១៥. បន្នរសមោ បរិច្ឆេទោ

អរូបាវចរសមាធិភាវនានិទ្ទេសោ

៩៨០. រូបារូបមតីតេន, រូបារូបាទិវេទិនា;

យានិ ចារូបបុញ្ញានិ, សរូបេនីរិតានិ តុ.

៩៨១. តេសំ ទានិ បវក្ខាមិ, ភាវនានយមុត្តមំ;

យោគាវចរភិក្ខូនំ, ហិតត្ថាយ សមាសតោ.

៩៨២. ‘‘រូបេ ខោ វិជ្ជមានស្មិំ, ទណ្ឌាទានាទយោ សិយុំ;

អនេកាបិ បនាពាធា, ចក្ខុរោគាទយោ’’ឥតិ.

៩៨៣. រូបេ អាទីនវំ ទិស្វា, រូបេ និព្ពិន្ទមានសោ;

តស្សាតិក្កមនត្ថាយ, អរូបំ បដិបជ្ជតិ.

៩៨៤. តម្ហា កសិណរូបាបិ, សោ និព្ពិជ្ជ វិសារទោ;

អបក្កមិតុកាមោ ច, សូករាភិហតោវ សា.

៩៨៥. ចតុត្ថេ បន ឈានស្មិំ, ហុត្វា ចិណ្ណវសី វសី;

ចតុត្ថជ្ឈានតោ ធីមា, វុដ្ឋាយ វិធិនា បុន.

៩៨៦. ករោតិ បនិទំ ចិត្តំ, រូបមារម្មណំ យតោ;

អាសន្នសោមនស្សញ្ច, ថូលសន្តវិមោក្ខតោ.

៩៨៧. ឥតិ អាទីនវំ ទិស្វា, ចតុត្ថេ តត្ថ សព្ពសោ;

និកន្តិំ បរិយាទាយ, បឋមារុប្បញ្ច សន្តតោ.

៩៨៨. ចក្កវាឡបរិយន្តំ, យត្តកំ វា បនិច្ឆតិ;

តត្តកំ បត្ថរិត្វាន, ផុដ្ឋោកាសញ្ច តេន តំ.

៩៨៩. អាកាសោ ឥតិ វានន្តោ,

អាកាសោ ឥតិ វា បុន;

មនសា ហិ ករោន្តោវ,

ឧគ្ឃាដេតិ បវុច្ចតិ.

៩៩០. ឧគ្ឃាដេន្តោ ហិ កសិណំ, ន សំវេល្លេតិ តំ បន;

ន ចុទ្ធរតិ សោ យោគី, បូវំ វិយ កបាលតោ.

៩៩១. កេវលំ បន តំ នេវ, អាវជ្ជតិ ន បេក្ខតិ;

នាវជ្ជន្តោ នបេក្ខន្តោ, ឧគ្ឃាដេតិ ហិ នាមសោ.

៩៩២. កសិណុគ្ឃាដិមាកាសំ, និមិត្តំ បន តំវ សោ;

អាកាសោ ឥតិ ចិត្តេន, អាវជ្ជតិ បុនប្បុនំ.

៩៩៣. អាវជ្ជតោ ហិ តស្សេវំ,

ករោតោ តក្កាហតម្បិ ច;

បញ្ច នីវរណា តស្ស,

វិក្ខម្ភន្តិ ហិ សព្ពសោ.

៩៩៤. អាសេវតិ ច ភាវេតិ, តំ និមិត្តំ បុនប្បុនំ;

ករោតោ បន តស្សេវ, សន្តចិត្តស្ស យោគិនោ.

៩៩៥. តត្រាកាសេ បនាប្បេតិ, បឋមារុប្បមានសំ;

ឥធាបិ បុរិមេ ភាគេ, តីណិ ចត្តារិ វា បន.

៩៩៦. ជវនានិ ឧបេក្ខាយ, សម្បយុត្តានិ ហោន្តិ ហិ;

ចតុត្ថំ បញ្ចមំ វាបិ, ហោតិ អារុប្បមានសំ.

៩៩៧. បុន ភាវេតុកាមេន, ទុតិយារុប្បមានសំ;

សុចិណ្ណវសិនា ហុត្វា, បឋមារុប្បមានសេ.

៩៩៨. អាសន្នរូបាវចរ-ជ្ឈានបច្ចត្ថិកន្តិ ច;

ទុតិយារុប្បចិត្តំវ, ន ច សន្តមិទន្តិ ច.

៩៩៩. ឯវមាទីនវំ ទិស្វា, បឋមារុប្បមានសេ;

និកន្តិំ បរិយាទាយ, ទុតិយំ សន្តតោ បន.

១០០០. តមាកាសំ ផរិត្វាន, បវត្តមានសំ បន;

តញ្ច វិញ្ញាណមិច្ចេវំ, កត្តព្ពំ មនសា ពហុំ.

