៧. បឋមរុក្ខសុត្តំ

៥៣៧. ‘‘សេយ្យថាបិ ភិក្ខវេ, យេ កេចិ ជម្ពុទីបកា រុក្ខា, ជម្ពូ តេសំ អគ្គមក្ខាយតិ; ឯវមេវ ខោ ភិក្ខវេ, យេ កេចិ ពោធិបក្ខិយា ធម្មា, បញ្ញិន្ទ្រិយំ តេសំ អគ្គមក្ខាយតិ, យទិទំ – ពោធាយ. កតមេ ច, ភិក្ខវេ, ពោធិបក្ខិយា ធម្មា? សទ្ធិន្ទ្រិយំ, ភិក្ខវេ, ពោធិបក្ខិយោ ធម្មោ, តំ ពោធាយ សំវត្តតិ. វីរិយិន្ទ្រិយំ…បេ… សតិន្ទ្រិយំ…បេ… សមាធិន្ទ្រិយំ…បេ… បញ្ញិន្ទ្រិយំ ពោធិបក្ខិយោ ធម្មោ, តំ ពោធាយ សំវត្តតិ. សេយ្យថាបិ, ភិក្ខវេ, យេ កេចិ ជម្ពុទីបកា រុក្ខា, ជម្ពូ តេសំ អគ្គមក្ខាយតិ; ឯវមេវ ខោ, ភិក្ខវេ, យេ កេចិ ពោធិបក្ខិយា ធម្មា, បញ្ញិន្ទ្រិយំ តេសំ អគ្គមក្ខាយតិ, យទិទំ – ពោធាយា’’តិ. សត្តមំ.