១៦. សោឡសមោ បរិច្ឆេទោ

អភិញ្ញានិទ្ទេសោ

១០៤៣. ឥតោ បរំ ករិស្សាមិ, បញ្ញាសុទ្ធិករំ បរំ;

បញ្ចន្នម្បិ អភិញ្ញានំ, មុខមត្តនិទស្សនំ.

១០៤៤. រូបារូបសមាបត្តី,

និព្ពត្តេត្វា បនដ្ឋបិ;

លោកិកាបិ អភិញ្ញាយោ,

ភាវេតព្ពា វិភាវិនា.

១០៤៥. ចតុត្ថជ្ឈានមត្តេបិ, សុចិណ្ណវសិនា សតា;

អនុយោគមភិញ្ញាសុ, កាតុំ វត្តតិ យោគិនោ.

១០៤៦. អភិញ្ញា នាម ភិក្ខូនំ, សាភិញ្ញានំ អនុត្តរោ;

អលង្ការោ ហិ តាណន្តិ, សត្ថន្តិ ច បវុច្ចតិ.

១០៤៧. និព្ពត្តិតាស្វភិញ្ញាសុ, យោគាវចរភិក្ខុនា;

សមាធិភាវនា ហិស្ស, តទា និដ្ឋង្គតា សិយា.

១០៤៨. ទិព្ពានិ ចក្ខុសោតានិ, ឥទ្ធិចិត្តវិជាននំ;

បុព្ពេនិវាសញាណន្តិ, បញ្ចាភិញ្ញា ឥមា សិយុំ.

១០៤៩. កសិណានុលោមតាទីហិ, ចតុទ្ទសនយេហិ ច;

ទមេតព្ពមភិញ្ញាយោ, បត្តុកាមេន មានសំ.

១០៥០. ទន្តេ សមាហិតេ សុទ្ធេ, បរិយោទាតេ អនង្គណេ;

នុបក្លេសេ មុទុភូតេ, កម្មនីយេ ឋិតាចលេ.

១០៥១. ឥតិ អដ្ឋង្គសម្បន្នេ, ចិត្តេ ឥទ្ធិវិធាយ ច;

អភិនីហរតិ ចេ ចិត្តំ, សិជ្ឈតិទ្ធិវិកុព្ពនំ.

១០៥២. អភិញ្ញាបាទកជ្ឈានំ, សមាបជ្ជ តតោ បន;

វុដ្ឋាយ ហិ សតំ វាបិ, សហស្សំ វា យទិច្ឆតិ.

១០៥៣. ‘‘សតំ ហោមិ សតំ ហោមី’’-ច្ចេវំ កត្វាន មានសំ;

អភិញ្ញាបាទកជ្ឈានំ, សមាបជ្ជ តតោ បន.

១០៥៤. វុដ្ឋាយ បុនធិដ្ឋាតិ,

សហាធិដ្ឋានចេតសា;

សតំ ហោតិ ហិ សោ យោគី,

សហស្សាទីស្វយំ នយោ.

១០៥៥. បាទកជ្ឈានចិត្តំ តុ, និមិត្តារម្មណំ សិយា;

បរិកម្មមនានេត្ថ, សតារម្មណិកានិ តុ.

១០៥៦. តទាធិដ្ឋានចិត្តម្បិ, សតារម្មណមេវ តំ;

បុព្ពេ វុត្តប្បនាចិត្តំ, វិយ គោត្រភុនន្តរំ.

១០៥៧. តមេកំ ជាយតេ តត្ថ, ចតុត្ថជ្ឈានិកំ មនោ;

បរិកម្មវិសេសោវ, សេសំ បុព្ពសមំ ឥធ.

ឥទ្ធិវិធញាណំ.

១០៥៨. ទិព្ពសោតមិទំ តត្ថ, ភាវេតព្ពំ កថំ សិយា;

អភិញ្ញាបាទកជ្ឈានំ, សមាបជ្ជ តតោ បុន.

១០៥៩. វុដ្ឋាយ បរិកម្មេន, កាមាវចរចេតសា;

សទ្ទោ អាវជ្ជិតព្ពោវ, មហន្តោ សុខុមោបិ ច.

១០៦០. តស្សេវំ បន សទ្ទស្ស, និមិត្តំ មនសិ កុព្ពតោ;

ទិព្ពសោតមិទានិស្ស, ឧប្បជ្ជិស្សតិ តំ ឥតិ.

១០៦១. សទ្ទេស្វញ្ញតរំ សទ្ទំ, កត្វា អារម្មណំ តតោ;

ឧប្បជ្ជិត្វា និរុទ្ធេ តុ, មនោទ្វារាវជ្ជនេ បុន.

១០៦២. ជវនានិ ហិ ជាយន្តេ, តស្ស ចត្តារិ បញ្ច វា;

បុរិមានេត្ថ ចិត្តេសុ, តីណិ ចត្តារិ វា បន.

