៥. វីថិមុត្តបរិច្ឆេទោ

១. វីថិចិត្តវសេនេវំ, បវត្តិយមុទីរិតោ.

បវត្តិសង្គហោ នាម, សន្ធិយំ ទានិ វុច្ចតិ.

២. ចតស្សោ ភូមិយោ, ចតុព្ពិធា បដិសន្ធិ, ចត្តារិ កម្មានិ, ចតុធា មរណុប្បត្តិ ចេតិ វីថិមុត្តសង្គហេ ចត្តារិ ចតុក្កានិ វេទិតព្ពានិ.

ភូមិចតុក្កំ

៣. តត្ថ អបាយភូមិ កាមសុគតិភូមិ រូបាវចរភូមិ អរូបាវចរភូមិ ចេតិ ចតស្សោ ភូមិយោ នាម.

៤. តាសុ និរយោ តិរច្ឆានយោនិ បេត្តិវិសយោ អសុរកាយោ ចេតិ អបាយភូមិ ចតុព្ពិធា ហោតិ.

៥. មនុស្សា ចាតុមហារាជិកា តាវតិំសា យាមា តុសិតា និម្មានរតិ បរនិម្មិតវសវត្តី ចេតិ កាមសុគតិភូមិ សត្តវិធា ហោតិ.

៦. សា បនាយមេកាទសវិធាបិ កាមាវចរភូមិច្ចេវ សង្ខំ គច្ឆតិ.

៧. ព្រហ្មបារិសជ្ជា ព្រហ្មបុរោហិតា មហាព្រហ្មា ចេតិ បឋមជ្ឈានភូមិ.

៨. បរិត្តាភា អប្បមាណាភា អាភស្សរា ចេតិ ទុតិយជ្ឈានភូមិ.

៩. បរិត្តសុភា អប្បមាណសុភា សុភកិណ្ហា ចេតិ តតិយជ្ឈានភូមិ.

១០. វេហប្ផលា អសញ្ញសត្តា សុទ្ធាវាសា ចេតិ ចតុត្ថជ្ឈានភូមីតិ រូបាវចរភូមិ សោឡសវិធា ហោតិ.

១១. អវិហា អតប្បា សុទស្សា សុទស្សី អកនិដ្ឋា ចេតិ សុទ្ធាវាសភូមិ បញ្ចវិធា ហោតិ.

១២. អាកាសានញ្ចាយតនភូមិ វិញ្ញាណញ្ចាយតនភូមិ អាកិញ្ចញ្ញាយតនភូមិ នេវសញ្ញានាសញ្ញាយតនភូមិ ចេតិ អរូបភូមិ ចតុព្ពិធា ហោតិ.

១៣. បុថុជ្ជនា ន លព្ភន្តិ, សុទ្ធាវាសេសុ សព្ពថា.

សោតាបន្នា ច សកទាគាមិនោ ចាបិ បុគ្គលា.

១៤. អរិយា នោបលព្ភន្តិ, អសញ្ញាបាយភូមិសុ.

សេសដ្ឋានេសុ លព្ភន្តិ, អរិយានរិយាបិ ច.

ឥទមេត្ថ ភូមិចតុក្កំ.

បដិសន្ធិចតុក្កំ

១៥. អបាយបដិសន្ធិ កាមសុគតិបដិសន្ធិ រូបាវចរបដិសន្ធិ អរូបាវចរបដិសន្ធិ ចេតិ ចតុព្ពិធា បដិសន្ធិ នាម.

១៦. តត្ថ អកុសលវិបាកោបេក្ខាសហគតសន្តីរណំ អបាយភូមិយំ ឱក្កន្តិក្ខណេ បដិសន្ធិ ហុត្វា តតោ បរំ ភវង្គំ បរិយោសានេ ចវនំ ហុត្វា វោច្ឆិជ្ជតិ, អយមេកាបាយបដិសន្ធិ នាម.

