៧. សមុច្ចយបរិច្ឆេទោ

១. ទ្វាសត្តតិវិធា វុត្តា, វត្ថុធម្មា សលក្ខណា.

តេសំ ទានិ យថាយោគំ, បវក្ខាមិ សមុច្ចយំ.

២. អកុសលសង្គហោ មិស្សកសង្គហោ ពោធិបក្ខិយសង្គហោ សព្ពសង្គហោ ចេតិ សមុច្ចយសង្គហោ ចតុព្ពិធោ វេទិតព្ពោ.

អកុសលសង្គហោ

៣. កថំ? អកុសលសង្គហេ តាវ ចត្តារោ អាសវា – កាមាសវោ ភវាសវោ ទិដ្ឋាសវោ អវិជ្ជាសវោ.

៤. ចត្តារោ ឱឃា – កាមោឃោ ភវោឃោ ទិដ្ឋោឃោ អវិជ្ជោឃោ.

៥. ចត្តារោ យោគា – កាមយោគោ ភវយោគោ ទិដ្ឋិយោគោ អវិជ្ជាយោគោ.

៦. ចត្តារោ គន្ថា – អភិជ្ឈាកាយគន្ថោ, ព្យាបាទោ កាយគន្ថោ, សីលព្ពតបរាមាសោ កាយគន្ថោ, ឥទំសច្ចាភិនិវេសោ កាយគន្ថោ.

៧. ចត្តារោ ឧបាទានា – កាមុបាទានំ ទិដ្ឋុបាទានំ សីលព្ពតុបាទានំ អត្តវាទុបាទានំ.

៨. ឆ នីវរណានិ – កាមច្ឆន្ទនីវរណំ ព្យាបាទនីវរណំ ថិនមិទ្ធនីវរណំ ឧទ្ធច្ចកុក្កុច្ចនីវរណំ វិចិកិច្ឆានីវរណំ អវិជ្ជានីវរណំ.

៩. សត្ត អនុសយា – កាមរាគានុសយោ ភវរាគានុសយោ បដិឃានុសយោ មានានុសយោ ទិដ្ឋានុសយោ វិចិកិច្ឆានុសយោ អវិជ្ជានុសយោ.

១០. ទស សំយោជនានិ – កាមរាគសំយោជនំ រូបរាគសំយោជនំ អរូបរាគសំយោជនំ បដិឃសំយោជនំ មានសំយោជនំ ទិដ្ឋិសំយោជនំ សីលព្ពតបរាមាសសំយោជនំ វិចិកិច្ឆាសំយោជនំ ឧទ្ធច្ចសំយោជនំ អវិជ្ជាសំយោជនំ សុត្តន្តេ.

១១. អបរានិបិ ទស សំយោជនានិ – កាមរាគសំយោជនំ ភវរាគសំយោជនំ បដិឃសំយោជនំ មានសំយោជនំ ទិដ្ឋិសំយោជនំ សីលព្ពតបរាមាសសំយោជនំ វិចិកិច្ឆាសំយោជនំ ឥស្សាសំយោជនំ មច្ឆរិយសំយោជនំ អវិជ្ជាសំយោជនំ អភិធម្មេ (វិភ. ៩៦៩).

១២. ទស កិលេសា – លោភោ ទោសោ មោហោ មានោ ទិដ្ឋិ វិចិកិច្ឆា ថិនំ ឧទ្ធច្ចំ អហិរិកំ អនោត្តប្បំ.

១៣. អាសវាទីសុ បនេត្ថ កាមភវនាមេន តព្ពត្ថុកា តណ្ហា អធិប្បេតា, សីលព្ពតបរាមាសោ ឥទំសច្ចាភិនិវេសោ អត្តវាទុបាទោ ច តថាបវត្តំ ទិដ្ឋិគតមេវ បវុច្ចតិ.

១៤. អាសវោឃា ច យោគា ច,

តយោ គន្ថា ច វត្ថុតោ;

ឧបាទានា ទុវេ វុត្តា,

អដ្ឋ នីវរណា សិយុំ.

