១៤. ចុទ្ទសមោ បរិច្ឆេទោ

រូបាវចរសមាធិភាវនានិទ្ទេសោ

៧៨៩. ភាវនានយមហំ ហិតានយំ,

មានយញ្ច សុគតំ សុខានយំ;

ព្យាករោមិ បរមំ ឥតោ បរំ,

តំ សុណាថ មធុរត្ថវណ្ណនំ.

៧៩០. ឧត្តរំ តុ មនុស្សានំ, ធម្មតោ ញាណទស្សនំ;

បត្តុកាមេន កាតព្ពំ, អាទិតោ សីលសោធនំ.

៧៩១. សង្កស្សរសមាចារេ, ទុស្សីលេ សីលវជ្ជិតេ;

នត្ថិ ឈានំ កុតោ មគ្គោ, តស្មា សីលំ វិសោធយេ.

៧៩២. សីលំ ចារិត្តវារិត្តវសេន ទុវិធំ មតំ;

តំ បនាច្ឆិទ្ទមក្ខណ្ឌមកម្មាសមនិន្ទិតំ.

៧៩៣. កត្តព្ពំ អត្ថកាមេន, វិវេកសុខមិច្ឆតា;

សីលញ្ច នាម ភិក្ខូនំ, អលង្ការោ អនុត្តរោ.

៧៩៤. រតនំ សរណំ ខេមំ, តាណំ លេណំ បរាយណំ;

ចិន្តាមណិ បណីតោ ច, សីលំ យានមនុត្តរំ.

៧៩៥. សីតលំ សលិលំ សីលំ, កិលេសមលធោវនំ;

គុណានំ មូលភូតញ្ច, ទោសានំ ពលឃាតិ ច.

៧៩៦. តិទិវារោហណញ្ចេតំ, សោបានំ បរមុត្តមំ;

មគ្គោ ខេមោ ច និព្ពាននគរស្ស បវេសនេ.

៧៩៧. តស្មា សុបរិសុទ្ធំ តំ, សីលំ ទុវិធលក្ខណំ;

កត្តព្ពំ អត្ថកាមេន, បិយសីលេន ភិក្ខុនា.

៧៩៨. កាតព្ពោ បន សីលស្មិំ, បរិសុទ្ធេ ឋិតេនិធ;

បលិពោធស្សុបច្ឆេទោ, បលិពោធា ទសាហុ ច.

៧៩៩. ‘‘អាវាសោ ច កុលំ លាភោ,

គណោ កម្មញ្ច បញ្ចមំ;

អទ្ធានំ ញាតិ អាពាធោ,

គន្ថោ ឥទ្ធីតិ តេ ទសា’’តិ.

៨០០. បលិពោធស្សុបច្ឆេទំ, កត្វា ទសវិធស្សបិ;

ឧបសង្កមិតព្ពោ សោ, កម្មដ្ឋានស្ស ទាយកោ.

៨០១. បិយោ គរុ ភាវនីយោ, វត្តា ច វចនក្ខមោ;

គម្ភីរញ្ច កថំ កត្តា, នោ ចដ្ឋានេ និយោជកោ.

៨០២. ឯវមាទិគុណោបេតមុបគន្ត្វា ហិតេសិនំ;

កល្យាណមិត្តំ កាលេន, កម្មដ្ឋានស្ស ទាយកំ.

៨០៣. កម្មដ្ឋានំ គហេតព្ពំ, វត្តំ កត្វា បនស្ស តុ;

តេនាបិ ចរិតំ ញត្វា, ទាតព្ពំ តស្ស ភិក្ខុនោ.

៨០៤. ចរិតំ បនិទំ រាគទោសមោហវសេន ច;

សទ្ធាពុទ្ធិវិតក្កានំ, វសេន ឆព្ពិធំ មតំ.

៨០៥. វោមិស្សកនយា តេសំ, ចតុសដ្ឋិ ភវន្តិ តេ;

តេហិ អត្ថោ ន ចត្ថីតិ, ន មយា ឥធ ទស្សិតា.

៨០៦. អសុភា ច ទសេវេត្ថ, តថា កាយគតាសតិ;

ឯកាទស ឥមេ រាគ-ចរិតស្សានុកូលតា.