១៧. កុសលវិបាកោបេក្ខាសហគតសន្តីរណំ បន កាមសុគតិយំ មនុស្សានញ្ចេវ ជច្ចន្ធាទីនំ ភុម្មស្សិតានញ្ច វិនិបាតិកាសុរានំ បដិសន្ធិភវង្គចុតិវសេន បវត្តតិ.

១៨. មហាវិបាកានិ បន អដ្ឋ សព្ពត្ថាបិ កាមសុគតិយំ បដិសន្ធិភវង្គចុតិវសេន បវត្តន្តិ.

១៩. ឥមា នវ កាមសុគតិបដិសន្ធិយោ នាម.

២០. សា បនាយំ ទសវិធាបិ កាមាវចរបដិសន្ធិច្ចេវ សង្ខំ គច្ឆតិ.

២១. តេសុ ចតុន្នំ អបាយានំ មនុស្សានំ វិនិបាតិកាសុរានញ្ច អាយុប្បមាណគណនាយ និយមោ នត្ថិ.

២២. ចាតុមហារាជិកានំ បន ទេវានំ ទិព្ពានិ បញ្ចវស្សសតានិ អាយុប្បមាណំ, មនុស្សគណនាយ នវុតិវស្សសតសហស្សប្បមាណំ ហោតិ, តតោ ចតុគ្គុណំ តាវតិំសានំ, តតោ ចតុគ្គុណំ យាមានំ, តតោ ចតុគ្គុណំ តុសិតានំ, តតោ ចតុគ្គុណំ និម្មានរតីនំ, តតោ ចតុគ្គុណំ បរនិម្មិតវសវត្តីនំ.

២៣. នវសតញ្ចេកវីស-វស្សានំ កោដិយោ តថា.

វស្សសតសហស្សានិ, សដ្ឋិ ច វសវត្តិសុ.

២៤. បឋមជ្ឈានវិបាកំ បឋមជ្ឈានភូមិយំ បដិសន្ធិភវង្គចុតិវសេន បវត្តតិ.

២៥. តថា ទុតិយជ្ឈានវិបាកំ តតិយជ្ឈានវិបាកញ្ច ទុតិយជ្ឈានភូមិយំ.

២៦. ចតុត្ថជ្ឈានវិបាកំ តតិយជ្ឈានភូមិយំ.

២៧. បញ្ចមជ្ឈានវិបាកំ ចតុត្ថជ្ឈានភូមិយំ.

២៨. អសញ្ញសត្តានំ បន រូបមេវ បដិសន្ធិ ហោតិ. តថា តតោ បរំ បវត្តិយំ ចវនកាលេ ច រូបមេវ បវត្តិត្វា និរុជ្ឈតិ, ឥមា ឆ រូបាវចរបដិសន្ធិយោ នាម.

២៩. តេសុ ព្រហ្មបារិសជ្ជានំ ទេវានំ កប្បស្ស តតិយោ ភាគោ អាយុប្បមាណំ.

៣០. ព្រហ្មបុរោហិតានំ ឧបឌ្ឍកប្បោ.

៣១. មហាព្រហ្មានំ ឯកោ កប្បោ.

៣២. បរិត្តាភានំ ទ្វេ កប្បានិ.

៣៣. អប្បមាណាភានំ ចត្តារិកប្បានិ.

៣៤. អាភស្សរានំ អដ្ឋ កប្បានិ.

៣៥. បរិត្តសុភានំ សោឡស កប្បានិ.

៣៦. អប្បមាណសុភានំ ទ្វត្តិំស កប្បានិ.

៣៧. សុភកិណ្ហានំ ចតុសដ្ឋិ កប្បានិ.

៣៨. វេហប្ផលានំ អសញ្ញសត្តានញ្ច បញ្ចកប្បសតានិ.

៣៩. អវិហានំ កប្បសហស្សានិ.

៤០. អតប្បានំ ទ្វេ កប្បសហស្សានិ.