ឆឡេវានុសយា ហោន្តិ, នវ សំយោជនា មតា;

កិលេសា ទស វុត្តោយំ, នវធា បាបសង្គហោ.

មិស្សកសង្គហោ

១៥. មិស្សកសង្គហេ ឆ ហេតូ – លោភោ ទោសោ មោហោ អលោភោ អទោសោ អមោហោ.

១៦. សត្ត ឈានង្គានិ – វិតក្កោ វិចារោ បីតិ ឯកគ្គតា សោមនស្សំ ទោមនស្សំ ឧបេក្ខា.

១៧. ទ្វាទស មគ្គង្គានិ – សម្មាទិដ្ឋិ សម្មាសង្កប្បោ សម្មាវាចា សម្មាកម្មន្តោ សម្មាអាជីវោ សម្មាវាយាមោ សម្មាសតិ សម្មាសមាធិ មិច្ឆាទិដ្ឋិ មិច្ឆាសង្កប្បោ មិច្ឆាវាយាមោ មិច្ឆាសមាធិ.

១៨. ពាវីសតិន្ទ្រិយានិ – ចក្ខុន្ទ្រិយំ សោតិន្ទ្រិយំ ឃានិន្ទ្រិយំ ជិវ្ហិន្ទ្រិយំ កាយិន្ទ្រិយំ ឥត្ថិន្ទ្រិយំ បុរិសិន្ទ្រិយំ ជីវិតិន្ទ្រិយំ មនិន្ទ្រិយំ សុខិន្ទ្រិយំ ទុក្ខិន្ទ្រិយំ សោមនស្សិន្ទ្រិយំ ទោមនស្សិន្ទ្រិយំ ឧបេក្ខិន្ទ្រិយំ សទ្ធិន្ទ្រិយំ វីរិយិន្ទ្រិយំ សតិន្ទ្រិយំ សមាធិន្ទ្រិយំ បញ្ញិន្ទ្រិយំ អនញ្ញាតញ្ញស្សាមីតិន្ទ្រិយំ អញ្ញិន្ទ្រិយំ អញ្ញាតាវិន្ទ្រិយំ.

១៩. នវ ពលានិ – សទ្ធាពលំ វីរិយពលំ សតិពលំ សមាធិពលំ បញ្ញាពលំ ហិរិពលំ ឱត្តប្បពលំ អហិរិកពលំ អនោត្តប្បពលំ.

២០. ចត្តារោ អធិបតី – ឆន្ទាធិបតិ វីរិយាធិបតិ ចិត្តាធិបតិ វីមំសាធិបតិ.

២១. ចត្តារោ អាហារា – កពឡីការោ អាហារោ, ផស្សោ ទុតិយោ, មនោសញ្ចេតនា តតិយា, វិញ្ញាណំ ចតុត្ថំ.

២២. ឥន្ទ្រិយេសុ បនេត្ថ សោតាបត្តិមគ្គញាណំ អនញ្ញាតញ្ញស្សាមីតិន្ទ្រិយំ.

២៣. អរហត្តផលញាណំ អញ្ញាតាវិន្ទ្រិយំ.

២៤. មជ្ឈេ ឆ ញាណានិ អញ្ញិន្ទ្រិយានីតិ បវុច្ចន្តិ.

២៥. ជីវិតិន្ទ្រិយញ្ច រូបារូបវសេន ទុវិធំ ហោតិ.

២៦. បញ្ចវិញ្ញាណេសុ ឈានង្គានិ, អវីរិយេសុ ពលានិ, អហេតុកេសុ មគ្គង្គានិ ន លព្ភន្តិ.

២៧. តថា វិចិកិច្ឆាចិត្តេ ឯកគ្គតា មគ្គិន្ទ្រិយពលភាវំ ន គច្ឆតិ.

២៨. ទ្វិហេតុកតិហេតុកជវនេស្វេវ យថាសម្ភវំ អធិបតិ ឯកោវ លព្ភតីតិ.

