៤. អាសវក្ខយសុត្តំ

៥៣៤. ‘‘បញ្ចិមានិ, ភិក្ខវេ, ឥន្ទ្រិយានិ ភាវិតានិ ពហុលីកតានិ អាសវានំ ខយាយ សំវត្តន្តិ. កតមានិ បញ្ច? សទ្ធិន្ទ្រិយំ…បេ… បញ្ញិន្ទ្រិយំ – ឥមានិ ខោ, ភិក្ខវេ, បញ្ចិន្ទ្រិយានិ ភាវិតានិ ពហុលីកតានិ អាសវានំ ខយាយ សំវត្តន្តី’’តិ.

‘‘បញ្ចិមានិ, ភិក្ខវេ, ឥន្ទ្រិយានិ ភាវិតានិ ពហុលីកតានិ សំយោជនប្បហានាយ សំវត្តន្តិ, អនុសយសមុគ្ឃាតាយ សំវត្តន្តិ, អទ្ធានបរិញ្ញាយ សំវត្តន្តិ, អាសវានំ ខយាយ សំវត្តន្តិ. កតមានិ បញ្ច? សទ្ធិន្ទ្រិយំ…បេ… បញ្ញិន្ទ្រិយំ – ឥមានិ ខោ, ភិក្ខវេ, បញ្ចិន្ទ្រិយានិ ភាវិតានិ ពហុលីកតានិ សំយោជនប្បហានាយ សំវត្តន្តិ, អនុសយសមុគ្ឃាតាយ សំវត្តន្តិ, អទ្ធានបរិញ្ញាយ សំវត្តន្តិ, អាសវានំ ខយាយ សំវត្តន្តី’’តិ. ចតុត្ថំ.