៤១. សុទស្សានំ ចត្តារិ កប្បសហស្សានិ.

៤២. សុទស្សីនំ អដ្ឋ កប្បសហស្សានិ.

៤៣. អកនិដ្ឋានំ សោឡស កប្បសហស្សានិ.

៤៤. បឋមារុប្បាទិវិបាកានិ បឋមារុប្បាទិភូមីសុ យថាក្កមំ បដិសន្ធិភវង្គចុតិវសេន បវត្តន្តិ. ឥមា ចតស្សោ អរូបបដិសន្ធិយោ នាម.

៤៥. តេសុ បន អាកាសានញ្ចាយតនូបគានំ ទេវានំ វីសតិកប្បសហស្សានិ អាយុប្បមាណំ.

៤៦. វិញ្ញាណញ្ចាយតនូបគានំ ទេវានំ ចត្តាលីសកប្បសហស្សានិ.

៤៧. អាកិញ្ចញ្ញាយតនូបគានំ ទេវានំ សដ្ឋិកប្បសហស្សានិ.

៤៨. នេវសញ្ញានាសញ្ញាយតនូបគានំ ទេវានំ ចតុរាសីតិកប្បសហស្សានិ.

៤៩. បដិសន្ធិ ភវង្គញ្ច, តថា ចវនមានសំ.

ឯកមេវ តថេវេកវិសយញ្ចេកជាតិយំ.

ឥទមេត្ថ បដិសន្ធិចតុក្កំ.

កម្មចតុក្កំ

៥០. ជនកំ ឧបត្ថម្ភកំ ឧបបីឡកំ ឧបឃាតកញ្ចេតិ កិច្ចវសេន.

៥១. គរុកំ អាសន្នំ អាចិណ្ណំ កដត្តាកម្មញ្ចេតិ បាកទានបរិយាយេន.

៥២. ទិដ្ឋធម្មវេទនីយំ ឧបបជ្ជវេទនីយំ អបរាបរិយវេទនីយំ អហោសិកម្មញ្ចេតិ បាកកាលវសេន ចត្តារិ កម្មានិ នាម.

៥៣. តថា អកុសលំ កាមាវចរកុសលំ រូបាវចរកុសលំ អរូបាវចរកុសលញ្ចេតិ បាកឋានវសេន.

៥៤. តត្ថ អកុសលំ កាយកម្មំ វចីកម្មំ មនោកម្មញ្ចេតិ កម្មទ្វារវសេន តិវិធំ ហោតិ.

៥៥. កថំ? បាណាតិបាតោ អទិន្នាទានំ កាមេសុមិច្ឆាចារោ ចេតិ កាយវិញ្ញត្តិសង្ខាតេ កាយទ្វារេ ពាហុល្លវុត្តិតោ កាយកម្មំ នាម.

៥៦. មុសាវាទោ បិសុណវាចា ផរុសវាចា សម្ផប្បលាបោ ចេតិ វចីវិញ្ញត្តិសង្ខាតេ វចីទ្វារេ ពាហុល្លវុត្តិតោ វចីកម្មំ នាម.

៥៧. អភិជ្ឈា ព្យាបាទោ មិច្ឆាទិដ្ឋិ ចេតិ អញ្ញត្រាបិ វិញ្ញត្តិយា មនស្មិំយេវ ពាហុល្លវុត្តិតោ មនោកម្មំ នាម.

៥៨. តេសុ បាណាតិបាតោ ផរុសវាចា ព្យាបាទោ ច ទោសមូលេន ជាយន្តិ.

៥៩. កាមេសុមិច្ឆាចារោ អភិជ្ឈា មិច្ឆាទិដ្ឋិ ច លោភមូលេន.

៦០. សេសានិ ចត្តារិបិ ទ្វីហិ មូលេហិ សម្ភវន្តិ.

៦១. ចិត្តុប្បាទវសេន បនេតំ អកុសលំ សព្ពថាបិ ទ្វាទសវិធំ ហោតិ.