៨០៧. ចតស្សោ អប្បមញ្ញាយោ, សវណ្ណកសិណា ឥមេ;

អដ្ឋេវ ច សទា ទោស-ចរិតស្សានុកូលតា.

៨០៨. តំ មោហចរិតស្សេត្ថ, វិតក្កចរិតស្ស ច;

អនុកូលន្តិ និទ្ទិដ្ឋំ, អានាបានំ បនេកកំ.

៨០៩. បុរិមានុស្សតិឆក្កំ, សទ្ធាចរិតទេហិនោ;

មរណូបសមាយុត្តា, សតិមាហារនិស្សិតា.

៨១០. សញ្ញា ធាតុវវត្ថានំ, ពុទ្ធិប្បកតិជន្តុនោ;

ឥមេ បន ច ចត្តារោ, អនុកូលាតិ ទីបិតា.

៨១១. ចត្តារោបិ ច អារុប្បា, សេសានិ កសិណានិ ច;

អនុកូលា ឥមេ សព្ព-ចរិតានន្តិ វណ្ណិតា.

៨១២. ឥទំ សព្ពំ បនេកន្ត-វិបច្ចនីកភាវតោ;

អតិសប្បាយតោ វុត្ត-មិតិ ញេយ្យំ វិភាវិនា.

៨១៣. កម្មដ្ឋានានិ សព្ពានិ, ចត្តាលីសាតិ និទ្ទិសេ;

កសិណានិ ទស ចេវ, អសុភានុស្សតី ទស.

៨១៤. ចតស្សោ អប្បមញ្ញាយោ, ចត្តារោ ច អរូបិនោ;

ចតុធាតុវវត្ថានំ, សញ្ញា ចាហារតា ឥតិ.

៨១៥. កម្មដ្ឋានេសុ ឯតេសុ, ឧបចារវហា កតិ;

អានាបានសតិំ កាយ-គតំ ហិត្វា បនដ្ឋបិ.

៨១៦. សេសានុស្សតិយោ សញ្ញា, វវត្ថានន្តិ តេរស;

ឧបចារវហា វុត្តា, សេសា តេ អប្បនាវហា.

៨១៧. អប្បនាយាវហេស្វេត្ថ, កសិណានិ ទសាបិ ច;

អានាបានសតី ចេវ, ចតុក្កជ្ឈានិកា ឥមេ.

៨១៨. អសុភានិ ទស ចេត្ថ, តថា កាយគតាសតិ;

ឯកាទស ឥមេ ធម្មា, បឋមជ្ឈានិកា សិយុំ.

៨១៩. អាទិព្រហ្មវិហារាតិ, តិកជ្ឈានវហា តយោ;

ចតុត្ថាបិ ច អារុប្បា, ចតុត្ថជ្ឈានិកា មតា.

៨២០. វសេនារម្មណង្គានំ, ទុវិធោ សមតិក្កមោ;

គោចរាតិក្កមារូបេ, រូបេ ឈានង្គតិក្កមោ.

៨២១. ទសេវ កសិណានេត្ថ, វឌ្ឍេតព្ពានិ ហោន្តិ ហិ;

ន ច វឌ្ឍនិយា សេសា, ភវន្តិ អសុភាទយោ.

៨២២. ទសេវ កសិណានេត្ថ, អសុភានិ ទសាបិ ច;

អានាបានសតី ចេវ, តថា កាយគតាសតិ.

៨២៣. បដិភាគនិមិត្តានិ, ហោន្តិ អារម្មណានិ ហិ;

សេសានេវ បដិភាគ-និមិត្តារម្មណា សិយុំ.

៨២៤. អសុភានិ ទសាហារ-សញ្ញា កាយគតាសតិ;

ទេវេសុ នប្បវត្តន្តិ, ទ្វាទសេតានិ សព្ពទា.

៨២៥. តានិ ទ្វាទស ចេតានិ, អានាបានសតីបិ ច;

តេរសេវ បនេតានិ, ព្រហ្មលោកេ ន វិជ្ជរេ.

