១០. ចតុត្ថរុក្ខសុត្តំ

៥៤០. ‘‘សេយ្យថាបិ, ភិក្ខវេ, យេ កេចិ សុបណ្ណានំ រុក្ខា, កូដសិម្ពលី [កោដសិម្ពលិ (ស្យា. កំ.)] តេសំ អគ្គមក្ខាយតិ; ឯវមេវ ខោ, ភិក្ខវេ, យេ កេចិ ពោធិបក្ខិយា ធម្មា, បញ្ញិន្ទ្រិយំ តេសំ អគ្គមក្ខាយតិ, យទិទំ – ពោធាយ. កតមេ ច, ភិក្ខវេ, ពោធិបក្ខិយា ធម្មា? សទ្ធិន្ទ្រិយំ, ភិក្ខវេ, ពោធិបក្ខិយោ ធម្មោ, តំ ពោធាយ សំវត្តតិ…បេ… បញ្ញិន្ទ្រិយំ ពោធិបក្ខិយោ ធម្មោ, តំ ពោធាយ សំវត្តតិ. សេយ្យថាបិ, ភិក្ខវេ, យេ កេចិ សុបណ្ណានំ រុក្ខា, កូដសិម្ពលី តេសំ អគ្គមក្ខាយតិ; ឯវមេវ ខោ, ភិក្ខវេ, យេ កេចិ ពោធិបក្ខិយា ធម្មា, បញ្ញិន្ទ្រិយំ តេសំ អគ្គមក្ខាយតិ, យទិទំ – ពោធាយា’’តិ. ទសមំ.

ពោធិបក្ខិយវគ្គោ សត្តមោ.

តស្សុទ្ទានំ –

សំយោជនា អនុសយា, បរិញ្ញា អាសវក្ខយា;

ទ្វេ ផលា ចតុរោ រុក្ខា, វគ្គោ តេន បវុច្ចតីតិ.