១០៦៣. បរិកម្មោបចារានុ-លោមគោត្រភុនាមកា;

ចតុត្ថំ បញ្ចមំ វាបិ, អប្បនាចិត្តមីរិតំ.

១០៦៤. សហជាតំ តុ យំ ញាណំ, អប្បនាមានសេន ហិ;

តំ ញាណំ ទិព្ពសោតន្តិ, វទន្តិ សុតកោវិទា.

១០៦៥. ថាមជាតំ ករោន្តេន, តំ ញាណំ តេន យោគិនា;

‘‘ឯត្ថន្តរគតំ សទ្ទំ, សុណាមី’’តិ ច ចេតសា.

១០៦៦. អង្គុលំ ទ្វង្គុលំ ភិយ្យោ,

វិទត្ថិ រតនំ តថា;

គាមោ ទេសោ តតោ យាវ,

ចក្កវាឡា តតោ បរំ.

១០៦៧. ឥច្ចេវំ តុ បរិច្ឆិជ្ជ, វឌ្ឍេតព្ពំ យថាក្កមំ;

ឯសោ អធិគតាភិញ្ញោ, បាទការម្មណេន តុ.

១០៦៨. ផុដ្ឋោកាសគតេ សទ្ទេ, សព្ពេ បន សុណាតិ សោ;

សុណន្តោ បាដិយេក្កម្បិ, សល្លក្ខេតុំ បហោតិ សោ.

ទិព្ពសោតញាណំ.

១០៦៩. កថំ បនុប្បាទេតព្ពំ, ចេតោបរិយមានសំ;

ទិព្ពចក្ខុវសេនេវ, ឥទំ ញាណំ បនិជ្ឈតិ.

១០៧០. អាលោកំ បន វឌ្ឍេត្វា, តស្មា ទិព្ពេន ចក្ខុនា;

ហទយំ បន និស្សាយ, វត្តមានំ តុ លោហិតំ.

១០៧១. ទិស្វា បរស្ស វិញ្ញេយ្យំ,

ហោតិ ចិត្តំ តុ ភិក្ខុនា;

សោមនស្សយុតេ ចិត្តេ,

លោហិតំ លោហិតំ សិយា.

១០៧២. ទោមនស្សយុតេ ចិត្តេ, វត្តមានេ តុ កាឡកំ;

ឧបេក្ខាសហិតេ ចិត្តេ, តិលតេលូបមំ សិយា.

១០៧៣. តស្មា បរស្ស សត្តស្ស, ទិស្វា ហទយលោហិតំ;

ចេតោបរិយញាណំ តំ, កាតព្ពំ ថាមតំ គតំ.

១០៧៤. ឯវំ ថាមគតេ តស្មិំ, យថានុក្កមតោ បន;

ចិត្តមេវ វិជានាតិ, វិនា លោហិតទស្សនំ.

១០៧៥. កាមាវចរចិត្តញ្ច, រូបារូបេសុ មានសំ;

សព្ពមេវ វិជានាតិ, សរាគាទិប្បភេទកំ.

ចេតោបរិយញាណំ.

១០៧៦. បុព្ពេនិវាសញាណេន, កត្តព្ពា តទនុស្សតិ;

តំ សម្បាទេតុកាមេន, អាទិកម្មិកភិក្ខុនា;

ឈានានិ បន ចត្តារិ, សមាបជ្ជានុបុព្ពតោ.

១០៧៧. អភិញ្ញាបាទកជ្ឈានា, វុដ្ឋាយ ហិ តតោ បុន;

ភិក្ខុនា វជ្ជិតព្ពាវ, និសជ្ជា សព្ពបច្ឆិមា.

១០៧៨. តតោ បភុតិ សព្ពម្បិ, បដិលោមក្កមា បន;

សព្ពមាវជ្ជិតព្ពំ តំ, ទិវសេ រត្តិយំ កតំ.

១០៧៩. បដិលោមក្កមេនេវ, ទុតិយេ តតិយេបិ ច;

ទិវសេ បក្ខមាសេសុ, តថា សំវច្ឆរេសុបិ.

១០៨០. យាវ អស្មិំ ភវេ សន្ធិ, តាវ តេន ច ភិក្ខុនា;

កតមាវជ្ជិតព្ពំ តំ, បុរិមស្មិំ ភវេបិ ច.

១០៨១. ចុតិក្ខណេបិ និព្ពត្តំ, នាមរូបញ្ច សាធុកំ;

ឯវមាវជ្ជិតេ តស្មិំ, នាមរូបេ យទា បន.

១០៨២. តទេវារម្មណំ កត្វា, នាមរូបំ ចុតិក្ខណេ;

មនោទ្វារេ មនក្ការោ, ឧប្បជ្ជតិ តទា បន.

១០៨៣. អាវជ្ជនេ និរុទ្ធស្មិំ, តទេវារម្មណំ បន;

កត្វា ជវនចិត្តានិ, ហោន្តិ ចត្តារិ បញ្ច វា;

បុព្ពេ វុត្តនយេនេវ, សេសំ ញេយ្យំ វិភាវិនា.