៦២. កាមាវចរកុសលម្បិ កាយទ្វារេ បវត្តំ កាយកម្មំ, វចីទ្វារេ បវត្តំ វចីកម្មំ, មនោទ្វារេ បវត្តំ មនោកម្មញ្ចេតិ កម្មទ្វារវសេន តិវិធំ ហោតិ.

៦៣. តថា ទានសីលភាវនាវសេន.

៦៤. ចិត្តុប្បាទវសេន បនេតំ អដ្ឋវិធំ ហោតិ.

៦៥. ទានសីលភាវនាបចាយនវេយ្យាវច្ចបត្តិទានបត្តានុមោទនធម្មស្សវនធម្មទេសនា ទិដ្ឋិជុកម្មវសេន ទសវិធំ ហោតិ.

៦៦. តំ បនេតំ វីសតិវិធម្បិ កាមាវចរកម្មមិច្ចេវ សង្ខំ គច្ឆតិ.

៦៧. រូបាវចរកុសលំ បន មនោកម្មមេវ, តញ្ច ភាវនាមយំ អប្បនាប្បត្តំ, ឈានង្គភេទេន បញ្ចវិធំ ហោតិ.

៦៨. តថា អរូបាវចរកុសលញ្ច មនោកម្មំ, តម្បិ ភាវនាមយំ អប្បនាប្បត្តំ. អារម្មណភេទេន ចតុព្ពិធំ ហោតិ.

៦៩. ឯត្ថាកុសលកម្មមុទ្ធច្ចរហិតំ អបាយភូមិយំ បដិសន្ធិំ ជនេតិ, បវត្តិយំ បន សព្ពម្បិ ទ្វាទសវិធំ សត្តាកុសលបាកានិ សព្ពត្ថាបិ កាមលោកេ រូបលោកេ ច យថារហំ វិបច្ចតិ.

៧០. កាមាវចរកុសលម្បិ កាមសុគតិយមេវ បដិសន្ធិំ ជនេតិ, តថា បវត្តិយញ្ច មហាវិបាកានិ, អហេតុកវិបាកានិ បន អដ្ឋបិ សព្ពត្ថាបិ កាមលោកេ រូបលោកេ ច យថារហំ វិបច្ចតិ.

៧១. តត្ថាបិ តិហេតុកមុក្កដ្ឋំ កុសលំ តិហេតុកំ បដិសន្ធិំ ទត្វា បវត្តេ សោឡស វិបាកានិ វិបច្ចតិ.

៧២. តិហេតុកមោមកំ ទ្វិហេតុកមុក្កដ្ឋញ្ច កុសលំ ទ្វិហេតុកំ បដិសន្ធិំ ទត្វា បវត្តេ តិហេតុករហិតានិ ទ្វាទស វិបាកានិ វិបច្ចតិ.

៧៣. ទ្វិហេតុកមោមកំ បន កុសលំ អហេតុកមេវ បដិសន្ធិំ ទេតិ, បវត្តេ ច អហេតុកវិបាកានេវ វិបច្ចតិ.

៧៤. អសង្ខារំ សសង្ខារ-វិបាកានិ ន បច្ចតិ.

សសង្ខារមសង្ខារ-វិបាកានីតិ កេចន.

តេសំ ទ្វាទស បាកានិ, ទសាដ្ឋ ច យថាក្កមំ;

យថាវុត្តានុសារេន យថាសម្ភវមុទ្ទិសេ.

៧៥. រូបាវចរកុសលំ បន បឋមជ្ឈានំ បរិត្តំ ភាវេត្វា ព្រហ្មបារិសជ្ជេសុ ឧប្បជ្ជតិ.

៧៦. តទេវ មជ្ឈិមំ ភាវេត្វា ព្រហ្មបុរោហិតេសុ.

៧៧. បណីតំ ភាវេត្វា មហាព្រហ្មេសុ.

