញាណស្ស, អប្បមាណោវ គោចរោ.

១១២២. តំ មគ្គារម្មណំ ហោតិ, មគ្គចិត្តស្ស ជាននេ;

បរិយាយេនេវេតស្ស, មគ្គារម្មណតា មតា.

១១២៣. អតីតេ សត្តទិវស-ព្ភន្តរេ ច យទា បន;

អនាគតេ តថា សត្ត-ទិវសព្ភន្តរេបិ ច.

១១២៤. បរេសំ បន ចិត្តស្ស, ជាននេ សមុទីរិតំ;

អតីតារម្មណញ្ចេវ, តទានាគតគោចរំ.

១១២៥. កថញ្ច បន តំ បច្ចុប្បន្នគោចរតំ គតំ;

បច្ចុប្បន្នំ តិធា វុត្តំ, ខណសន្តតិអទ្ធតោ.

១១២៦. តត្ថ តិក្ខណសម្បត្តំ, បច្ចុប្បន្នខណាទិកំ;

ឯកទ្វេសន្តតិវារបរិយាបន្នមិទំ បន.

១១២៧. សន្តតិបច្ចុប្បន្នន្តិ, អាហុ សន្តតិកោវិទា;

ឯកព្ភវបរិច្ឆិន្នំ, បច្ចុប្បន្នន្តិ បច្ឆិមំ.

១១២៨. ខណាទិកត្តយំ បច្ចុ-ប្បន្នំ តមាហុ កេចិធ;

ចេតោបរិយញាណស្ស, ហោតិ អារម្មណំ ឥតិ.

១១២៩. យថា ច បុប្ផមុដ្ឋិម្ហិ, ឧក្ខិត្តេ គគនេ បន;

អវស្សំ ឯកមេកស្ស, វណ្ដំ វណ្ដេន វិជ្ឈតិ.

១១៣០. ឯវំ មហាជនស្សាបិ, ចិត្តេ អាវជ្ជិតេ បន;

ឯកស្ស ចិត្តមេកេន, អវស្សំ បន វិជ្ឈតិ.

១១៣១. យេនាវជ្ជតិ ចិត្តេន, យេន ជានាតិ ចេតសា;

តេសំ ទ្វិន្នំ សហដ្ឋានា-ភាវតោ តំ ន យុជ្ជតិ.

១១៣២. ជវនាវជ្ជនានំ តុ, នានារម្មណបត្តិតោ;

អនិដ្ឋេ បន ហិ ឋានេ, អយុត្តន្តិ បកាសិតំ.

១១៣៣. តស្មា សន្តតិអទ្ធាន-បច្ចុប្បន្នានមេវ តុ;

វសេន បច្ចុប្បន្នំ តំ, ហោតិ អារម្មណំ ឥទំ.

១១៣៤. បច្ចុប្បន្នម្បិ អទ្ធាខ្យំ, ឥទំ ជវនវារតោ;

ទីបេតព្ពន្តិ និទ្ទិដ្ឋំ, តត្រាយំ ទីបនានយោ.

១១៣៥. យទា បរស្ស ចិត្តញ្ហិ, ញាតុមាវជ្ជតិទ្ធិមា;

អាវជ្ជនមនោ តស្ស, បច្ចុប្បន្នខណវ្ហយំ.

១១៣៦. អារម្មណំ តទា កត្វា, តេន សទ្ធិំ និរុជ្ឈតិ;

ជវនានិ ហិ ជាយន្តេ, តស្ស ចត្តារិ បញ្ច វា.

១១៣៧. ឯតេសំ បច្ឆិមំ ចិត្តំ, ឥទ្ធិចិត្តមុទីរិតំ;

កាមាវចរចិត្តានិ, សេសានីតិ វិនិទ្ទិសេ.

១១៣៨. ឯតេសំ បន សព្ពេសំ, និរុទ្ធំ តុ តទេវ ច;

ចិត្តំ អារម្មណំ ហោតិ, តស្មា សព្ពានិ តានិបិ.

១១៣៩. ឯការម្មណតំ យន្តិ, ន នានារម្មណានិ ហិ;

អទ្ធាវសា ភវេ បច្ចុ-ប្បន្នារម្មណតោ បន.

១១៤០. ឯការម្មណភាវេបិ, ឥទ្ធិមានសមេវ ច;

បរស្ស ចិត្តំ ជានាតិ, នេតរានិ យថា បន.

១១៤១. ចក្ខុទ្វារេ តុ វិញ្ញាណំ, រូបំ បស្សតិ នេតរំ;

ឯវមេវ ច តំ ឥទ្ធិ-ចិត្តមេវ ច ជានាតិ.

១១៤២. បរចិត្តារម្មណត្តា, ពហិទ្ធារម្មណំ សិយា;

ចេតោបរិយញាណម្បិ, អដ្ឋស្វេវ បវត្តតិ.

១១៤៣. បុព្ពេនិវាសញាណម្បិ, បរិត្តាទីសុ អដ្ឋសុ;

អារម្មណវិភាគេសុ, បវត្តតិ កថំ បន.

១១៤៤. កាមាវចរខន្ធានំ, សមនុស្សរណេ បន;

បរិត្តារម្មណំយេវ, ហោតីតិ បរិទីបយេ.

១១៤៥. រូបាវចរិការុប្បខន្ធានុស្សរណេ បន;

ភវតីតិ ហិ ញាតព្ពំ, តំ មហគ្គតគោចរំ.