១០០១. អាវជ្ជនញ្ច កត្តព្ពំ, តថា តក្កាហតម្បិ ច;

‘‘អនន្ត’’ន្តិ ‘‘អនន្ត’’ន្តិ, កាតព្ពំ មនសា និធ.

១០០២. តស្មិំ បន និមិត្តស្មិំ, វិចារេន្តស្ស មានសំ;

ឧបចារេន តំ ចិត្តំ, សមាធិយតិ យោគិនោ.

១០០៣. អាសេវតិ ច ភាវេតិ, តំ និមិត្តំ បុនប្បុនំ;

តស្ស ចេវំ ករោន្តស្ស, សតិសម្បន្នចេតសោ.

១០០៤. អាកាសំ ផុសវិញ្ញាណេ, ទុតិយារុប្បមានសំ;

អប្បេតិ អប្បនា យស្មិំ, នយោ វុត្តនយោវ សោ.

១០០៥. អាកាសោយមនន្តោតិ, ឯវមាកាសមេវ តំ;

ផរិត្វា បវត្តវិញ្ញាណំ, ‘‘វិញ្ញាណញ្ច’’ន្តិ វុច្ចតិ.

១០០៦. មនក្ការវសេនាបិ, អនន្តំ បរិទីបិតំ;

‘‘វិញ្ញាណានន្ត’’មិច្ចេវ, វត្តព្ពំ បនិទំ សិយា.

១០០៧. អថ ភាវេតុកាមេន, តតិយារុប្បមានសំ;

សុចិណ្ណវសិនា ហុត្វា, ទុតិយារុប្បមានសេ.

១០០៨. អាសន្នបឋមារុប្ប-ចិត្តបច្ចត្ថិកន្តិ ច;

តតិយារុប្បចិត្តំវ, ន ច សន្តមិទន្តិ ច.

១០០៩. ឯវមាទីនវំ ទិស្វា, ទុតិយារុប្បមានសេ;

និកន្តិំ បរិយាទាយ, តតិយំ សន្តតោ បន.

១០១០. ឯវំ មនសិ កត្វាន, កាតព្ពោ មនសា បុន;

បឋមារុប្បវិញ្ញាណា-ភាវោ តស្សេវ សុញ្ញតោ.

១០១១. តំ បនាកាសវិញ្ញាណំ, អកត្វា មនសា បុន;

‘‘នត្ថិ នត្ថី’’តិ វាតេន, ‘‘សុញ្ញំ សុញ្ញ’’ន្តិ វា តតោ.

១០១២. អាវជ្ជិតព្ពមេវញ្ហិ, កត្តព្ពំ មនសាបិ ច;

តក្កាហតញ្ច កាតព្ពំ, បុនប្បុនំវ ធីមតា.

១០១៣. តស្មិំ និមិត្តេ តស្សេវំ, វិចារេន្តស្ស មានសំ;

សតិ តិដ្ឋតិ ភិយ្យោបិ, សមាធិយតិ មានសំ.

១០១៤. អាសេវតិ ច ភាវេតិ, តំ និមិត្តំ បុនប្បុនំ;

តស្ស ចេវំ ករោន្តស្ស, សតិសម្បន្នចេតសោ.

១០១៥. កសិណុគ្ឃាដិមាកាសំ, ផរិត្វាន សមន្តតោ;

វិញ្ញាណស្ស បវត្តស្ស, នត្ថិភាវេ អភាវកេ.

១០១៦. តតិយារុប្បវិញ្ញាណំ,

តំ បនាប្បេតិ យោគិនោ;

អប្បនាយ នយោបេត្ថ,

ហោតិ វុត្តនយោវ សោ.

១០១៧. អាកាសគតវិញ្ញាណំ, ទុតិយារុប្បចក្ខុនា;

បស្សន្តោ វិហរិត្វាន, ‘‘នត្ថិ នត្ថី’’តិអាទិនា.

១០១៨. បរិកម្មមនក្ការេ, តស្មិំ អន្តរហិតេ បន;

តស្សាបគមមត្តំវ, បស្សន្តោ វសតី ច សោ.

១០១៩. សន្និបាតំ យថា កោចិ, ទិស្វា សង្ឃស្ស កត្ថចិ;

គតេ សង្ឃេ តុ តំ ឋានំ, សុញ្ញមេវានុបស្សតិ.

១០២០. បុន ភាវេតុកាមេន, ចតុត្ថារុប្បមានសំ;

សុចិណ្ណវសិនា ហុត្វា, តតិយារុប្បមានសេ.

១០២១. អាសន្នទុតិយារុប្ប-ចិត្តបច្ចត្ថិកន្តិ ច;

ចតុត្ថារុប្បចិត្តំវ, ន ច សន្តមិទន្តិ ច.

១០២២. ឯវមាទីនវំ ទិស្វា, តតិយារុប្បមានសេ;

និកន្តិំ បរិយាទាយ, ចតុត្ថំ សន្តតោ បន.