៧៨. តថា ទុតិយជ្ឈានំ តតិយជ្ឈានញ្ច បរិត្តំ ភាវេត្វា បរិត្តាភេសុ.

៧៩. មជ្ឈិមំ ភាវេត្វា អប្បមាណាភេសុ.

៨០. បណីតំ ភាវេត្វា អាភស្សរេសុ.

៨១. ចតុត្ថជ្ឈានំ បរិត្តំ ភាវេត្វា បរិត្តសុភេសុ.

៨២. មជ្ឈិមំ ភាវេត្វា អប្បមាណសុភេសុ.

៨៣. បណីតំ ភាវេត្វា សុភកិណ្ហេសុ.

៨៤. បញ្ចមជ្ឈានំ ភាវេត្វា វេហប្ផលេសុ.

៨៥. តទេវ សញ្ញាវិរាគំ ភាវេត្វា អសញ្ញសត្តេសុ.

៨៦. អនាគាមិនោ បន សុទ្ធាវាសេសុ ឧប្បជ្ជន្តិ.

៨៧. អរូបាវចរកុសលញ្ច យថាក្កមំ ភាវេត្វា អារុប្បេសុ ឧប្បជ្ជន្តីតិ.

៨៨. ឥត្ថំ មហគ្គតំ បុញ្ញំ, យថាភូមិវវត្ថិតំ.

ជនេតិ សទិសំ បាកំ, បដិសន្ធិបវត្តិយំ.

ឥទមេត្ថ កម្មចតុក្កំ.

ចុតិបដិសន្ធិក្កមោ

៨៩. អាយុក្ខយេន កម្មក្ខយេន ឧភយក្ខយេន ឧបច្ឆេទកកម្មុនា ចេតិ ចតុធា មរណុប្បត្តិ នាម.

៩០. តថា ច មរន្តានំ បន មរណកាលេ យថារហំ អភិមុខីភូតំ ភវន្តរេ បដិសន្ធិជនកំ កម្មំ វា, តំកម្មករណកាលេ រូបាទិកមុបលទ្ធបុព្ពមុបករណភូតញ្ច កម្មនិមិត្តំ វា, អនន្តរមុប្បជ្ជមានភវេ ឧបលភិតព្ពមុបភោគភូតញ្ច គតិនិមិត្តំ វា កម្មពលេន ឆន្នំ ទ្វារានំ អញ្ញតរស្មិំ បច្ចុបដ្ឋាតិ, តតោ បរំ តមេវ តថោបដ្ឋិតំ អារម្មណំ អារព្ភ វិបច្ចមានកកម្មានុរូបំ បរិសុទ្ធំ ឧបក្កិលិដ្ឋំ វា ឧបលភិតព្ពភវានុរូបំ តត្ថោណតំវ ចិត្តសន្តានំ អភិណ្ហំ បវត្តតិ ពាហុល្លេន, តមេវ វា បន ជនកភូតំ កម្មំ អភិនវករណវសេន ទ្វារប្បត្តំ ហោតិ.

៩១. បច្ចាសន្នមរណស្ស តស្ស វីថិចិត្តាវសានេ ភវង្គក្ខយេ វា ចវនវសេន បច្ចុប្បន្នភវបរិយោសានភូតំ ចុតិចិត្តំ ឧប្បជ្ជិត្វា និរុជ្ឈតិ, តស្មិំ និរុទ្ធាវសានេ តស្សានន្តរមេវ តថាគហិតំ អារម្មណំ អារព្ភ សវត្ថុកំ អវត្ថុកមេវ វា យថារហំ អវិជ្ជានុសយបរិក្ខិត្តេន តណ្ហានុសយមូលកេន សង្ខារេន ជនិយមានំ សម្បយុត្តេហិ បរិគ្គយ្ហមានំ សហជាតានមធិដ្ឋានភាវេន បុព្ពង្គមភូតំ ភវន្តរបដិសន្ធានវសេន បដិសន្ធិសង្ខាតំ មានសំ ឧប្បជ្ជមានមេវ បតិដ្ឋាតិ ភវន្តរេ.