២៩. ឆ ហេតូ បញ្ច ឈានង្គា, មគ្គង្គា នវ វត្ថុតោ.

សោឡសិន្ទ្រិយធម្មា ច, ពលធម្មា នវេរិតា.

ចត្តារោធិបតិ វុត្តា, តថាហារាតិ សត្តធា;

កុសលាទិសមាកិណ្ណោ, វុត្តោមិស្សកសង្គហោ.

ពោធិបក្ខិយសង្គហោ

៣០. ពោធិបក្ខិយសង្គហេ ចត្តារោ សតិបដ្ឋានា កាយានុបស្សនាសតិបដ្ឋានំ វេទនានុបស្សនាសតិបដ្ឋានំ ចិត្តានុបស្សនាសតិបដ្ឋានំ ធម្មានុបស្សនាសតិបដ្ឋានំ.

៣១. ចត្តារោ សម្មប្បធានា ឧប្បន្នានំ បាបកានំ បហានាយ វាយាមោ, អនុប្បន្នានំ បាបកានំ អនុប្បាទាយ វាយាមោ, អនុប្បន្នានំ កុសលានំ ឧប្បាទាយ វាយាមោ, ឧប្បន្នានំ កុសលានំ ភិយ្យោភាវាយ វាយាមោ.

៣២. ចត្តារោ ឥទ្ធិបាទា – ឆន្ទិទ្ធិបាទោ វីរិយិទ្ធិបាទោ ចិត្តិទ្ធិបាទោ វីមំសិទ្ធិបាទោ.

៣៣. បញ្ចិន្ទ្រិយានិ – សទ្ធិន្ទ្រិយំ វីរិយិន្ទ្រិយំ សតិន្ទ្រិយំ សមាធិន្ទ្រិយំ បញ្ញិន្ទ្រិយំ.

៣៤. បញ្ច ពលានិ – សទ្ធាពលំ វីរិយពលំ សតិពលំ សមាធិពលំ បញ្ញាពលំ.

៣៥. សត្ត ពោជ្ឈង្គា – សតិសម្ពោជ្ឈង្គោ ធម្មវិចយសម្ពោជ្ឈង្គោ វីរិយសម្ពោជ្ឈង្គោ បីតិសម្ពោជ្ឈង្គោ បស្សទ្ធិសម្ពោជ្ឈង្គោ សមាធិសម្ពោជ្ឈង្គោ ឧបេក្ខាសម្ពោជ្ឈង្គោ.

៣៦. អដ្ឋ មគ្គង្គានិ – សម្មាទិដ្ឋិ សម្មាសង្កប្បោ សម្មាវាចា សម្មាកម្មន្តោ សម្មាអាជីវោ សម្មាវាយាមោ សម្មាសតិ សម្មាសមាធិ.

៣៧. ឯត្ថ បន ចត្តារោ សតិបដ្ឋានាតិ សម្មាសតិ ឯកាវ បវុច្ចតិ.

៣៨. តថា ចត្តារោ សម្មប្បធានាតិ ច សម្មាវាយាមោ.

៣៩. ឆន្ទោ ចិត្តមុបេក្ខា ច, សទ្ធាបស្សទ្ធិបីតិយោ.

សម្មាទិដ្ឋិ ច សង្កប្បោ, វាយាមោ វិរតិត្តយំ.

សម្មាសតិ សមាធីតិ, ចុទ្ទសេតេ សភាវតោ;

សត្តតិំសប្បភេទេន, សត្តធា តត្ថ សង្គហោ.

៤០. សង្កប្បបស្សទ្ធិ ច បីតុបេក្ខា,

ឆន្ទោ ច ចិត្តំ វិរតិត្តយញ្ច;

នវេកឋានា វិរិយំ នវដ្ឋ,

សតី សមាធី ចតុ បញ្ច បញ្ញា;

សទ្ធា ទុឋានុត្តមសត្តតិំស-

ធម្មានមេសោ បវរោ វិភាគោ.