៨២៦. ឋបេត្វា ចតុរារូបេ, នត្ថិ កិញ្ចិ អរូបិសុ;

មនុស្សលោកេ សព្ពានិ, បវត្តន្តិ ន សំសយោ.

៨២៧. ចតុត្ថំ កសិណំ ហិត្វា, កសិណា អសុភានិ ច;

ទិដ្ឋេនេវ គហេតព្ពា, ឥមេ ឯកូនវីសតិ.

៨២៨. សតិយម្បិ ច កាយម្ហិ, ទិដ្ឋេន តចបញ្ចកំ;

សេសមេត្ថ សុតេនេវ, គហេតព្ពន្តិ ទីបិតំ.

៨២៩. អានាបានសតី ឯត្ថ, ផុដ្ឋេន បរិទីបិតា;

វាយោកសិណមេវេត្ថ, ទិដ្ឋផុដ្ឋេន គយ្ហតិ.

៨៣០. សុតេនេវ គហេតព្ពា, សេសា អដ្ឋារសាបិ ច;

ឧបេក្ខា អប្បមញ្ញា ច, អរូបា ចេវ បញ្ចិមេ.

៨៣១. អាទិតោវ គហេតព្ពា, ន ហោន្តីតិ បកាសិតា;

បញ្ចតិំសាវសេសានិ, គហេតព្ពានិ អាទិតោ.

៨៣២. កម្មដ្ឋានេសុ ហេតេសុ, អាកាសកសិណំ វិនា;

កសិណា នវ ហោន្តេ ច, អរូបានំ តុ បច្ចយា.

៨៣៣. ទសាបិ កសិណា ហោន្តិ, អភិញ្ញានំ តុ បច្ចយា;

តយោ ព្រហ្មវិហារាបិ, ចតុក្កស្ស ភវន្តិ តុ.

៨៣៤. ហេដ្ឋិមំ ហេដ្ឋិមារុប្បំ, ឧបរូបរិមស្ស ហិ;

តថា ចតុត្ថមារុប្បំ, និរោធស្សាតិ ទីបិតំ.

៨៣៥. សព្ពានិ ច បនេតានិ, ចត្តាលីសវិធានិ តុ;

វិបស្សនាភវសម្បត្តិ-សុខានំ បច្ចយា សិយុំ.

៨៣៦. កម្មដ្ឋានំ គហេត្វាន, អាចរិយស្ស សន្តិកេ;

វសន្តស្ស កថេតព្ពំ, អាគតស្សាគតក្ខណេ.

៨៣៧. ឧគ្គហេត្វា បនញ្ញត្រ, គន្តុកាមស្ស ភិក្ខុនោ;

នាតិសង្ខេបវិត្ថារំ, កថេតព្ពំ តុ តេនបិ.

៨៣៨. កម្មដ្ឋានំ គហេត្វាន, សម្មដ្ឋានំ មនោភុនោ;

អដ្ឋារសហិ ទោសេហិ, និច្ចំ បន វិវជ្ជិតេ.

៨៣៩. អនុរូបេ វិហារស្មិំ, វិហាតព្ពំ តុ គាមតោ;

នាតិទូរេ នច្ចាសន្នេ, សិវេ បញ្ចង្គសំយុតេ.

៨៤០. ខុទ្ទកោ បលិពោធោបិ, ឆិន្ទិតព្ពោ បនត្ថិ ចេ;

ទីឃា កេសា នខា លោមា, ឆិន្ទិតព្ពា វិភាវិនា.

៨៤១. ចីវរំ រជិតព្ពំ តំ, កិលិដ្ឋំ តុ សចេ សិយា;

សចេ បត្តេ មលំ ហោតិ, បចិតព្ពោវ សុដ្ឋុ សោ.

៨៤២. អច្ឆិន្នបលិពោធេន, បច្ឆា តេន ច ភិក្ខុនា;

បវិវិត្តេ បនោកាសេ, វសន្តេន យថាសុខំ.

៨៤៣. វជ្ជេត្វា មត្តិកំ នីលំ, បីតំ សេតញ្ច លោហិតំ;

សណ្ហាយារុណវណ្ណាយ, មត្តិកាយ មនោរមំ.