១០៨៤. បរិកម្មាទិនាមានិ, បុរិមានិ ភវន្តិ តុ;

បច្ឆិមំ អប្បនាចិត្តំ, រូបាវចរិកំ ភវេ.

១០៨៥. តេន ចិត្តេន យំ ញាណំ, សំយុត្តំ តេន យា បន;

សំយុត្តា សតិ សា បុព្ពេ-និវាសានុស្សតីរិតា.

បុព្ពេនិវាសានុស្សតិញាណំ.

១០៨៦. រូបំ បស្សិតុកាមេន, ភិក្ខុនា ទិព្ពចក្ខុនា;

កសិណារម្មណំ ឈានំ, អភិញ្ញាបាទកំ បន.

១០៨៧. អភិនីហារក្ខមំ កត្វា, តេជោកសិណមេវ វា;

ឱទាតកសិណំ វាបិ, អាលោកកសិណម្បិ វា.

១០៨៨. ឥមេសុ កតបុញ្ញេហិ, កសិណេសុ ច តីសុបិ;

អាលោកកសិណំ ឯត្ថ, សេដ្ឋន្តិ បរិទីបិតំ.

១០៨៩. តស្មា តមិតរំ វាបិ, ឧប្បាទេត្វា យថាក្កមំ;

ឧបចារភូមិយំយេវ, ឋត្វា តំ បន បណ្ឌិតោ.

១០៩០. វឌ្ឍេត្វាន ឋបេតព្ពំ, ន ឧប្បាទេយ្យ អប្បនំ;

ឧប្បាទេតិ សចេ ហោតិ, បាទកជ្ឈាននិស្សិតំ.

១០៩១. ឈានស្ស វឌ្ឍិតស្សន្តោ-គតំ រូបំ តុ យោគិនា;

បស្សិតព្ពំ ភវេ រូបំ, បស្សតោ បន តស្ស តំ.

១០៩២. បរិកម្មស្ស វារោ ហិ, អតិក្កមតិ តាវទេ;

អាលោកោបិ តតោ តស្ស, ខិប្បមន្តរធាយតិ.

១០៩៣. តស្មិំ អន្តរហិតេ រូប-គតម្បិ ច ន ទិស្សតិ;

តេនាថ បាទកជ្ឈានំ, បវិសិត្វា តតោ បុន.

១០៩៤. វុដ្ឋាយ បន អាលោកោ, ផរិតព្ពោវ ភិក្ខុនា;

ឯវំ អនុក្កមេនេវ, អាលោកោ ថាមវា សិយា.

១០៩៥. ‘‘អាលោកោ ឯត្ថ ហោតូ’’តិ,

យត្តកំ ឋានមេវ សោ;

បរិច្ឆិន្ទតិ តត្ថេវ,

អាលោកោ បន តិដ្ឋតិ.

១០៩៦. ទិវសម្បិ និសីទិត្វា, បស្សតោ ហោតិ ទស្សនំ;

តិណុក្កាយ គតោ មគ្គំ, បុរិសេត្ថ និទស្សនំ.

១០៩៧. ឧប្បាទនក្កមោបិស្ស, តត្រាយំ ទិព្ពចក្ខុនោ;

វុត្តប្បការរូបំ តំ, កត្វា អារម្មណំ បន.

១០៩៨. មនោទ្វារេ មនក្ការេ, ជាតេ យានិ តទេវ ច;

រូបំ អារម្មណំ កត្វា, ជាយន្តិ ជវនានិ ហិ.

១០៩៩. កាមាវចរចិត្តានិ, តានិ ចត្តារិ បញ្ច វា;

ហេដ្ឋា វុត្តនយេនេវ, សេសំ ញេយ្យំ វិភាវិនា.

១១០០. អត្ថសាធកចិត្តំ តំ, ចតុត្ថជ្ឈានិកំ មតំ;

តំចិត្តសំយុតំ ញាណំ, ទិព្ពចក្ខុន្តិ វុច្ចតិ.

១១០១. អនាគតំសញាណស្ស, យថាកម្មុបគស្ស ច;

បរិកម្មំ វិសុំ នត្ថិ, ឥជ្ឈន្តិ ទិព្ពចក្ខុនា.

១១០២. ចុតូបបាតញាណម្បិ, ទិព្ពចក្ខុន្តិ វា បន;

អត្ថតោ ឯកមេវេទំ, ព្យញ្ជនេ បន នានតា.

ទិព្ពចក្ខុញាណំ.

១១០៣. យោធ សុណាតិ ករោតិ ច ចិត្តេ,

គន្ថមិមំ បរមំ បន ភិក្ខុ;

សោ អភិធម្មមហណ្ណវបារំ,

យាតិ អនេន តរេន តរិត្វា.

ឥតិ អភិធម្មាវតារេ អភិញ្ញានិទ្ទេសោ នាម

សោឡសមោ បរិច្ឆេទោ.