៤១. សព្ពេ លោកុត្តរេ ហោន្តិ, ន វា សង្កប្បបីតិយោ.

លោកិយេបិ យថាយោគំ, ឆព្ពិសុទ្ធិបវត្តិយំ.

សព្ពសង្គហោ

៤២. សព្ពសង្គហេ បញ្ចក្ខន្ធា – រូបក្ខន្ធោ វេទនាក្ខន្ធោ សញ្ញាក្ខន្ធោ សង្ខារក្ខន្ធោ វិញ្ញាណក្ខន្ធោ.

៤៣. បញ្ចុបាទានក្ខន្ធា – រូបុបាទានក្ខន្ធោ វេទនុបាទានក្ខន្ធោ សញ្ញុបាទានក្ខន្ធោ សង្ខារុបាទានក្ខន្ធោ វិញ្ញាណុបាទានក្ខន្ធោ.

៤៤. ទ្វាទសាយតនានិ – ចក្ខាយតនំ សោតាយតនំ ឃានាយតនំ ជិវ្ហាយតនំ កាយាយតនំ មនាយតនំ រូបាយតនំ សទ្ទាយតនំ គន្ធាយតនំ រសាយតនំ ផោដ្ឋព្ពាយតនំ ធម្មាយតនំ.

៤៥. អដ្ឋារស ធាតុយោ – ចក្ខុធាតុ សោតធាតុ ឃានធាតុ ជិវ្ហាធាតុ កាយធាតុ រូបធាតុ សទ្ទធាតុ គន្ធធាតុ រសធាតុ ផោដ្ឋព្ពធាតុ ចក្ខុវិញ្ញាណធាតុ សោតវិញ្ញាណធាតុ ឃានវិញ្ញាណធាតុ ជិវ្ហាវិញ្ញាណធាតុ កាយវិញ្ញាណធាតុ មនោធាតុ ធម្មធាតុ មនោវិញ្ញាណធាតុ.

៤៦. ចត្តារិ អរិយសច្ចានិ – ទុក្ខំ អរិយសច្ចំ, ទុក្ខសមុទយោ អរិយសច្ចំ, ទុក្ខនិរោធោ អរិយសច្ចំ, ទុក្ខនិរោធគាមិនី បដិបទា អរិយសច្ចំ.

៤៧. ឯត្ថ បន ចេតសិកសុខុមរូបនិព្ពានវសេន ឯកូនសត្តតិ ធម្មា ធម្មាយតនធម្មធាតូតិ សង្ខំ គច្ឆន្តិ.

៤៨. មនាយតនមេវ សត្តវិញ្ញាណធាតុវសេន ភិជ្ជតិ.

៤៩. រូបញ្ច វេទនា សញ្ញា, សេសចេតសិកា តថា.

វិញ្ញាណមិតិ បញ្ចេតេ, បញ្ចក្ខន្ធាតិ ភាសិតា.

៥០. បញ្ចុបាទានក្ខន្ធាតិ, តថា តេភូមកា មតា.

ភេទាភាវេន និព្ពានំ, ខន្ធសង្គហនិស្សដំ.

៥១. ទ្វារារម្មណភេទេន, ភវន្តាយតនានិ ច.

ទ្វារាលម្ពតទុប្បន្ន-បរិយាយេន ធាតុយោ.

៥២. ទុក្ខំ តេភូមកំ វដ្ដំ, តណ្ហា សមុទយោ ភវេ.

និរោធោ នាម និព្ពានំ, មគ្គោ លោកុត្តរោ មតោ.

៥៣. មគ្គយុត្តា ផលា ចេវ, ចតុសច្ចវិនិស្សដា.

ឥតិ បញ្ចប្បភេទេន, បវុត្តោ សព្ពសង្គហោ.

ឥតិ អភិធម្មត្ថសង្គហេ សមុច្ចយសង្គហវិភាគោ នាម

សត្តមោ បរិច្ឆេទោ.