៨៤៤. កត្តព្ពំ កសិណជ្ឈានំ, បត្តុកាមេន ធីមតា;

សេនាសនេ វិវិត្តស្មិំ, ពហិទ្ធា វាបិ តាទិសេ.

៨៤៥. បដិច្ឆន្នេ បនដ្ឋានេ, បព្ភារេ វា គុហន្តរេ;

សំហារិមំ វា កាតព្ពំ, តំ តត្រដ្ឋកមេវ វា.

៨៤៦. សំហារិមំ ករោន្តេន, ទណ្ឌកេសុ ចតូស្វបិ;

ចម្មំ វា កដសារំ វា, ទុស្សបត្តម្បិ វា តថា.

៨៤៧. ពន្ធិត្វា តថា កាតព្ពំ, មត្តិកាយ បមាណតោ;

ភូមិយំ បត្ថរិត្វា ច, ឱលោកេតព្ពមេវ តំ.

៨៤៨. តត្រដ្ឋំ ភូមិយំ វដ្ដំ, អាកោដិត្វាន ខាណុកេ;

វល្លីហិ តំ វិនន្ធិត្វា, កាតព្ពំ កណ្ណិកំ សមំ.

៨៤៩. វិត្ថារតោ បមាណេន, វិទត្ថិចតុរង្គុលំ;

វដ្ដំ វត្តតិ តំ កាតុំ, វិវដ្ដំ បន មិច្ឆតា.

៨៥០. ភេរីតលសមំ សាធុ, កត្វា កសិណមណ្ឌលំ;

សម្មជ្ជិត្វាន តំ ឋានំ, ន្ហត្វា អាគម្ម បណ្ឌិតោ.

៨៥១. ហត្ថបាសបមាណស្មិំ, តម្ហា កសិណមណ្ឌលា;

បទេសេ តុ សុបញ្ញត្តេ, អាសនស្មិំ សុអត្ថតេ.

៨៥២. ឧច្ចេ តត្ថ និសីទិត្វា, វិទត្ថិចតុរង្គុលេ;

ឧជុកាយំ បណិធាយ, កត្វា បរិមុខំ សតិំ.

៨៥៣. កាមេស្វាទីនវំ ទិស្វា, នេក្ខម្មំ ទដ្ឋុ ខេមតោ;

បរមំ បីតិបាមោជ្ជំ, ជនេត្វា រតនត្តយេ.

៨៥៤. ‘‘ភាគី អស្សមហំ អទ្ធា, ឥមាយ បដិបត្តិយា;

បវិវេកសុខស្សា’’តិ, កត្វា ឧស្សាហមុត្តមំ.

៨៥៥. អាការេន សមេនេវ, ឧម្មីលិត្វាន លោចនំ;

និមិត្តំ គណ្ហតា សាធុ, ភាវេតព្ពំ បុនប្បុនំ.

៨៥៦. ន វណ្ណោ បេក្ខិតព្ពោ សោ, ទដ្ឋព្ពំ ន ច លក្ខណំ;

វណ្ណំ បន អមុញ្ចិត្វា, ឧស្សទស្ស វសេន ហិ.

៨៥៧. ចិត្តំ បណ្ណត្តិធម្មស្មិំ, ឋបេត្វេកគ្គមានសោ;

‘‘បថវី បថវិ’’ច្ចេវំ, វត្វា ភាវេយ្យ បណ្ឌិតោ.

៨៥៨. បថវី មេទនី ភូមិ, វសុធា ច វសុន្ធរា;

ឯវំ បថវិនាមេសុ, ឯកំ វត្តុម្បិ វដ្ដតិ.

៨៥៩. ឧម្មីលិត្វា និមីលិត្វា, អាវជ្ជេយ្យ បុនប្បុនំ;

យាវុគ្គហនិមិត្តំ តុ, នុប្បជ្ជតិ ច តាវ សោ.

៨៦០. ឯវំ ភាវយតោ តស្ស, បុន ឯកគ្គចេតសោ;

យទា បន និមីលេត្វា, អាវជ្ជន្តស្ស យោគិនោ.