១១៤៦. អតីតេ អត្តនា មគ្គំ, ភាវិតំ តុ ផលម្បិ វា;

សមនុស្សរតោ ឯវ-ប្បមាណារម្មណំ សិយា.

១១៤៧. សមនុស្សរតោ មគ្គំ, មគ្គារម្មណមេវ តំ;

អតីតារម្មណំយេវ, ហោតិ ឯកន្តតោ ឥទំ.

១១៤៨. ចេតោបរិយញាណម្បិ, យថាកម្មុបគម្បិ ច;

អតីតារម្មណា ហោន្តិ, កិញ្ចាបិ អថ ខោ បន.

១១៤៩. ចេតោបរិយញាណស្ស, សត្តទ្ទិវសព្ភន្តរំ;

អតីតំ ចិត្តមេវស្ស, អារម្មណមុទីរិតំ.

១១៥០. អតីតេ ចេតនាមត្តំ, យថាកម្មុបគស្សបិ;

បុព្ពេនិវាសញាណស្ស, នត្ថិ កិញ្ចិ អគោចរំ.

១១៥១. អជ្ឈត្តារម្មណំ អត្ត-ខន្ធានុស្សរណេ សិយា;

ពហិទ្ធារម្មណំ អញ្ញ-ខន្ធានុស្សរណេ ភវេ.

១១៥២. សរណេ នាមគោត្តស្ស, តំ នវត្តព្ពគោចរំ;

បុព្ពេនិវាសញាណម្បិ, អដ្ឋស្វេវ បវត្តតិ.

១១៥៣. បច្ចុប្បន្នេ បរិត្តេ ច, ពហិទ្ធជ្ឈត្តិកេសុបិ;

ចតូស្វេតេសុ ធម្មេសុ, ទិព្ពចក្ខុ បវត្តតិ.

១១៥៤. ទិព្ពសោតសមំ ទិព្ព-ចក្ខុអារម្មណក្កមេ;

រូបំ សទ្ទោតិ ទ្វិន្នំ តុ, អយមេវ វិសេសតា.

១១៥៥. អនាគតំសញាណម្បិ, បរិត្តាទីសុ អដ្ឋសុ;

អារម្មណវិភាគេសុ, បវត្តតិ កថំ បន.

១១៥៦. និព្ពត្តិស្សតិ យំ កាមា-វចរេតិ បជានតោ;

បរិត្តារម្មណំ ហោតិ, រូបារូបេស្វនាគតេ.

១១៥៧. និព្ពត្តិស្សតិ យញ្ចាបិ, សិយា មហគ្គតគោចរំ;

ភាវេស្សតិ អយំ មគ្គំ, ផលំ សច្ឆិករិស្សតិ.

១១៥៨. ឯវំ បជាននេ អប្ប-មាណារម្មណតំ ភវេ;

មគ្គំ ភាវេស្សតិច្ចេវ, ជាននេ មគ្គគោចរំ.

១១៥៩. ឯកន្តេន ឥទំ ញាណំ, ហោតានាគតគោចរំ;

ចេតោបរិយំ តុ កិញ្ចាបិ, ហោតានាគតគោចរំ.

១១៦០. អថ ខោ បន តំ សត្ត-ទិវសព្ភន្តរំ បន;

ចិត្តមេវ ច ជានាតិ, ន ហិ តំ អញ្ញគោចរំ.

១១៦១. អនាគតំសញាណស្ស, អនាគតំសគោចរំ;

‘‘អហំ ទេវោ ភវិស្សាមិ’’-ច្ចេវមជ្ឈត្តគោចរំ.

១១៦២. ‘‘តិស្សោ ផុស្សោ អមុត្រាយំ,

និព្ពត្តិស្សតិនាគតេ’’;

ឥច្ចេវំ ជាននេ តស្ស,

ពហិទ្ធារម្មណំ សិយា.

១១៦៣. ជាននេ នាមគោត្តស្ស, យស្ស កស្សចិនាគតេ;

បុព្ពេនិវាសញាណំវ, តំ នវត្តព្ពគោចរំ.

១១៦៤. យថាកម្មុបគញាណំ, បរិត្តាទីសុ បញ្ចសុ;

អារម្មណវិភាគេសុ, បវត្តតិ កថំ បន.

១១៦៥. ជាននេ កាមកម្មស្ស, បរិត្តារម្មណំ សិយា;

តថា មហគ្គតកម្មស្ស, តំ មហគ្គតគោចរំ.

១១៦៦. អតីតមេវ ជានាតិ, តស្មា ចាតីតគោចរំ;

អជ្ឈត្តារម្មណំ ហោតិ, អត្តនោ កម្មជាននេ.

១១៦៧. ពហិទ្ធារម្មណំ ហោតិ, បរកម្មបជាននេ;

ឯវំ បវត្តិ ញាតព្ពា, យថាកម្មុបគស្សបិ.

១១៦៨. សត្តន្នម្បិ អភិញ្ញានំ, វុត្តោ អារម្មណក្កមោ;

ឯត្ថ វុត្តនយេនេវ, វេទិតព្ពោ វិភាវិនា.

១១៦៩. វិវិធត្ថវណ្ណបទេហិ សម្បន្នំ,

មធុរត្ថមតិនីហរំ គន្ថំ;

សោតុជនស្ស ហទយបីតិករំ,

សុណេយ្យ កោចិ មនុជោ សចេតនោ.

ឥតិ អភិធម្មាវតារេ អភិញ្ញារម្មណនិទ្ទេសោ នាម

សត្តរសមោ បរិច្ឆេទោ.