៩២. មរណាសន្នវីថិយំ បនេត្ថ មន្ទប្បវត្តានិ បញ្ចេវ ជវនានិ បាដិកង្ខិតព្ពានិ, តស្មា យទិ បច្ចុប្បន្នារម្មណេសុ អាបាថគតេសុ ធរន្តេស្វេវ មរណំ ហោតិ, តទា បដិសន្ធិភវង្គានម្បិ បច្ចុប្បន្នារម្មណតា លព្ភតីតិ កត្វា កាមាវចរបដិសន្ធិយា ឆទ្វារគ្គហិតំ កម្មនិមិត្តំ គតិនិមិត្តញ្ច បច្ចុប្បន្នមតីតារម្មណំ ឧបលព្ភតិ, កម្មំ បន អតីតមេវ, តញ្ច មនោទ្វារគ្គហិតំ, តានិ បន សព្ពានិបិ បរិត្តធម្មភូតានេវារម្មណានិ.

៩៣. រូបាវចរបដិសន្ធិយា បន បញ្ញត្តិភូតំ កម្មនិមិត្តមេវារម្មណំ ហោតិ.

៩៤. តថា អរូបបដិសន្ធិយា ច មហគ្គតភូតំ បញ្ញត្តិភូតញ្ច កម្មនិមិត្តមេវ យថារហមារម្មណំ ហោតិ.

៩៥. អសញ្ញសត្តានំ បន ជីវិតនវកមេវ បដិសន្ធិភាវេន បតិដ្ឋាតិ, តស្មា តេ រូបបដិសន្ធិកា នាម.

៩៦. អរូបា អរូបបដិសន្ធិកា.

៩៧. សេសា រូបារូបបដិសន្ធិកា.

៩៨. អារុប្បចុតិយា ហោន្តិ, ហេដ្ឋិមារុប្បវជ្ជិតា.

បរមារុប្បសន្ធី ច, តថា កាមតិហេតុកា.

រូបាវចរចុតិយា, អហេតុរហិតា សិយុំ;

សព្ពា កាមតិហេតុម្ហា, កាមេស្វេវ បនេតរា.

អយមេត្ថ ចុតិបដិសន្ធិក្កមោ.

៩៩. ឥច្ចេវំ គហិតបដិសន្ធិកានំ បន បដិសន្ធិនិរោធានន្តរតោ បភុតិ តមេវារម្មណមារព្ភ តទេវ ចិត្តំ យាវ ចុតិចិត្តុប្បាទា អសតិ វីថិចិត្តុប្បាទេ ភវស្ស អង្គភាវេន ភវង្គសន្តតិសង្ខាតំ មានសំ អព្ពោច្ឆិន្នំ នទីសោតោ វិយ បវត្តតិ.

១០០. បរិយោសានេ ច ចវនវសេន ចុតិចិត្តំ ហុត្វា និរុជ្ឈតិ.

១០១. តតោ បរញ្ច បដិសន្ធាទយោ រថចក្កមិវ យថាក្កមំ ឯវ បរិវត្តន្តា បវត្តន្តិ.

១០២. បដិសន្ធិភវង្គវីថិយោ, ចុតិចេហ តថា ភវន្តរេ.

បុន សន្ធិ ភវង្គមិច្ចយំ, បរិវត្តតិ ចិត្តសន្តតិ.

បដិសង្ខាយបនេតមទ្ធុវំ, អធិគន្ត្វា បទមច្ចុតំ ពុធា;

សុសមុច្ឆិន្នសិនេហពន្ធនា, សមមេស្សន្តិ ចិរាយ សុព្ពតា.

ឥតិ អភិធម្មត្ថសង្គហេ វីថិមុត្តសង្គហវិភាគោ នាម

បញ្ចមោ បរិច្ឆេទោ.