១០២៣. ឯវំ មនសិ កត្វាន, បុន តត្ថេវ ធីមតា;

អភាវារម្មណំ កត្វា, សម្បវត្តមិទំ មនោ.

១០២៤. ‘‘សន្តំ សន្តមិទំ ចិត្ត’’-មិច្ចេវំ តំ បុនប្បុនំ;

ហោតិ អាវជ្ជិតព្ពញ្ច, កាតព្ពំ មនសាបិ ច.

១០២៥. តស្មិំ និមិត្តេ តស្សេវំ, វិចារេន្តស្ស មានសំ;

សតិ តិដ្ឋតិ ភិយ្យោបិ, សមាធិយតិ មានសំ.

១០២៦. អាសេវតិ ច ភាវេតិ, តំ និមិត្តំ បុនប្បុនំ;

តស្ស ចេវំ ករោន្តស្ស, សតិសម្បន្នចេតសោ.

១០២៧. តតិយារុប្បសង្ខាត-ខន្ធេសុ ច ចតូសុបិ;

ចតុត្ថារុប្បវិញ្ញាណំ, តំ បនាប្បេតិ យោគិនោ.

១០២៨. អប្បនាយ នយោបេត្ថ, ហេដ្ឋា វុត្តនយូបមោ;

អបិចេត្ថ វិសេសោយំ, វេទិតព្ពោ វិភាវិនា.

១០២៩. ‘‘អហោ សន្តា វតាយ’’ន្តិ, សមាបត្តិ បទិស្សតិ;

យា បនាភាវមត្តម្បិ, កត្វា ឋស្សតិ គោចរំ.

១០៣០. សន្តារម្មណតាយេវ, ‘‘សន្តាយ’’ន្តិ វិបស្សតិ;

សន្តតោ ចេ មនក្ការោ, កថញ្ច សមតិក្កមោ.

១០៣១. អនាបជ្ជិតុកាមត្តា, ហោតេវ សមតិក្កមោ;

‘‘សមាបជ្ជាមហមេត’’-មិច្ចាភោគោ ន វិជ្ជតិ.

១០៣២. សន្តតោ តំ ករោន្តោ ហិ, មនសា សុខុមំ បរំ;

អសញ្ញំ បន ទុព្ពល្យំ, បាបុណាតិ មហគ្គតំ.

១០៣៣. នេវសញ្ញី ច នាសញ្ញី,

យាយ សញ្ញាយ ហោតិ សោ;

ន កេវលំ តុ សញ្ញាវ,

ឯទិសី អថ ខោ បន.

១០៣៤. ឯវមេវ ភវន្តេត្ថ, សុខុមា វេទនាទយោ;

បត្តមក្ខនតេលេន, មគ្គស្មិំ ឧទកេន ច.

១០៣៥. សាវេតព្ពោ អយំ អត្ថោ, ចតុត្ថារុប្បពោធនេ;

បដុសញ្ញាយ កិច្ចស្ស, នេវក្ករណតោ អយំ.

១០៣៦. ‘‘នេវសញ្ញា’’តិ និទ្ទិដ្ឋា, ចតុត្ថារុប្បសម្ភវា;

បដុសញ្ញាយ កិច្ចំ សា, កាតុំ សក្កោតិ នេវ ច.

១០៣៧. យថា ទហនកិច្ចំ តុ, តេជោធាតុ សុខោទកេ;

សា សង្ខារាវសេសត្តា, សុខុមត្តេន វិជ្ជតិ;

តស្មា បន ច សា សញ្ញា, ‘‘នាសញ្ញា’’តិ បវុច្ចតិ.

១០៣៨. ឯតា ហិ រូបមាកាសំ,

វិញ្ញាណំ តទភាវកំ;

អតិក្កមិត្វា កមតោ,

ចតស្សោ ហោន្តិ អាហ ច.

១០៣៩. ‘‘អារម្មណាតិក្កមតោ, ចតស្សោបិ ភវន្តិមា;

អង្គាតិក្កមមេតាសំ, ន ឥច្ឆន្តិ វិភាវិនោ.

១០៤០. សុបណីតតរា ហោន្តិ,

បច្ឆិមា បច្ឆិមា ឥធ;

ឧបមា តត្ថ វិញ្ញេយ្យា,

បាសាទតលសាដិកា’’តិ.

១០៤១. សង្ខេបេន មយារុប្ប-សមាបត្តិនយោ អយំ;

ទស្សិតោ ទស្សិតោ សុទ្ធ-ទស្សិនា បិយទស្សិនា.

១០៤២. រូបារូបជ្ឈានសមាបត្តិវិធានំ,

ជានាតិមំ សារតរំ យោ បន ភិក្ខុ;

រូបារូបជ្ឈានសមាបត្តីសុ ទក្ខោ,

រូបារូបំ យាតិ ភវំ សោ អភិភុយ្យ.

ឥតិ អភិធម្មាវតារេ អរូបាវចរសមាធិភាវនានិទ្ទេសោ នាម

បន្នរសមោ បរិច្ឆេទោ.